Fikieme Ma je bi Whu?
“Ehru igbehru na kpobi e fọ no rirẹ, uvumọ edo o rọ ehru irre na ha; evra na e wezẹ ku irre na no: hẹrẹ; who ti serihọ obọnana wọhọ enana.”—JOHANN WOLFGANG VON GOETHE, ỌKETA GERMANY.
1, 2. (a) Didiọ isiuru a kugbe rọ ma ohwo-akpọ? (b) Oghẹrẹ uzuazọ vẹ imava ọsosuọ na a reawere riẹ?
ỌGHẸNẸ ọ ma ohwo-akpọ avọ isiuru re ọ rria bẹdẹ bẹdẹ. Evaọ uzẹme, Ebaibol na ọ ta nnọ o fi ọ “iroro ọ ebẹdẹ bẹdẹ họ idu rai.” (Ọtausiuwoma Na 3:11, Beck) Rekọ orọnikọ isiuru re a rria bẹdẹ bẹdẹ ọvo Ọghẹnẹ ọ rọ kẹ ahwo-akpọ họ. Ọ kẹ rai uvẹ nọ a rẹ sae rọ rria re.
2 A ma ọsẹ gbe oni ọsosuọ mai, Adamu avọ Ivi, gbagba, ababọ ẹthọthọ evaọ iroro hayo ugboma. (Iziewariẹ 32:4) Roro iei—ọyawọ hayo edada egaga e rọ họ, ekpere ozodhẹ hayo awa-ọruọ ọ rrọ họ! Ofa riẹ, Ọghẹnẹ o fi rai họ uwou ọ aparadase owowoma. Ọghẹnẹ ọ j’iroro nnọ ohwo-akpọ ọ rẹ rria bẹdẹ bẹdẹ gbe nnọ evaọ omoke jọ otọakpọ o vẹ vọ avọ emọ egbagba riẹ. (Emuhọ 1:31; 2:15) Kọ fikieme ma je bi whu?
Aghẹmeeyo Ọ Wha Uwhu Ze
3. Eme uzuazọ ebẹdẹ bẹdẹ kẹ Adamu avọ Ivi o roma hwa?
3 Ọghẹnẹ o j’uzi kẹ Adamu nọ: “Whọ rẹ sae ria ibi ire nọ e rọ ogba na odode; rekọ whọ rẹ re ure ẹriẹ ewoma gbe eyoma na ha, keme eva ẹdẹ nọ whọ re riẹ, who re ti whuẹ.” (Emuhọ 2:16, 17) Fikiere uzuazọ ebẹdẹ bẹdẹ rọkẹ Adamu avọ Ivi o jọ oware ajokpanọ; o roma hwa ẹmeoyo rai kẹ Ọghẹnẹ.
4. Okenọ Adamu avọ Ivi a raha uzi, fikieme ẹruore ẹrria ebẹdẹ bẹdẹ evaọ Aparadase u je vru mi ai?
4 Dede na, avọ ọkora, Adamu avọ Ivi a ghẹmeeyo kẹ uzi Ọghẹnẹ. (Emuhọ 3:1-6) Evaọ ere oruo, a te zihe ruọ eraha-izi, keme “oware uyoma họ uzioraha.” (1 Jọn 3:4) Fiki oyena, Adamu avọ Ivi a gbe wo ẹruore uzuazọ ebẹdẹ bẹdẹ hẹ. Fikieme? Keme “uwhu họ osa [oware] uyoma.” (Ahwo Rom 6:23) Fikiere, okenọ o je bruoziẹ Adamu avọ Ivi, Ọghẹnẹ ọ tẹ ta nọ: “Whẹ ẹkpẹ, jẹruọ ẹkpẹ who re ti zihe rua.” A te le ọsẹ gbe oni ọsosuọ mai no uwou Aparadase rai no. Evaọ ẹdẹ nọ a ru umuomu na, Adamu avọ Ivi a te muhọ ewhu ẹmẹrera.—Emuhọ 3:19, 23, 24.
‘Uwhu U te Ahwo Kpobi’
5. Ẹvẹ uwhu o rọ vaha te uyẹ ohwo-akpọ na soso?
5 Enẹna umuomu o daruọ ogẹgẹ-ukuoriọ-oma Adamu avọ Ivi didi no. Fikiere, a sai wo emọ egbagba ha, wọhọ epanọ a rẹ sae rehọ ukolo nọ o nwẹhẹ no rọ ma oware oriẹriẹ hẹ na. (Job 14:4) Evaọ uzẹme, eyẹ ohwo-akpọ kpobi o be k’imuẹro inọ ọsẹ gbe oni ọsosuọ mai a kuọ omokpokpọ gbe uzuazọ ebẹdẹ bẹdẹ rai avọ orọ emọ rai fiẹ. Pọl ukọ Oleleikristi na o kere nọ: “Umuomu orọ fiki omọvo vaha ruọ akpọ na, gbe uwhu fiki izieraha, fikiere uwhu u te zite ahwo kpobi: keme fiki onana uwhu u ro te ahwo kpobi, keme ahwo kpobi a raha uzi.”—Ahwo Rom 5:12; wawo Olezi 51:5.
6. Fikieme ma je bi whu?
6 Nẹnẹ na ekiotọ-eriariẹ a riẹ oware nọ ahwo-akpọ a jẹ be kpako je whu hu. Dede na, Ebaibol o dhesẹ nnọ ma bi whu fikinọ a yẹ omai avọ uzioraha, keme ma reuku uyero onana no obọ ọsẹ gbe oni ọsosuọ mai ze. Rekọ eme ọ rẹ via k’omai evaọ okenọ ma te whu?