Uwuhrẹ 13

Ẹvẹ Whọ Sai ro Duku Egagọ Uzẹme Na?

Kọ egagọ kpobi e rẹ were Ọghẹnẹ, manikọ ọvuọvo? (1)

Fikieme egagọ buobu e jẹ riẹ nọ i bi se oma rai Ileleikristi? (2)

Ẹvẹ whọ sai ro vuhu Ileleikristi uzẹme? (3-7)

1. Jesu o mu egagọ Ileleikristi uzẹme ọvuọvo họ. Fikiere nẹnẹ, ugboma, hayo ukoko ọvuọvo ọ rẹ jariẹ, ọrọ enọ e be rọ uzẹme gọ Jihova Ọghẹnẹ. (Jọn 4:23, 24; Ahwo Ẹfẹsọs 4:4, 5) Ebaibol o wuhrẹ nọ umutho ahwo ọvo a rọ unu ohwahwa nọ u bi su kpohọ uzuazọ na.—Matiu 7:13, 14.

2. Ebaibol na ọ ruẹaro inọ okenọ ikọ na a te whu no, iwuhrẹ ethọthọ gbe iruemu nọ i fo Oleleikristi hi e te rehọ ẹmẹrera nyaruọ ukoko Ileleikristi na. A ve ti si ahwo nọ erọwo lele oma rai ukpenọ a lele Kristi. (Matiu 7:15, 21-23; Iruẹru 20:29, 30) Oyejabọ nọ ma jẹ be ruẹ oghoghẹrẹ egagọ buobu nọ i bi se oma rai Ileleikristi na. Ẹvẹ ma sai ro vuhu Ileleikristi uzẹme?

3. Oka ulogbo ọrọ Ileleikristi uzẹme họ re a wo uvi uyoyou evaọ udevie rai. (Jọn 13:34, 35) A wuhrẹ i rai re a roro nọ a woma vi amọfa nọ ovioma hayo ohọoma rai u wo ohẹriẹ no ọ rai hi. Hayo kọ a wuhrẹ i rai nọ a re mukpahe amọfa nọ i no erẹwho efa ze he. (Iruẹru 10:34, 35) Fikiere a wo obọ evaọ emo ho. Ileleikristi uzẹme a re ru ohwohwo wọhọ inievo emezae gbe emetẹ.—1 Jọn 4:20, 21.

4. Oka egagọ uzẹme ọfa họ enọ e rọ ahwo rai a wo adhẹẹ odidi kẹ Ebaibol na. A rehe riẹ wọhọ Ẹme Ọghẹnẹ a tẹ jẹ rọwo oware nọ ọ ta. (Jọn 17:17; 2 Timoti 3:16, 17) A ru Ẹme Ọghẹnẹ wọhọ onọ u wuzou vi iroro hayo iruemu ohwo-akpọ. (Matiu 15:1-3, 7-9) A rẹ daoma rehọ Ebaibol na rria evaọ uzuazọ ikẹdẹ kẹdẹ rai. Fikiere a rẹ ta oware ovo jọ no a ve ru ofa ha.—Taitọs 1:15, 16.

5. Egagọ uzẹme a rẹ kẹ odẹ Ọghẹnẹ ọghọ re. (Matiu 6:9) Jesu o ru odẹ Ọghẹnẹ, Jihova, via kẹ amọfa. Ileleikristi uzẹme a re ru epọvo na hrọ. (Jọn 17:6, 26; Ahwo Rom 10:13, 14) Amono a rọ okegbe ra nọ a be ta kpahe odẹ Ọghẹnẹ kẹ amọfa?

6. Ileleikristi uzẹme a rẹ ta usiuwoma kpahe Uvie Ọghẹnẹ. Erei Jesu o ru. Ẹsikpobi ọ jẹ hẹ t’ẹme kpahe Uvie na. (Luk 8:1) Ọ kẹ ilele riẹ ujaje re a whowho ovuẹ ovo onana evaọ otọakpọ na kpobi. (Matiu 24:14; 28:19, 20) Ileleikristi uzẹme a rọwo nọ Uvie Ọghẹnẹ ọvo ọ te wha udhedhẹ gbe omofọwẹ ze otọakpọ ọnana.—Olezi 146:3-5.

7. Ilele Jesu a rẹ jọ abọ akpọ omuomu ọnana ha. (Jọn 17:16) A re duoma họ iruẹru esuo gbe avro eyero akpọ họ. A rẹ whaha iruemu enwoma, iruẹru, gbe iroro nọ e rọ odode evaọ akpọ na. (Jemis 1:27; 4:4) Kọ whọ sae vuhu egagọ jọ evaọ okegbe ra nọ i wo eka Egagọ-Ahwo-Ikristi uzẹme enana?

[Pictures on page 26, 27]

Ileleikristi uzẹme a re you ohwohwo, kẹ Ebaibol adhẹẹ, jẹ ta usiuwoma kpahe Uvie Ọghẹnẹ