ẸKPẸTI UWUHRẸ 20A

Oghẹrẹ nọ A Ghale Otọ Na

Oghẹrẹ nọ a romatotọ dhesẹ iwhru ẹkwotọ na kpobi na o kẹ ahwo nọ a jọ igbo na imuẹro inọ ẹkwotọ ezi rai na ọ te wariẹ zihe ruọ ẹkwotọ owoma nọ a te rria. Eme ma rẹ sai wuhrẹ no eruẹaruẹ nana ze nẹnẹ? Eware ivẹ jọ nọ ma rẹ sai wuhrẹ noi ze ena:

Emapo nọ u bi dhesẹ iwhru otọ nọ a ghale kẹ ahwo Izrẹl nọ a no igbo ze na, wọhọ epanọ Izikiẹl o kere i rai fihotọ. A ghale otọ na kẹ erua na kpobi ẹrẹrẹe unọjọ utọjọ muhọ no Dan ze, kẹsena u te te Asha, Naftalae, Manasẹ, Ifremu, Rubẹn, Juda, Otọ nọ A rẹ Nyaseba (ẹkẹ otọ esuo), Bẹnjamin, Simiọn, Isaka, Zẹbulọn, gbe Gad.

Ma wo ọvuọ oria riẹ gbe iruo nọ i wuzou

Ohwo kpobi evaọ usu ahwo nọ a zihe no igbo ze na o wo ẹkwotọ nọ a kẹ riẹ nọ ọ rọ reuku evaọ Ẹkwotọ Eyaa na. Epọvo na re nẹnẹ, idibo Jihova kpobi a wo iruo nọ a bi ru evaọ ukoko riẹ. O tẹ make wọhọ nọ iruo nọ ma wo evaọ ukoko na e rro ho, ma wo ọvuọ oria riẹ, yọ iruo kpobi nọ ma bi ru evaọ ukoko na i wuzou. Idibo Jihova kpobi a rrọ ghaghae evaọ aro riẹ.

A ghale otọ na ẹrẹrẹe

Evaọ eruẹaruẹ Izikiẹl na, emamọ eware nọ e da Ẹkwotọ Eyaa na fia i te ahwo nọ a jẹ rria ẹkwotọ na kpobi obọ ẹrẹrẹe. Epọvo na re nẹnẹ, Jihova ọ kẹ idibo riẹ kpobi uvẹ ovona nọ a re ro wo eghale nọ i bi no ukoko riẹ nọ o wọhọ aparadase na ze.

Zihe kpohọ uzou avọ 20, edhe-ẹme avọ 5-11