“O Sae jọ Uzẹme He!”

ỌZAE jọ evaọ obọ New York (U.S.A.) o gbiku nọ: “Ọmọzae mẹ Jonathan o je weze bru egbẹnyusu jọ emaele kakao no oria mai.

Aye mẹ, Valentina, ọ gwọlọ nọ ọ nya ha. Edhadhẹ imoto i re mu ei ozọ ẹsikpobi. Rekọ iruẹru eware ikporakporo e rẹ were ọmọzae riẹ, yọ egbẹnyusu riẹ a wo uwou iruo rai evaọ oria nọ ọ sae jọ wuhrẹ. Mẹ jọ uwou ẹdẹjọ evaọ abọ ukiediwo-ọre Manhattan, New York. Aye mẹ o weze bru imoni riẹ evaọ obọ Puerto Rico. ‘Jonathan o ti zihe tha obọnana,’ ere me roro. Oke onana ẹgogo ẹthẹ na o te kporo. ‘Ababọ avro ọye.’ Ọye he. Iporisi avọ ahwo nọ e rẹ rẹro te ahwo nọ enwoma-idudhe. ‘Kọ who vuhu elasisi edraiva ọnana?’ ere ọga iporisi na ọ nọ. ‘Ẹhẹ, ọrọ ọmọzae mẹ, Jonathan.’ ‘Ma wo usi uyoma jọ k’owhẹ. Asidẹnte jọ ọ via, yọ . . . ọmọzae ra, . . . ọmọzae ra o whu no.’ Ẹme ọsosuọ nọ mẹ ta họ, ‘O sae jọ uzẹme he!’ Eguegue ọyena o te rovie ola jọ fihọ idu mai nọ u gbe bi kpo, dede nọ ikpe buobu e vrẹ no.”

Ọsẹ jọ evaọ obọ Barcelona (Spain) o kere nọ: “Eva etoke ikpe 1960 evaọ obọ Spain, ma jọ uviuwou evawere. María, aye mẹ, ọ jariẹ, jegbe emọ esa mai, David, Paquito, gbe Isabel, nọ ikpe rai ọvuọvo e jọ 13, 11, gbe 9.

“Ẹdẹjọ eva Asa 1963, Paquito o te no isukulu ze avọ ubo uzou nọ ọ ta nọ o be tehe iẹe gaga. U gbe omai unu oware nọ o sae suọ oghẹrẹ uzou-otehe oyena ze—rekọ u kri ma tẹ riẹ hẹ. Nọ euwa esa e vrẹ no o te whu. Asidẹnte jọ nọ o te ẹvori riẹ o kpe rie no.

“O vrẹ ikpe 30 no anwo nọ Paquito o ro whu. Omake rọ ere, edada ologbo uwhu oyena o gbẹ r’omai oma rii te ẹdẹ inẹnẹ na. Oghẹrẹ ovo o riẹ hẹ nọ ọmọ o je whu kuọ eyewọ nọ a gbe roro nọ a jọ oma rai ku oware jọ fiẹ ha—oghẹrẹ nọ o maki kri te kẹha, hayo unu emọ efa nọ a wo dede.”

Eware ivẹ enana nọ e via nọ emọ i je whu ku eyewọ na, u dhesẹ epanọ ola na u re kodo jẹ tọ te nọ ọmọ o te whu. Ẹvẹ eme ọbo-imu jọ e gba te ọnọ ọ ta nọ: “Uwhu ọmọ o rẹ mae wha uweri tha je guegue ohwo viọ uwhu ọkpako keme ọmaha họ ohwo urere nọ a re rẹro nọ o ti whu whremu eva uviuwou na. . . . Uwhu ọmọ kpobi u dhesẹ uvru ẹruore ewezẹ obaro, okugbe [ọmọzae, aye-ọmọ, emọ-iruọmọ], eware . . . nọ a te reawere rai ha.” Yọ eroro kpahe uwhu onana didi o sai kpoma họ aye re ọnọ ọmọ o whu ku ẹkwoma eva nọ i no rie.

