Jọn Ọhọahwo-Ame na Ọ Ruẹrẹ Edhere na Họ

Ikpe 17 e vrẹ no anwẹnọ Jesu nọ ọ jọ ikpe 12 ọ jẹ rọ nọ iwuhrẹ na enọ evaọ etẹmpol na. O jọ amara Asa hayo Ane ọrọ ukpe 29 C.E. Ahwo buobu a be ta ẹme kpahe Jọn, omoni Jesu nọ ọ be ta usiuwoma evaọ ewho nọ e rrọ ofẹ ovatha-ọre Ethẹ Jọdan.

Jọn ọ jọ ohwo oghẹrẹsa evaọ ẹgọ gbe ẹmeunu riẹ. Eto ekamẹle a ro ru ewu riẹ, yọ ọ jẹ hae rọ umueku oviẹ-arao mu eku riẹ. Ebaka-ẹkpẹ gbe ọnyọ họ emu nọ ọ jẹ re. Kọ didi ovuẹ o je whowho? O je whowho nọ: “Wha kurẹriẹ, keme Uvie odhiwu o kẹle no.”—Matiu 3:2.

Ovuẹ Jọn o jẹ were ahwo nọ a nyaze te gaviezọ kẹe. Ibuobu rai a ruẹ nọ u fo re a kurẹriẹ, koyehọ a re siobọno eware iyoma nọ a je ru vẹre. Ahwo a je no “Jerusalẹm gbe Judia kpobi gbe ewho nọ e wariẹ Jọdan họ kpobi” bru ei ze. (Matiu 3:5) Ibuobu nọ e nyaze te gaviezọ kẹ Jọn a kurẹriẹ. Ọ tẹ jẹ họ ae ame, o je duwu ae họ ame le no evaọ ethẹ Jọdan. Fikieme?

Jọn ọ họ ahwo ame, onọ u dhesẹ nọ a kurẹriẹ no izi Ọghẹnẹ nọ a thọ, enọ ọ rọ re-ọvọ kugbe orẹwho Izrẹl. (Iruẹru Ikọ 19:4) Rekọ orọnọ ahwo kpobi a kurẹriẹ jẹ họ-ame he. Nọ otu Farisi gbe Sadusi a nya bru Jọn ze, o se rai “emọ eriwhẹ.” Kẹsena ọ tẹ ta kẹ ae nọ: “Wha mọ ibi nọ i re dhesẹ ekurẹriẹ. Wha jọ udu rai ta ha inọ, ‘Abraham họ ọsẹ mai.’ Keme mẹ be ta kẹ owhai nọ Ọghẹnẹ ọ rẹ sai zihe itho nana ruọ emọ kẹ Abraham. Ma be ta ẹme na, ewhe ọ rrọ otọ ire na no. Fikiere, ure kpobi nọ o be mọ emamọ ubi hi, a re ti koi fihọ otọ a ve gbolo iei fihọ erae.”—Matiu 3:7-10.

Fikinọ ahwo a je zurie bru Jọn ze, yọ ovuẹ riẹ u je duobọte ahwo udu, gbe nọ ọ jẹ họ ahwo buobu ame, a te vi izerẹ gbe otu Livai bru ei nyae nọe nọ: “Whẹ yọ ono?”

Jọn ọ tẹ kẹ ae uyo nọ: “Mẹ họ Kristi na ha.”

A tẹ wariẹ nọe nọ: “Kọ whẹ yọ ono? Whẹ yọ Elaeja?”

Ọ tẹ kuyo nọ: “Ijo.”

Kẹsena a tẹ wariẹ nọe nọ: “Kọ whẹ họ ọruẹaro nọ ọ be tha na?” A gwọlọ riẹ sọ ọye họ Ọruẹaro ologbo nọ Mosis ọ ta nọ ọ te tha na.—Iziewariẹ 18:15, 18.

Jọn ọ tẹ jẹ kpahe kẹ ae nọ: “Ijo!”

A tẹ gbẹ be nọe ghele nọ: “Whẹ yọ ono? Ta kẹ omai re ma sae ruẹ uyo kẹ enọ i vi omai ze. Eme whọ be ta kpahe omara?” Jọn ọ tẹ ta nọ: “Mẹ yọ uvou ohwo jọ nọ o bi se evaọ obọ udhude, ‘Wha ru edhere Jihova liọ,’ wọhọ epanọ Aizaya ọruẹaro na ọ ta.”—Jọn 1:19-23.

A tẹ nọe nọ: “Kọ fikieme whọ be rọ họ ahwo ame otẹrọnọ whẹ họ Kristi hayo Elaeja hayo ọruẹaro nọ ọ be tha na ha?” Jọn ọ tẹ kẹ ae uyo nọ: “Ame mẹ be rọ họ [ahwo] ame. Ohwo jọ ọ rrọ udevie rai na nọ wha riẹ hẹ, ọnọ ọ rrọ emu mẹ nyaze.”—Jọn 1:25-27.

Ẹhẹ, Jọn ọ ta nọ ọ be ruẹrẹ edhere na họ, koyehọ o bi fiobọhọ kẹ ahwo wo oghẹrẹ udu nọ a sae rọ jẹ Mesaya nọ a ya eyaa riẹ na rehọ, ọnọ ọ te jọ Ovie na. Jọn ọ ta kpahe ọnọ ọ be tha na nọ: “Ọnọ ọ rrọ emu mẹ nyaze na ọ ga vi omẹ, me te epanọ mẹ sae rọ ba eviẹ noi awọ họ.” (Matiu 3:11) Jọn ọ tubẹ ta nọ: “Ọnọ ọ rrọ emu mẹ nyaze na o kparo vi omẹ no keme ọ kake rọ omẹ ziọ uzuazọ.”—Jọn 1:15.

Fikiere, ovuẹ Jọn na u fo gaga inọ, “Wha kurẹriẹ, keme Uvie odhiwu o kẹle no.” (Matiu 3:2) Onana u dhesẹ kẹ ahwo kpobi inọ iruo odibọgba Jesu Kristi Ovie na, ọnọ Jihova o bi vi ze na, i bi ti muhọ.