Epanọ A Ruẹrẹ Ukoko na Họ gbe Epanọ A be rọ Kpọe

EVAỌ ileta ọsosuọ riẹ ro se ahwo Kọrint, Pọl ukọ na ọ fodẹ oware jọ nọ u wuzou gaga kpahe Ọghẹnẹ. Pọl o kere nọ: “Ọghẹnẹ yọ Ọghẹnẹ nọ ọ rrọ zighi zighi hi rekọ ọrọ udhedhẹ.” Kẹsena nọ ọ jẹ wariẹ ta kpahe epanọ iwuhrẹ ukoko e rẹ jọ, ọ ta nọ: “Jọ eware kpobi e nya kpatiẹ je lele ọruẹrẹfihotọ.”—1 Kọr. 14:33, 40.

² Evaọ obọ emuhọ ileta ọvo yena, ukọ na ọ kẹ uthubro kpahe ohẹriẹ nọ o jọ ukoko ahwo Kọrint na. Pọl ọ tuduhọ inievo na awọ nọ a “jọ ọvo evaọ eme rai” jẹ “jọ okugbe ọvo evaọ iroro gbe eriwo rai.” (1 Kọr. 1:10, 11) Kẹsena ọ tẹ kẹ ae ohrẹ kpahe eware sa-sa nọ e jẹ whae ze nọ okugbe ọ gbẹ jọ ukoko na ha. Ọ rehọ ugboma ohwo-akpọ kẹ oriruo ro dhesẹ epanọ u ro fo re a wo okugbe je ru eware kugbe. Ọ tuduhọ ahwo kpobi nọ a rrọ ukoko Ileleikristi na awọ inọ a rọ edhere oyoyou rẹrote ohwohwo ghelọ uvẹ-iruo nọ a wo kẹhẹ. (1 Kọr. 12:12-26) Re ahwo nọ a rrọ ukoko na a ru eware kugbe kpatiẹ o gwọlọ nọ a rẹ jọ ukoko na ru ọruẹrẹfihotọ epanọ eware e rẹ jọ.

³ Rekọ ẹvẹ a ti ro ru ọruẹrẹfihotọ epanọ eware e rẹ jọ evaọ ukoko Ileleikristi na? Ono o ti ru ọruẹrẹfihotọ na? Oghẹrẹ vẹ ọruẹrẹfihotọ na o te jọ? Amono a ti ro mu re a rẹrote eware? Ma tẹ kẹ Ebaibol na uvẹ re ọ kpọ omai, ma re wo iyo ivevẹ kẹ enọ nana.—1 Kọr. 4:6.

A RUẸRẸ E RIẸ HỌ EPANỌ ỌGHẸNẸ Ọ GWỌLỌ

⁴ A tuọ ukoko Ileleikristi na họ evaọ ẹdẹ Pẹntikọst 33 C.E. Eme ma riẹ kpahe epanọ ukoko na o jọ evaọ ikpe-udhusoi ọsosuọ? A ruẹrẹ e riẹ họ jẹ jẹ kpọe wọhọ epanọ Ọghẹnẹ ọ gwọlọ. Iku nọ e rrọ Ebaibol na kpahe oware nọ o via evaọ Jerusalẹm enwenọ ikpe idu ivẹ (2,000) nọ i kpemu o kẹ imuẹro vevẹ inọ Ọghẹnẹ họ ọnọ ọ rehọ ukoko Ileleikristi nọ a wholo na mu. (Iruẹru 2:1-47) Ukoko na yọ uwou riẹ, ahwo uwou riẹ. (1 Kọr. 3:9; Ẹf. 2:19) Oghẹrẹ nọ a ruẹrẹ iruẹru ukoko na họ gbe epanọ a jẹ rọ kpọe evaọ ikpe-udhusoi ọsosuọ na oye ukoko Ileleikristi na u bi lele nẹnẹ.

⁵ Oware wọhọ ilele udhozeza (120) i mu ukoko Ileleikristi na họ evaọ ikpe-udhusoi ọsosuọ. Ahwo nana a kaki ku ẹzi ọfuafo ku, onọ u ru eme Joẹl 2:28, 29 gba. (Iruẹru 2:16-18) Rekọ evaọ ẹdẹ ọvo yena, a họ amọfa nọ a bu te oware wọhọ idu esa (3,000) ame, a te ku enana kugbe ukoko enọ a rọ ẹzi yẹ na. A dede ovuẹ kpahe Kristi rehọ a tẹ “jẹ romakẹ iwuhrẹ ikọ na.” U no ere no, “Jihova o te je ku enọ o bi ti siwi kugbe ai kẹdẹ kẹdẹ.”—Iruẹru 2:41, 42, 47.

