Uzou Avọ Isoi
Ufuoma nọ Enọ E be Gọ Jihova A be Reawere Riẹ
1, 2. (a) Didi oghẹrẹ ufuoma Ọghẹnẹ ọ kẹ imava ọsosuọ na? (b) Fodẹ izi jọ nọ e jẹ kpọ iruẹru Adamu avọ Ivi.
OKENỌ Jihova ọ ma ọzae gbe aye ọsosuọ na, a reawere ufuoma nọ u vi onọ ahwo-akpọ a wo kpobi nẹnẹ na. Uwou rai o jọ Aparadase, Ọgbọ Idẹn owowoma na. Ẹyao ọvuọvo ọ jẹ raha omawere uzuazọ rai hi, keme a wo iroro gbe igboma egbagba. Uwhu o jẹ hẹrẹ ae he wọhọ epanọ o rrọ kẹ ohwo kpobi no anwọ okioye ze na. Ofariẹ a jọ atakẹ-oteru hu, rekọ a wo okẹ igbunu orọ ufuoma iroro-ejẹ, ẹgba nọ a rẹ rọ jiroro obọ rai. Rekọ re a gbẹ reawere ufuoma ugbunu oyena, a rẹ rọ adhẹẹ kẹ izi Ọghẹnẹ.
2 Wọhọ oriruo, roro kpahe izi emama nọ Ọghẹnẹ o fihọ. Ẹsejọhọ a nwane rehọ unu fodẹ izi eyena jọ họ, rekọ a ma Adamu avọ Ivi evaọ edhere nọ a re ro yo ẹme kẹ ae. Ohọo u re dhesẹ nọ a gwọlọ emu; uruame, inọ a gwọlọ ame; ekiediwi ọre, inọ a gwọlọ re a wezẹ. Jihova ọ tẹ jẹ kẹ ae iruo. Iruo eyena yọ uzi, keme o rẹ te kpọ owojẹ rai. A re ti yẹ emọ, su emama uzuazọ otọakpọ sa-sa na, a ve je ru iwhru Aparadase na kẹre bẹsenọ o re ruru akpọ na soso no. (Emuhọ 1:28; 2:15) Ẹvẹ uzi oyena o rrọ oware ẹwo gbe erere te! O kẹ rae iruo nọ e rẹ veva ziezi, o kẹ rae uvẹ nọ a rẹ rọ rehọ ẹgba rai ruiruo vọvọ evaọ uvi edhere. Ofariẹ, a wo uvẹ ulele nọ a sae rọ jiroro epanọ a re ro ru iruo rai gba. Eme ọfa ohwo ọ gwọlọ?
3. Ẹvẹ Adamu avọ Ivi a hẹ sai ro wuhrẹ re a rehọ ufuoma rai nọ a rẹ rọ jiroro ruiruo ziezi?
3 Uzẹme, nọ a kẹ Adamu avọ Ivi uvẹ nọ a rẹ rọ jẹ iroro, orọnikọ oyena o nwani dhesẹ nọ oghẹrẹ iroro nọ a jẹ kpobi e rẹ wha emamọ iyẹrẹ ze he. Ufuoma iroro-ejẹ rai u re lele izi gbe ehri-izi Ọghẹnẹ. Ẹvẹ a sai ro wuhrẹ izi nana? Ẹkwoma ezọgaviẹ kẹ Ọnoru rai gbe ẹrotọvi iruo riẹ. Ọghẹnẹ ọ kẹ Adamu avọ Ivi areghẹ nọ o gwọlọ re a sai fi eware nọ a bi wuhrẹ na họ iruo. Nọ a ma ae gbagba na, ẹkoma rai o rẹ jọ re a dhesẹ ekwakwa Ọghẹnẹ via nọ a tẹ be jiroro. Evaọ uzẹme, a rẹ romatotọ ru ere otẹrọnọ a ghine vuhu eware nọ Ọghẹnẹ o ru kẹ ae mu jẹ gwọlọ ru ei eva were.—Emuhọ 1:26, 27; Jọn 8:29.
4. (a) Kọ ujaje nọ a kẹ Adamu avọ Ivi inọ a re ubi ure ovo jọ họ na u mi rai ufuoma? (b) Fikieme onana o jẹ rọ ute nọ u fo?
