A Koko Omai Họ re Ma Ru Oreva Jihova

EVAỌ akpọ na soso, ikoko buobu e riẹ, ikoko egagọ, erọ isuẹsu, ekiọthuọ, egwae gbe itu sa-sa nọ i wo oghẹrẹ iruemu, ẹjiroro, eriwo gbe iwuhrẹ sa-sa. Rekọ ukoko ovo jọ o riẹ nọ u wo ohẹriẹ gaga no edekọ na kpobi. Ẹme Ọghẹnẹ o dhesẹ vevẹ nọ ukoko yena họ Isẹri Jihova.

² O rrọ oware evawere inọ whọ rrọ ukoko Jihova. Who bi ru oreva Ọghẹnẹ enẹna keme who wuhrẹ oware nọ oreva Ọghẹnẹ o rrọ no. (Ol. 143:10; Rom 12:2) Whẹ yọ ọgbodibo nọ o bi ru iruo ẹsikpobi evaọ usu inievo iyoyou akpọ-soso. (2 Kọr. 6:4; 1 Pita 2:17; 5:9) Onana o be wha eghale buobu gbe evawere se owhẹ wọhọ epanọ a ya eyaa riẹ evaọ Ẹme Ọghẹnẹ. (Itẹ 10:22; Mak 10:30) Who te bi ru oreva Jihova ziezi enẹna, yọ a be ruẹrẹ owhẹ kpahe kẹ akpọ nọ whọ te jọ rria emamọ uzuazọ bẹdẹ bẹdẹ.—1 Tim. 6:18, 19; 1 Jọn 2:17.

³ Ọmemama Oride mai o wo ukoko akpọ-soso nọ o rrọ oghẹrẹsa nọ o be nya lele ekpakpọ Ọghẹnẹ. Onana u dhesẹ nọ Jihova nọ o wuzou ahwo kpobi na họ ọnọ o bi su ukoko na. Ma fi eva kpobi họ iẹe. Ọye họ Obruoziẹ mai, Ọkẹ-Uzi mai, gbe Ovie mai. (Aiz. 33:22) Fikinọ ọ rrọ Ọghẹnẹ nọ o re ru eware kpatiẹ, o ru eruẹrẹfihotọ no nọ ma re ro “lele iei ru iruo” rọ wha ẹjiroro riẹ haro.—2 Kọr. 6:1, 2.

⁴ Nọ ekuhọ uyero-akpọ nana u bi si kẹle kẹdẹ kẹdẹ na, ma be nyaharo evaọ otọ esuo Ovie nọ a ro mu na, Kristi Jesu. (Aiz. 55:4; Evia. 6:2; 11:15) Jesu ọvo ọ rọ unu riẹ ta nọ ilele riẹ a ti ru iruo nọ e rro vi enọ o ru evaọ etoke odibọgba riẹ evaọ otọakpọ. (Jọn 14:12) O te jọ ere keme ilele Jesu a te jọ ẹkwotọ nọ o ti dhe ẹruẹruọ ta usi uwoma fikinọ a ti wo oke thethei je ti dhe ebuebu. A ti whowho usi uwoma Uvie na rite oka avọ oka otọakpọ na.—Mat. 24:14; 28:19, 20; Iruẹru 1:8.

⁵ Onana u gine rugba no wọhọ epanọ ma be hae ruẹ na. Rekọ, wọhọ epanọ Jesu ọ ta vevẹ, iruo ewhowho usi uwoma na u ti kuhọ evaọ oke nọ Jihova o fihọ. Eruẹaruẹ nọ e rrọ Ebaibol na i dhesẹ vevẹ nọ ẹdẹ ologbo Jihova nọ o re mu ọwhewhe na ọ kẹle no.—Joẹl 2:31; Zẹf. 1:14-18; 2:2, 3; 1 Pita 4:7.

