Enọ Ahwo Nọ A S’ebe

Ẹsejọ ma re yo inievo nọ a rẹ t’ẹme hayo lẹ kẹ Uvie Ọghẹnẹ re ọ nyaze otọakpọ. Ẹme ọnana ọ gba?

A tẹ ghinẹ t’uzẹme, o rọ edhere ọgbagba nọ a rẹ rọ t’ẹme no Ikereakere na ze he. Obọ odhiwu Uvie Ọghẹnẹ o rọ. Fikiere, Pọl ukọ na ọ tẹ sai kere nọ: “Ọnowo na ọ rẹ te thọ omẹ no keyoma keyoma kpobi re o siwi omẹ rọ kẹ uvie odhiwu riẹ. Jọ oruaro u te i bẹdẹ bẹdẹ. Ami.”—2 Timoti 4:18; Matiu 13:44; 1 Ahwo Kọrint 15:50.

A rọ Uvie na mu obọ odhiwu evaọ 1914, yọ a re ti kpeziei ziọ otọakpọ nọ a te wariẹ ru fihọ Aparadase hayo oria ọfa ha. Jesu Kristi họ Ovie Uvie na. Wọhọ Ovie, Jesu o wuzou enjẹle na kpobi. Fikiere, uzedhe oria esuo riẹ họ obọze Ọghẹnẹ evaọ obọ odhiwu. Ileleikristi nọ a kẹ ẹzi a ti kuomagbei wọhọ ivie gbe izerẹ evaọ obọ odhiwu.—Ahwo Ẹfẹsọs 1:19-21; Eviavia 5:9, 10; 20:6.

Kọ onana u dhesẹ nọ ma re gbe ru olẹ ayare nọ ọ rọ abọ Olẹ Olori na se Ọghẹnẹ hẹ, onọ o ta nọ: “Uvie ra oze, epanọ a rọ obọ odhiwu ru orọ eva ra, ru re a jọ akpọ na ru ere re”? (Matiu 6:10) Thabọ no oyena, olẹ oyena o rọ gbagba yọ o gbẹ vọ avọ otofa.

Uvie Ọghẹnẹ ọ te gbẹ jẹ emamọ owọ kpahe otọakpọ ọnana, yọ oye họ oware nọ ma wo họ iroro nọ ma tẹ be lẹ be fodẹ oghẹrẹ eme nọ e rọ Olẹ Olori na. Wọhọ oriruo, Daniẹl 2:44 ọ ruẹaro inọ Uvie na ọ te “ze” te raha erẹwho kpobi no jẹ rehọ esuo otọakpọ na soso. Eviavia 21:2 ọ ta kpahe Jerusalẹm Ọkpokpọ na nọ o bi no obọ odhiwu ze. Ahwo nọ i ru Jerusalẹm Ọkpokpọ na via họ Ileleikristi 144,000 nọ a kẹ ẹzi enọ e rẹ te jọ ọmọtibobo Kristi. A tẹ jẹ rọ ibe eriuku kugbe Jesu evaọ Uvie na. Fikiere Eviavia 21:2 u dhesẹ epanọ a te rọ rẹriẹ ova ku otọakpọ na, avọ eghale buobu nọ i ti te uviuwou ohwo-akpọ.—Eviavia 21:3, 4.

Taure enana gbe eruẹaruẹ igbunu efa i te ti rugba, o rẹ gbẹ jọ ziezi re a lẹ se Jihova Ọghẹnẹ nya lele eme Jesu na, “Uvie ra oze.” Rekọ ma re woi họ iroro nọ Uvie na ọ be ziọ Otọakpọ obonẹ te jọ họ. Egọmeti Uvie na ọ rọ obọ odhiwu, orọnikọ otọakpọ họ.

[Picture Credit Line on page 30]

Otọakpọ: Nọ a sino ifoto NASA ze