Uzou avọ 3

“Me Re Wowolẹ”

1-3. Oghẹrẹ vẹ Jesu ọ rọ ruọ Jerusalẹm, kọ fikieme o sai ro gbe otujọ nọ e jẹ hẹrẹ iẹe unu?

JERUSALẸM kpobi ọ be koyẹ. A bi rẹro okpohwo jọ. Ahwo a dikihẹ akakotọ edhere evaọ ughe ẹwho na. A be rọ ọwhọ hẹrẹ ọzae nana keme ahwo jọ a be ta inọ ọye họ ọreuku Devidi Ovie na gbe Osu nọ uvie na u te evaọ Izrẹl. Ejọ evaọ usu rai a tẹ rọ eya-iriẹ ze bi veghe; amọfa a tẹ riẹ iwu rai gbe egha ire fihọ edhere kẹe. (Matiu 21:7, 8; Jọn 12:12, 13) Ẹsejọhọ ibuobu a je roro oghẹrẹ nọ ọ te rọ ruọ okpẹwho na.

² O sae jọnọ otujọ a je rẹro inọ ovie nana ọ te nyaze avọ oruaro gbe ọghọ ologbo. A riẹ kpahe ikpahwo nọ e rọ oruaro ruọ ewho sa-sa no. Wọhọ oriruo, Absalọm ọmọ Devidi ọ rehọ oma riẹ mu ovie; ezae udhuvẹ gbe ikpe e jẹ kobaro kẹ akẹkẹ riẹ. (2 Samuẹle 15:1, 10) Julius Caesar, osu ahwo Rom na, o dhesẹ oruaro nọ u tube vi onana; okejọ o jariẹ nọ ọ ruọ okpẹwho-esuo ahwo Rom avọ ini udhuvẹ nọ e wha ikpẹ nọ e jọ t’ofẹ t’ofẹ riẹ! Rekọ obọnana ahwo Jerusalẹm a bi rẹro ohwo nọ ọ rro vi enana kpobi. Sọ ogbotu na a ginẹ riẹ hayo a riẹ hẹ, ohwo nana họ Mesaya na, ọzae nọ ọ mae rro nọ ọ rria no. Rekọ ẹsejọhọ oghẹrẹ nọ Ovie nana ọ rọ nya lahwe u gbe ahwo jọ unu.

³ A ruẹ uvumọ akẹkẹ hẹ, a ruẹ ahwo nọ i dhuye họ aro riẹ hẹ, a ruẹ enyenya dede he, kabikọ ini. Ukpoye kọ eketekete gheghe Jesu ọ dhẹ.a Ọ gọ okpẹgọ họ, yọ a rọ eware eghaghae whẹ erru họ eketekete na gbe he. Ukpenọ a rọ ehọ eghaghae hwa eketekete na kọ iwu ilele Jesu a rọ hwa ehru riẹ. Fikieme Jesu ọ rọ rehọ enẹ ruọ Jerusalẹm kpakiyọ enọ i te rie he a rehọ oruaro gbe ehaa ruọ ewho rai?

4. Eme Ebaibol e ta kpahe oghẹrẹ nọ Mesaya Ovie na ọ te rọ ruọ Jerusalẹm?

⁴ Jesu o bi ru eruẹaruẹ jọ gba, onọ o ta nọ: “Ghọghọ gaga . . . Do edo oghọghọ, O ọmọtẹ Jerusalem! Ri, Ovie ra o bi bru owhẹ tha; avọ ogaga gbe obọokparọ, ọ be rọ oma urokpotọ dhẹ eva ehru eketekete.” (Zekaraya 9:9) Eruẹaruẹ nana i dhesẹ inọ ẹdẹjọ Mesaya na, Ọnọ Ọghẹnẹ O Wholo na, ọ te roma via kẹ ahwo Jerusalẹm wọhọ Ovie nọ Ọghẹnẹ o ro mu. Ofariẹ, oghẹrẹ nọ ọ rọ roma via gbe oghẹrẹ arao nọ ọ dhẹ i dhesẹ uruemu-aghae jọ nọ o wo via—omaurokpotọ.

