Whọ Dhozọ Họ

Oware nọ Jesu O Ru

IVIDIO: Jesu Ọ kẹ Osu Ọmoha Jọ nọ O Fe Ohrẹ

1. Rri IVIDIO na, hayo se Mak 10:17-22. Kẹsena whọ vẹ kẹ iyo enọ nọ e rrọ obotọ na:

1. Emamọ iruemu vẹ o sae jọ nọ Jesu ọ ruẹ evaọ oma osu nọ ọ jọ ọmoha na?

2. Fikieme o rọ gwọlọ nọ Jesu o re wo uyoyou gbe udu re ọ sae kẹ ọzae na ohrẹ?

Eme Ma Wuhrẹ Mi Jesu?

2. Re ma sai fiobọhọ kẹ ahwo nọ ma bi wuhrẹ nyaharo, ma rẹ ta ẹme kẹ ae evaọ edhere owowou, rekọ ma rẹ vuẹ ae oria nọ o jọ gwọlọ nọ a re nwene vevẹ.

Rọ Aro Kele Jesu

3. Fiobọhọ kẹ ohwo nọ who bi wuhrẹ fi itee họ je le itee na tobọ.

1. Rehọ oria “Utee nọ whọ rẹ sai fihọ” nọ ọ rrọ uwuhrẹ kpobi evaọ obe Reawere Uzuazọ Bẹdẹ Bẹdẹ! na fiobọhọ kẹ ohwo na fi utee họ.

2. Fiobọhọ kẹ ohwo na riẹ eware jọ nọ ọ rẹ sai ru re o fi itee nọ ọ sai le tobọ obọnana họ gbe enọ ọ sai le tobọ evaọ obaro.

3. Hai yere ohwo na ẹsikpobi kẹ ẹnyaharo nọ o bi wo.

4. Daoma riẹ eware nọ i bi ru nọ ohwo na ọ gbẹ be nyaharo ho, who ve fiobọhọ kẹe re ọ riẹ oware nọ o re ru kpahe ae.

1. Nọ omara nọ:

   • ‘Eme ọ be whae ze nọ ohwo nọ me bi wuhrẹ ọ gbẹ be nyaharo re ọ họ-ame he?’

   • ‘Eme mẹ sai ru ro fiobọhọ kẹe?’

2. Lẹ se Jihova re ọ kẹ owhẹ udu nọ whọ sae rọ vuẹ ohwo na oware nọ u fo nọ o re ru vevẹ, gbe epanọ whọ sae rọ ta ẹme na evaọ edhere owowou.

5. Siọ ohwo na ba ewuhrẹ otẹrọnọ ọ be nyaharo ho.

1. Re whọ riẹ sọ ohwo nọ who bi wuhrẹ ọ be nyaharo, nọ omara nọ:

   • ‘Kọ ohwo nọ me bi wuhrẹ na o bi ru lele eware nọ o bi wuhrẹ na?’

   • ‘Kọ ọ be hai kpohọ iwuhrẹ ukoko jẹ vuẹ amọfa eware nọ o bi wuhrẹ evaọ Ebaibol na?’

   • ‘Nọ orọnọ o wuhrẹ kri te omoke jọ no na, kọ ọ gwọlọ nọ ọ rẹ jọ omọvo Isẹri Jihova?’

2. Otẹrọnọ ohwo nọ who bi wuhrẹ ọ gwọlọ nyaharo ho:

   • Ta kẹe re o roro kpahe oware nọ o be whaha iẹe.

   • Rọ areghẹ vuẹe oware nọ whọ rọ gwọlọ se iẹe ba ewuhrẹ.

   • Vuẹe eware nọ u fo nọ o re muhọ eru re whọ sae wariẹ mu ei họ ewuhrẹ evaọ oke ofa.