4 Nwani fo, Ọghẹnẹ ọ salọ nọ ọ rẹ dawo omarọkẹ nọ a wo kẹe wọhọ Ọkokẹ Uzuazọ rai gbe unevaze rai re a daji umuo uwhru nọ o fihọ kẹ ae. Jihova ọ kẹ Adamu ujaje onana: “Whọ rẹ sae ria ibi ire nọ e rọ ogba na odode; rekọ whọ rẹ re ure ẹriẹ ewoma gbe eyoma na ha, keme eva ẹdẹ nọ whọ re riẹ, who re ti whuẹ.” (Emuhọ 2:16, 17) Nọ a ma Ivi no, a tẹ vuẹe uzi nana. (Emuhọ 3:2, 3) Kọ uzi nana u mi rai ufuoma? Vievie. A wo emuore awere oghoghẹrẹ buobu nọ a rẹ sae re ababọ ẹre ubi ure ovo oyena. (Emuhọ 2:8, 9) U fo re a vuhumu nọ Ọghẹnẹ o wo otọakpọ na, keme ọye ọ ma riẹ. Fikiere o wo udu nọ o re ro fi izi nọ e rọwo kugbe ẹjiroro riẹ họ gbe enọ e rẹ kẹ ahwo-akpọ erere.—Olezi 24:1, 10.
5. (a) Ẹvẹ Adamu avọ Ivi a ro ku ufuoma oruaro nọ a wo fiẹ? (b) Eme ọ rehọ ẹta ufuoma nọ Adamu avọ Ivi a jẹ reawere riẹ, kọ ẹvẹ u ro kpomahọ omai?
5 Rekọ eme ọ via? Avọ iroro uvo-uthei nọ e wọ riẹe, ẹnjẹle jọ ọ rehọ ufuoma iroro-ejẹ riẹ ruiruo thọthọ o te zihe ruọ Setan, onọ otofa riẹ o rrọ “Ọzadhe.” Ọ viẹ Ivi họ ẹkwoma imuẹro nọ ọ kẹ riẹ kpahe oware jọ nọ o wọso oreva Ọghẹnẹ. (Emuhọ 3:4, 5) Adamu o te kuomagbe Ivi raha uzi Ọghẹnẹ. Ẹkwoma ẹrehọ oware nọ o rrọ orai hi, a te ku ufuoma oruaro rai fiẹ. Uzioraha u te zihe ruọ olori rai, yọ wọhọ epanọ Ọghẹnẹ ọ vẹvẹ unu no vẹre, uwhu u te lele iei. Ukuoriọ nọ a kpeze se emọ rai họ uzioraha—onọ u bi dhesẹ oma via evaọ iroro eyoma oruo nọ a ro kugbe yẹ ae. Uzioraha o tẹ jẹ wha ebẹbẹ nọ i su kpohọ ẹyao, owho, gbe uwhu ze. Iroro eyoma-oruo, onọ ekpokpo Setan u ru ga viere, o tẹ wha okegbe ohwo-akpọ nọ o vọ avọ ikuigbe omukpahe, ethube, okienyẹ, gbe emo nọ i kpe ahwo ima buobu no ze. Ẹvẹ onana u wo ohẹriẹ te no ufuoma nọ Ọghẹnẹ ọ kẹ ohwo-akpọ eva emuhọ!—Iziewariẹ 32:4, 5; Job 14:1, 2; Ahwo Rom 5:12; Eviavia 12:9.
Oria nọ A Sae Jọ Ruẹ Ufuoma
6. (a) Diẹse a sai jo duku uvi ufuoma? (b) Didi oghẹrẹ ufuoma Jesu ọ jẹ t’ẹme kpahe?
6 Fikiọ iyero iyoma nọ e vọ oria kpobi nẹnẹ, u gbunu hu inọ ahwo a bi siuru ewo ufuoma nọ u vi onọ a wo. Rekọ diẹse a sai jo duku uvi ufuoma? Jesu ọ ta nọ: “Wha tẹ rria evaọ ẹme mẹ, yọ whai ghinọ ilele mẹ, wha rẹ te riẹ uzẹme na, uzẹme na u re ti ru owhai emuyẹ.” ( Jọn 8:31, 32) Ufuoma onana orọnikọ utionọ ahwo a re rẹro riẹ nọ a tẹ siọ osu jọ hayo oghẹrẹ egọmeti jọ fikinọ a gwọlọ ọfa ha. Ukpoye, ufuoma nana u re te ehri ebẹbẹ ohwo-akpọ. Oware nọ Jesu ọ jẹ ta na họ ufuoma no igbo kẹ uzioraha. ( Jọn 8:24, 34- 36) Fikiere, ohwo o te zihe ruọ uvi olele Jesu Kristi, ọ rẹ ruẹ enwene ologbo evaọ uzuazọ riẹ, ufuoma!