Aye uwou-orọo jọ nọ ohwo o whu ku ọ ta vevẹ nọ: “Ọzae mẹ, Russell, o je ruiruo obufihọ eva eria imu eva oria ẹmo obọ Pacific eva etoke Ẹmo Akpọ II. Ọ rehọ ẹro ruẹ jẹ zọ no ehọre iyoma jọ no. O te zihe ze obọ United States je ti mu uzuazọ omofọwẹ họ ẹria. Uwhremu na, o te je ru iruo wọhọ ọgbaodibo Ẹme Ọghẹnẹ. Nọ ọ nwane vrẹ ikpe 60 no o te mu oka ẹbẹbẹ udu họ ẹruẹ. Ọ daoma re ọ rria uzuazọ ojaja. Kẹsena, ẹdẹjọ eva Ẹhrẹ 1988, ọ tẹ ruẹ uye ẹyao udu ọgaga jọ, o te whu. Ọraha ologbo uwhu riẹ ọ wha ze. Mẹ sai tube yere iei nọ kodẹ dede he. Orọnikọ ọzae mẹ gheghe ọ jọ họ. Emamọ ogbẹnyusu mẹ ọjọ. Ikpe 40 ma rria uzuazọ kugbe. Enẹna o tẹ wọhọ nọ ọkora ologbo mẹ te rẹriẹ ova ku na.”

Enana yọ ebẹbẹ ekakao eva udevie idu buobu rai nọ e be tehe iviuwou eva akpọ na soso kẹdẹ kẹdẹ. Wọhọ epanọ ahwo buobu nọ i bi weri a rẹ ta k’owhẹ, okenọ ọmọ ra, ọzae ra, aye ra, ọsẹ hayo oni ra, ogbẹnyusu ra o te whu, ghinọ uzẹme nọ oware nọ Pọl okere Oleleikristi na o se rie, “ọwegrẹ urere.” Ẹsibuobu oghẹrẹ owọ nọ ohwo ọ rẹ kake jẹ kpahe usi ugbunu otiọye na họ avro, “O sae jọ uzẹme he! U muomẹ ẹro ho.” Eghẹrẹ owojẹ efa i re je lele iei, wọhọ epanọ ma te ruẹ na.—1 Ahwo Kọrint 15:25, 26.

Rekọ, taure ma te ti roro kpahe iroro uweri, joma kẹ iyo enọ obọdẹ jọ. Kọ u dhesẹ nọ uwhu họ ekuhọ ohwo ọyena? Kọ ẹruore jọ ọ riẹ nnọ ma te wariẹ ruẹ iyoyou mai?

Ẹruore Uzẹme jọ Ọ Riẹ

Pọl okere Ebaibol na ọ kẹ ẹruore ufuoma ro no uwhu, “ọwegrẹ urere” ọyena. O kere nọ: “Ọ rẹ te raha [uwhu no, NW ].” “Ọ te raha ọwegrẹ urere na no eva uwhu.” (1 Ahwo Kọrint 15:26; The New English Bible) Fikieme o jẹ nwani mu Pọl ẹro tere? Keme Jesu Kristi ọnọ a kpare no uwhu ze o wuhrẹ i rie. (Iruẹru 9:3-19) Fikioye re, Pọl ọ jẹ sai kere nọ: “Epanọ ohwo [Adam] ọ wha uwhu ze eva akpọ na, ere ohwo [Jesu Kristi] ọ wha ẹkparomatha no iwhuowhu ze i re. Keme epanọ ahwo kpobi a whu fiki Adam na, ere a je ti ru ahwo kpobi wo uzuazọ fiki Kristi.”—1 Ahwo Kọrint 15:21, 22.

O da Jesu gaga nọ o zere ayeuku obọ Nein jẹ ruẹ ọmọzae riẹ nọ o whu. Ikere Ebaibol na e ta k’omai nọ: “Whaọ nọ [Jesu] ọ kẹle unu okpẹwho [Nein] na no, koyehọ, a be wha ọ jọ nọ o whu vrẹ ọye ọvo họ ọmọzae oni riẹ, ọ tẹ rọ aye uku; ahwo okpẹwho na buobu a lele i rie. Olori na nọ ọ rue riẹ, ohrọ riẹ o tẹ riẹ e, ọ tẹ ta kẹ e nọ, ‘Whọ viẹ hẹ.’ Ọ tẹ nyaze kẹle rọ obọ te owha na, ewha-owha i te dikihẹ ẹta ọvo. Ọ tẹ ta nọ, ‘Ẹghele mẹ ta kẹ owhẹ nọ, Kparoma.’ Ọ nọ o whu na ọ tẹ keria, o te mu ẹme họ ẹta. Ọ tẹ rehọ iẹ kẹ oni riẹ. Ozọ u te zi mu ai kpobi; a te jiri Ọghẹnẹ, nọ, ‘Ọruẹaro ologbo jọ o no udevie mai ze!’ ‘Ọghẹnẹ [ọ rẹriẹ aro ti kuọ ahwo riẹ no, NW ].’ ” Muẹrohọ oghẹrẹ nọ ohrọ o re Jesu te, te epanọ ọ rọ kpare ọmọzae ayeuku na! Dai roro oware nọ oyena u dhesẹ kpahe obaro!—Luk 7:12-16.