⁶ Ukoko nọ o jọ Jerusalẹm u je wo ẹvi gaga te epanọ ozerẹ okpehru ahwo Ju na ọ rọ ta nọ ilele na a rehọ iwuhrẹ rai vọ Jerusalẹm no. Izerẹ ahwo Ju buobu a jọ usu ilele ekpokpọ nọ i kurẹriẹ ziọ ukoko na evaọ Jerusalẹm.—Iruẹru 5:27, 28; 6:7.

⁷ Jesu ọ ta nọ: “Wha . . . ti se isẹri kpahe omẹ evaọ Jerusalẹm, evaọ Judia soso gbe Sameria, je rite oria nọ o mai thabọ evaọ otọakpọ na.” (Iruẹru 1:8) Yọ ere o via okenọ ukpokpoma ulogbo u du lahwe evaọ Jerusalẹm nọ a kpe Stivin no, ilele nọ e jẹ rria etẹe a tẹ vahabọ ruọ Judia gbe Sameria soso. Rekọ oria kpobi nọ a nya, a ruabọhọ je whowho usi uwoma na je ru ilele efa buobu, yọ ejọ rai e jọ ahwo Sameria. (Iruẹru 8:1-13) Uwhremu na, a tẹ te ta usi uwoma na ziezi kẹ enọ e yawo ho, koyehọ enọ e rrọ ahwo Ju hu. (Iruẹru 10:1-48) Usi uwoma nọ a jẹ ta evaọ eria sa-sa na o wha riẹ ze nọ ibuobu i je ro zihe ruọ ilele, a tẹ jẹ tuọ ikoko ekpokpọ họ evaọ eria efa nọ e rrọ Jerusalẹm ho.—Iruẹru 11:19-21; 14:21-23.

⁸ Didi eruẹrẹfihotọ a ru re a ruẹ nọ ukoko okpokpọ kpobi nọ a tohọ a ruẹrẹ e riẹ họ jẹ be kpọe wọhọ epanọ Ọghẹnẹ ọ gwọlọ? A rọ ẹkwoma ẹzi Ọghẹnẹ rehọ ithuru-igodẹ mu evaọ otọ Jesu re a rẹrote uthuru na. Pọl avọ Banabas a rehọ ekpako mu evaọ ikoko nọ a kpohọ evaọ etoke erẹ usi uwoma ota ọsosuọ rai. (Iruẹru 14:23) Luk nọ ọ rrọ omọvo enọ i kere Ebaibol na o gbiku ẹgwae nọ Pọl ọ gba kugbe ekpako ukoko nọ o jọ Ẹfisọs. Pọl ọ ta kẹ ae nọ: “Wha muẹrohọ omarai gbe uthuru na soso, enọ ẹzi ọfuafo na ọ rehọ owhai mu esẹro evaọ udevie rai, re wha sẹro ukoko Ọghẹnẹ, onọ ọ rehọ azẹ Ọmọ obọriẹ dẹ.” (Iruẹru 20:17, 28) A te ahwo nọ a rẹ jọ ekpako fikinọ a nyate eware nọ a jọ Ikereakere na gwọlọ mi ekpako. (1 Tim. 3:1-7) A kẹ Taitọs, ibe oruiruo Pọl udu re ọ rehọ ekpako mu evaọ ikoko obọ Kriti.—Tait. 1:5.

⁹ Nọ a be tuọ ikoko efa họ na, ikọ gbe ekpako na evaọ Jerusalẹm a gbẹ jọ esẹro nọ e jẹ kobaro evaọ ukoko Ileleikristi ikpe-udhusoi ọsosuọ nọ o kẹre ruọ erẹwho sa-sa no na. Ae a jọ utu nọ o jẹ rẹrote iruẹru ukoko Ileleikristi na soso.

¹⁰ Nọ Pọl ukọ na o je kere se ukoko obọ Ẹfisọs, ọ ta nọ ukoko Ileleikristi na o tẹ be nya lele ekpakpọ ẹzi Ọghẹnẹ je bi yoẹme kẹ Jesu Kristi nọ o wuzou ukoko na, o rẹ sai wo okugbe ẹsikpobi. Ukọ na ọ tuduhọ Ileleikristi nọ e jọ obei awọ inọ a wo omaurokpotọ, re a jẹ yọrọ “okugbe ọvo nọ ẹzi na ọ be wha ze” ẹkwoma usu udhedhẹ nọ a re wo kugbe ahwo kpobi evaọ ukoko na. (Ẹf. 4:1-6) Kẹsena ọ tẹ wariẹ ẹme nọ ọ rrọ Olezi 68:18, ọ tẹ rehọ iẹe dhesẹ ọruẹrẹfihotọ nọ Jihova ọ rọ rehọ ezae nọ i te mu re a ruiruo evaọ ukoko na wọhọ ikọ, eruẹaro, etausiuwoma, esẹro, gbe iwuhrẹ. Ezae nana nọ e rrọ ekẹ nọ i no obọ Jihova ze na a ti ru ukoko na soso dikihẹ gaga evaọ oghẹrẹ nọ o rẹ were Ọghẹnẹ.—Ẹf. 4:7-16.