7. (a) Didi edhere ma sai ro wo ufuoma no uzioraha enẹna? (b) Re ma wo ufuoma oyena, eme o gbahọ nọ ma re ru?
7 Onana o nwani dhesẹ hẹ inọ enẹna Ileleikristi uzẹme a gbe bi wo okpomahọ uzioraha eyoma oruo nọ a ro yẹ ai hi. Nọ a reuku uzioraha na, a gbe bi lele iei họre. (Ahwo Rom 7:21-25) Rekọ ohwo ọ tẹ be ghinẹ rria lele iwuhrẹ Jesu, ọ rẹ gbẹ jọ ọrigbo kẹ uzioraha ha. Uzioraha o rẹ gbẹ jọ wọhọ osu kẹe he nọ o rẹ kẹe ijaje nọ o re koko. O re gbe kiẹta edhere uzuazọ nọ o kare ẹjiroro gbe onọ o rẹ kẹe iroro-oziẹbro oyoma ha. Ọ rẹ reawere iroro-oziẹbro efuafo evaọ aro Ọghẹnẹ keme a rehọ izieraha anwae vrẹ riẹ no fikiọ ẹrọwọ nọ o fihọ idhe Kristi. Iroro uzioraha e rẹ gwọlọ du lahwe, rekọ ọ tẹ se nọ ọ rẹ j’owọ kpahe ae fikinọ ọ kareghẹhọ emamọ iwuhrẹ Kristi, yọ o bi dhesẹ nọ uzioraha o gbẹ rrọ olori riẹ hẹ.—Ahwo Rom 6:12-17.
8. (a) Didi ufuoma ofa Egagọ-Ileleikristi uzẹme o k’omai? (b) Didi uruemu ma re wo kpahe isu na?
8 Roro ufuoma nọ ma be reawere riẹ wọhọ Ileleikristi. Ma wo ufuoma no okpomahọ iwuhrẹ erue no, no igbo ogbẹrọwọ, gbe igbo kẹ uzioraha. Izẹme ilogbo kpahe uyero enọ i whu no gbe ẹkparomatha na e k’omai ufuoma no ugbẹdhẹ ozọ uwhu no. Ẹriẹ inọ Uvie ukiẹrẹe Ọghẹnẹ u bi ti nwene egọmeti ahwo-akpọ sebaẹgba kẹle na o kẹ omai ufuoma no ababọ-ẹruore. (Daniẹl 2:44; Matiu 6:10) Rekọ oghẹrẹ ufuoma oyena o k’uvẹ kẹ uzou-uveghe kẹ ahwo egọmeti gbe izi rai hi.—Taitọs 3:1, 2; 1 Pita 2:16, 17.
9. (a) Ẹvẹ Jihova ọ be rọ rehọ uyoyou fi obọ họ k’omai re ma reawere ufuoma nọ o mae rro nọ o lọhọ kẹ ahwo akpọ enẹna? (b) Ẹvẹ ma sae rọ jẹ emamọ iroro?
9 Jihova o vu omai wa re ma dawo idhere buobu rọ riẹ edhere uzuazọ nọ ọ mai fo ẹria ha. Ọ riẹ oghẹrẹ nọ a rọ ma omai, oware nọ o rẹ wha uvi edẹro s’omai, gbe oware nọ o rẹ mae k’omai erere okrẹkri. Ọ riẹ iroro gbe uruemu nọ e rẹ sae raha usu ohwo kugbe Ei je kugbe ibe ahwo-akpọ, tubẹ whaha ohwo ẹruọ akpọ ọkpokpọ na dede. Avọ uyoyou, Jihova ọ vuẹ omai kpahe eware enana kpobi ẹkwoma Ebaibol na gbe ukoko riẹ nọ a rẹ ruẹ. (Mak 13:10; Ahwo Galesha 5:19-23; 1 Timoti 1:12, 13) Fikiere obọ mai o rrọ re ma fi uvẹ iroro-ejẹ nọ Ọghẹnẹ ọ k’omai na họ iruo rọ jiroro owọ nọ ma rẹ jẹ. Hẹrioma no Adamu, ma te si oware nọ Ebaibol na ọ ta k’omai t’udu, ma te jẹ emamọ iroro. Ma re dhesẹ nọ emamọ usu kugbe Jihova oye họ oware nọ o mae rrọ oja evaọ uzuazọ.
