Ọghẹnẹ Ọ Ma Ọzae gbe Aye Ọsosuọ

Jihova ọ kọ ọgbọ fihọ oria jọ nọ a re se Idẹn. Ọgbọ na ọ vọ avọ idodo, ire, gbe erao buobu. Ọghẹnẹ ọ tẹ rọ ovu otọ na ma Adamu ọzae ọsosuọ na, kẹsena o te ku ẹwẹ ku inwe riẹ. Kọ whọ riẹ oware nọ o via? Ọzae na ọ tẹ ze uzuazọ! Jihova ọ tẹ vuẹ Adamu nọ ọ rẹrote ọgbọ na, ọ tẹ jẹ vuẹe nọ o mu edẹ kẹ erao na kpobi.

Jihova o jie uzi jọ nọ u wuzou gaga kẹ Adamu. Ọ ta kẹ Adamu nọ: ‘Whọ rẹ sae re ibi-ire na kpobi, rekọ u wo ubi-ure jọ nọ whọ rẹ re he. Whọ tẹ re ubi-ure yena, who ti whu.’

Evaọ oke ofa, Jihova ọ tẹ ta nọ: ‘Mẹ rẹ ma ohwo nọ o re fiobọhọ kẹ Adamu.’ Jihova o te ru Adamu kie ruọ owezẹ udidi, kẹsena ọ tẹ rehọ ubiofẹ Adamu jọ ma aye kẹe. Odẹ aye na họ Ivi. Adamu avọ Ivi a te zihe ruọ ọzae-avọ-aye ọsosuọ. Ẹvẹ eva e were Adamu te nọ ọ ruẹ aye nọ Ọghẹnẹ ọ ma kẹe? Eva e were Adamu ga te epanọ ọ rọ ta nọ: ‘Rri ohwo nọ Jihova ọ rọ ubiofẹ mẹ ma! Obọnana, me wo ohwo nọ ọ wọhọ omẹ no!’

Jihova ọ tẹ ta kẹ Adamu avọ Ivi nọ a yẹ emọ re a vọ otọakpọ na. Jihova ọ gwọlọ nọ a ruiruo kugbe re a zihe otọakpọ na soso ruọ aparadase, hayo ọgbọ owowoma, wọhọ ọgbọ Idẹn. Rekọ eware e nya ere he. Fikieme? Ma ti wuhrẹ kpahe onana evaọ uzoẹme nọ o rrọ obaro na.