Kọ Esiwo Igbunu E Gbẹ Be Via?
“RỌWO Jesu re ẹyao ra o kpo!” Eme nọ e wọhọ enana e wha riẹ ze nọ Alexandre, omọvo ichọche Olẹ-Ẹzi jọ, ọ rọ rọwo nọ re ọ lọ ubiumu fiki ẹyao riẹ u re dhesẹ nọ ọ kare ẹrọwọ. Ọ rọwo inọ ẹrọwọ ọvo o te kẹ usiwo nọ ọ gwọlọ. Benedita, nọ o kru egagọ Kathọlik gaga, u duobọ tei nọ o yo kpahe esiwo igbunu nọ a bi ru evaọ aruẹri ọ Aparecida do Norte, evaọ ẹwho ọ São Paulo, Brazil. Avọ eme ọ ọguakugbe jọ nọ oniọvo-oni riẹ o wuhrẹ i rie, Benedita ọ tẹ lẹ se Oni Mai ọrọ Aparecida, Anthony, gbe “erezi” efa kẹ ogaga nọ o re ro siwi enọ e be mọ.
Orọ vevẹ inọ, makọ eva ekuhọ ikpe-udhusoi avọ 20 nana dede, ahwo buobu a gbẹ rọwo esiwo igbunu—rekọ fikieme? Ẹsejọhọ, ofu o bi dhe otujọ nọ a tẹ ruẹ nọ edọkita e be sai si ẹyao, edada, gbe uye-oruẹ iyoyou rai no ho, maero kọ emọ rai. Ahwo nọ ẹyao rai o bi kpo ho a rẹ sai roro nọ, enẹna nọ imu e ghare gaga no na, a te raha ugho ovuovo ho otẹrọnọ a ruẹ ohwo nọ ọ rẹ lẹ fihọ ẹyao rai. Ahwo jọ a be jọ TV ruẹ ichọche gbe ahwo sa-sa enọ e be ta nọ a wo usiwo kẹ AIDS, ọkora, ọta, oruẹ, uduama, gbe eyao efa. Te a wo ẹrọwọ kpahe olẹ otiọye te a wo ho, a rẹ nya ghele keme oria ofa o gbẹ riẹ nọ a re kpohọ họ. Ghele amọfa nọ a roro nọ erieda e wha ẹyao rai ze a re roro nọ ibimu i wo ogaga nọ i re ro fiobọhọ kẹ ai hi.
Evaọ abọdekọ riẹ, ahwo jọ e riẹ nọ e wọso, hayo tubẹ ghọ, ẹjiroro ọ esiwo igbunu nọ u re no obọ “erezi” nọ i whu no ze hayo isiwi-ahwo ichọche nọ e rọ uzuazọ dede. Wọhọ epanọ Jornal da Tarde o ta, ọbo-imu ifue na Dráusio Varella o roro nọ orọwọ na o rọ “ẹkoko kẹ ẹrọwọ igheghẹ na gbe enọ e kare ẹruore.” O fibae nọ: “Fikinọ a bi rẹro usiwo igbunu, ahwo buobu a tẹ be se usiwo imu fiki ahwo eviẹhọ enana.” Yọ The New Encyclopædia Britannica o ru rie vevẹ nọ: “Esiwo nọ e kare imu a je he roro ai kugbe eria ọrẹri gbe iruẹru egagọ evaọ oke anwae, yọ ebo-imu a dhesẹ usiwo otiọye fihọ usiwo-ọnyẹ nọ u re kpo muotọ họ.” Ghele na, ahwo buobu e riẹ nọ e ghinẹ rọwo nọ usiwo ugbunu a ro siwi ai. Rọ kẹ ai, usiwo na u kpo ẹyao rai riẹriẹriẹ!
Ahwo nọ e riẹ kpahe Ebaibol na a riẹ nọ Jesu Kristi o siwi ahwo nọ e jẹ mọ ẹsibuobu, yọ ‘ogaga Ọghẹnẹ’ o ro ru onana. (Luk 9:42, 43) Fikiere a rẹ sai roro nọ, ‘Kọ ogaga Ọghẹnẹ u gbe bi ruiruo je bi siwi ahwo nẹnẹ?’ Otẹrọ ere, eme jabọ omodawọ re a siwi ahwo i gbe bi ro wo iruo ho? Kọ fikinọ ọnọ ọ be mọ na o wo ẹrọwọ tere he hayo kọ azọhọ nọ o ru o bu hu? Kọ u fo re Oleleikristi ọ gwọlọ usiwo igbunu nọ ọ tẹ be mọ ẹyao ọgaga hayo onọ a rẹ sai siwi hi? Kọ oghẹrẹ esiwo Jesu nọ e jẹ hẹ sẹ gaga na e te gbẹ wariẹ via? Whọ te ruẹ iyo obọdẹ enọ enana evaọ uzoẹme nọ u lele onana.