Ẹgwọlọ Oghẹrẹ Ufuoma Ofa
10. Didi oghẹrẹ ufuoma ejọ nọ e rrọ Isẹri Jihova a bi le?
10 Ẹsejọ emoha jọ nọ e rrọ Isẹri Jihova—gbe efa nọ e nwane rrọ emaha ha—a sai roro nọ a gwọlọ oghẹrẹ ufuoma ofa. Akpọ na ọ sae jọ aro rai wowoma, yọ epanọ a bi roro kpahe iẹe te, ere isiuru nọ a re ro ru eware ethọthọ nọ e da akpọ na fia e rẹ ga te re. Ẹsejọhọ orọnọ ahwo otiọye na a gwọlọ lọ imu egaga, da-idi vrẹ oma, hayo bruẹnwae he. Rekọ a re muọ usu họ ẹnya kugbe enọ e rrọ uvi Ileleikristi hi, gwọlọ nọ ahwo na a jẹ ae rehọ. A sai tube mu ẹmeọta gbe uruemu rai họ ẹya ru dede.—3 Jọn 11.
11. Diẹse isiuru nọ a re ro ru eyoma i re no ze ẹsejọ?
11 Ẹsejọ urusio re a duoma họ iruemu akpọ na u re no obọ ohwo nọ ọ ta nọ ọ be gọ Jihova ze. Oye họ oware nọ o via kẹ Ileleikristi ọsosuọ jọ, yọ o sae via nẹnẹ re. Oghẹrẹ ahwo yena a rẹ gwọlọ ru eware jọ nọ a roro nọ e te kẹ ae omawere, rekọ eware enana e wọso izi Ọghẹnẹ. A re zizie amọfa re a “riakpọ” omojọ. A rẹ ‘yeyaa ufuoma, rekọ yọ ae omarai a rrọ erigbo egbegbe.’—2 Pita 2:19.
12. Didi iyẹrẹ iyoma i re no uruemu nọ u mukpahe izi gbe ehri-izi Ọghẹnẹ ze?
12 Iyẹrẹ nọ i re no ufuoma utioye na ze e rẹ jọ yoyoma ẹsikpobi, keme ufuoma oyena o gwọlọ aghẹmeeyo kẹ izi Ọghẹnẹ. Wọhọ oriruo, igberẹ-ibro e rẹ wha ẹbẹbẹ iroro ze, ẹyao, uwhu, udihọ nọ a gwọlọ họ, jegbe orọo nọ o rẹ sae fa. (1 Ahwo Kọrint 6:18; 1 Ahwo Tẹsalonika 4:3-8) Imu egaga elọ o rẹ wha ugbemu-ofu ze, ẹme nọ a rẹ ta h’akọ, ude-oruẹ bizibizi, aro nọ o re bi ohwo, ẹbẹbẹ ẹwẹ-ọwẹ, ogbẹruẹ eware, gbe uwhu. O sae lẹliẹ ẹlọ imu egaga reria ohwo obọ, onọ o rẹ sai su kpohọ egbulegbu re a sae ruẹ ugho nọ a rẹ rọ dẹ imu na. Enwenọ epọvo na o rẹ jọ kẹ ọgba-idieda re. (Itẹ 23:29-35) Enọ e rehọ oma kẹ oghẹrẹ uruemu utioye na a sai roro nọ a wo ufuoma, rekọ a vẹ te ruẹ nọ eware e vabọ no inọ a zihe ruọ erigbo uzioraha no. Whaọ dai roro oghẹrẹ olori ọgeva nọ uzioraha o rrọ! Eroro kpahe ẹme na enẹna u re fiobọhọ thọ omai no eware itieye na.—Ahwo Galesha 6:7, 8.
Oria nọ Ebẹbẹ E rẹ Jọ Muhọ
13. (a) Ẹvẹ isiuru nọ i re su kpohọ ebẹbẹ i re ro muhọ ẹsibuobu? (b) Re ma wo otoriẹ oware nọ “usu uyoma” o rrọ, eriwo ono ma rẹ gwọlọ? (c) Nọ whọ be za enọ nọ e rrọ edhe-ẹme avọ 13 na, fiẹgba họ eriwo Jihova .
13 Dai roro kpahe oria nọ ebẹbẹ eyena e rẹ jọ muhọ ẹsibuobu. Ebaibol na o ru rie vevẹ nọ: “Kohwo kohwo o re kie ruọ odawọ okenọ urusio avọ eguọlọ-aguọlọ riẹ e gba riẹ họ. Kẹsena, nọ urusio u te dihọ, u ve yẹ umuomu, nọ umuomu o jẹ rro thẹtawa no o vẹ wha uwhu ze.” ( Jemis 1:14, 15) Ẹvẹ isiuru na e rẹ rọ kpare via? Ẹkwoma oware nọ o ruọ iroro na. Ẹsibuobu onana u re no usu onya kugbe ahwo nọ i bi koko ehri-izi Ebaibol ho ze. Uzẹme, mai kpobi ma riẹ nọ ma rẹ whaha “usu uyoma.” (1 Ahwo Kọrint 15:33) Rekọ usu vẹ họ usu uyoma? Ẹvẹ Jihova o riwi ẹme na? Eroro kpahe enọ nọ e rrọ obotọ na gbe erri kpohọ ikereakere nọ a fodẹ na u ti fiobọhọ k’omai ku ẹme na họ ziezi.
