Diẹse A Jọ Yẹ Jesu, Kọ Oke Vẹ A Yẹ Riẹ?

Ọba Rom nọ a re se Siza Ọgọstọs o j’uzi nọ ohwo kpobi o kpohọ ẹwho nọ a jọ yẹi nyai fi odẹ h’otọ. Fikiere Josẹf avọ Meri a tẹ nyai fi odẹ h’otọ evaọ Bẹtlẹhẹm ẹwho nọ a jọ yẹ ai nọ ọ kẹle Jerusalẹm.

Ahwo buobu a ziọ Bẹtlẹhẹm ti fi odẹ h’otọ. Nọ Josẹf avọ Meri a te obei, a ruẹ oria ovo wohọ họ, fikiere a te wohọ uwou-erao, oria nọ a be jọ thuru eketekete gbe erao efa. Etẹe a jọ yẹ Jesu. Meri ọ tẹ rọ ewẹ-ohọ variẹe, ọ tẹ wọe kiẹzẹ etehe nọ a re fi emu họ kẹ erao.

U muẹro nọ Ọghẹnẹ họ ọnọ o ru nọ Siza Ọgọstọs o ro j’uzi inọ ohwo kpobi ọ nyai fi odẹ h’otọ na. Ẹvẹ ma rọ ta ere? Keme uzi na u ru rie lọhọ nọ a ro yẹ Jesu evaọ Bẹtlẹhẹm, ẹwho Devidi ovie na, ọsẹ-ode riẹ. A ruẹaro riẹ fihọ Ikereakere na no anwẹdẹ inọ Bẹtlẹhẹm a te jọ yẹ Osu nọ a ya eyaa riẹ na.—Maeka 5:2.

Aso nọ a ro yẹ Jesu na o wuzou gaga. Elo ọnwranwra o lo wariẹ ithuru-igodẹ jọ họ evaọ obọ ẹwọ. Oruaro Jihova u lo wariẹ ae họ na. Ukọ-odhiwu jọ ọ tẹ ta kẹ ithuru-igodẹ na nọ: “Jọ ozọ u mu owhai hi, keme rri! mẹ be vuẹ owhai emamọ usi orọ oghọghọ ulogbo nọ ahwo kpobi a ti wo. Keme nẹnẹ na a jọ ẹwho Devidi yẹ osiwi kẹ owhai, Kristi Olori na. Onana họ oka nọ wha ti ro vuhu iei: Wha te ruẹ ọmọfofa nọ a rehọ ewẹ-ohọ variẹ nọ a ro kiẹzẹ etehe nọ a re fi emu họ kẹ erao.” Idudhe na, ikọ-odhiwu buobu e tẹ romavia jẹ ta nọ: “Oruaro u te Ọghẹnẹ evaọ obọ odhiwu, gbe udhedhẹ kẹ ahwo nọ a wo emamọ eva evaọ otọakpọ.”—Luk 2:10-14.

Nọ ikọ-odhiwu na e nyavrẹ no, ithuru-igodẹ na a tẹ jẹ ta kẹ ohwohwo nọ: “Wha joma nya ovavo kpobọ Bẹtlẹhẹm re ma ruẹ oware nọ o via na, nọ Jihova o ru omai riẹ na.” (Luk 2:15) A tẹ ruọ edhere ovovẹrẹ bi kpohọ obonọ ukọ-odhiwu na o dhesẹ kẹ ae na, a tẹ jọ etẹe ruẹ Jesu. Nọ ithuru-igodẹ na a gbiku eware nọ ukọ-odhiwu na ọ ta kẹ ae, akpọ o te gbe ahwo kpobi nọ a yo iku na unu. Meri o te fi eme nana kpobi họ udu riẹ, bi roro kpahe otofa eware nana.

Ahwo buobu a roro nọ edẹ 25 Akpegbivẹ a ro yẹ Jesu. Rekọ amara Akpegbivẹ yọ ezi oso avọ ekpahe evaọ Bẹtlẹhẹm. Yọ ẹsejọ dede, edhedhẹ na ọ rẹ ga te epanọ ekpalekpa-ame i re ro kie no ehru ze. Etoke yena evaọ ukpe na, ithuru-igodẹ avọ igodẹ rai a sae jọ obọ ẹwọ evaọ aso ho. U te no ere no, Siza ọba Rom nọ esuo riẹ ọ be were ahwo vẹre he na, ọ hae sae gbaudu ta kẹ ahwo na nọ a nyai fi odẹ h’otọ evaọ etoke ekpahe egaga itieye he, onya ugbo nọ o rẹ rehọ edẹ buobu. U muẹro nọ amara Akpe a yẹ Jesu.