UWUHRẸ AVỌ 29

Eme Ọ rẹ Via kẹ Omai nọ Ma te Whu?

Onọ A Printi

Kọ ohwo nọ who you o whu ku owhẹ no ẹdẹ jọ? O rẹ da gaga, yọ o sae lẹliẹ owhẹ nọ inọ: ‘Eme ọ rẹ via nọ ma te whu? Kọ ẹruore ọ riẹ inọ ma te wariẹ ruẹ ahwo mai na ẹdẹ jọ?’ Ma te jọ uwuhrẹ nana gbe onọ o kẹle riẹ na wuhrẹ kpahe iyo nọ Ebaibol na ọ kẹ nọ e rẹ sasa ohwo oma.

1. Eme ọ rẹ via kẹ omai nọ ma te whu?

Jesu ọ rehọ uwhu ro dhesẹ owezẹ udidi. Nọ ohwo ọ tẹ rrọ owezẹ udidi ọ rẹ riẹ eware nọ e be via kẹle iẹe he. Ẹvẹ uwhu o rọ wọhọ owezẹ? Nọ ohwo o te whu no, oware ovo o rẹ gbẹ dae he. Ghelọ epanọ o you ahwo uviuwou riẹ gbe egbẹnyusu riẹ te kẹhẹ, aro rai i re voi hi. Ebaibol na ọ ta nọ, “enọ i whu no a riẹ oware ovuovo ho.”—Se Ọtausiuwoma Na 9:5.

2. Didi erere ma re wo nọ ma tẹ riẹ uzẹme na kpahe uwhu?

Ahwo buobu a rẹ dhozọ uwhu, yọ ozọ ohwo nọ o whu no o re tube mu ai dede. Rekọ oware nọ Ebaibol na ọ ta kpahe uwhu o sai si ozọ na no owhẹ ẹro. Jesu ọ ta nọ: “Uzẹme na u . . . ti si owhai no igbo.” (Jọn 8:32) Egagọ jọ a re wuhrẹ nọ ohwo o te whu, oware jọ u re noi oma kpohọ oria ọfa, rekọ Ebaibol na ọ ta ere vievie he. Fikiere, ohwo nọ o whu no ọ rẹ ruẹ uye he. Nọ orọnọ ahwo nọ a whu no a riẹ oware ovo ho na, a rẹ sae nwa omai oma ha. Nọ o rrọ ere na, ma rẹ gọ hayo ru oware ovo kẹ ahwo nọ a whu no ro kie ai ofu hu, yọ ma rẹ lẹ kẹ ai gbe he.

Ahwo jọ a rẹ ta nọ a re lele enọ i whu no ta ẹme. Rekọ o sae jọ ere vievie he. Wọhọ epanọ ma wuhrẹ no na, enọ i whu no “a riẹ oware ovuovo ho.” Nọ ohwo o te roro nọ o bi lele ahwo riẹ nọ a whu no ta ẹme yọ idhivẹri o bi lele ta ẹme na, keme a re ru wọhọ ẹsenọ a rrọ ahwo nọ a whu no na. Ma tẹ riẹ oghẹrẹ nọ ohwo nọ o whu no ọ rrọ dẹẹ, ma re kie ruọ abọ idhivẹri hi. Jihova ọ vẹvẹ omai unu nọ ma lele enọ i whu no ta ẹme he, keme ọ riẹ nọ ma tẹ nya usu kugbe idhivẹri o rẹ wha uye se omai.—Se Iziewariẹ 18:10-12.

GBE WUHRẸ EWARE EFA

Gbe wuhrẹ kpahe oware nọ Ebaibol na ọ ta kpahe uwhu, gbe nọ Ọghẹnẹ oyoyou na ọ rẹ lahiẹ ahwo nọ a whu no ho, yọ onana o ti ru ẹrọwọ nọ who fihọ Ọghẹnẹ ga.

Ọzae jọ nọ avọ emọ esese ivẹ riẹ a keria agbara evaọ okenọ a ro ki aye riẹ nọ o yẹ emọ ivẹ na kẹe. Egbẹnyusu gbe imoni riẹ a rrọ kugbe ae be sasa ae oma jẹ tuduhọ ai awọ.

3. Wuhrẹ kpahe oghẹrẹ nọ ahwo nọ a whu no a rrọ dẹẹ

Evaọ akpọ na soso, ahwo a rọwo eware sa-sa kpahe ahwo nọ a whu no. Rekọ o sae jọnọ aikpobi na e rrọ uzẹme he.

Eme ahwo a jọ oria nọ whọ be rria rọwo kpahe ahwo nọ a whu no?

Re whọ ruẹ oware nọ Ebaibol na ọ ta, kporo IVIDIO na.

IVIDIO: Ẹvẹ Ahwo nọ A Whu No A Rrọ?—Amabọ Jọ Riẹ (1:19)

Iwoho: Eria jọ ividio na ‘Ẹvẹ Ahwo nọ A Whu no A Rrọ?—Amabọ Jọ Riẹ.’ 1. Ori nọ ọ rrọ ehwa evaọ ẹsipito. 2. Ọzae nọ ọ be wezẹ evaọ udevie imava nọ a gbẹ rrọ evaọ itreni bi kpohọ erẹ.