IKOKO NA A BI LELE ORIRUO IKỌ NA NẸNẸ

¹¹ Nẹnẹ, ikoko Isẹri Jihova kpobi a bi lele oriruo oghẹrẹ nọ a ruẹrẹ eware họ evaọ oke ikọ na. Aikpobi a ru ukoko akpọ-soso nọ o rrọ okugbe ọvo via, onọ ahwo nọ a rọ ẹzi wholo a rrọ otọhotọ riẹ. (Zẹk. 8:23) Jesu Kristi o bi ru onana lọhọ. Wọhọ epanọ ọ ya eyaa, ọ rrọ kugbe ilele riẹ nọ a rọ ẹzi wholo na “edẹ na kpobi rite oke urere uyero-akpọ na.” Ahwo nọ a rẹ ziọ ukoko na nọ u bi vihọ na a rẹ jẹ usi uwoma Ọghẹnẹ na rehọ, rehọ uzuazọ rai kpobi mudhe kẹ Jihova, a vẹ họ-ame zihe ruọ ilele Jesu. (Mat. 28:19, 20; Mak 1:14; Iruẹru 2:41) A re vuhumu nọ Jesu Kristi nọ ọ rrọ “emamọ othuru-igodẹ na” họ Ọnọ o wuzou uthuru na soso, onọ Ileleikristi nọ a rọ ẹzi wholo gbe “igodẹ efa” a rrọ eva. (Jọn 10:14, 16; Ẹf. 1:22, 23) “Uthuru ọvo” yena o be sẹro okugbe rai ẹkwoma Kristi nọ a vuhumu nọ ọye o wuzou rai, a tẹ jẹ be romakpotọ kẹ “ọrigbo nọ a re fievahọ nọ o wo areghẹ na” nọ Kristi o ro mu re ọ kpọ iruẹru ukoko na. Joma gbe fi eva mai kpobi họ ọrigbo nana nẹnẹ.—Mat. 24:45.

IRUO EGBẸGWAE NỌ UKOKO NA U WO

¹² Re ọrigbo na ọ sai ru emu ẹme Ọghẹnẹ te ahwo obọ evaọ ẹruoke, a vẹ jẹ sae ta usi uwoma Uvie na taure urere na o tẹ te ze, ọrigbo na ọ rehọ egbẹgwae sa-sa mu. Izi erẹwho sa-sa e whobọhọ egbẹgwae nana, yọ egbẹgwae nana i re ruiruo kugbe. A bi fiobọhọ ru iruo usi uwoma ota na lọhọ evaọ akpọ na soso.

ỌRUẸRẸFIHOTỌ UWOU OGHA

¹³ Oke kpobi nọ a tuọ uwou ogha họ, a rẹ rehọ Ogbẹgwae Uwou Ogha mu, onọ ekpako esa hayo bu vrẹ ere a rẹ jọ re a rẹrote iruo na evaọ orẹwho hayo erẹwho nọ e rrọ otọ uwou ogha yena. Omọvo ogbẹgwae na jọ ọ rẹ jọ ọnọ o re koko iruẹru Ogbẹgwae Uwou Ogha na họ.

¹⁴ A rẹ ghale ikoko nọ e rrọ otọ uwou ogha kpobi fihọ ikogho. Ikogho na e rẹ jọ ẹrẹrẹe he, oghẹrẹ nọ oria o rrọ, ẹvẹrẹ jegbe unu ikoko nọ e rrọ otọ uwou ogha na a re rri rọ jiroro na. A rẹ rehọ ọsẹro okogho mu nọ ọ rẹ nyai rri ikoko nọ e rrọ okogho. Uwou ogha u re kere se ọsẹro okogho epanọ o re ro ru iruo riẹ.

¹⁵ Ikoko na e be nya lele eruẹrẹfihotọ ukoko na nọ a ru rọkẹ erere mai kpobi. A rẹ jẹ ekpako nọ a ro mu nọ e be rẹrote iruo na evaọ iwou ogha, ikogho, gbe ikoko rehọ. Ọrigbo nọ a re fievahọ nọ o wo areghẹ na a rẹroso nọ ọ rẹ kẹ ae emu ẹme Ọghẹnẹ evaọ ẹruoke. Ọrigbo na omariẹ o bi ru lele oware kpobi nọ Kristi nọ o wuzou riẹ ọ ta, o bi lele ehri-izi Ebaibol gbe oghẹrẹ nọ ẹzi ọfuafo na ọ be kpọe. Nọ mai kpobi ma be rọ okugbe ru iruo na, ma bi wo oghẹrẹ iyẹrẹ nọ Ileleikristi ikpe-udhusoi ọsosuọ a wo: “Ikoko na e tẹ jọ gaga evaọ ẹrọwọ na je bi vihọ no ẹdẹ te ẹdẹ.”—Iruẹru 16:5.