Uwuhrẹ 2
Ono Họ Ọghẹnẹ?
Ono họ Ọghẹnẹ uzẹme na, kọ eme họ odẹ riẹ? (1, 2)
Oghẹrẹ ugboma ovẹ o wo? (3)
Eme họ ekwakwa-ilogbo riẹ? (4)
Kọ ma sai fi emema gbe iwoho họ iruo evaọ egagọ mai nọ ma be rọ gọe? (5)
Idhere ivẹ e vẹ ma sai ro wuhrẹ kpahe Ọghẹnẹ? (6)
1. Ahwo a be gọ eware buobu. Rekọ Ebaibol na ọ ta k’omai inọ Ọghẹnẹ UZẸME ọvuọvo ọ rọ. Ọye ọ ma eware kpobi nọ erọ odhiwu gbe otọakpọ. Fikinọ ọye ọ k’omai uzuazọ, ọye ọvo họ Ọnọ ma rẹ gọ.—1 Ahwo Kọrint 8:5, 6; Eviavia 4:11.
2. Ọghẹnẹ o wo edẹ-ova buobu rekọ o wo odẹ ọvo. Odẹ oyena họ JIHOVA. Evaọ Ebaibol buobu, a si odẹ Ọghẹnẹ no ae no a te fi edẹ-ova ỌNOWO hayo ỌGHẸNẸ họ ẹta rai. Rekọ okenọ a kere Ebaibol na, odẹ na Jihova ọ via asia 7,000 evaọ eva riẹ!—Ọnyano 3:15; Olezi 83:18.
3. Jihova o wo ugboma, rekọ o wọhọ omai hi. ‘Ọghẹnẹ yọ Ẹzi,’ ere Ebaibol na ọ ta. (Jọn 4:24) Ẹzi yọ oghẹrẹ uzuazọ nọ u kpehru gaga vi ọmai. Ohwo-akpọ ọvo ọ re ruẹ Ọghẹnẹ hẹ. Jihova ọ be rria ob’odhiwu, rekọ ọ rẹ sae ruẹ eware kpobi. (Olezi 11:4, 5; Jọn 1:18) Kọ eme họ ẹzi ọfuafo na? Orọnikọ ohwo wọhọ Ọghẹnẹ hẹ. Ikpoye, ogaga iruo Ọghẹnẹ ọ rọ.—Olezi 104:30.
4. Ebaibol na o rovie uruemu-oma Jihova via k’omai. U dhesẹ inọ ekwakwa ilogbo riẹ họ uyoyou, ẹdhoguo-okiẹrẹe, areghẹ, gbe ogaga. (Iziewariẹ 32:4; Job 12:13; Aizaya 40:26; 1 Jọn 4:8) Ebaibol na ọ ta k’omai inọ ọ vọ avọ ohrọ, ẹwo, erọvrẹ, ọghọ, gbe odiri. Mai, wọhọ emọ ẹmeoyo, ma rẹ daoma re ma raro keliei.—Ahwo Ẹfẹsọs 5:1, 2.
5. Kọ ma sai g’uzou kpotọ hayo lẹ kẹ emema, iwoho, hayo eka evaọ egagọ mai? Ijo! (Ọnyano 20:4, 5) Jihova ọ ta inọ ọye ọvo ma rẹ gọ hrọ. Ọ rẹ ghale orro riẹ kugbe ohwo ọvo ho hayo oware ofa ha. Emema i wo ogaga nọ i re ro fiobọhọ k’omai hi.—Olezi 115:4-8; Aizaya 42:8.
6. Ẹvẹ ma sae rọ riẹ Ọghẹnẹ viere? Edhere jọ họ ẹro o muhọ eware nọ ọ ma je roro didi kpahe eware nọ emama na e be ta k’omai. Emama Ọghẹnẹ i dhesẹ k’omai nọ o wo ogaga ulogbo gbe areghẹ. Ma ruẹ uyoyou riẹ evaọ eware kpobi nọ o ru no. (Olezi 19:1-6; Ahwo Rom 1:20) Edhere ọfa nọ ma sai ro wuhrẹ kpahe Ọghẹnẹ họ ẹkwoma ewuhrẹ Ebaibol na. Evaọ etẹe ọ jẹ vuẹ omai eware buobu kpahe oghẹrẹ Ọghẹnẹ nọ ọ rọ. Ọ tẹ jẹ ta k’omai kpahe ẹjiroro riẹ gbe oware nọ ọ gwọlọ nọ ma ru.—Emọs 3:7; 2 Timoti 3:16, 17.
[Pictures on page 5]
Ma wuhrẹ kpahe Ọghẹnẹ no emama gbe Ebaibol na ze