Se Ọtausiuwoma Na 3:20, kẹsena wha vẹ ta ẹme kpahe enọ nana:

Wọhọ epanọ oria Ebaibol nana o ta na, eme ọ rẹ via nọ ohwo o te whu no?
Kọ oware jọ o rrọ oma ohwo nọ u re whu hu?

Ma rẹ jọ Ebaibol na se iku Lazarọs, ogbẹnyusu ọkpekpe Jesu nọ o whu. Nọ wha ti se Jọn 11:11-14 na, muẹrohọ oware nọ Jesu ọ ta kpahe Lazarọs okenọ o whu. Kẹsena wha vẹ ta ẹme kpahe enọ nana:

Eme Jesu ọ rọ uwhu dhesẹ?
Nọ orọnọ Jesu o dhesẹ uwhu ere na, eme oyena u wuhrẹ omai kpahe oghẹrẹ nọ ahwo nọ a whu no a rrọ?
Kọ who roro nọ oghẹrẹ nọ Ebaibol o dhesẹ uwhu na u kiehọ?

4. Erere nọ ma re wo nọ ma tẹ riẹ uzẹme na kpahe uwhu

Ma tẹ riẹ uzẹme na kpahe uwhu, ma rẹ dhozọ ahwo nọ a whu no ho. Se Ọtausiuwoma Na 9:10, kẹsena wha vẹ ta ẹme kpahe onọ nana:

Kọ ahwo nọ a whu no a sae nwa omai oma?

Oware nọ Ebaibol ọ ta u re fiobọhọ kẹ omai nọ ma gbe ro ru eware jọ ro kie ofu ahwo nọ a whu no ho, yọ ma rẹ gọ ae gbe he. Se Aizaya 8:19 gbe Eviavia 4:11, kẹsena wha vẹ ta ẹme kpahe onọ nana:

Ẹvẹ who roro nọ Jihova o bi rri ohwo nọ ọ rẹ gọ ahwo nọ a whu no hayo yare ae re a fiobọhọ kẹe?

Iwoho: Eware nọ a re ru rọ kẹ ahwo nọ a whu no ọghọ. 1. Ọzae nọ o kigwẹ fihọ aro uki be lẹ avọ emuore nọ o bi ro dhe idhe. 2. Ezae esa nọ i ku oghẹrẹ eware jọ họ oma nọ a bi gbe ehaa. 3. Ahwo nọ a bi luje nọ a ku ekpe uzou ohwo họ, yọ a kru iwoho uzou ohwo evaọ Ẹdẹ Enọ I Whu No. — Ma tẹ riẹ uzẹme na kpahe uwhu, u re si omai no igbo iruemu nọ e rẹ dha Ọghẹnẹ eva

5. Ma re wo omosasọ nọ ma tẹ riẹ uzẹme na kpahe uwhu

A bi wuhrẹ ahwo buobu nọ a te whu, a te ruẹ uye olahiẹ fiki eware iyoma nọ a ru. Rekọ o rọ oware omosasọ nọ ma rọ riẹ nọ ohwo o te whu no, ọ rẹ gbẹ ruẹ uye he, ọ tẹ make rrọ ohwo nọ o ru eware nọ i yoma gaga dede. Se Ahwo Rom 6:7, kẹsena wha vẹ ta ẹme kpahe onọ nana:

Wọhọ epanọ ma se evaọ Ebaibol na inọ ohwo o te whu yọ a si uzioraha riẹ noi uzou no na, kọ who roro nọ ahwo nọ a whu no a be ruẹ uye fiki eware iyoma nọ a ru?

Epanọ ma riẹ Jihova te, ere u re mu omai ẹro te inọ ọ rẹ lahiẹ ahwo nọ a whu no vievie he. Se Iziewariẹ 32:4 gbe 1 Jọn 4:8, kẹsena wha vẹ ta ẹme kpahe enọ nana:

Kọ Ọghẹnẹ nọ o wo emamọ iruemu nọ a fodẹ evaọ eria Ebaibol yena ọ sae ginẹ kuvẹ re a lahiẹ ahwo nọ a whu no?
Kọ oware nọ Ebaibol na o wuhrẹ kpahe uwhu na o sasa owhẹ oma? Fikieme?

AHWO JỌ A RẸ TA NỌ: “Ozọ oware nọ o te via kẹ omẹ nọ me te whu no u bi mu omẹ.”

Eria Ebaibol vẹ whọ rẹ sai se kẹ ohwo na rọ sasa iẹe oma?

EME WHO WUHRẸ NO?

Nọ ohwo o te whu no, yọ uzuazọ riẹ u kuhọ no, ọ rẹ gbẹ riẹ oware ovo ho. Ahwo nọ a whu no a rẹ ruẹ uye he, yọ a rẹ sae nwa ahwo nọ a rrọ uzuazọ oma ha.