⁶ Nọ ma bi vuhu oware nọ oreva Jihova o rrọ mu evaọ auwa urere nana, o gwọlọ nọ ma rẹ daoma vi epaọ anwẹdẹ ru oware nọ Ọghẹnẹ ọ gwọlọ. Onana o gwọlọ nọ ma rẹ riẹ eruẹrẹfihotọ nọ e rrọ ukoko Ọghẹnẹ ziezi je ru oware kpobi nọ ukoko na o ta. Ehri-izi nọ e rrọ Ikereakere na a be rọ kpọ ukoko na, koyehọ ijaje, izi, gbe iwuhrẹ nọ e rrọ Ẹme Ọghẹnẹ nọ a rọ ẹgba ẹzi riẹ kere na.—Ol. 19:7-9.

⁷ Fikinọ ahwo Jihova a be nya lele ithubro itieye na nọ i no Ebaibol ze na, a be rria je ru iruo kugbe evaọ udhedhẹ gbe okugbe ọvo. (Ol. 133:1; Aiz. 60:17; Rom 14:19) Eme o ru okugbe nọ ọ rrọ udevie inievo mai evaọ oria kpobi na rrọ gaga? Uyoyou. Uyoyou o be wọ omai ru eware, yọ ma whẹ riẹ họ oma wọhọ ewu. (Jọn 13:34, 35; Kọl. 3:14) Okugbe nana nọ Ọghẹnẹ ọ rọ ghale omai na u bi fiobọhọ kẹ omai nya lele abọ obọ odhiwu ọrọ ukoko Jihova.

ABỌ OBỌ ODHIWU ỌRỌ UKOKO JIHOVA

⁸ Aizaya, Izikiẹl, gbe Daniẹl, eruẹaro na, a jọ eruẹaruẹ ruẹ abọ obọ odhiwu ọrọ ukoko Jihova. (Aiz., uzou avọ 6; Izik., uzou 1; Dan. 7:9, 10) Epọvo na re, Jọn ukọ na ọ jọ eruẹaruẹ ruẹ epanọ eware e rrọ evaọ obọ odhiwu, o te gbe imiku riẹ kẹ omai evaọ obe Eviavia. Ọ ruẹ Jihova evaọ agbara-uvie oruaro avọ ikọ-odhiwu nọ e wariẹ e riẹ họ nọ i bi whowho nọ: “Ọrẹri, ọrẹri, ọrẹri na họ Jihova Ọghẹnẹ, Erumeru na, ọnọ ọ jọ, nọ ọ rrọ, nọ ọ be tha na.” (Evia. 4:8) Jọn ọ tẹ jẹ ruẹ “omogodẹ jọ . . . nọ o dikihẹ aro agbara-uvie na,” Omogodẹ Ọghẹnẹ, Jesu Kristi.—Evia. 5:6, 13, 14; Jọn 1:29.

⁹ Eruẹaruẹ nana nọ a jọ ruẹ Jihova nọ ọ keria agbara-uvie na u dhesẹ nọ Jihova họ Ọnọ o wuzou ukoko nana. Obe 1 Iruẹru-Ivie 29:11, 12 o ta kpahe iẹe gbe ọkwa okpehru riẹ nọ: “O Jihova, whọ rrọ ruaro, who wo ẹgba, who wo erru, who re mu urirẹ, who te je wo oruaro, keme eware kpobi nọ e rrọ idhiwu gbe otọakpọ na era. O Jihova, whẹ o wo uvie na. Whẹ họ Ọnọ o ru omara wuzou eware kpobi. Obọ ra efe gbe oruaro i no ze, who bi su eware kpobi, yọ ogaga gbe ẹgba e rrọ owhẹ obọ, obọ ra o rẹ sai ru ohwo jọ ruaro, o rẹ jẹ kẹ ahwo kpobi ẹgba.”