5. Fikieme omaurokpotọ Jesu u ro siuru gaga, kọ fikieme o rọ r’oja re ma raro kele omaurokpotọ riẹ?

⁵ Omaurokpotọ Jesu yọ uruemu-aghae riẹ jọ nọ u siuru gaga. Wọhọ epanọ ma ta evaọ uzoẹme nọ o vrẹ na, Jesu ọvo họ “edhere na, gbe uzẹme, gbe uzuazọ.” (Jọn 14:6) O rọ vevẹ inọ evaọ ahwo ima-idu buobu nọ e rria no, ọvuọvo nọ ọkwa riẹ ọ tubẹ kaka ọrọ Ọmọ Ọghẹnẹ ọ riẹ hẹ. Ghele na, Jesu o wo omorro gbe omovia nọ i bi kpokpo ima ahwo-akpọ buobu nẹnẹ na ha. Re ma sae jọ ilele Jesu, ma rẹ daoma whaha omorro. (Jemis 4:6) Kareghẹhọ inọ Jihova o mukpahe omoya. Fikiere, o r’oja re ma raro kele omaurokpotọ Jesu.

O Wo Omaurokpotọ no Anwae Ze

6. Eme họ omaurokpotọ, kọ ẹvẹ Jihova ọ rọ riẹ nnọ Mesaya na ọ te roma kpotọ?

⁶ Ohwo nọ o wo omaurokpotọ ọ rẹ wọ oma kpehru hu. Okwakwa-aghae nana u re muhọ no udu ze, yọ u re dhesẹ oma via evaọ ẹmeunu gbe uruemu ohwo, gbe oghẹrẹ nọ o bi yeri kugbe amọfa. Ẹvẹ Jihova ọ rọ riẹ inọ Mesaya na ọ te roma kpotọ? Ọ riẹ nọ Ọmọ riẹ ọ be raro kele omaurokpotọ riẹ ziezi. (Jọn 10:15) Ọ tubẹ ruẹ nnọ Ọmọ na o dhesẹ omaurokpotọ no. Evaọ oghẹrẹ vẹ?

7-9. (a) Ẹvẹ Maekẹl o ro dhesẹ omaurokpotọ okenọ o wo avro kugbe Setan? (b) Ẹvẹ Ileleikristi a sae rọ raro kele Maekẹl dhesẹ omaurokpotọ?

⁷ Obe Jud u dhesẹ emamọ oriruo jọ via, inọ: “Nọ Maekẹl ukọ-odhiwu oride na, o je lele ukumuomu na họre, vroavro kpahọ oma Mosis, ọ jobọ nọ o ro rovie unu riẹ poviẹ e he, rekọ, anọ, ‘Ọnowo na ọ whọku owhẹ.’” (Jud 9) Maekẹl yọ odẹ nọ a rọ riẹ Jesu fiki ọkwa riẹ wọhọ ukọ-odhiwu oride, koyehọ ọnọ o wuzou enjẹle Jihova nọ e rrọ obọ odhiwu.b (1 Ahwo Tẹsalonika 4:16) Rekọ muẹrohọ oware nọ Maekẹl o ru okenọ tei te Setan a wo avro.

⁸ Jud ọ ta ha oware nọ Setan ọ jẹ te gwọlọ rehọ oma Mosis ru, rekọ o rẹ sai mu omai ẹro inọ iroro iyoma e jọ Ẹdhọ eva. Ẹsejọhọ ọ jẹ te gwọlọ rehọ ugboma Mosis wha egagọ erue haro. Dede nọ Maekẹl ọ jẹ za iroro iyoma Setan na dhe, ọ gba oma riẹ ghele. Setan o gine fo ohwo nọ a rẹ whọku, rekọ fikinọ a re “rehọ oziẹobro kpobi” họ obọ Maekẹl he, ọ riẹ nnọ obọ Jihova Ọghẹnẹ ọvo ọwhọkuo otiọye na o re no ze. (Jọn 5:22) Maekẹl họ ukọ-odhiwu oride na, ọnọ o wuzou ijẹle na kpobi. Ghele na, ukpenọ o ru orọ udu riẹ, o vu eware wa kẹ Jihova. U te no omaurokpotọ no, o dhesẹ re inọ ọ riẹ ọnyaba riẹ.

