Ileta Nọ Utu Ẹruorote Iruẹru Isẹri Jihova u kere ze
Ibe ọg’Ọghẹnẹ ọghaghae:
Wọhọ epanọ whọ riẹ, Ebaibol na ọ ta ẹme kpahe ahwo buobu. Ibuobu rai yọ ezae jegbe eyae nọ i wo ẹrọwọ nọ i wo oghẹrẹ ebẹbẹ nọ ma wo na. A jọ “wọhọ omai na.” (Jemis 5:17) Ebẹbẹ gbe awaọruọ e lẹliẹ oma lọhọ ejọ. Ahwo uviuwou rai hayo ahwo nọ a gbẹ jẹ gọ Ọghẹnẹ a ru ejọ eva dha gaga. Yọ udu u je brukpe ejọ rai fiki ethobọ obọrai.
Kọ u dhesẹ nọ ahwo yena a nyasiọ Jihova ba no riẹriẹriẹ? Ijo. Ibuobu rai e jọ wọhọ ọso-ilezi na nọ ọ lẹ nọ: “Mẹ nyathọ wọhọ ogodẹ nọ o vru; gwọlọ odibo ra, keme izi ra e [re] thọrọ omẹ ẹro ho.” (Olezi 119:176) Kọ eme yena e wọhọ oware nọ o rrọ owhẹ udu?
Idibo Jihova nọ i reghe no uthuru na e rẹ thọrọ iẹe ẹro vievie he. Ukpoye, ọ rẹ gwọlọ ae, yọ ẹkwoma ibe eg’Ọghẹnẹ rai ọ rẹ mai ro ru onana. Wọhọ oriruo, roro kpahe oghẹrẹ nọ Jihova o ro fiobọhọ kẹ odibo riẹ Job, ọnọ eware okpẹtu sa-sa e via kẹ, ekọ riẹ e raha, ahwo uwou riẹ a whu, ẹyao ọgaga o te je kiei. Yọ ahwo nọ a hai fiobọhọ kẹe jẹ tuduhọ iẹe awọ a ta eme edada kẹ Job. Rekọ o kiukeku Jihova vievie he dede nọ o roro thọ ẹmẹsejọ. (Job 1:22; 2:10) Ẹvẹ Jihova o ro fiobọhọ kẹ Job wariẹ kpọ iroro riẹ vi?
Edhere jọ nọ Jihova o ro fiobọhọ kẹ Job họ ẹkwoma ibe ọg’Ọghẹnẹ riẹ nọ a re se Elaihu. Nọ Job ọ jẹ ta eware nọ e be kẹe uye, Elaihu ọ gaviezọ, ọ tẹ gwọlọ nọ ọ rẹ ta ẹme. Kọ eme ọ te ta? Kọ ọ te fo Job hayo ru udu brukpei hayo kpomovuọ họ iẹe oma re ọ rọ ere ru ẹme na tei udu? Kọ Elaihu o rri omariẹ nọ o woma vi Job? Vievie! Ẹzi Ọghẹnẹ ọ wọ Elaihu ta nọ: “Epanọ mẹ rọ rọkẹ Ọghẹnẹ erei whọ rọ re; [ọviẹ] a rọ ma omẹ re.” Kẹsena ọ tẹ tuduhọ Job awọ nọ: “Ozọ mẹ u mu owhẹ vievie he, mẹ te kẹ owhẹ uye ovo ho.” (Job 33:6, 7) Elaihu o fiba edada Job hu, ukpoye ọ rehọ uyoyou kẹ Job ohrẹ gbe uduotahawọ.
Iviena riẹ inọ iroro evo yena e wọ omai kere ibroshọ nana. Oware nọ ma kaki ru họ, ma gaviezọ jẹ romatotọ roro kpahe iyero ahwo sa-sa nọ a reghe no ukoko na gbe eme nọ a ta. (Itẹ 18:13) Kẹsena ma te kpohọ Ikereakere na, ma tẹ lẹ jẹ kiẹ iku epanọ Jihova o ro fiobọhọ kẹ idibo riẹ oke anwae nọ e jọ iyero itieye. Ma tẹ rehọ iriruo Ebaibol na gbe erọ oke mai na kere ibroshọ nana. Ma gwọlọ nọ whọ romatotọ se obe nana. Iviena jọ u mu owhẹ ẹro nọ ma you owhẹ gaga.
Utu Ẹruorote Iruẹru Isẹri Jihova