“Wha Kareghẹhọ Enọ E be Kobaro Evaọ Udevie Rai”

EME nana nọ Pọl ukọ na ọ ta na nọ a kere fihọ obe Ahwo Hibru 13:7 na, a rẹ jẹ sae fa ae: “Kareghẹhọ enọ e be kpọ owhai.” No Pẹntikọst 33 C.E. vrẹ, ikọ Olori na Jesu Kristi a jọ utu ẹruorote nọ o jẹ kpọ eware evaọ ukoko Ileleikristi nọ o tohọ obọ na. (Iruẹru 6:2-4) Oware wọhọ ukpe 49 C.E., a te ti ku amọfa nọ a jọ usu ikọ Jesu hu kugbe utu ẹruorote nana. Evaọ okenọ a ro ku ẹme oyawo na họ, “ikọ na gbe ekpako na evaọ obọ Jerusalẹm” a jọ utu ẹruorote na. (Iruẹru 15:1, 2) Owha-iruo rai o jọ re a jiroro kpahe eme nọ i kpomahọ Ileleikristi evaọ oria kpobi. A jẹ hai vi ileta gbe izi nọ a rọwo fihọ no se ikoko na, enana kpobi e jẹ bọ ikoko na ga, u te ru nọ ilele na a ro wo iroro evona, a te je je ru eware oghẹrẹ ovona. Ikoko na i je yoẹme jẹ jẹ romakpotọ nya lele ekpakpọ utu ẹruorote na, u te ru nọ Jihova ọ jẹ rọ ghale ae, eware e tẹ jẹ riẹ nya kẹ ae.—Iruẹru 8:1, 14, 15; 15:22-31; 16:4, 5; Hib. 13:17.

² Nọ ikọ na i whu no, ẹsiọ-orọwọ na o te muhọ. (2 Tẹs. 2:3-12) Wọhọ epanọ Jesu ọ jọ ọtadhesẹ iwhiti gbe ikpoko na ta nọ o te via, a tẹ kọ ikpoko (Ileleikristi erue) fihọ udevie iwhiti na (Ileleikristi nọ a rọ ẹzi wholo). Evaọ ikpe-udhusoi buobu nọ i lele i rie, a kẹ itu ivẹ na uvẹ re e rro kugbe bọo oke ivuẹvu na, koyehọ “oke urere uyero-akpọ.” (Mat. 13:24-30, 36-43) Jesu ọ gbẹ jọ kugbe Ileleikristi nọ a rọ ẹzi wholo na ọvuọvo evaọ oke yena, rekọ utu ẹruorote o jariẹ hẹ, ugogo utu ovo o jọ otọakpọ na ha nọ Jesu ọ jẹ rọ kpọ ilele riẹ. (Mat. 28:20) Rekọ ọ ruẹaro fihọ otọ nọ eware i ti nwene evaọ oke ivuẹvu na.

³ “Kọ ginọ ono họ ọrigbo nọ a re fievahọ nọ o wo areghẹ na?” Onọ yena Jesu Kristi o ro mu ọtadhesẹ jọ họ nọ o rrọ abọjọ “oka” nọ ọ kẹ kpahe “oke urere uyero-akpọ na.” (Mat. 24:3, 42-47) Jesu ọ ta nọ ọrigbo nọ a re fievahọ na o ti ruiruo gaga rọ emu ẹme Ọghẹnẹ kuọ ahwo Ọghẹnẹ “evaọ ẹruoke.” Nwane wọhọ epanọ Jesu ọ rehọ utu ahwo ruiruo evaọ ikpe-udhusoi ọsosuọ na, orọnikọ omọvo jọ họ na, ere ọvona ọrigbo nọ a re fievahọ nọ Jesu o bi ro ruiruo evaọ oke urere uyero-akpọ na ọ rrọ omọvo jọ họ re.

