Fikieme Ma rọ Ta nọ 1919?

Eruẹaruẹ Ebaibol gbe eware nọ e via i dhesẹ vevẹ nọ ukpe 1914 Jesu o ro mu esuo họ evaọ obọ odhiwu, yọ ukpe yena edẹ urere uyero-akpọ Setan i ro muhọ. Eme Jesu o ru nọ a rehọ iẹe mu Ovie no? Kọ o si idibo riẹ nọ e rrọ otọakpọ no igbo Babilọn Ologbo na ẹsiẹsiẹ? Kọ ọ rehọ “ọrigbo nọ a re fievahọ nọ o wo areghẹ na” mu evaọ 1914 je mu iruo ivuẹvu na họ?​—Mat. 24:45.

O sae nwane via ere he. Kareghẹhọ nọ ẹzi Ọghẹnẹ ọ wọ Pita ukọ na kere nọ, “uwou Ọghẹnẹ [ẹdhoguo] o ti jo muhọ.” (1 Pita 4:17) Epọvo na re, Malakae ọruẹaro na ọ ruẹaro kpahe okenọ Jihova ọ te rọ ziọ uwou egagọ Riẹ, tei te “ọnyukọ ọvọ na,” Ọmọ Ọghẹnẹ. (Mal. 3:1-5) Oke yena o te jọ okenọ a ti ro ru idibo Ọghẹnẹ fo, a vẹ te jẹ rẹriẹ ovao dhe edawọ. Kọ eware nọ e via e rọwokugbe eruẹaruẹ nana?

Ee! Etoke ukpe 1914 rite obọ emuhọ ukpe 1919 o jọ etoke edawọ rọkẹ Isẹri Jihova, enọ a je se Emọ-Uwuhrẹ Ebaibol oke yena. O tẹ jẹ jọ etoke nọ a ro ru ai fo. Wọhọ oriruo, ahwo Ọghẹnẹ a je rẹro nọ ukpe 1914 uyero-akpọ nana u ti ro kuhọ, nọ o gbẹ via ere he, o tẹ kẹ ibuobu rai uye gaga. Eware i te je yoma viere evaọ ukpe 1916, nọ Brọda Charles T. Russell, ọnọ ọ jẹ kobaro evaọ iruẹru ahwo Ọghẹnẹ evaọ oke yena o whu. Otu jọ nọ Brọda Russell ọ were gaga a tẹ jẹ wọso oware kpobi nọ Brọda Joseph F. Rutherford nọ ọ rehọ ẹta Russell o je ru. A te mu ọvuọ utu riẹ họ ẹhẹriẹ kpohọ, yọ onana o jẹ te hẹriẹ ukoko na no dede evaọ ukpe 1917. Kẹsena, evaọ ukpe 1918, isu egagọ a te ru nọ egọmeti ọ rọ rehọ Brọda Rutherford avọ inievo ihrẹ efa nọ e jẹ kobaro evaọ iruẹru idibo Ọghẹnẹ ro guẹdhọ, a te brukpe ai je fi ai họ uwou-odi ekueku. A tẹ siọ iruo ba evaọ obọ Brooklyn, oria nọ ehri ukoko na ọ jọ. Avro ọ riẹ hẹ, ahwo Ọghẹnẹ a gbẹ jọ igbo Babilọn Ologbo na!

Kọ eme ọ via evaọ ukpe 1919? Ẹkẹre o te kurẹriẹ ẹsiẹvo! Evaọ emuhọ ukpe yena, a te siobọno Brọda Rutherford avọ inievo nọ a mu fihọ uwou-odi na. A tẹ nwani mu iruo họ! O raha oke he, a te ru ọruẹrẹfihotọ okokohọ ologbo jọ je mu emagazini ọkpokpọ nọ a re se The Golden Age họ ekere (onọ a bi se Awake! enẹna). A ru emagazini nana re a hẹ rehọ iẹe kẹ ahwo evaọ usi uwoma ota. U te no ere no, a jọ ukoko ovuovo rehọ oniọvo jọ mu ọsẹro nọ ọ rẹ rẹrote iruo usi uwoma ota na ziezi. Ukpe yena ovona a ro mu Bulletin họ ekere, (onọ ma bi se Obe Ewuhrẹ Uzuazọ Oleleikristi gbe Usi Uwoma Ota Mai enẹna) re a rehọ iẹe wuhrẹ ahwo epanọ a re ru iruo usi uwoma ota na ziezi.

Kọ eme ọ via no na? O rrọ vevẹ nọ Kristi o si ahwo riẹ no igbo Babilọn Ologbo na no. Ọ rehọ ọrigbo riẹ nọ a re fievahọ nọ o wo areghẹ na mu no. Iruo ivuẹvu na i muhọ no. Ukpe 1919 na u wuzou gaga, yọ anwọ ukpe yena ze iruo na e nyaharo gaga no evaọ edhere nọ ma rẹro riẹ hẹ.