Igbẹhẹ Jerusalẹm

Joma kake ta kpahe eware jọ nọ e via evaọ ikpe jọ nọ e vrẹ. Nehemaya odibo Atazazis ovie na, yọ ohwo Izrẹl nọ ọ jẹ rria okpẹwho Pasia nọ a re se Shushan. Oniọvo Nehemaya ọ tẹ wha ekpehre usi jọ no obọ Juda ze inọ: ‘Uzuazọ ahwo nọ a zihe kpobọ Jerusalẹm na o rrọ ọza, keme igeti gbe igbẹhẹ okpẹwho na nọ ahwo Babilọn a raha na, a re wariẹ bọ ae he.’ Eva e gbẹ jẹ were Nehemaya vievie he. Ọ tẹ gwọlọ nọ o re kpobọ Jerusalẹm re ọ nyai fiobọhọ kẹ ahwo na, fikiere ọ tẹ lẹ se Ọghẹnẹ re ovie na ọ kẹe uvẹ nya.

Uwhremu na, ovie na o te muẹrohọ nọ eva e be were Nehemaya ha. Ọ tẹ ta kẹ Nehemaya nọ: ‘Mẹ re ruẹ owhẹ nọ who mu ovao họ enẹ ẹdẹvo ho. Eme ọ be thọ?’ Nehemaya ọ tẹ ta kẹe nọ: ‘Fikieme me gbe mu ovao họ họ kpakiyọ a raha Jerusalẹm okpẹwho mẹ fihọ otọ?’ Ovie na ọ tẹ ta kẹe nọ: ‘Kọ eme whọ gwọlọ nọ me ru kẹ owhẹ?’ Nehemaya ọ tẹ nwane lẹ fihọ eva evaọ etẹe. Kẹsena ọ tẹ ta kẹ ovie na nọ: ‘Ivie, kẹ omẹ uvẹ re me kpobọ Jerusalẹm nyae wariẹ bọ igbẹhẹ na.’ Atazazis ovie na ọ tẹ ta kẹ Nehemaya nọ ọ rẹ sae nya, ọ tẹ kẹe isoja nọ e rẹ thọe re oware ovo o gbẹ via kẹe evaọ edhere he. Ọ tẹ rọ Nehemaya mu ọba Juda, o tẹ jẹ kẹe ire nọ ọ rẹ rọ bọ igeti okpẹwho na.

Nọ Nehemaya o te obọ Jerusalẹm, ọ tẹ nya igbẹhẹ okpẹwho na soso wariẹ. O te koko izerẹ gbe isu na họ, ọ tẹ ta kẹ ae nọ: ‘Okpoware o rrọ otọ na. U fo nọ ma re mu iruo họ obọnana.’ Ahwo na a tẹ ginẹ rọwo, a te mu igbẹhẹ na họ ẹbọ.

Rekọ ewegrẹ ahwo Izrẹl a te je se ai ẹkoko, be ta nọ: ‘Uruakọ dede o re kporo igbẹhẹ nọ wha be bọ na fihọ otọ.’ Rekọ ahwo Izrẹl a daezọ ẹkoko nọ a je se ai na ha, a je ru iruo rai vrẹ ọvo. A tẹ te bọ ugbẹhẹ na kpehru gaga.

Ewegrẹ na a tẹ jẹ gwọlọ rọ tabọ tabọ wọ ohọre ziọ Jerusalẹm, re a ruọ ae ọza. Nọ ahwo Ju a yo kpahe oware na, ozọ u te mu ai gaga. Rekọ Nehemaya ọ tẹ ta nọ: ‘Ozọ u mu owhai hi. Jihova ọ rrọ kugbe omai.’ Nehemaya ọ tẹ rehọ ezae mu re a rou ahwo nọ a be bọ igbẹhẹ na, fikiere ewegrẹ na a gbẹ jẹ sae wọ ohọre ze he.

Evaọ edẹ udhuvẹ gbe ikpegbivẹ (52) ọvo, a tẹ bọ igbẹhẹ okpẹwho na gbe igeti na re. Nehemaya o te zizie ahwo Livai na kpobi ziọ Jerusalẹm rọkẹ eromudhe ebabọ na. Ọ tẹ ghale ai kpohọ eko ivẹ nọ e rẹ so ile. A tẹ rehọ ofẹ Unuẹthẹ Eyeri-Ame gadiẹ kpobọ ehru ugbẹhẹ na, kẹsena itu ivẹ nọ e jẹ so ile na a tẹ nya rri ọvuọ ofẹ riẹ, bẹsenọ a rọ nya okpẹwho na soso wariẹ. A be nya na yọ a bi kporo egba, igogo, gbe ekpata, yọ a be so ile jiri Jihova. Ẹzra o lele utu ile jọ nya, Nehemaya o te lele utu nọ u kiọkọ nya, bẹsenọ ai kpobi a rọ nya zere ohwohwo evaọ oria etẹmpol na. Ahwo na kpobi—te ezae, te eyae, gbe emọ, a te dhe idhe kẹ Jihova je ru ehaa ilogbo. A rẹ sae jọ ugbothabọ yo edo oghọghọ rai dede.