Eme Me re Ru nọ A tẹ be Gwọlọ Omẹ Ẹme Evaọ Obọ Isukulu?

EME WHỌ HAI TI RU?

Rri oware nọ o be via na: Thomas ọ gwọlọ kpohọ isukulu nẹnẹ hẹ. Ọ te nya odẹ gbe he. Ọ gwọlọ gbẹ nya dede he. Anwọ emerae esa nọ i kpemu nọ egbẹnyusu riẹ a rọ raha odẹ riẹ evaọ obọ isukulu o bi ro ru ere. A te mu edẹ buobu kẹe. Ẹsejọ emọ eklase riẹ jọ a rẹ tehe ebe riẹ noi abọ je ru wọhọ ẹsenọ o thọ ae obọ, hayo ohwo jọ ọ vẹ jọ obemu gele iei, yọ nọ o te kuoma rẹriẹ, ọ rẹ gbẹ ruẹ ohwo nọ o ru oware na ha. Odẹnukpo, ọnọ ọ be gwọlọ iẹe ẹme na ọ jọ evaọ itanẹte seha kẹe . . .

Orọnọ whẹ họ Thomas, eme who ti ru?

DHIZU JE RORO OMOJỌ!

Orọnikọ whọ rẹ nwani fioma hotọ họ! Uzẹme riẹ, whọ rẹ sai kpe ọgwọlọ-ẹme ababọ obọ nọ who re dhe tei. Evaọ oghẹrẹ vẹ?

• WHỌ KPUNU HU. Ebaibol na ọ ta nọ: “Ohwo ogheghẹ ọ rẹ ta ofu riẹ kie, rekọ ohwo nọ o wareghẹ yọ ọ fọ rirẹ.” (Itẹ 29:11) Otẹrọnọ whọ gbẹ kpunu hu, o rẹ bẹ enọ e be gwọlọ owhẹ ẹme na.

• WHO RU KELE HE. Ebaibol na ọ ta nọ: “Wha rọ eyoma hwosa eyoma kẹ ohwo ọvo ho.” (Ahwo Rom 12:17) Orukele ọ rẹ lẹliẹ ẹbẹbẹ na kpotọ họ, rekọ ọ rẹ lẹliẹ eware yoma.

• WHO KPOHỌ ORIA NỌ A RẸ JỌ GWỌLỌ OWHẸ ẸME HE. Ebaibol na ọ ta nọ: “Ohwo owareghẹ ọ ruẹ ese o re siomano.” (Itẹ 22:3) Daoma kẹnoma kẹ ahwo nọ a rẹ gwọlọ ẹme gbe eria nọ a rẹ jọ.

• KPAHE ẸME KẸ AE WOLẸ. Ebaibol na ọ ta nọ: “Uyo olọlọhọ o rẹ whaha ofu.” (Itẹ 15:1) Whọ sai tube ru oware jọ nọ u re fou ehwẹ. Wọhọ oriruo, ọgwọlọ-ẹme ọ tẹ ta kẹ owhẹ nọ who fu hrọ, whọ sae rọ omara dhesẹ nọ o da owhẹ hẹ, jẹ kpahe kẹe nọ, “Mẹ ginẹ rrọ fuẹfu!”

• NYA NO ETẸE. Ọmọtẹ ikpe 19 jọ nọ a re se Nora ọ ta nọ, “whọ gbẹ kpunu hu, u re dhesẹ nọ who wo areghẹ vi ohwo nọ ọ be gwọlọ owhẹ ẹme na. U te je dhesẹ nọ whọ rẹ sae kpọ ofu ra, oware nọ ọgwọlọ ẹme na ọ rẹ sai ru hu.”​—2 Timoti 2:24.

• WHỌ GBẸ HAI RRI OMARA KUẸKU HU. Egwọlọ ẹme a rẹ riẹ ahwo nọ a bi rri omarai kuẹku, gbe ahwo nọ a te sae kpobọ họ. Rekọ egwọlọ-ẹme buobu a re si oma rehọ nọ a tẹ ruẹ nọ oware nọ a bi ru owhẹ na o be da owhẹ hẹ.

• TA KẸ OHWO JỌ. Iticha isukulu jọ vẹre ọ ta nọ: Mẹ rẹ ta kẹ ohwo kpobi nọ a be gwọlọ ẹme riẹ inọ ọ ta via. Oware nọ o mai woma oye, keme o rẹ whae ze nọ a gbe ro ru ei kẹ omọfa ha.”