Etẹ, eva iraro ahwo, Jesu o je ru ẹkparomatha nọ o rẹ thọrọ ẹro ha. Oyena yọ emedhesẹ gheghe ọrọ ẹkparomatha nọ ọ kake ruẹaro riẹ no vẹre taure o te ti ru onana, ẹkparomatha ziọ uzuazọ otọakpọ eva otọ “odhiwu ọkpokpọ.” Eva okeoye Jesu ọ jẹ ta nọ: “Onana u gbe owhai enu hu; keme oke o be tha nọ enọ e rọ eva iki kpobi i je ti yo urru riẹ, a vẹ te nya via.”—Eviavia 21:1, 3, 4; Jọn 5:28, 29; 2 Pita 3:13.

Amọfa jọ nọ e rehọ ẹro ruẹ ẹkparomatha họ Pita, jegbe efa jọ 12 na nọ e jọ usu kugbe Jesu nọ o je kperẹ. A ghine yo kpahe ẹkparomatha nọ Jesu ọ fodẹ na eva akotọ Abade Galili. Ikere na e ta k’omai nọ: “Jesu ọ tẹ ta kẹ ae nọ, ‘Wha ti furie ohọwo rai.’ Ilele na ọvuọvo ọ sae wiwi nọe nọ, ‘Whẹ ono ho?’ A riẹ no nọ Ọnowo na. Jesu ọ nyaze ọ tẹ rehọ ebrẹdi na ọ tẹ rehọ kẹ ae, eri ere re. Whaọ onana họ o rọ avọ esa nọ Jesu ọ rehọ oma via kẹ ilele riẹ nọ ọ kparoma nọ iwhuowhu no.”—Jọn 21:12-14.

Fikiere, Pita ọ tẹ sai kere avọ imuẹro nọ: “Oghale u te Ọghẹnẹ na gbe Ọsẹ Ọnowo mai Jesu Kristi; fiki ohrọ ulogbo riẹ a rọ wariẹ omai yẹ zihe ruọ ọkpokpọ, e ruọ ẹruore ebẹdẹ fiki ẹkparomatha Jesu Kristi no iwhuowhu.”—1 Pita 1:3.

Pọl ukọ na o dhesẹ evafihọ ẹruore riẹ nọ ọ ta nọ: “[Mẹ] rọwo eware kpobi wọhọ epanọ e rọ evaọ uzi na, jegbe enọ a kere họ evaọ eruẹaro na, me wo ẹruore kpahe Ọghẹnẹ wọhọ ọ nọ enana omarai a rọwo na re, inọ ẹkparomatha enọ ikiete avọ enọ ikiete he e rẹ te jarọ.”—Iruẹru 24:14, 15.

Fikiere ima buobu a sai wo uvi ẹruore ọ ẹwariẹ ruẹ enọ a you eva uzuazọ otọakpọ, rekọ eva otọ iyero sa. Ẹvẹ iyero eyena e rẹ te jọ? Eme efa kpahe ẹruore Ebaibol kẹ iyoyou mai nọ ma kufiẹ no a te wariẹ ai ta eva abọ urere omobe onana, nọ uzoẹme riẹ o ta nọ “Ẹruore Imuẹro kẹ Iwhuowhu Na.”

Rekọ jo ma kake t’ẹme kpahe enọ nọ whọ sae nọ otẹrọnọ who bi weri uwhu ohwo nọ who you: Kọ u fo re a weri enẹ? Ẹvẹ mẹ sae rọ rria kugbe uweri mẹ? Eme amọfa a sai ru re a fiobọhọ k’omẹ thihakọ? Ẹvẹ mẹ sai ro fiobọhọ kẹ amọfa nọ i bi weri? Yọ maero, Eme Ebaibol na e ta kpahe ẹruore imuẹro rọ kẹ iwhuowhu na? Kọ mẹ te wariẹ ruẹ iyoyou mẹ? Eva ibovẹ?

Enọ nọ A re Roro Kpahe

Eme u no otọ ze nọ ohwo o re ru kpahe uwhu oyoyou?

Eme Jesu o ru kẹ ayeuku obọ Nein?

Didi ẹruore kpahe iwhuowhu na Jesu ọ kẹ?

Fikieme u je mu Pita avọ Pọl ẹro ga tere inọ ẹkparomatha ọ rẹ te jọ?

Didi enọ e gwọlọ iyo?

[Ẹme nọ a fi ẹgba họ nọ ọ rrọ ẹwẹ-obe avọ 4]

‘Ma wo usi uyoma jọ k’owhẹ. Asidẹnte jọ ọ via, yọ . . . ọmọzae ra, . . . ọmọzae ra o whu no.’