Ọmọ nọ A Ya Eyaa Riẹ Na

Josẹf avọ Meri a gbe zihe kpobọ Nazarẹt he, a tẹ daji Bẹtlẹhẹm. Nọ Jesu o te edẹ eree no, a tẹ yawo iẹe wọhọ epanọ Uzi nọ Ọghẹnẹ ọ kẹ emọ Izrẹl o ta. (Iruo-Izerẹ 12:2, 3) O jọ uruemu ahwo oke yena re a mu odẹ kẹ ọmọzae evaọ ẹdẹ avọ eree na re. A te se ọmọ na Jesu, wọhọ epanọ Gebriẹl ukọ-odhiwu na ọ ta kẹ ae.

Nọ Jesu ọ kpako te edẹ 40 no, ọsẹgboni riẹ a tẹ rehọ iẹe kpohọ oria jọ. Bovẹ a rehọ e riẹ nya? Obọ Jerusalẹm, nọ o rehọ umutho emaele jọ thabọ no oria nọ a be rria. Uzi nọ Ọghẹnẹ ọ kẹ emọ Izrẹl o ta nọ, a te yẹ ọmọzae, nọ edẹ 40 e jẹ vrẹ no, oni ọmọ na o re kpobọ etẹmpol na nyai dhe idhe nọ o re ro ru oma riẹ fo.—Iruo-Izerẹ 12:4-7.

Ere Meri o ru. Ọ rehọ emevra ekakao ivẹ ro dhe idhe. Onana u dhesẹ epanọ eware e jọ kẹ Josẹf avọ Meri. Uzi na o ta nọ ohwo ọ rẹ rọ omogodẹ gbe ọmọvra ro dhe idhe. Rekọ obọ oni na u gbe te omogodẹ hẹ, ọ vẹ rọ irueruẹ ivẹ hayo ilekuku ivẹ ro dhe idhe. Fikinọ Meri o wo ugho ho, oye o soriẹ nọ ọ rọ rehọ evra ivẹ ro dhe idhe na.

Nọ Josẹf avọ Meri a jọ obọ etẹmpol na, ọkpọkuọzae jọ ọ tẹ nya bru rai. Odẹ riẹ Simiọn. Ọghẹnẹ ọ vuẹ riẹ nọ taure o te ti whu ọ te ruẹ Mesaya hayo Kristi nọ a ya eyaa riẹ na. Ẹdẹ nọ a rọ rehọ Jesu kpobọ etẹmpol na, ẹzi ọfuafo na ọ tẹ kpọ Simiọn kpobọ etẹmpol na, ọ tẹ ruẹ Josẹf avọ Meri gbe ọmọfofa na. Simiọn ọ tẹ wọ ọmọ na.

Nọ ọmọ na ọ rrọ Simiọn obọ na, o te bi yere Ọghẹnẹ nọ: “O, Olori Ehrugbakpọ, odibo ra ọ rẹ sai whu dhedhẹ enẹna wọhọ epanọ whọ ta, keme ibiaro mẹ e ruẹ ọnọ whọ be rọ kẹ esiwo no nọ whọ ruẹrẹhọ no evaọ iraro ahwo na kpobi, elo nọ o ti si ebi no erẹwho na, ọ tẹ jẹ rrọ oruaro ọrọ ahwo ra Izrẹl.”—Luk 2:29-32.

Nọ Josẹf avọ Meri a yo eme yena, akpọ o gbe rai unu. Simiọn ọ tẹ lẹ olẹ eghale kẹ ae jẹ ta kẹ Meri nọ ọmọ riẹ na “ọ te lẹliẹ ahwo buobu kie jẹ lẹliẹ ahwo buobu wariẹ kpama evaọ Izrẹl” gbe nọ a ti duwu ọgbọdọ othethei họ Meri lafi, onọ u dhesẹ uweri nọ o te dae oma fia.—Luk 2:34.

Omọfa ọ jọ etẹe ẹdẹ yena re. Odẹ riẹ Anna, ọruẹaro-aye nọ ọ kpako te ikpe 84 no. Ọ jẹ hai kpobọ etẹmpol na ẹsikpobi. Evaọ oke yena nọ Simiọn ọ rrọ kugbe Josẹf avọ Meri gbe Jesu na, Anna ọ tẹ nya bru rai ze. Anna o te mu Ọghẹnẹ họ eyere jẹ be vuẹ ahwo kpobi kpahe Jesu.

A rẹ ruẹ unu gbiku eva nọ e jẹ were Josẹf avọ Meri hi kpahe eware nana nọ e via evaọ etẹmpol na. Ababọ avro, eware nana kpobi e kẹ rai imuẹro inọ ọmọ rai na họ Ọnọ Ọghẹnẹ ọ ya eyaa riẹ na.