Uwuhrẹ 8
Uzuazọ Uviuwou nọ O rẹ Were Ọghẹnẹ
Eme họ ọkwa ọzae evaọ uviuwou na? (1)
Ẹvẹ ọzae o re ru aye riẹ? (2)
Didi owha-iruo ọsẹ o wo? (3)
Eme họ ẹkẹ-abọ aye evaọ uviuwou na? (4)
Eme Jihova ọ gwọlọ mi eyewọ gbe emọ? (5)
Eme họ eriwo Ebaibol kpahe ẹhẹriẹ gbe orọo-ofa? (6, 7)
1. Ebaibol na ọ ta nọ ọzae họ ọnọ o wuzou uviuwou riẹ. (1 Ahwo Kọrint 11:3) Ọzae o re ghine wo aye ọvo. A rẹ ruọ orọo ziezi lele uzi na.—1 Timoti 3:2; Taitọs 3:1.
2. Ọzae o re you aye riẹ wọhọ epanọ o you omobọ riẹ. O re ru ei wọhọ epanọ Jesu o ru ilele riẹ. (Ahwo Ẹfẹsọs 5:25, 28, 29) Ọ rẹ tehe aye riẹ hayo lahiẹe evaọ oghẹrẹ ovo vievie he. Ikpoye, o re dhesẹ adhẹẹ gbe ọghọ kẹe.—Ahwo Kọlọsi 3:19; 1 Pita 3:7.
3. Ọsẹ o re ruiruo gaga re ọ sẹro uviuwou riẹ. Ọ rẹ gwọlọ emuore, emuẹgọ, gbe uwou kẹ aye gbe emọ riẹ. Ọsẹ ọ rẹ jẹ rehọ ẹgwọlọ ẹzi kuọ uviuwou riẹ. (1 Timoti 5:8) Ọ rẹ k’obaro evaọ obufihọ kẹ uviuwou riẹ re a wuhrẹ kpahe Ọghẹnẹ gbe ẹjiroro Riẹ.—Iziewariẹ 6:4-9; Ahwo Ẹfẹsọs 6:4.
4. Aye ọ rẹ jọ omamọ ofiobọhọ kẹ ọzae riẹ. (Emuhọ 2:18) Ọ rẹ thọ ọzae riẹ uke evaọ ewuhrẹ gbe ọkpọvio emọ rai. (Itẹ 1:8) Jihova ọ gwọlọ mi aye re ọ rehọ uyoyou sẹro uviuwou riẹ. (Itẹ 31:10, 15, 26, 27; Taitọs 2:4, 5) O re wo adhẹẹ odidi kẹ ọzae riẹ.—Ahwo Ẹfẹsọs 5:22, 23, 33.
5. Ọghẹnẹ ọ gwọlọ nọ emọ a yoẹme kẹ ọsẹ gbe oni rai. (Ahwo Ẹfẹsọs 6:1-3) Ọ gwọlọ nọ esẹ gbe ini a kẹ emọ rai uthubro gbe ọkpọvio. O gwọlọ nọ esẹ gbe ini a rẹ raha oke ro wuhrẹ Ebaibol kugbe emọ rai, rẹro te ẹgwọlọ ẹzi gbe omosasọ rai. (Iziewariẹ 11:18, 19; Itẹ 22:6, 15) Esẹ gbe ini a rẹ rehọ ofu hayo eva egaga whọku emọ rai oke ovo ho.—Ahwo Kọlọsi 3:21.
6. Okenọ erivẹ-orọo a te wo ebẹbẹ eyeri kugbe ohwohwo, a rẹ daoma re a fi ehrẹ Ebaibol họ iruo. Ebaibol ọ hrẹ omai nọ ma dhesẹ uyoyou je wo erọvrẹ. (Ahwo Kọlọsi 3:12-14) Ẹme Ọghẹnẹ ọ tuduhọ ẹhẹriẹ wọhọ edhere nọ a re ro ku ebẹbẹ esese họ họ. Rekọ aye ọ rẹ sae sa inọ ọ rẹ nyase ọzae riẹe ba otẹrọnọ (1) ọzae riẹe ọ se thahethahe inọ o re fiobọhọ kẹ uviuwou riẹ hẹ, (2) ọzae riẹ o te wo ofu ọgaga te epanọ uzuazọ gbe omosasọ aye na o jẹ rọ enwoma, hayo (3) omukpahọ ọgaga ọzae riẹe u ru riei nọ aye na ọ gbẹ sae gọ Jihova ha.—1 Ahwo Kọrint 7:12, 13.
7. Erivẹ orọo a re ghine fievahọ ohwohwo. Ẹnwae-obro yọ uzioraha mukpahe Ọghẹnẹ gbe ọrivẹ ohwo. (Ahwo Hibru 13:4) Ẹnwae-obro kugbe omọfa nọ ọ rọ ọrọo na ha ọvo họ udu Ikereakere na kẹ orọ-ofa nọ o rẹ kuvẹ ẹwariẹ rọo. (Matiu 19:6-9; Ahwo Rom 7:2, 3) Jihova o mukpahiẹe okenọ ahwo a tẹ be fa orọo ababọ oware nọ Ikereakere na e ta a vẹ nyae rọo omọfa.—Malakae 2:14-16.
[Pictures on page 16, 17]
Ọghẹnẹ ọ gwọlọ nọ ọsẹ gbe oni a kẹ emọ rai ehrẹ gbe ọkpọvio
[Picture on page 17]
Ọsẹ oyoyou ọ rẹ rehọ eware iwo gbe ẹzi kuọ uviuwou riẹ