EPANỌ MA RE RO VUHU “ỌRIGBO NỌ A RE FIEVAHỌ NỌ O WO AREGHẸ NA”

⁴ Amono Jesu o ro mu re a kuọ ilele riẹ? O sae jọ amọfa vi enọ a rọ ẹzi wholo nọ e rrọ otọakpọ na ha. A jọ Ebaibol na se ai “izerẹ nọ e rrọ ivie” nọ a kẹ iruo re a jọ “‘oria kpobi whowho ewoma’ Ọnọ o se [rai] no ebi ziọ elo igbunu riẹ.” (1 Pita 2:9; Mal. 2:7; Evia. 12:17) Kọ ahwo kpobi nọ a rọ ẹzi wholo nọ e rrọ otọakpọ họ ọrigbo nọ a re fievahọ na? Ijo. Okenọ Jesu ọ rehọ edhere igbunu kuọ ahwo nọ a bu te oware wọhọ ezae idu isoi (5,000), te eyae te emaha na, ọ ghale emu na kẹ ilele na, ilele na e tẹ ghale iẹe kẹ ahwo na. (Mat. 14:19) Ọ rehọ umutho ahwo kuọ ahwo buobu. Oghẹrẹ ovona ọ be rọ rehọ emu ẹme Ọghẹnẹ kuọ ahwo nẹnẹ re.

⁵ Fikiere, “orieyero nọ a re fievahọ na, ọnọ o wo areghẹ na” yọ umutho inievo-emezae jọ nọ a rọ ẹzi wholo nọ i bi ru ekiakiẹ evaọ Ẹme Ọghẹnẹ ro kere ebe je ru eware efa nọ a bi ro wuhrẹ idibo Ọghẹnẹ evaọ etoke ọzino Kristi na. (Luk 12:42) No anwọ okenọ edẹ urere na i ro muhọ ze na, inievo-emezae nọ a rọ ẹzi wholo nọ e rrọ “ọrigbo nọ a re fievahọ nọ o wo areghẹ na” a bi ru iruo kugbe evaọ obọ ehri ukoko. Nẹnẹ, inievo-emezae nana nọ a rọ ẹzi wholo na họ Utu Ẹruorote Iruẹru Isẹri Jihova.

⁶ Kristi ọ be rehọ utu ahwo nana kere kpahe epanọ eruẹaruẹ Ebaibol i bi ro rugba jẹ be kẹ ithubro ẹruoke kpahe epanọ ahwo a sai ro fi ehri-izi Ebaibol họ iruo evaọ uzuazọ kẹdẹ kẹdẹ. Ẹkwoma ikoko Isẹri Jihova nọ e rrọ eria sa-sa a be rọ ghale eme nana nọ a bi kere no Ebaibol ze na. (Aiz. 43:10; Gal. 6:16) Evaọ oke Ebaibol, a jẹ hae rehọ ọrigbo, hayo orieyero nọ a fievahọ mu ọnọ o re wuzou iruẹru uwou olori riẹ. Ere ọvona a rehọ owha-iruo ẹruorote ahwo Ọghẹnẹ kẹ ọrigbo nọ a re fievahọ nọ o wo areghẹ na. Ọrigbo na ọ tẹ jẹ be rẹrote eware nọ ukoko na u wo, iruẹru usi uwoma ota na, eruẹrẹfihotọ ikokohọ esese gbe ilogbo, eromuo esẹro nọ e be wọ ewha sa-sa evaọ ukoko na, gbe ebe nọ a bi kere no Ebaibol ze, enana kpobi e be kẹ “idibo uwou” na erere.—Mat. 24:45.

⁷ Kọ amono họ “idibo uwou” na? Ae họ enọ a be rọ ẹme Ọghẹnẹ ko. Evaọ oke ọsosuọ, idibo uwou na kpobi a jọ enọ a rọ ẹzi wholo. Uwhremu na, idibo uwou na u te ti kugbe ogbotu obuobu orọ “igodẹ efa” na. (Jọn 10:16) Itu ivẹ na a be reawere iwuhrẹ ẹme Ọghẹnẹ nọ i bi no obọ ọrigbo nọ a re fievahọ na ze.

⁸ Evaọ oke uye ulogbo na nọ Jesu ọ te nyaze ti bruoziẹ kpe jẹ raha uyero-akpọ omuomu nana, ọ te rehọ ọrigbo nọ a re fievahọ na mu “ọnọ ọ rẹ rẹrote eyero riẹ kpobi.” (Mat. 24:46, 47) Enọ e rrọ ọrigbo nọ a re fievahọ na a ve ti wo osohwa obọ odhiwu rai. Te ai te amọfa nọ a rrọ usu idu udhuhrẹ gbe ene (144,000) na a ve ti lele Kristi su. Dede nọ ọrigbo nọ a re fievahọ nọ o wo areghẹ ọ te gbẹ jọ otọakpọ na ha, Jihova avọ Jesu a te rọ ẹkwoma “isu” nọ a ro mu vuẹ enọ e rrọ otọ Uvie Mesaya na evaọ otọakpọ oware nọ a re ru.—Ol. 45:16.

