Jihova Ọ Ta Ẹme kẹ Samuẹle

Ilai Ozerẹ Okpehru na o wo emezae ivẹ nọ e jọ izerẹ evaọ uwou-udhu egagọ na. Edẹ emezae ivẹ na họ Hofini avọ Finihas. A je yoẹme kẹ Jihova ha, yọ a je ru ahwo eware iyoma. Nọ ahwo Izrẹl a tẹ rehọ arao ze nọ a re ro dhe idhe kẹ Jihova, Hofini avọ Finihas a vẹ jariẹ rehọ abọ nọ ọ mai woma kẹ omarai. Ilai o yo kpahe eware nọ emọ riẹ i je ru na, rekọ o ru oware ovo kpahe iẹe he. Kọ Jihova ọ te kẹ ai uvẹ re a hai ru enenẹ ọvo?

Dede nọ Samuẹle ọ maha vi Hofini avọ Finihas, ọ rọ aro kele ai hi. Eva Samuẹle e jẹ were Jihova. Aso ẹdẹ jọ nọ Samuẹle ọ jọ owezẹ, o te yo urru jọ nọ u se odẹ riẹ. Ọ tẹ kpama jẹ dhẹ bru Ilai, ọ tẹ ta kẹ Ilai nọ: ‘Mẹ na!’ Rekọ Ilai ọ tẹ ta kẹe nọ: ‘Me se owhẹ hẹ. Nyae wariẹ kiẹzẹ.’ Samuẹle ọ tẹ wariẹ nyai kiẹzẹ. Urru na o tẹ wariẹ sei. Nọ Samuẹle ọ wariẹ yo urru na orọ avọ isiasa, Ilai ọ tẹ riẹ nọ Jihova o bi se Samuẹle na. Ilai ọ tẹ ta kẹ Samuẹle nọ ọ tẹ wariẹ yo urru na, jọ ọ ta nọ: ‘Ivie ta ẹme Jihova. Odibo ra o bi yo.’

Samuẹle ọ tẹ wariẹ nyai kiẹzẹ. Kẹsena o te yo urru na nọ o wariẹ sei: ‘Samuẹle! Samuẹle!’ O te yo nọ: ‘Ivie ta ẹme keme odibo ra o bi yo.’ Jihova ọ tẹ ta kẹe nọ: ‘Ta kẹ Ilai nọ mẹ te kẹe avọ uviuwou riẹ uye. Ọ riẹ nọ emọ riẹ a bi ru eware iyoma evaọ uwou-udhu mẹ, rekọ o bi ru oware ovo kpahe iẹe he.’ Nọ oke o ke, Samuẹle o te rovie ethẹ uwou-udhu na wọhọ epanọ o re ru vẹre na. Ozọ u je mu ei re ọ vuẹ Ilai uwou nọ Jihova o vi rie na. Rekọ Ilai o te se Samuẹle jẹ nọe nọ: ‘Ọmọzae mẹ, eme Jihova ọ ta kẹ owhẹ? Vuẹ omẹ oware kpobi.’ Fikiere Samuẹle ọ tẹ vuẹ Ilai oware kpobi nọ Jihova ọ ta kẹe.

Jihova ọ jọ kugbe Samuẹle nọ ọ be rro ze na. Evaọ otọ Izrẹl soso, ahwo Izrẹl a riẹ nọ Jihova ọ salọ Samuẹle re ọ jọ ọruẹaro gbe obruoziẹ.