Kọ Obọ Ọghẹnẹ Emamọ Usi na U Gine No Ze?

1. Ono o wo eme Ebaibol na?

Emamọ usi na inọ ahwo a te rria bẹdẹ bẹdẹ evaọ otọakpọ na o rrọ Ebaibol na. (Olezi 37:29) Ebe udhosa-gbezeza (66) e rrọ Ebaibol na. Ọghẹnẹ ọ rehọ ezae udhuvẹ (40) kere Ebaibol na. Mosis o kere ebe isoi ọsosuọ Ebaibol na oware wọhọ ikpe idu esa gbe egba isoi (3,500) nọ i kpemu. Jọn ukọ na o kere obe urere Ebaibol na evaọ ikpe nọ i bu vrẹ ikpe odu ọvo gbe egba izii (1,900) nọ i kpemu. Ẹme ono ahwo na a kere? Ọghẹnẹ ọ jẹ rọ ẹkwoma ẹzi ọfuafo riẹ ta ẹme kẹ ahwo nọ a kere Ebaibol na. (2 Samuẹle 23:2) Ẹme Ọghẹnẹ a kere orọnikọ orọ obọrai hi. Fikiere Jihova họ Ọnọ o wo eme Ebaibol na.​—Se 2 Timoti 3:16; 2 Pita 1:20, 21.

Rri ividio na Ono o wo eme Ebaibol na?

2. Ẹvẹ o sai ro mu omai ẹro inọ eme Ebaibol na uzẹme?

Ma riẹ nọ Ebaibol na obọ Ọghẹnẹ u no ze keme o ta kpahe eware buobu nọ e te via evaọ obaro gbagba. Ohwo-akpọ ọvuọvo ọ sai ru oyena ha. (Joshua 23:14) Ọghẹnẹ Erumeru na ọvo ọ rẹ sae ta kpahe eware nọ e te via kẹ ahwo-akpọ evaọ obaro gbagba.​—Se Aizaya 42:9; 46:10.

Ma rẹ sai rẹro nọ obe nọ u no obọ Ọghẹnẹ ze o rẹ jọ oghẹrẹ sa, yọ ere o ginẹ rrọ. A fa Ebaibol na fihọ evẹrẹ buobu no yọ unu Ebaibol nọ a ru no, ẹkpẹhẹbe. Dede nọ u kri no nọ a ro kere Ebaibol na, o rọwo kugbe iwuhrẹ otọkiẹ-egbaeriariẹ. Ofariẹ, eme nọ ahwo udhuvẹ (40) na a kere, e wọso ohwohwo ho.a U te no ere no, oware nọ Ebaibol na o ta kpahe uyoyou o kẹ imuẹro inọ obọ Ọghẹnẹ eme yena i no ze, yọ Ebaibol na o wo ẹgba nọ o re ro nwene uzuazọ ahwo. Eware nana kpobi e kẹ ima ahwo buobu imuẹro inọ Ebaibol na yọ Ẹme Ọghẹnẹ.​—Se 1 Ahwo Tẹsalonika 2:13.

Rri ividio na Ẹvẹ o sai ro mu omai ẹro inọ eme nọ e rrọ Ebaibol na uzẹme?

3. Eme Ebaibol na ọ ta kpahe?

Ugogo oware jọ nọ Ebaibol na ọ ta kpahe họ, emamọ usi inọ Ọghẹnẹ o wo emamọ ẹjiroro kẹ ahwo-akpọ. Ebaibol na ọ ta kpahe epanọ ohwo-akpọ o ro ku uvẹ nọ ọ hae rọ rria aparadase otọakpọ kufiẹ gbe epanọ a ti ro zihe aparadase ze evaọ obaro.​—Se Eviavia 21:4, 5.

Ma rẹ sae jẹ jọ Ebaibol na ruẹ izi, ehri-izi, gbe ehrẹ. U te no ere no, Ebaibol na ọ ta kpahe oghẹrẹ nọ Ọghẹnẹ o ro yerikugbe ahwo-akpọ, onọ u fiobọhọ kẹ omai riẹ oghẹrẹ nọ Ọghẹnẹ ọ rrọ. Fikiere, Ebaibol na ọ rẹ sai fiobọhọ kẹ owhẹ riẹ Ọghẹnẹ. O ta kpahe epanọ whọ sae rọ jọ ogbẹnyusu riẹ.​—Se Olezi 19:7, 11; Jemis 2:23; 4:8.

4. Ẹvẹ whọ sai ro wo otoriẹ Ebaibol na?

Ibroshọ nana o te rọ oghẹrẹ ovona nọ Jesu o je ro ru ahwo riẹ Ebaibol na fiobọhọ kẹ owhẹ wo otoriẹ Ebaibol na. Jesu ọ jẹ hae fodẹ eria Ebaibol unọjọ utọjọ, kẹsena o ve ru ahwo riẹ “wo otoriẹ Ikereakere na.”​—Se Luk 24:27, 45.

A rẹ ruẹ obọ evawere nọ emamọ usi nọ u no obọ Ọghẹnẹ ze o rẹ kẹ hẹ. Ghele na, ahwo jọ a be gwọlọ yoi hi, yọ eva e rẹ tubẹ dha amọfa kpahe emamọ usi na. Rekọ ajọ oma o lọhọ owhẹ hẹ. Re whọ sai wo uzuazọ ebẹdẹ bẹdẹ o gwọlọ nọ whọ rẹ riẹ Ọghẹnẹ.​—Se Jọn 17:3.