Gọ Jihova, Orọnọ Setan He

Ẹsa ọrọ kẹ omai kpobi. Jọ Jihova ma rẹ gọ hayo Setan avọ idhivẹri riẹ. Ma rẹ sai ru ivẹ na ha. Ẹvẹ u wo areghẹ te re ma gọ Jihova!

Jihova O Re Ziezi

Wọhọ epanọ ma ruẹ, idhivẹri na e rẹ ghọghọ nọ a tẹ be nwa ahwo oma jẹ be via ae họ. Jihova ọ rọ ere he. O wo uyoyou kẹ ahwo epanọ ọsẹ o re you emọ riẹ. Ọye họ Ọkokẹ “oware uwoma avọ okẹ nọ ogbakiete kpobi.” (Jemis 1:17) O re si oware uwoma ovo no họ ohwo akpọ họ, o tẹ make rọ nọ o rọ araha ruaro mi ei dede.—Ahwo Ẹfisọs 2:4-7.

Jesu o dhesẹ uyoyou nọ o wo kẹ ahwo via, o siwi enọ i tuaro, enọ i dienu, ọ tẹ jẹ kpare enọ i whu no ziọ uzuazọ — Jesu, Ọmọ Ọghẹnẹ, o dhesẹ uyoyou kẹ ahwo ẹkwoma eyao rai nọ o siwi

Roro kpahe eware nọ Ọmọ Ọghẹnẹ, Jesu o ru eva otọakpọ. O ru enọ idienu tẹme o te je ru ituaro ruẹ ude. O siwi emoti gbe ahwo nọ ako. O le izi imuomu no je siwi oghẹrẹ eyao kpobi. Fikiọ ogaga Ọghẹnẹ, Jesu, ọ kpare enọ i whu no ze uzuazọ dede.—Matiu 9:32-35; 15:30, 31; Luk 7:11-15.

Ukpenọ ọ ta erue ro su omai thọ, kọ uzẹme Ọghẹnẹ ọ rẹ ta ẹsikpobi. Ọ rẹ viẹ ohwo ọvo họ vievie he.—Ikelakele 23:19.

Whaha Iruemu Igbegbe

Nwanọ epanọ ẹriri amarao aruẹ ọ rẹ gba onyẹ gaga, ere ogbẹrọwọ gbe ọruọta o gba ima ahwo buobu gaga. A rẹ dhozọ iwhuowhu na. A rẹ dhozọ idhivẹri na. A rẹ ro awa fikiọ egie, eware-oka, enua, gbe ẹbo. A rehọ fikiọ erue Setan Ẹdhọ na gba oma rai ifi ọ ogbẹrọwọ gbe iruemu anwae. Eware enana evo nọ erọ egbefẹ kẹ idibo Ọghẹnẹ e riẹ hẹ.

Ogaga Jihova u vi orọ Setan thethabọ. Otẹrọnọ whọ gọ Jihova, ọ rẹ te thọ owhẹ n’obọ idhivẹri na. (Jemis 4:7) Enua i re ti ru owhẹ oware ovo ho. Re ojọ oriruo, eva Nigeria, ebo egaga esa jọ nọ i wo eda a vi enua bru Osẹri Jihova nọ ọ se nnọ o re no ẹwho ho. Nọ enua na i ru iruo ho, ozọ u te mu omọvo ebo esa na jọ, koyehọ ọ nya bru Osẹri na, ọ tẹ lẹ kẹ ohrọoriọ.

Otẹrọnọ idhivẹri na i kpokpo owhẹ, se odẹ Jihova, ọ rẹ te thọ owhẹ. (Itẹ 18:10) Rekọ re who te wo ukeothọ Ọghẹnẹ, kọ who re sioma no abọ owo kugbe iruẹru-imizi gbe egagọ idhivẹri riẹriẹriẹ. Ere eg’Ọghẹnẹ oke anwae obọ Ẹfẹsọs a ru. Nọ a kua ebe emajiki rai koko a tẹ mahe ae. (Iruẹru Ikọ 19:19, 20) Idibo Ọghẹnẹ inẹnẹ a re ru ere hrọ. Sioma no ekwakwa-ẹbo, idibẹ, ifiare “ekpọfia,” ẹbo, ebe erayẹ, gbe eware efa kpobi nọ i wo abọ kugbe iruẹru-imizi.

Wuhrẹ Egagọ Uzẹme

Whọ tẹ gwọlọ ru Ọghẹnẹ eva were, oma u sino egagọ ọrue gbe eware iyoma e sebaeruo ọvo i te he. Who re kru oma ga wuhrẹ emamọ egagọ hrọ. Ebaibol na i dhesẹ onọ a gwọlọ:

Egagọ uzẹme i kugbe iwuhrẹ Ileleikristi nọ who re kpohọ gbe Ebaibol na nọ who re se — Kpohọ iwuhrẹ Ileleikristi.—Ahwo Hibru 10:24, 25

Wuhrẹ Ebaibol na.—Jọn 17:3

Egagọ uzẹme i kugbe usiuwoma nọ whọ rẹ ta kẹ amọfa, olẹ nọ whọ rẹ lẹ se Jihova, whọ vẹ jẹ họ-ame — Ta usiwoma kẹ amọfa.—Matiu 24:14

Lẹ se Jihova.—Ahwo Filipai 4:6, 7

Họ ame.—Iruẹru Ikọ 2:41

Kuomagbe Isẹri ọ Jihova

Setan avọ idhivẹri na a wo ahwo eva otọakpọ nọ i bi wuhrẹ je bi ru eware e thọthọ. Rekọ Jihova o wo ahwo re. A ye họ Isẹri ọ Jihova. (Aizaya 43:10) Wariẹ akpọ na họ, Isẹri ọ Jihova a bu viọ ima ezeza. Ai kpobi a be daoma re a ru eware ezi je wuhrẹ ahwo uzẹme na. Eva etọ nọ emai bu, whọ rẹ sai nya ku ai eva Ọgwa Uvie rai na, oria nọ a je ti dede o whẹ rehọ sasasa.

Iruo rai họ re a fiobọhọ kẹ amọfa gọ Ọghẹnẹ. A re ti wuhrẹ Ebaibol na kugbe owhẹ eva uwou ra, fiobọhọ k’owhẹ oghẹrẹ nọ whọ rẹ rọ gọ Jihova eva uvi edhere. Whọ rẹ hwa osa fihọ onana ha. Eva e rẹ were Isẹri na re a wuhrẹ uzẹme na keme a you ahwo a te je you Jihova Ọghẹnẹ.

Isẹri Jihova nọ i bi dede ahwo rehọ evaọ Ọgwa Uvie, Isẹri Jihova nọ i bi wuhrẹ Ebaibol kugbe ohwo — Isẹri ọ Jihova a re ti fiobọhọ k’owhẹ gọ Ọghẹnẹ