Ẹzi Ọfuafo O Te Kọniliọs Obọ

Oletu ogbaẹmo ahwo Rom jọ nọ a re se Kọniliọs ọ jẹ rria ẹwho nọ a re se Sisaria, yọ o wuzou gaga. Dede nọ ọ jọ ohwo Ju hu, ahwo Ju a jẹ hae kẹe adhẹẹ gaga. Ọ jẹ hai fiobọhọ kẹ iyogbe gbe ahwo nọ a gwọlọ obufihọ gaga. Kọniliọs o fi ẹrọwọ họ Jihova, yọ ọ jẹ hae lẹ sei ẹsikpobi. Ẹdẹ jọ, ukọ-odhiwu jọ ọ tẹ romavia kẹ Kọniliọs jẹ ta kẹe nọ: ‘Ọghẹnẹ o yo elẹ ra no. Enẹna vi ahwo bru Pita evaọ obọ okpẹwho Jọpa nọ ọ rrọ, re a vuẹe nọ ọ nyaze.’ Kọniliọs ọ tẹ nwani vi ezae esa kpobọ Jọpa, yọ u thabọ te oware wọhọ emaele ọgba (30).

Nọ ahwo na a rrọ edhere na, Pita ọ tẹ ruẹ eruẹaruẹ jọ evaọ obọ Jọpa. Ọ ruẹ erao sa-sa nọ ahwo Ju a rẹ re he, o te yo urru jọ nọ o ta kẹe nọ o kpe re ọ re. Pita ọ tẹ se thahe thahe inọ: ‘Mẹ re re arao nọ ọ fo ho ẹdẹvo ho.’ Urru na o tẹ ta kẹe nọ: ‘Who gbe se ai erao nọ e fo ho ho. Ọghẹnẹ o ru rai fo no.’ Urru na o tẹ jẹ ta kẹ Pita nọ: ‘Ezae esa jọ e rrọ unuẹthẹ ra. Nya lele ai.’ Pita ọ tẹ nyabru ezae na jẹ nọ ae oware nọ a be rọ gwọlọ iẹe. A tẹ ta nọ: ‘Kọniliọs oletu ogbaẹmo Rom o vi omai ze. Ọ gwọlọ nọ whọ nyaze obọ uwou riẹ evaọ obọ Sisaria.’ Pita ọ tẹ ta kẹ ae nọ a wezẹ uwou riẹ bẹsenọ oke o rẹ ke. Nọ oke o ke no, ọyomariẹ avọ inievo jọ nọ e rrọ Jọpa a te lele ezae na kpobọ Sisaria.

Nọ Kọniliọs ọ ruẹ Pita, o te kigwẹ fihọ aro riẹ. Rekọ Pita ọ tẹ ta nọ: ‘Kpama! Mẹ yọ ohwo-akpọ gheghe wọhọ owhẹ re. Ọghẹnẹ ọ ta kẹ omẹ nọ mẹ nyaziọ uwou ra, dede nọ ahwo Ju a rẹ ruọ uwou ohwo nọ ọ rrọ ohwo Ju hu. Ivie vuẹ omẹ oware nọ who ro vi ahwo ze ti se omẹ.’

Kọniliọs ọ tẹ ta kẹ Pita nọ: ‘Edẹ ene nọ e vrẹ nọ mẹ jẹ lẹ se Ọghẹnẹ, ukọ-odhiwu jọ ọ tẹ ta kẹ omẹ nọ me vi ahwo nyai se owhẹ. Ivie wuhrẹ omai ẹme Jihova.’ Pita ọ tẹ ta nọ: ‘Enẹna mẹ ruẹ no nọ Ọghẹnẹ o wo ọriẹwẹ hẹ. Ọ rẹ jẹ ohwo kpobi nọ ọ gwọlọ gọe rehọ.’ Pita o te wuhrẹ ai eware buobu kpahe Jesu. Ẹzi ọfuafo na ọ tẹ ruọ Kọniliọs gbe ahwo kpobi nọ a jọ etẹe oma, aikpobi a tẹ họ-ame.