Imaree E Zọ Ruọ Akpọ nọ A Ru Fo No

Noa avọ uviuwou riẹ gbe erao na a tẹ ruọ eva okọ na. Jihova ọ tẹ kare ẹthẹ okọ na, oso o te muhọ ẹrọ. Oso na ọ rrọ te epanọ okọ na u ro muhọ evori. Ukuhọ riẹ, ame ọ tẹ vọ otọakpọ na kpobi. Ahwo oyoma na kpobi a te whu. Rekọ Noa avọ uviuwou riẹ nọ a jọ eva okọ na a zọ. Dai roro epanọ eva e were e rai te fikinọ a yoẹme kẹ Jihova!

Oso na ọ rrọ edẹ udhuvẹ (40) gbe aso udhuvẹ (40), kẹsena ọ tẹ ka. Ame na o te muhọ ẹkpọ ẹmẹrera. Ukuhọ riẹ, okọ na o tẹ kpahe ehru ugbehru jọ. Rekọ oke yena yọ ame ọ gbẹ vọ oria kpobi, fikiere Noa avọ uviuwou riẹ a sai no eva okọ na ze evaọ oke yena ha.

Ẹmẹrera na, ame na ọ tẹ kpọ kpobi no. Noa avọ uviuwou riẹ a rria okọ na vrẹ ukpe ovo soso. Kẹsena Jihova ọ tẹ ta kẹ ae nọ a no eva okọ na ze, re a ruọ akpọ nọ o ru fo no. Eva e were rai gaga inọ Jihova o siwi rai, fikiere a te dhe idhe ro jiri Jihova.

Idhe nọ a dhe na e were Jihova gaga. Jihova ọ tẹ ya eyaa nọ ọ te gbẹ rọ ame raha akpọ na ofa ha. Jihova o te ru nọ usi-oso o rọ romavia evaọ obọ ehru re o jọ oka eyaa riẹ. Kọ whọ ruẹ usi-ame hayo usi-oso hayo usi okpowhe no ẹdẹ jọ?

Kẹsena Jihova ọ tẹ ta kẹ Noa avọ uviuwou riẹ nọ a yẹ emọ re a vọ otọakpọ na.