⁹ Orọnikọ Jud o mu kere eme nana ha. U yoma gaga inọ Ileleikristi jọ evaọ oke Jud a wo omaurokpotọ họ. A jẹ wọ oma kpehru, “be ta eme iyoma kpahe eware nọ a riẹ otọ rai hi.” (Jud 10) Mai ahwo-akpọ ma gbe rri otọ mu hu, omorro o rẹ sae ruọ udu mai. Wọhọ oriruo, otẹrọnọ ugboma ekpako na a jiroro jọ nọ u vẹ omai ẹro ho, eme ma re ru? Kọ ma tẹ be jọ obemu rọ unu raha ekpako na yọ ma riẹ oware nọ a rọ jiroro na ha, ogbẹrọnọ omorro ma bi dhesẹ na? Ukpoye, joma raro kele Maekẹl, koyehọ Jesu, re ma siọ unu ba edhehọ eme nọ i te omai hi.

10, 11. (a) Eme o gbe owhẹ unu kpahe otọakpọ nọ Ọmọ Ọghẹnẹ ọ rọwo inọ ọ rẹ nyaze? (b) Ẹvẹ ma sae rọ raro kele omaurokpotọ Jesu?

¹⁰ Ọmọ Ọghẹnẹ o te je dhesẹ omaurokpotọ nọ ọ rọwo inọ ọ rẹ ziọ otọakpọ. Roro kpahe eware nọ ọ nya seba. Ọye ọ jọ ukọ-odhiwu oride na. Ọ tẹ jẹ jọ “Ẹme na,” koyehọ Ọtota Jihova. (Jọn 1:1-3) Obọ odhiwu ọ jẹ rria, “oria ẹria oruaro ẹri” Jihova. (Aizaya 63:15) Ghele na, Ọmọ na “o se omariẹ gbe oware ovo ho, ọ tẹ rehọ oghẹrẹ oma odibo, a te je yẹi wọhọ ohwo.” (Ahwo Filipai 2:7) Dai roro oware nọ o gwọlọ mi ei re ọ ziọ otọakpọ! A kpeze uzuazọ riẹ fihọ edhede ọmọtẹ ohwo Ju nọ ọ riẹ ọzae he, etẹe ọ jọ rro emerae izii bẹsenọ a ti ro yẹi wọhọ ọmọboba nọ a yọrọ evaọ uviuwou ọwena nọ ọ jọ oyogbere, bẹsenọ o ro wuhrẹ onya jẹ rro te ọmoha. Dede nọ ọ kare uzioraha, eva etoke uzoge riẹ kpobi ọ roma kpotọ kẹ ọsẹgboni riẹ nọ e gba ha. (Luk 2:40, 51, 52) A rẹ ruẹ obọ omaurokpotọ riẹ hẹ!

¹¹ Kọ ma sae raro kele omaurokpotọ Jesu ẹkwoma eruo iruo nọ amọfa a rẹ sai rri vo? Wọhọ oriruo, a rẹ sai rri iruo usiuwoma ota na vo nọ ahwo a tẹ be se ovuẹ na, se omai ẹkoko, hayo gbẹroma. (Matiu 28:19, 20) Rekọ ma te bi thihakọ evaọ iruo nana, ma sai ti fi obọ họ siwi otujọ. Oghẹrẹ nọ o rrọ kpobi, ma ti wuhrẹ omaurokpotọ, ma vẹ jẹ rọ ere lele ithihi Olori mai, Jesu Kristi.

Omaurokpotọ Jesu Evaọ Otọakpọ

12-14. (a) Ẹvẹ Jesu o ro dhesẹ omaurokpotọ nọ ahwo a te jiri ei? (b) Idhere vẹ Jesu ọ rọ rehọ omaurokpotọ yeri kugbe amọfa? (c) Eme o dhesẹ inọ orọnikọ Jesu ọ jẹ faki dhesẹ omaurokpotọ họ?

¹² Jesu o dhesẹ omaurokpotọ evaọ etoke odibọgba riẹ kpobi evaọ otọakpọ. O dhesẹ onana ẹkwoma ujiro gbe oruaro kpobi nọ o kpeze bru Ọsẹ riẹ. Ẹsejọ ahwo a jẹ hai jiri Jesu fiki eme areghẹ nọ i je noi unu ze, eware igbunu nọ o je ru, makọ uruemu uwoma riẹ. Oke kpobi nọ a jiri Jesu, ọ jẹ hai kpeze ujiro na se Jihova.—Mak 10:17, 18; Jọn 7:15, 16.

