UWUHRẸ AVỌ 10
Ẹvẹ Iwuhrẹ Isẹri Jihova E Sai ro Fiobọhọ Kẹ Owhẹ?
Kọ a zizie owhẹ kpohọ iwuhrẹ Isẹri Jihova no ẹdẹ jọ? Otẹrọnọ whọ re nya ẹdẹvo ho, ozọ o sae dina jọ owhẹ ẹro. Ẹsejọhọ who bi roro nọ: ‘Eme a rẹ jọ obọ iwuhrẹ na ru dede? Fikieme i ro wuzou? Kọ fikieme u ro fo nọ mẹ nya?’ Evaọ uwuhrẹ nana, whọ te ruẹ epanọ amọfa nọ who re kuomagbe wuhrẹ kpahe Ọghẹnẹ o sai ro si owhẹ kẹle iẹe je fiobọhọ kẹ owhẹ omara.
1. Ẹjiroro vẹ o mai wuzou nọ ma be hai ro kuomagbe?
Ohwo jọ evaọ usu ahwo nọ a kere Ebaibol na ọ fodẹ ẹjiroro nọ o mai wuzou inọ: “Me re jiri Jihova evaọ udevie ogbotu nọ o kokohọ na.” (Olezi 26:12) Epọvo na re nẹnẹ, o rẹ were Isẹri Jihova gaga re a kuomagbe ru iwuhrẹ. Wariẹ akpọ na soso họ, a re kuomagbe koka koka re a jiri Ọghẹnẹ, so ile jẹ lẹ. Yọ evaọ etoke sa-sa evaọ ẹgbukpe na, a re kuomagbe ru ikokohọ ilogbo nọ a rẹ jọ gọ Ọghẹnẹ re.
2. Eme who ti wuhrẹ evaọ obọ iwuhrẹ mai?
Ẹme Ọghẹnẹ Ebaibol na ma re wuhrẹ evaọ obọ iwuhrẹ mai, yọ ma re “ru ei vẹ ziezi jẹ fa otọ riẹ.” (Se Nehemaya 8:8.) Nọ whọ tẹ be hai kpohọ iwuhrẹ, who ti wuhrẹ kpahe Jihova gbe obọdẹ iruemu riẹ. Yọ nọ whọ be riẹ epanọ o you owhẹ te na, u ti ru owhẹ si kẹle iẹe ziezi. Who ti je wuhrẹ kpahe epanọ ọ sai ro fiobọhọ kẹ owhẹ yeri emamọ uzuazọ.—Aizaya 48:17, 18.
3. Irere vẹ who re wo nọ who te bi lele amọfa ta ẹme evaọ obọ iwuhrẹ mai?
Jihova ọ vuẹ omai nọ ma “roro kpahe ohwohwo re ma sai ru ohwohwo dhesẹ uyoyou je ru iruo iwoma, ma re gbabọkẹ omakokohọ mai hi.” (Ahwo Hibru 10:24, 25) Whọ te jọ obọ iwuhrẹ mai ruẹ ahwo nọ a gine you ohwohwo jẹ be gwọlọ wuhrẹ kpahe Ọghẹnẹ wọhọ owhẹ omara. Who ti yo eme nọ e rẹ tuduhọ ohwo awọ nọ i no Ebaibol ze nọ a te ta. (Se Ahwo Rom 1:11, 12.) Whọ te sai je lele ahwo jọ nọ e re te rọo ho gbe enọ e rọo no ta ẹme, nọ i bi wo evawere ghelọ ebẹbẹ nọ a be rẹriẹ ovao dhe. Enana yọ ẹjiroro jọ nọ Jihova ọ rọ gwọlọ nọ ma hai kokomahọ ẹsikpobi.
GBE WUHRẸ EWARE EFA
Wuhrẹ kpahe epanọ iwuhrẹ Isẹri Jihova e rẹ jọ, gbe oware nọ u ro woma re ma dawo ẹgba mai kpobi kpohọ iwuhrẹ na.
4. Iwuhrẹ Isẹri Jihova
Evaọ ikpe-udhusoi ọsosuọ, Ileleikristi a jẹ hai kuomagbe gọ Jihova ẹsikpobi. (Ahwo Rom 16:3-5) Se Ahwo Kọlọsi 3:16, kẹsena wha vẹ ta ẹme kpahe onọ nana:
Oghẹrẹ vẹ Ileleikristi ọsosuọ a jẹ rọ gọ Jihova?
Nẹnẹ, Isẹri Jihova a be hai kuomagbe ẹsikpobi re evaọ eria egagọ rai. Re whọ ruẹ epanọ iwuhrẹ rai e rẹ jọ, kporo IVIDIO na. Kẹsena wha ve rri uwoho ewuhrẹ nọ a bi ru jẹ ta ẹme kpahe enọ nọ e rrọ obotọ na.
Eme who muẹrohọ nọ a rẹ jọ Ọgwa Uvie ru nọ who se kpahe evaọ Ahwo Kọlọsi 3:16 na?
