Josaya O You Uzi Ọghẹnẹ

A rehọ Josaya mu ovie evaọ okenọ ọ jọ ikpe eree ọvo. Evaọ oke yena, ahwo na a je ru eware emajiki gaga, yọ a jẹ gọ emedhọ. Nọ Josaya o te ikpe ikpegbezeza (16) no, ọ tẹ gwọlọ nọ ọ rẹ gọ Jihova evaọ edhere nọ ọ rẹ were Ọghẹnẹ. Nọ o te ikpe udhe (20) no, o te mu emedhọ gbe egbada-idhe kpobi nọ e jọ okpẹwho na họ ẹraha. Nọ Josaya ọ jọ ikpe udhegbezeza (26), o te ru ọruẹrẹfihotọ re a ruẹrẹ eria nọ e raha evaọ etẹmpol Jihova.

Ozerẹ okpehru jọ nọ a re se Hilkaya ọ tẹ ruẹ uko-obe Uzi Jihova evaọ etẹmpol na, yọ o sae jọ nọ onọ Mosis o kere na. Okere-obe ovie na nọ a re se Shefan ọ tẹ rehọ uko-obe Uzi na se Josaya, o te sei do via kẹe. Nọ Josaya ọ be gaviezọ na, o te muẹrohọ nọ ahwo na a bi ru lele Uzi Jihova ha anwọ ikpe buobu ze na. Josaya ọ tẹ ta kẹ Hilkaya nọ: ‘Eva mai e be dha Jihova gaga. Nyae nọ mi Jihova, ọ te vuẹ omai oware nọ ma re ru.’ Jihova ọ tẹ rọ ẹkwoma ọruẹaro-aye nọ a re se Họlda kuyo inọ: ‘Ahwo Juda a nyasiọ omẹ ba no. Mẹ te kẹ ai uye, rekọ o te jọ okenọ Josaya ọ gbẹ rrọ uzuazọ họ, keme Josaya ọ romakpotọ kẹ omẹ.’

Nọ Josaya ovie na o yo ẹme nọ Jihova ọ ta, o te kpobọ etẹmpol na, o te koko ahwo Juda kpobi họ. O te se Uzi Jihova do via kẹ orẹwho na soso. Josaya avọ ahwo na a tẹ ya eyaa kẹ Jihova nọ a te rọ eva rai kpobi yoẹme kẹ Jihova.

Anwọ ikpe buobu ze na orẹwho Juda u ri ru Ehaa Ọnyavrẹ na ha. Rekọ nọ Josaya ọ jọ Uzi Jihova ruẹ nọ u fo re a hai ru Ehaa Ọnyavrẹ na kukpe kukpe, ọ tẹ ta kẹ orẹwho na soso nọ: ‘Ma ti ru Ehaa Ọnyavrẹ kẹ Jihova.’ Josaya ọ tẹ ruẹrẹ oma kpahe re o dhe idhe buobu, ọ tẹ jẹ ruẹrẹ ahwo nọ a rẹ so ile evaọ etẹmpol na họ. Orẹwho na soso u te ru Ehaa Ọnyavrẹ na, kẹsena Ehaa Ebrẹdi nọ E Kare Ẹvi i te lele iei evaọ edẹ ihrẹ soso. A ri ru ọkpọ Ehaa Ọnyavrẹ itiena anwọ oke Samuẹle ze he. Josaya o gine you Uzi Ọghẹnẹ. Kọ o rẹ were owhẹ re who wuhrẹ kpahe Jihova?