¹³ Jesu o dhesẹ omaurokpotọ evaọ oghẹrẹ nọ o yeri kugbe ahwo. Evaọ uzẹme, o ru rie vevẹ inọ ọ ziọ otọakpọ na te gbodibo, orọnikọ re a gbodibo kẹe he. (Matiu 20:28) O dhesẹ omaurokpotọ evaọ edhere ẹwo nọ o ro yeri kugbe ahwo. Okenọ ilele riẹ a ru ei oware nọ o da riẹ, o do ku ai hi; ọ jẹ daoma ta ẹme nọ o re te ai udu. (Matiu 26:39-41) Okenọ ogbotu na a ruẹe ọza evaọ okenọ ọ jẹ gwọlọ serihọ, o le rai vrẹ hẹ; ọ kpairoro vrẹ eriosehọ riẹ o te mu ai “eware ibuobu” họ ewuhrẹ. (Mak 6:30-34) Okenọ aye jọ nọ ọ rrọ ohwo Izrẹl he ọ jẹ lẹe re o siwi ọmọ riẹ, ọ rọwo kẹ aye na oke ọsosuọ họ. Rekọ orọnọ evedha ọ rọ se kẹ aye na ha; uwhremu na o ru oware nọ aye na ọ gwọlọ kẹe fiki ẹrọwọ ologbo nọ aye na o dhesẹ, wọhọ epanọ ma te ta kpahe evaọ Uzou avọ 14 na.—Matiu 15:22-28.

¹⁴ Evaọ idhere buobu, Jesu ọ ginẹ jọ epanọ o dhesẹ oma riẹ na inọ: “Me re wowolẹ jegbọ eva i ro kpotọ.” (Matiu 11:29) Orọnikọ ọ jẹ faki dhesẹ omaurokpotọ họ. U no rie udu ze. Agbẹta nọ Jesu o je ro wuhrẹ ilele riẹ ẹsikpobi inọ a roma kpotọ na.

O Wuhrẹ Ilele Riẹ Omaurokpotọ

15, 16. Didi uruemu Jesu ọ ta inọ ilele riẹ a re wo, onọ u wo ohẹriẹ no orọ isu akpọ na?

¹⁵ Ikọ Jesu a jẹ kaki wo omaurokpotọ họ. Fikiere, Jesu o je wuhrẹ ai uruemu nana kẹse kẹse. Wọhọ oriruo, ẹdẹjọ Jemis avọ Jọn a rehọ ẹkwoma oni rai yare Jesu inọ ọ ya eyaa ọkwa ologbo kẹ ai evaọ Uvie Ọghẹnẹ. Avọ omaurokpotọ, Jesu ọ kuyo nọ: “Obọze gbe ẹkpẹlobọ mẹ ẹkeria, o rọ nọ mẹ rẹ kẹ hẹ, rekọ ohwo nọ Ọsẹ mẹ ọ ruẹrẹ eriẹ kẹ.” Fiki onana, “ofu o te mu” ikọ ikpe edekọ na kẹ Jemis avọ Jọn. (Matiu 20:20-24) Eme Jesu o ru kpahe ẹbẹbẹ nana?

¹⁶ Ọ rọ ẹwo whọku ai kpobi, ta nọ: “Wha riẹ nọ ikpahwo [erẹwho na] a rẹ rọ oma ru ilori kẹ ae, ahwo ologbo rai a te jọ ududu kẹ ae. Ere a re ti ruẹ udevie rai hi; rekọ ohwo nọ ọ rẹ te jọ udevie rai rua, ọ rẹ te jọ odibo rai. Ohwo nọ ọ rẹ te jọ aro udevie rai, ọ rẹ te jọ ọrigbo rai.” (Matiu 20:25-27) Ababọ avro, ikọ na a riẹ epanọ ‘ikpahwo erẹwho na’ a rẹ wọ oma kpehru jẹ gwọlọ ekwa te. Jesu o dhesẹ inọ ilele riẹ a re wo ohẹriẹ no isu-egeva eyena, enọ e rẹ họre kẹ ekwa. U fo re ikọ na a roma kpotọ. Kọ ikọ na a wo otoriẹ ẹme na?

17-19. (a) Edhere vẹ Jesu o ro wuhrẹ ikọ riẹ omaurokpotọ taure o te ti whu? (b) Oware vẹ Jesu o ru nọ o mai dhesẹ omaurokpotọ?