¹⁰ Jesu Kristi nọ ọ rrọ ibe oruiruo Jihova, o wo ọkwa okpehru evaọ obọ odhiwu, yọ a kẹ riẹ udu-esuo ulogbo no. Evaọ uzẹme, Ọghẹnẹ o “fi eware kpobi họ otọ awọ riẹ, jẹ rehọ iẹe mu ọnọ o wuzou eware kpobi evaọ ukoko na.” (Ẹf. 1:22) Pọl ukọ na ọ ta kpahe Jesu nọ: “Ọghẹnẹ ọ kpare riẹ fihọ ọkwa nọ o kpehru vi onọ ọ jọ vẹre jẹ kẹe odẹ nọ o rro vi odẹ ofa kpobi, re ighilawọ kpobi i kigwẹ evaọ odẹ Jesu, ighilawọ enọ e rrọ obọ odhiwu gbe otọakpọ gbe obọ otọ ẹkpẹ na—re ẹrọo kpobi ọ jẹ ta via nọ Jesu Kristi họ Olori, onọ o rẹ wha oruaro se Ọghẹnẹ Ọsẹ na.” (Fil. 2:9-11) Fikiere, ma rẹ sai fi eva kpobi họ esuo okiẹrẹe Jesu Kristi.

¹¹ Daniẹl ọruẹaro na ọ jọ eruẹaruẹ ruẹ Ọnọ Ọ Rrọ no Anwae Ze na evaọ agbara-uvie Riẹ evaọ obọ odhiwu, yọ ikọ-odhiwu nọ i bu te “odu idu a jẹ gbodibo kẹe, yọ idu ikpe akwa idu ikpe a dikihẹ aro riẹ.” (Dan. 7:10) Ebaibol na o se ogbaẹmo ikọ-odhiwu nana “izi nọ i bi ru iruo ọrẹri . . . , enọ a vi re a gbodibo kẹ enọ i ti wo esiwo.” (Hib. 1:14) A ruẹrẹ emama ẹzi nana kpobi fihọ ‘egbara-uvie, ọkwa-ilori, egọmeti, gbe udu-esuo.’—Kọl. 1:16.

¹² Ma tẹ romatotọ roro kpahe eware nana nọ e rrọ abọ obọ odhiwu ukoko Jihova na, ma rẹ sai wo otoriẹ oware nọ o lẹliẹ ọwhewhe mu Aizaya nọ ọ jọ eruẹaruẹ “ruẹ Jihova nọ ọ keria agbara-uvie okpekpehru” yọ “sẹraf i dikihẹ obọ ehru riẹ.” Aizaya ọ ta nọ: “Uye u te omẹ! Mẹ te seba ewhu hu, keme mẹ yọ ohwo nọ igbenu riẹ e fo ho, yọ mẹ be rria udevie ahwo nọ igbenu rai e fo ho; keme ibiaro mẹ e ruẹ Ovie na no, Jihova olori egbaẹmo omariẹ!” Evaọ uzẹme, u gbe Aizaya unu, o te je rri omariẹ kakao nọ o wo otoriẹ epanọ ukoko Jihova o rro te. Oware nọ ọ ruẹ na u duobọtei te epanọ okenọ a se use jọ no obọ odhiwu ze rọkẹ iruo obọdẹ jọ nọ a re ro whowho ẹdhoguo Jihova, Aizaya ọ tẹ ta nọ: “Mẹ na! Vi omẹ.”—Aiz. 6:1-5, 8.

¹³ Ukoko Jihova nọ ahwo Riẹ a rẹ riẹ je vuhumu u re duobọte ai oghẹrẹ ovona. Nọ ukoko na o be nyaharo na, ma rẹ daoma nya lele iei. Ma rẹ daoma dhesẹ nẹnẹ inọ ma fievahọ ukoko Jihova.

UKOKO JIHOVA O BE NYAHARO

¹⁴ Evaọ eruẹaruẹ Izikiẹl nọ e rrọ uzou 1 obe Izikiẹl, a dhesẹ Jihova inọ ọ be dhẹ akẹkẹ ologbo evaọ obọ odhiwu. Akẹkẹ oruaro nana o dikihẹ kẹ abọ ukoko Jihova nọ a rẹ ruẹ hẹ. Ọ be dhẹ akẹkẹ nana evaọ oghẹrẹ nọ ọ be rọ rehọ uyoyou kpọe jẹ be rehọ iẹe ru lele ẹjiroro riẹ.—Ol. 103:20.

