Iwhowho Uvie A Be Niyẹrẹ

Obufihọ kẹ Enọ “Uruame” U re Kpe Evaọ Russia

“AHWO nọ ohọo gbe uruame ẹrẹreokie u re kpe eva e were ae, keme eva e rẹ te vọ ae,” ere Jesu ọ ta. (Matiu 5:6) Oriruo ọnana o dhesẹ epanọ Isẹri Jihova a bi ro fiobọhọ nyate ẹgwọlọ uruame ẹzi ibuobu evaọ obọ Russia, oria nọ a jọ fi awhaha họ uvẹ egagọ evaọ ikpe nọ i bu vi 70.

▪ Aye jọ nọ a re se Valentina o wo enọ Ebaibol ilogbo nọ a re sae k’iyo kẹ hẹ evaọ ikpe buobu. Wọhọ oriruo, u je gbei unu inọ: ‘Ono Jesu ọ lẹ se?’ O te je roro nọ o sae jọ nọ Jesu ọ lẹ se ohwo nọ o kpehru vi ọye omariẹ yọ o te je roro kpahe odẹ Ohwo ọnana.

O te weze kpohọ Ichọche Orthodox ọrọ Russia. Rekọ, evaọ egagọ yena ọ ruẹ uyo kẹ enọ riẹ na ha. Nọ onana o vọ riẹ eva ha, o te kpohọ ichọche Protẹstant rekọ ọ ruẹ iyo ivevẹ ọvuọvo ho. Nọ ọ gbẹ riẹ oria nọ ọ rẹ nya ha, Valentina o te mu Ebaibol na họ ese, be daoma re ọ ruẹ iyo na kẹ omobọ riẹ—rekọ omolahiẹ gheghe. Ọ tẹ lẹ kẹ obufihọ.

U kri hi Isẹri Jihova a te kporo ẹthẹ riẹ. A te dhesẹ kẹe no Ebaibol ze inọ odẹ Ọghẹnẹ họ Jihova. Uwhremu na, o te ti wuhrẹ kpahe ohwo nọ Jesu ọ jẹ lẹ se na! O te mu Ebaibol họ ewuhrẹ kiti kiti kugbe Isẹri na. Ẹsibuobu o re riaro bẹsenọ oke o rẹ ke bi se ebe nọ Watch Tower Society a kporo, je rri eria Ebaibol nọ a fodẹ. U kri hi Valentina o te ku ei họ inọ ọ ruẹ uzẹme na no. Oware wọhọ emerae esa o te muọ usiuwoma họ ẹta, yọ emerae ivẹ nọ i lele i rie, ọ tẹ họ-ame. Omodawọ nọ ọ rọ gwọlọ uzẹme na u te wo osaohwa.

▪ Osẹri jọ ọ ruọ ebọso re ọ nyae ta usiuwoma evaọ oria nọ u sioma no. Evaọ etoke erẹe na ọ tẹ t’ẹme kugbe uvovo aye jọ kpahe eyaa Ebaibol na, rekọ uvovo aye na o wo isiuru hu. Emerae ivẹ nọ i lele i rie, Osẹri na ọ tẹ wariẹ kpohọ oria ovo na re ọ kẹ ovuẹ ogbotu. Nọ ẹme na o kuhọ no o te bikẹle ọrara jọ jẹ nọe inọ: “Kọ ohwo jọ ọ ta usiuwoma no Ebaibol ze k’owhẹ no ẹdẹjọ?” Ọzae na ọ tẹ k’uyo inọ, “E, whẹ họ ohwo na.” Osẹri na o te roro nọ o bi mu ta. Rekọ ọmoha na ọ tẹ ta kẹe epanọ emerae ivẹ nọ i kpemu o ro yo ẹme nọ Osẹri na avọ uvovo aye jọ a jẹ ta, evaọ erẹe ebọso na. “Mẹ jẹ gwọlọ nọ mẹ rẹ riẹ viere, rekọ who te nwotọ no ebọso na, yọ me te roro nọ mẹ te gbẹ ruẹ Isẹri Jihova ofa ha. Evaọ oria iruo mẹ mẹ tẹ ruẹ ọzae jọ ọnọ o bi wuhrẹ Ebaibol kugbe Isẹri na. Whaọ mẹ na!”

Ọzae na avọ aye riẹ a te mu Ebaibol họ ewuhrẹ. U kri hi, ọ tẹ ruẹ nọ iruo riẹ e wọso ijaje Ebaibol na. Fikinọ ọ gwọlọ wo emamọ iroro evaọ aro Ọghẹnẹ, o te nwene iruo riẹ. Enẹna ọ be rehọ uvẹ kpobi ta kẹ amọfa kpahe Uvie Ọghẹnẹ. Aye riẹ ọ be jẹ nyaharo re evaọ ewuhrẹ Ebaibol na.

Eva e be were Isẹri Jihova evaọ ẹkuotọ ologbo ọ Russia re a w’abọ evaọ ẹta kẹ ahwo udu ezi inọ: “ ‘Nyaze.’ Jọ ohwo nọ o yo kpobi ọ za nọ, ‘Nyaze.’ Whai e nọ uruame u re kpe a nyaze obonẹ re wha mi ame uzuazọ na, okẹ ọvọvẹ rọ kẹ ahwo nọ a guọlọ e riẹe.”—Eviavia 22:17.