Kọ uzẹme na nnọ ahwo jọ a wo oma ọghọ ọvo o nwani dhesẹ nọ a te jọ emamọ egbẹnyusu? (Emuhọ 34:1, 2, 18, 19)
Kọ ẹmeọta rai, ẹsejọhọ emiehwẹ rai, i ghine dhesẹ sọ ma rẹ jọ usu okpekpe kugbe ai? (Ahwo Ẹfẹsọs 5:3, 4)
Ẹvẹ o rẹ jọ Jihova oma ma tẹ salọ usu okpekpe kugbe ahwo nọ a you rie he? (2 Iruẹru-Ivie 19:1, 2)
Dede nọ ma rẹ jọ oria ovo ruiruo kugbe hayo kpohọ isukulu kugbe enọ i wo orọwọ mai hi, fikieme o jẹ gwọlọ nọ ma rẹ yọroma? (1 Pita 4:3, 4)
Etehe-ughe gbe ekasẹte ividio nọ ma re rri, Itanẹte nọ ma rẹ kiẹ, ebe, emagazini, gbe ebe-usi nọ ma re se yọ idhere nọ ma be rọ nyusu kugbe amọfa. Eghẹrẹ eware vẹ evaọ eria itieye na o gwọlọ nọ ma rẹ yọroma kẹ? (Itẹ 3:31; Aizaya 8:19; Ahwo Ẹfẹsọs 4:17-19)
Eme oghẹrẹ egbẹnyusu nọ ma salọ o rẹ ta kẹ Jihova kpahe oghẹrẹ ohwo nọ ma rrọ? (Olezi 26:1, 4, 5; 97:10)
14. Didi ufuoma ulogbo o rrọ obaro kẹ enọ i bi fi ohrẹ Ẹme Ọghẹnẹ h’iruo avọ ẹrọwọ enẹna?
14 Obọnana akpọ ọkpokpọ Ọghẹnẹ ọ rrọ obaro mai. Ẹkwoma egọmeti Uvie obọ odhiwu Ọghẹnẹ, ahwo-akpọ a ti wo ufuoma no igbo ekpokpo Setan gbe uyerakpọ omuomu riẹ kpobi. Ẹmẹrera, a ve ti si eware kpobi nọ uzioraha o wha ze no oma ahwo akpọ, onọ o te wha ẹgbagba iroro gbe ugboma ze, re ma sae reawere uzuazọ ebẹdẹ bẹdẹ evaọ Aparadase. Ukuhọ riẹ emama kpobi e vẹ te reawere ufuoma nọ o rọwo kugbe “ẹzi ỌNOWO na.” (2 Ahwo Kọrint 3:17) Kọ o rrọ oware areghẹ re ma ku eware eyena kpobi fiẹ fikinọ ma bi rri ohrẹ Ẹme Ọghẹnẹ vo enẹna? Ẹkwoma ufuoma Ileleikristi mai nọ ma re ro ruiruo ziezi nẹnẹ, j’omai kpobi ma dhesẹ vevẹ inọ oware nọ ma ghinẹ gwọlọ họ ‘ufuoma oruaro ọ emọ Ọghẹnẹ.’—Ahwo Rom 8:21.
Eme Ọkiẹkpemu
• Didi oghẹrẹ ufuoma imava ọsosuọ na a reawere riẹ? Ẹvẹ a rẹ sae rọ rehọ oyena wawo onọ ohwo-akpọ ọ be ruẹ enẹna?
• Didi ufuoma Ileleikristi uzẹme a wo? Ẹvẹ onana u ro w’ohẹriẹ no oware nọ akpọ na o bi se ufuoma?
• Fikieme u je wuzou re ma whaha usu uyoma? Wo ohẹriẹ no Adamu, ẹjiroro ono kpahe oware nọ u yoma ma rẹ jẹ rehọ?
[Iwoho nọ e rrọ ẹwẹ-obe avọ 46]
Ẹme Ọghẹnẹ ọ vẹvẹ unu nọ: “Wha jọ a viẹ owhai họhọ: Usu uyoma o rẹ raha uruemu ezi”