Kọ whọ jọ ividio na hayo uwoho na ruẹ oware ofa jọ nọ o were owhẹ evaọ iwuhrẹ mai?
Se 2 Ahwo Kọrint 9:7, kẹsena wha vẹ ta ẹme kpahe onọ nana:
Fikieme a gbe ro mi ugho ho evaọ iwuhrẹ Isẹri Jihova?
Jọ owhẹ avọ ohwo nọ o bi wuhrẹ owhẹ wha rri eware nọ a ti wuhrẹ evaọ ewuhrẹ mai jọ evaọ oka nana kugbe.
Abọ vẹ evaọ ewuhrẹ na o mae were owhẹ hayo who roro nọ o te mai fiobọhọ kẹ owhẹ?
Kọ whọ riẹ?
Whọ sae jọ jw.org ruẹ eria nọ a rẹ jọ ru iwuhrẹ evaọ akpọ na soso gbe okenọ a re ro ru ai.
A rẹ jọ iwuhrẹ mai kẹ evuẹ, ru idhesẹvia, je dhesẹ ividio. A rẹ rọ ole gbe olẹ ro muhọ je ku iwuhrẹ na họ
Ahwo nọ a kpohọ ewuhrẹ na a re wo uvẹ nọ a rẹ rọ kẹ iyo evaọ abọ jọ ewuhrẹ na
Ohwo kpobi ọ sae nyaze—uviuwou soso, enọ e re rọo ho, ekpako soso, gbe emaha na
Iwuhrẹ mai ọvọvẹ. Isẹri Jihova a re mi ohwo ugho re ọ tẹ ruọ eva ha, yọ a re ghoro umudo gbe he
5. O gwọlọ nọ ma rẹ daoma re ma sai kpohọ iwuhrẹ
Roro kpahe oriruo uviuwou Jesu. Kukpe kukpe, a jẹ hae nya ugbo nọ u thabọ te emaele udhosa evaọ edẹ buobu no Nazarẹt kpobọ Jerusalẹm nyai ru ehaa evaọ etẹmpol na, yọ idhere na e jọ igbigbehru. Se Luk 2:39-42, kẹsena wha vẹ ta ẹme kpahe enọ nana:
Kọ who roro nọ obọ Jerusalẹm nọ a jẹ hae nya kukpe kukpe na yọ okolo iruo?
Fikieme o sae rọ gwọlọ nọ whọ rẹ daoma gaga re whọ sai kpohọ iwuhrẹ?
Kọ who roro nọ u gine fo re whọ daoma kpohọ iwuhrẹ? Fikieme?
Ebaibol na ọ ta nọ u wuzou gaga re ma hai kokohọ gọ Ọghẹnẹ. Se Ahwo Hibru 10:24, 25, kẹsena wha vẹ ta ẹme kpahe onọ nana:
Fikieme u ro fo re ma hai kpohọ iwuhrẹ ẹsikpobi?
AHWO JỌ A RẸ TA NỌ: “U du gwọlọ nọ who kuomagbe ahwo jọ re whọ tẹ gọ Ọghẹnẹ hẹ. Whọ rẹ sai se Ebaibol na kẹ omobọ ra evaọ obọ uwou.”
Oria Ebaibol vẹ hayo oriruo vẹ evaọ Ebaibol na u dhesẹ oware nọ Jihova ọ gwọlọ nọ ma ru?
EME WHO WUHRẸ NO?
Iwuhrẹ enya i re fiobọhọ kẹ owhẹ wuhrẹ eware buobu kpahe Jihova, ru owhẹ wo usu okpekpe kugbei, je kuomagbe amọfa gọe.
Ọkiẹkpemu
Fikieme Jihova ọ rọ ta nọ ma hai kuomagbe?
Eme who ti wuhrẹ evaọ iwuhrẹ Isẹri Jihova?
Irere efa vẹ who roro nọ whọ rẹ sai wo nọ who te kpohọ ewuhrẹ?
KIẸ KPAHE EFA
Kọ ozọ nọ who re ro kpohọ ewuhrẹ u bi mu owhẹ? Rri oware nọ u fiobọhọ kẹ ọzae jọ nọ ozọ o jẹ dina mu nọ iwuhrẹ na e rọ were iẹe gaga enẹna.
Rri epanọ iwuhrẹ e were uzoge jọ te gbe oware nọ o ru nọ ọ be sai ro kpohọ iwuhrẹ na ẹsikpobi.
Ruẹ oware nọ amọfa a ta kpahe oghẹrẹ nọ a rri iwuhrẹ enya.
“Fikieme Wha Jẹ Be Hae Kpohọ Iwuhrẹ Evaọ Obọ Ọgwa Uvie?” (Uzoẹme nọ o rrọ itanẹte)
Se kpahe epanọ uzuazọ ohwo jọ nọ ọ jọ utu ahwo nọ a re ru ozighi u ro nwene nọ o kpohọ ewuhrẹ Isẹri Jihova.