FIKIEME MA JẸ “KAREGHẸHỌ ENỌ E BE KOBARO” NA?

⁹ Ẹjiroro buobu e riẹ nọ ma jẹ “kareghẹhọ enọ e be kobaro” na je fievahọ ae. Fikieme ere oruo o rọ rrọ kẹ ewoma mai? Pọl ukọ na ọ ta nọ: “Keme a be sẹro rai, yọ a ti gu epanọ a ru te, re a ruẹsi ru onana avọ oghọghọ orọnikọ unuofiẹ hẹ, keme oyena o rẹ wha enwoma se owhai.” (Hib. 13:17) U wuzou re ma yoẹme jẹ romakpotọ nya lele ithubro nọ i no obọ rai ze keme a be sẹro mai re ma siọ usu mai kugbe Ọghẹnẹ ba ẹraha jẹ sai kru ẹrọwọ mai ga.

¹⁰ Evaọ obe 1 Ahwo Kọrint 16:14, Pọl ọ ta nọ: “Wha rehọ uyoyou ru eware kpobi nọ wha bi ru.” Uvi uyoyou nana họ oware nọ o be kpọ iroro-ejẹ kpobi nọ i kiekpahe ahwo Ọghẹnẹ. Obe 1 Ahwo Kọrint 13:4-8 o ta kpahe uyoyou nọ: “Uyoyou u re wo odiri, o tẹ jẹ rrọ wowou. Uyoyou o rẹ re ihri hi. O rẹ ya-oma ha, u re fu uke he, u re ru ugberuo ho, o rẹ gwọlọ ewoma obọriẹ hẹ, u re mu ofu hu. U re koko eware edada nọ a ru rie fihọ eva ha. O rẹ ghọghọ fiki emuemu hu, rekọ o rẹ ghọghọ fiki uzẹme. U re wo odiri evaọ eware kpobi, rọwo eware kpobi, rẹro eware kpobi, thihakọ eware kpobi. Uyoyou o rẹ jọ bẹdẹ bẹdẹ.” Nọ orọnọ uyoyou o be kpọ iroro kpobi nọ a be jẹ re o wha ewoma se idibo Jihova na, ma wo ẹjiroro kpobi nọ udu u re ro kie omai vi inọ iroro-ejẹ itieye na e rrọ rọkẹ ewoma mai. Ofariẹ, onana u bi dhesẹ nọ Jihova o you omai.

¹¹ Wọhọ epanọ o jọ evaọ ikpe-udhusoi ọsosuọ, ahwo nọ Jihova ọ be rọ kpọ ahwo riẹ yọ ahwo nọ a gba ha. Jihova ọ rehọ ahwo nọ a gba ha ro ru oreva riẹ gba evaọ oke nọ u kpemu. Noa o ku okọ ulogbo je whowho ọraha nọ o ti te ahwo oke riẹ. (Emu. 6:13, 14, 22; 2 Pita 2:5) Jihova ọ rehọ Mosis mu re o su ahwo riẹ no Ijipti. (Ọny. 3:10) Ọ rehọ ẹzi riẹ kẹ ahwo nọ a gba ha ro kere Ebaibol na. (2 Tim. 3:16; 2 Pita 1:21) Fikinọ Jihova ọ be rọ ahwo nọ a gba ha rọ kpọ iruo usi uwoma ota gbe ilele iruo na nẹnẹ, u re whrehe eva nọ ma fihọ ukoko Ọghẹnẹ hẹ. Ukpoye, o lẹliẹ eva nọ ma fihọ iẹe ga keme ma riẹ nọ ababọ uketha Jihova, ukoko na o sai ru eware kpobi nọ u bi ru na vievie he. Eware egaga nọ ọrigbo nọ a re fievahọ na o fi kparobọ no gbe eware nọ o ru no u dhesẹ nọ ẹzi Ọghẹnẹ ọ be kpọ eware. Eghale buobu i te abọ ukoko Jihova nọ a rẹ ruẹ na no. Fikiere, ma rẹ rehọ udu mai kpobi tha ukoko na uke je fievahọ iẹe.

