Jesu O Wo Ọwhọ kẹ Egagọ Uzẹme

Nọ ehaa orọo obọ Kena e nwani kuhọ no, Jesu ọ tẹ ruọ edhere bi kpobọ Kapaniọm. Oni Jesu gbe inievo Jesu nọ a re se Jemis, Josẹf, Saemọn, gbe Judas a jọ usu na re.

Kọ fikieme Jesu o ro kpobọ Kapaniọm? Okpẹwho nana o rro vi Nazarẹt gbe Kena, yọ oye ahwo a mae riẹ. U te no ere no, ibuobu ilele nọ Jesu o wo obọ na a be rria ẹwho Kapaniọm hayo kẹle etẹe. Fikiere onana u ti ru nọ Jesu ọ te sai ro wuhrẹ ai lọlọhọ.

Evaọ etoke nọ Jesu ọ rọ jọ Kapaniọm na, o ru iruo igbunu re. Onana u ru nọ ahwo buobu evaọ okpẹwho na gbe ewho nọ e kẹle riẹ a ro yo kpahe eware nọ o ru evaọ Kapaniọm. Rekọ uviemenẹ Jesu avọ ilele riẹ nọ e rrọ ahwo Ju na a ti kpobọ Jerusalẹm rọkẹ ehaa Ọnyavrẹ orọ ukpe 30 C.E.

Nọ a jọ etẹmpol obọ Jerusalẹm, ilele Jesu a ruẹ oware jọ nọ Jesu o ru nọ u gbe rai unu, onọ o ri ru ẹdẹvo ho.

Uzi nọ Ọghẹnẹ ọ kẹ emọ Izrẹl o ta nọ a rẹ rọ erao dhe idhe evaọ etẹmpol na, yọ erara nọ e ziọ ehaa na a rẹ dẹ emu nọ a rẹ re. Fikiere Uzi na o kuvẹ nọ ohwo nọ o bi no ugbothabọ ziọ Jerusalẹm kẹ ehaa nana ọ sae wha ugho lele oma nọ ọ rẹ rọ dẹ “eruẹ, hayo ogodẹ,” hayo ẹwe gbe oware ofa kpobi nọ ọ gwọlọ evaọ etoke nọ ọ te rria okpẹwho na. (Iziewariẹ 14:24-26) Onana o wha riẹ ze nọ ehreki nọ e rrọ Jerusalẹm a jẹ rọ zẹ erao gbe evra evaọ ọgwa ologbo jọ nọ ọ rrọ etẹmpol na. Yọ ehreki jọ a jẹ wha ahwo na re keme a jẹ zẹ eware na ghare hrọ.

Onana o kẹ Jesu uye gaga, fikiere o te gele igho inwene-igho na fihọ otọ, tu emẹjẹ rai gale uzou vi je le ehreki na ruọ otafe. Kẹsena ọ tẹ ta nọ: “Wha wọ eware nana no etenẹ! Wha gbe ru uwou Ọsẹ mẹ họ uwou eki hi!”—Jọn 2:16.

Nọ ilele Jesu a ruẹ onana, a tẹ kareghẹhọ eruẹaruẹ nọ a ruẹ kpahe Ọmọ Ọghẹnẹ, inọ: “Ọwhọ kẹ uwou ra o te da omẹ oma fia.” Rekọ ahwo Ju na a tẹ nọ inọ: “Didi oka whọ rẹ sai dhesẹ kẹ omai re ma riẹ nọ who wo udu nọ who re ro ru eware nana?” Jesu ọ tẹ ta kẹ ae nọ: “Wha kporo etẹmpol nana fihọ otọ, mẹ te bọe evaọ edẹ esa.”—Jọn 2:17-19; Olezi 69:9.

Ahwo Ju na a je roro nọ etẹmpol na dẹẹ Jesu ọ be ta kpahe na, fikiere a tẹ nọe nọ: “Ikpe udhuvẹ gbe ezeza a rọ bọ etẹmpol nana, kọ whọ te bọe evaọ edẹ esa?” (Jọn 2:20) Rekọ ugboma riẹ Jesu o je ro dhesẹ etẹmpol na. Nọ ikpe esa e vrẹ no, ilele riẹ a tẹ kareghẹhọ ẹme nana nọ Jesu ọ kparoma no uwhu ze no.