Uye U te Ovie-Aye Ọgeva Jọ

Ọgbọ owoma jọ nọ ọzae nọ a re se Nebọt o wo ọ kẹle uwou Ehab ovie na evaọ Jezrẹl. Yọ Ehab ọ jẹ hae jọ unwido riẹ ruẹ ọgbọ na ẹsikpobi. Ehab ọ gwọlọ ọgbọ nana, fikiere ọ tẹ ta nọ ọ rẹ dẹe mi Nebọt. Rekọ Nebọt ọ rọwo zẹ ọgbọ na kẹe he, keme o wọso uzi Jihova re ohwo ọ zẹ otọ nọ ọ reuku riẹ. Kọ Ehab ọ kpairoro vrẹ ọgbọ na fikinọ Nebọt ọ rọwo zẹ kẹe he? Ijo. Ukpoye eva e dha Ehab gaga. O kẹ riẹ uye te epanọ ọ rọ siọ emu ba ẹre, yọ ọ jẹ rọwo no ubrukpẹ riẹ ze he.

Aye Ehab nọ a re se Jezibẹl ọ geva gaga. Ọ tẹ ta kẹ Ehab nọ: ‘Whẹ họ ovie Izrẹl. Yọ oware kpobi nọ whọ gwọlọ u re te owhẹ obọ. Me ti ru re ọgbọ na o te owhẹ obọ.’ Jezibẹl o te kere ileta se ekpako ẹwho na nọ a gu ọrue fihọ Nebọt uzou inọ ọ la Ọghẹnẹ eka, re a rọ itho fi ei kpe. Ekpako ẹwho na a te gine ru epanọ Jezibẹl ọ ta na. Jezibẹl ọ tẹ ta kẹ Ehab ọzae riẹ nọ: ‘Nebọt o whu no. Obọnana ọgbọ na o zihe ruọ ọra no.’

Orọnikọ Nebọt ọvo họ emamọ ohwo nọ Jezibẹl o kpe no ho. Jezibẹl o kpe ahwo buobu nọ a you Jihova. Ọ jẹ gọ emedhọ yọ o ru eware iyoma efa buobu. Jihova ọ jẹ ruẹ eware iyoma kpobi nọ Jezibẹl o je ru na. Kọ eme Jihova o ti ru Jezibẹl?

Nọ Ehab o whu no, ọmọzae riẹ nọ a re se Jehoram o te zihe ruọ ovie. Jihova o te vi ọzae jọ nọ a re se Jehu nyai kpe Jezibẹl gbe uviuwou riẹ no.

Jehu ọ tẹ dhẹ akẹkẹ riẹ kpobọ ẹwho nọ a re se Jezrẹl, oria nọ Jezibẹl ọ jẹ rria. Jehoram ọ tẹ dhẹ akẹkẹ ze ti zere Jehu evaọ edhere. Jehoram ọ tẹ nọ Jehu nọ: ‘Kọ udhedhẹ o rrọ udevie mai?’ Jehu o te yo nọ: ‘Udhedhẹ ọ rẹ sae jariẹ hẹ keme oni ra Jezibẹl, o bi ru eware iyoma.’ Epanọ Jehoram ọ be rọ gwọlọ ku akẹkẹ riẹ rẹriẹ re ọ dhẹ na, Jehu ọ tẹ rọ ose sa Jehoram, o te whu.

Kẹsena Jehu o te kpobọ uwou Jezibẹl. Nọ Jezibẹl o yo nọ Jehu ọ be tha, o te peti abọ gbe awọ riẹ, si isiaro, fẹ eto riẹ fihọ wowoma, ọ tẹ keria akotọ unwido uwou-ehru riẹ be hẹrẹ Jehu. Nọ Jehu o te etẹe, Jezibẹl o te yere iei avọ ofu. Jehu o te bo se idibo Jezibẹl nọ i dikihẹ kẹle iẹe inọ: Wha “gele iei fihọ otọ!” A te gele Jezibẹl no unwido na fihọ otọ, o te whu.

Nọ oyena o vrẹ no, Jehu o te kpe emọ Ehab nọ i bu te udhosa-gbikpe (70) no, je si egagọ Bale no otọ na soso. Kọ onana u gbe dhesẹ nọ Jihova ọ be ruẹ eware kpobi nọ ahwo a bi ru, yọ ọ rẹ kẹ ahwo nọ a bi ru eware iyoma uye evaọ oke nọ o fihọ?