¹⁵ Etẹ akẹkẹ nana ọvuọvo o wo ẹtẹ ọfa evaọ eva riẹ—etẹ ivẹ na ẹrẹrẹe, yọ i where ohwohwo. Fikinọ i where ohwohwo na, e rẹ sae “nya kpohọ ofẹ kpobi evaọ ofẹ ene na.” (Izik. 1:17) Etẹ na e rẹ sae nya kpohọ ofẹ kpobi idudhe. O make rrọ ere na, orọnikọ akẹkẹ nana o bi mu dhẹ ababọ ohwo nọ ọ be kpọe he. Jihova ọ rẹ kẹ ukoko riẹ uvẹ re o kpohọ obonọ u je rie kpobi hi. Izikiẹl 1:20 o ta nọ: “A rẹ nya kpohọ oria kpobi nọ ẹzi na ọ kpọ rai nọ a nya.” Fikiere Jihova họ ọnọ o bi ru ukoko riẹ kpohọ oria kpobi nọ ẹzi riẹ ọ kpọ riẹ kpohọ. Onọ nọ o gba omai họ nọ ma rẹ nọ omamai họ, ‘Kọ mẹ be nya lele iei kpekpekpe?’

¹⁶ Re a nya lele ukoko Jihova kpekpekpe u vi iwuhrẹ nọ ma rẹ nya gbe usi uwoma nọ ma rẹ ta. Oware ọsosuọ nọ u re dhesẹ nọ ma be nya lele iei họ, ma re wo ẹnyaharo evaọ ukoko na je ru usu mai kugbe Ọghẹnẹ jọ gaga. Ma re “vuhu eware nọ e mae roja” jẹ riẹ eware nọ ukoko na u bi wuhrẹ omai jẹ nya lele ai. (Fil. 1:10; 4:8, 9; Jọn 17:3) Ma rẹ jẹ kareghẹhọ re inọ oria nọ eware e be jọ nya kpatiẹ yọ oria nọ a jọ wo emamọ ọruẹrẹfihotọ, a te je bi ru lele ọruẹrẹfihotọ na. Fikiere o gwọlọ nọ ma rẹ riẹ epanọ u wuzou te re ma rehọ eware kpobi nọ Jihova o mu họ omai obọ ro ru iruo ziezi re ma sai ru iruo riẹ gba. Nọ ma be nya lele akẹkẹ obọ odhiwu Jihova na, ma re yeri uzuazọ rọwokugbe ovuẹ nọ ma bi whowho na.

¹⁷ Ukoko Jihova u bi fiobọhọ kẹ omai nyaharo evaọ oreva Ọghẹnẹ uruo. Kareghẹhọ inọ Jihova họ Ọnọ ọ be dhẹ akẹkẹ obọ odhiwu nana. Fikiere, ma tẹ be nya lele akẹkẹ Jihova u dhesẹ nọ ma wo adhẹẹ kẹ Jihova je fievahọ iẹe inọ ọye họ Utho mai. (Ol. 18:31) Ebaibol na ọ ya eyaa nọ: “Jihova ọ te kẹ ahwo riẹ ẹgba. Jihova ọ te rọ udhedhẹ ghale ahwo riẹ.” (Ol. 29:11) Fikinọ ma rrọ ukoko Jihova nẹnẹ, ma bi wo ẹgba nọ ọ be kẹ jẹ reawere udhedhẹ nọ ọ be rọ ghale ahwo riẹ nọ o kokohọ. Ẹhẹ, avro ọ riẹ hẹ, ma ti gbe wo eghale buobu nọ ma be ruabọhọ ru oreva Jihova enẹna je rite ebẹdẹ bẹdẹ.