Uvie nọ U ti Su Otọakpọ na Soso

Kọ whọ riẹ Uvie oyena?— Ee, Uvie Ọghẹnẹ, onọ u ti zihe otọakpọ na kpobi ruọ aparadase. Kọ o te were owhẹ re who wuhrẹ eware efa kpahe Uvie nana?—

Uvie kpobi u re wo ovie. Yọ ovie na o re su ahwo ẹwho na. Kọ whọ riẹ Ovie nọ o ti su Uvie Ọghẹnẹ?— Jesu Kristi; yọ ọ rrọ obọ odhiwu. Kẹle na o ti su ahwo otọakpọ na kpobi. Kọ who roro nọ eva e te were omai okenọ Jesu o ti su otọakpọ na soso?—

Eva e te were omai gaga. Ahwo a te họre hayo fi ẹmo evaọ Aparadase he. Ahwo kpobi a ti you ohwohwo. Ahwo a te gbẹ mọ hayo whu hu. Ahwo nọ a tuaro a te ruẹ ude, enọ i diezọ a ti yo ẹme, yọ enọ e be sae nya ha, a te dhẹ ohrẹ je duola. Emu ọ te jariẹ buobu nọ ahwo a te re. Erao na kpobi a te rria dhedhẹ, yọ ma ti lele ai zaharo. A te kpare ahwo nọ a whu no ze. Ezae gbe eyae buobu nọ who wuhrẹ kpahe evaọ ibroshọ nana, wọhọ Rebeka, Rehab, Devidi, gbe Elaeja, a te wariẹ ziọ uzuazọ re. Kọ o gbẹ te were owhẹ re whọ ruẹ e rai nọ a tẹ kpare ae ze no?—

Jihova o you owhẹ yọ ọ gwọlọ nọ eva e rẹ were owhẹ. Who te bi wuhrẹ kpahe Jihova je bi yoẹme kẹe, whọ te rria bẹdẹ bẹdẹ evaọ aparadase otọakpọ. Kọ o were owhẹ ere?—