¹⁷ O jọ lọlọhọ kẹ ae he. Onana o jọ orọ ọsosuọ hayo orọ urere nọ Jesu o wuhrẹ i rai omaurokpotọ họ. Okejọ nọ u kpemu, nọ ilele riẹ a jẹ vro avro kpahe ọnọ ọ mae rro, ọ rehọ ọmaha dikihẹ udevie rai ọ tẹ ta kẹ ae inọ a jọ wọhọ emaha, enọ e rẹ wọ oma kpehru hu hayo gwọlọ ekwa wọhọ ekpako soso ho. (Matiu 18:1-4) Rekọ, makọ owọwọ nọ a ro mu ei na, ọ ruẹ inọ ikọ riẹ a gbe wo omorro. O te wuhrẹ ai oware jọ nọ a te kareghẹhọ oke krẹkri. Ọ tọlọ omokpa, o te ru oware nọ idibo e jẹ hai ru kẹ erara nọ e ziọ iwou ilori rai. Jesu ọ wozẹ awọ ikọ riẹ, te awọ Judas, ọnọ o bi ti vivie ei na.—Jọn 13:1-11.

¹⁸ Jesu o ru ẹme na vẹ nọ ọ ta kẹ ae nọ: “Mẹ kẹ owhai oriruo no.” (Jọn 13:15) Kọ ẹme na o te rai udu? Whaọ, evaọ aso ọvo yena, a tẹ jẹ wariẹ vro avro kpahe ọnọ ọ mae jọ usu rai rro. (Luk 22:24-27) Ghele na, Jesu o wo odiri kẹ ae jẹ roma kpotọ wuhrẹ ai. O te ru oware jọ nọ o rẹ thọrọ ilele riẹ ẹro vievie he: “O hrẹ oma riẹ kpotọ ọ tẹ rọwo whu” evaọ ehru ure oja. (Ahwo Filipai 2:8) Dede nọ Jesu ọ riẹ inọ a te gba eku họ iẹe uzou a ve ti kpei wọhọ ogbulegbu gbe ọnọ ọ ta eme aghọ, ọ rọwo inọ o re whu uwhu omovuọ nana. Ọmọ Ọghẹnẹ ọ tẹ rọ ere dhesẹ inọ evaọ usu emama Jihova kpobi, ọye ọ mai wo omaurokpotọ.

¹⁹ Ẹsejọhọ uwhu nọ Jesu ọ rọwo whu na oye o lẹliẹ uwuhrẹ omaurokpotọ na te ikọ riẹ udu. Ebaibol e ta kẹ omai inọ ezae nana a rọ omaurokpotọ ru iruo uvie na kugbe evaọ ikpe buobu nọ Jesu o whu no. Kọ ẹvẹ omai?

Kọ Who ti Lele Oriruo nọ Jesu O Fihọ Otọ Na?

20. Ẹvẹ ma sae rọ riẹ sọ ma wo omaurokpotọ?

²⁰ Pọl ọ tuduhọ omai omomọvo awọ nọ: “Wha jọ ẹjiroro nana ọjọ eva rai, ọnọ wha wo eva Kristi Jesu.” (Ahwo Filipai 2:5) Wọhọ Jesu, o gwọlọ inọ ma wo omaurokpotọ. Ẹvẹ ma sae rọ riẹ sọ ma wo omaurokpotọ? Pọl ọ kareghẹhọ omai inọ ma rẹ “rehọ mẹ-ọvo-ọria hayo eheri ru oware ovo ho, rekọ eva oma urokpotọ roro amọfa ro vi oma ra.” (Ahwo Filipai 2:3) Oware nọ u re fi obọ họ kẹ omai lele ohrẹ nana họ, ma re rri amọfa inọ a kpehru vi omai. Kọ who ti fi ohrẹ yena họ iruo?

21, 22. (a) Fikieme esẹro Ileleikristi a rẹ rọ roma kpotọ? (b) Ẹvẹ ma sai ro dhesẹ inọ ma rọ omaurokpotọ gọ ẹgọ?

