Jihova O Bi Rri Egagọ Ẹwẹ Ra Kpobi Ghaghae
‘Rọ ẹwẹ ra kpobi ru iruo kpobi nọ i te owhẹ, wọhọ ẹsenọ who bi ru ai kẹ Jihova, orọnikọ ahwo ho.’—AHWO KỌLỌSI 3:23.
1, 2. (a) Eme họ uvẹ ulogbo kpobi nọ ma re wo? (b) Fikieme ma gbẹ sai ru onọ ma gwọlọ ru ẹsejọ họ evaọ egagọ Ọghẹnẹ?
ẸGỌ Jihova họ ọghọ nọ ọ mae rro kpobi nọ ma re wo. Avọ emamọ ẹjiroro, u kri no nọ emagazini ọnana ọ be rọ tudu họ Ileleikristi awọ re a dhomahọ odibọgba na, re a tubẹ gọ “vọvọ” o tẹ lọhọ. (1 Ahwo Tẹsalonika 4:1) Rekọ orọnikọ ẹsikpobi ma be sai ru oware nọ udu mai o gwọlọ nọ ma re ru evaọ ẹgọ Ọghẹnẹ hẹ. Oniọvo-ọmọtẹ jọ nọ o wo ọzae he nọ ọ họ-ame te ikpe 40 no ọ ta nọ: “Oghẹrẹ eyero mẹ o gwọlọ nọ me re ruiruo oke-vọvọ. Ẹjiroro nọ me bi ro ruiruo họ, orọnikọ re me wo emuosẹ nọ e rọ akpọ na kpobi hayo re me kpohọ erẹ eghaghae he, rekọ re mẹ ruẹ ugho nọ mẹ rẹ rọ rẹro te igogo ẹgwọlọ mẹ, araha ibimu gbe ẹruorote ibiakọ mẹ. O r’omẹ oma epaọ ẹsenọ mẹ be rehọ umutho nọ u kiọkọ gheghe kẹ Jihova.”
2 Uyoyou kẹ Ọghẹnẹ o rẹ wọ omai re ma ru uthoma mai evaọ iruo usiuwoma ota na. Rekọ ebẹbẹ uzuazọ i re bru onọ ma rẹ sai ru dhe. Ẹruorote ewha-iruo Ikereakere efa, kugbe ewha-iruo uviuwou, e rẹ sae rehọ oke gbe ẹgba mai gaga. (1 Timoti 5:4, 8) Evaọ “oke ẹbẹbẹ” nana, uzuazọ o vọ avọ use-abọ gaga. (2 Timoti 3:1) Nọ ma gbẹ be sai ru te ẹgwọlọ mai evaọ odibọgba na ha, ẹsejọ ma rẹ sae ruawa. O rẹ sai gb’omai unu sọ egagọ mai e be were Ọghẹnẹ.
Erru ọ Egagọ Ẹwẹ Kpobi
3. Eme Jihova ọ gwọlọ mi omai kpobi?
3 Eva Olezi 103:14, Ebaibol na o rehọ oma osasa k’omai imuẹro nnọ Jihova “ọ riẹ epanọ a rọ ma omai; ọ be kareghẹhọ nọ mai ẹkpẹ gheghe.” Rro vi ohwo jọ kpobi, ọ riẹ uthoma mai. Ọ rẹ jọ obọ mai gwọlọ vi onọ ma rẹ sae kẹ hẹ. Eme ọ gwọlọ? Oware nọ ohwo kpobi ọ rẹ sae kẹ, makọ oghẹrẹ nọ uzuazọ riẹ o rọ kpobi: ‘Rọ ẹwẹ ra kpobi ru iruo kpobi nọ i te owhẹ, wọhọ ẹsenọ who bi ru ai kẹ Jihova orọnikọ ahwo ho.’ (Ahwo Kọlọsi 3:23) Ẹhẹ, Jihova ọ gwọlọ omai—mai kpobi—re ma rọ ẹwẹ mai kpobi gọe.