EPANỌ MA RE RO DHESẸ NỌ MA FIEVAHỌ UKOKO NA

¹² Enọ a ro mu nọ i wo uvẹ-iruo sa-sa evaọ ukoko na a re dhesẹ nọ a fievahọ ukoko na ẹkwoma iruo nọ i te rai nọ a rẹ rọ evawere jẹrehọ, a ve je ru ai ziezi. (Iruẹru 20:28) Nọ ma rrọ enọ i bi whowho usi Uvie na, ma rẹ rehọ ọwhọ ta usi uwoma na no uwou ruọ uwou, kpohọ izihebro, je wuhrẹ ahwo Ebaibol. (Mat. 24:14; 28:19, 20) Re ma wo erere vọvọ no eme Ọghẹnẹ nọ ọrigbo nọ a re fievahọ na o bi ro wuhrẹ omai na ze, ma rẹ ruẹrẹ oma kpahe je kpohọ iwuhrẹ ukoko gbe ikokohọ, te esese te ilogbo. Ma re wo erere gaga no uduotahawọ nọ ma rẹ kẹ ohwohwo ze evaọ okenọ ma tẹ rrọ kugbe inievo mai evaọ iwuhrẹ gbe ikokohọ.—Hib. 10:24, 25.

¹³ Ma tẹ be rehọ ugho hayo eware efa nọ ma wo ru unevaze rọ tha ukoko na uke, yọ ma bi dhesẹ nọ ma fievahọ iẹe. (Itẹ 3:9, 10) Ma tẹ ruẹ nọ inievo mai e rrọ ẹbẹbẹ nọ a jọ gwọlọ obufihọ ugho, iwu, emu gbe eware efa itieye, ma re fiobọhọ ababọ oke oraha. (Gal. 6:10; 1 Tim. 6:18) Uyoyou-inievo o rẹ wọ omai ru onana, fiẹrohotọ ẹsikpobi kẹ uvẹ nọ ma re ro dhesẹ kẹ Jihova gbe ukoko riẹ inọ ewoma nọ a bi ru kẹ omai o da omai ẹro fia.—Jọn 13:35.

¹⁴ Ma re je dhesẹ nọ ma fievahọ ukoko na nọ ma te bi ru lele iroro nọ ukoko na o jẹ. Onana u kugbe oma nọ ma re ro kpotọ ru lele ithubro nọ i bi no obọ ahwo nọ a ro mu evaọ ukoko na ze, wọhọ esẹro okogho gbe ekpako ukoko. Inievo nana a rrọ usu “enọ e be kobaro” na nọ u fo nọ ma re yoẹme kẹ jẹ romakpotọ kẹ. (Hib. 13:7, 17) Ma gbẹ maki wo otoriẹ ẹjiroro nọ a rọ jẹ iroro jọ ziezi hi, ma riẹ nọ ma te ru epanọ a ta, ewoma o re noi ze te omai. Yọ u re ru nọ Jihova ọ rẹ rọ ghale omai fikinọ ma bi ru lele Ẹme riẹ je bi yoẹme kẹ ukoko riẹ. Ma rẹ rọ ere dhesẹ nọ ma be romakpotọ kẹ Olori na, Jesu Kristi.

¹⁵ Ma wo ẹjiroro kpobi nọ ma re ro fievahọ ọrigbo nọ a re fievahọ nọ o wo areghẹ na. Setan, ọghẹnẹ uyero-akpọ nana, ọ be dawo ẹgba riẹ kpobi re ọ wha ekela se odẹ Jihova gbe ukoko riẹ. (2 Kọr. 4:4) Who kie kẹ eghẹ imuomu Setan he. (2 Kọr. 2:11) Ọ riẹ nọ “omoke kakao” gheghe u kiọkọ taure a te fi ei họ ọgọdọ odidi na, yọ ọ gba riẹ mu inọ o re si ahwo Jihova buobu ruọ abọ riẹ. (Evia. 12:12) Rekọ, nọ Setan ọ be họre vi epaọ anwẹdẹ na, joma si kẹle Jihova ziezi vi epaọ anwẹdẹ. Joma fievahọ Jihova gbe utu ahwo nọ ọ be rọ kpọ ahwo riẹ nẹnẹ. Ma te bi ru ere, okugbe ọ rẹ jọ udevie mai.