²¹ Ikpe buobu nọ Jesu o whu jẹ kparoma no, Pita ukọ na o gbe je roro kpahe epanọ omaurokpotọ o r’oja te. Ọ hrẹ esẹro Ileleikristi inọ a rọ omaurokpotọ ru iruo rai, orọnikọ a re ru oma oruoro kẹ uthuru Jihova ha. (1 Pita 5:2, 3) A rẹ wọ oma kpehru hu fikinọ a rrọ esẹro. Ukpoye, kọ ẹsiẹe a rẹ mai dhesẹ omaurokpotọ. (Luk 12:48) Dede na, orọnikọ esẹro na ọvo i re dhesẹ omaurokpotọ họ, rekọ Ileleikristi kpobi.

²² Ẹsikpobi Pita ọ jẹ kareghẹhọ aso ọyena nọ Jesu ọ rọ wozẹ awọ riẹ na dede nọ ọ kake jẹ rọwo ho re Jesu ọ wozẹ awọ riẹ. (Jọn 13:6-10) O kere se Ileleikristi nọ: “Whai kpobi a rehọ oma-urokpotọ gọẹgọ kẹ ohwo ohwo.” (1 Pita 5:5) Ẹme nọ a jọ etenẹ fa “gọẹgọ” na u dhesẹ epanọ odibo ọ rẹ rọ ohọ gba-ọgọdọ rọ ruẹrẹ oma kpahe kẹ iruo. Ẹme yena ọ sae jẹ kareghẹhọ omai oghẹrẹ nọ Jesu ọ rọ rehọ omokpa mu eku taure ọ tẹ te wozẹ awọ ilele riẹ. Ma te bi lele oriruo Jesu, kọ ma re rri oma mai inọ ma rro vi iruo jọ evaọ ukoko na? Omaurokpotọ mai u re dhesẹ oma via kẹ ahwo kpobi, wọhọ ẹsenọ ma rehọ iẹe gọ ẹgọ.

23, 24. (a) Fikieme ma jẹ whaha omorro? (b) Iroro ethọthọ vẹ kpahe omaurokpotọ uzoẹme nọ o rrọ aro na o te kpọvi?

²³ Omorro o wọhọ enua. O rẹ raha ohwo kuotọ. Ohwo nọ ọ maki wo onaa ziezi o te wo omorro, o re gbe fioka ha evaọ aro Ọghẹnẹ. Evaọ abọdekọ riẹ, makọ owhrori o te wo omaurokpotọ, ọ rẹ jọ ghaghae kẹ Jihova. Ma tẹ be daoma raro kele Kristi bi dhesẹ uruemu nana kẹdẹ kẹdẹ, a sae rọ unu gbiku eghale nọ ma ti wo ho. Pita o kere nọ: “Fikiere wha hrẹ oma rai kpotọ họ obọ otọ ogaga Ọghẹnẹ, re nọ uje te ezi ọvẹ kpare owhai kpehru.” (1 Pita 5:6) Jihova ọ ginẹ kpare Jesu kpehru fikinọ ọ roma kpotọ riẹriẹriẹ. Epọvo na Ọghẹnẹ mai ọ te ghale owhẹ kẹ omaurokpotọ ra.

²⁴ U yoma gaga inọ ahwo jọ a re roro nnọ ohwo nọ o wo omaurokpotọ yọ ọyẹlẹ. Oriruo Jesu u dhesẹ inọ ẹme yena yọ ọrue keme Jesu họ ohwo nọ ọ mai wo omaurokpotọ, yọ ọye ọ mae ga ẹro. Oye ma te ta kpahe evaọ uzoẹme nọ o rrọ aro na.

[Oruvẹ-obotọ]

Ẹvẹ Whọ Sai ro Lele Jesu?

● Oma o tẹ gwọlọ wọ owhẹ seha kpahe eware jọ nọ who ru, ẹvẹ oriruo Jesu ọ sai ro fi obọ họ kẹ owhẹ?—Matiu 12:15-19; Mak 7:35-37.

● Evaọ aruorokele Jesu, ẹvẹ whọ sai ro ru iruo nọ a re rri kuẹku evaọ ukoko na?—Jọn 21:1-13.

● Ẹvẹ oriruo Jesu o sai ro fi obọ họ kẹ owhẹ otẹrọnọ oma o be wọ owhẹ re who le okpodẹ gbe efe evaọ uyerakpọ nana?—Jọn 6:14, 15.

[Uwoho nọ o rrọ ẹwẹ-obe avọ 26]

“Ri, Ovie ra o bi bru owhẹ tha”