4. Eme u dhesẹ re a rọ ẹwẹ kpobi gọ Jihova?
4 Eme u dhesẹ re a rọ ẹwẹ kpobi gọ Jihova? Ubiẹme Grik nọ a fa ‘ẹwẹ kpobi’ u dhesẹ “no ẹwẹ ze.” “Ẹwẹ” na họ uzedhe oma ohwo kpobi, avọ ẹgba ugboma gbe iroro riẹ kpobi. Fikiere re a rọ ẹwẹ kpobi gọ u dhesẹ oma nọ a rẹ rọ kẹ, rehọ ẹgba mai kpobi kẹ jẹ rehọ ogaga mai kpobi kẹ riẹriẹriẹ evaọ iruo Ọghẹnẹ. Re a fiei họ lọlọhọ, u dhesẹ eruo oware nọ ẹwẹ mai kpobi o rẹ sai ru.—Mak 12:29, 30.
5. Ẹvẹ oriruo ikọ na u ro dhesẹ nnọ mai kpobi a rẹ sai ruiruo ẹrẹrẹ hẹ evaọ odibọgba na?
5 Re ohwo ọ rọ ẹwẹ kpobi ru kọ u dhesẹ nọ mai kpobi ma re ru ẹrẹrẹ evaọ odibọgba na? Oyena o rẹ sae lọhọ họ, keme eyero gbe ẹgba e rọ sa-sa no ẹwẹ ruọ ẹwẹ. Roro kpahe ikọ ẹrọwọ Jesu. Aikpobi a je ruiruo ẹrẹrẹ hẹ. Wọhọ oriruo, ma yo kpahe ikọ na jọ tere he, wọhọ Saimọn ohwo Kenan na gbe Jemis ọmọ Alfiọs. Ẹsejọhọ iruo nọ a ru wọhọ ikọ e jọ kakao. (Matiu 10:2-4) Wo ẹhẹriẹ, Pita ọ sae jẹ ewha-iruo egbẹgbẹdẹ buobu rehọ—whaọ, Jesu ọ tubẹ kẹe “isiavẹ uvie odhiwu na” dede! (Matiu 16:19) Ghele na, a kpare Pita kpehru vi edekọ họ. Okenọ Jọn ọ ruẹ eruẹaruẹ Jerusalẹm Ọkpokpọ evaọ Eviavia (ole 96 C.E.), ọ ruẹ itho otọhotọ 12 nọ a kere “edẹ ikọ kpogbivẹ” na fihọ.a (Eviavia 21:14) Jihova o rri iruo ikọ na kpobi ghaghae, dede nọ ejọ i ru bu vi edekọ.
6. Evaọ ọtadhesẹ ọkibi ọ Jesu na, eme ọ via kẹ ubi nọ a kọ fihọ “emamọ otọ” na, kọ didi enọ e roma via?
6 Epọvo na re, Jihova ọ be gwọlọ usiuwoma ota ẹrẹrẹ mi omai kpobi hi. Jesu o dhesẹ onana evaọ ọtadhesẹ ọkibi na, onọ o rehọ iruo usiuwoma ota na rọ wawo ekakọ ibi. Ubi na u kie fihọ otọ sa-sa, nọ u dikihẹ kẹ iyero udu sa-sa nọ enọ i yo ovuẹ na a dhesẹ. Jesu ọ ta nọ: “O nọ a kọ fihọ emamọ otọ, onana họ ọ nọ o yo eme na ọ tẹ riẹ otọ riẹ; ọye o ghinẹ mọ ibi, ọ tẹ mọ, ejọ udhe-usoi, ejọ udhe-osa, ejọ ọgba.” (Matiu 13:3-8, 18-23) Eme họ ubi onana, kọ ẹvẹ o rọ mọ unu sa-sa?
7. Didi ibi ubi nọ a kọ na o mọ, kọ fikieme o jẹ mọ unu ibi sa-sa?
7 Nọ o rọnọ ubi nọ a kọ na họ “ẹme uvie na,” ẹmọ ibi na u te dhesẹ ẹvaha ẹme na, ẹta riẹ kẹ amọfa. (Matiu 13:19) Unu ibi nọ e mọ e rọ sa-sa—no ọgba rite udhusoi—keme ẹgba gbe eyero evaọ uzuazọ e rọ sa-sa. Ohwo nọ o wo omakpokpọ gbe ogaga ọ rẹ sae raha oke ziezi evaọ usiuwoma ota vi ohwo nọ ẹyao ọ rọ oma hayo ọnọ ọ kpako no. Ọmoha nọ ọ te rọo ho nọ o wo ufuoma no ewha-iruo uviuwou ọ rẹ sai ru bu vi ọnọ o re ruiruo oke-kpobi re ọ sae ko uviuwou riẹ.—Wawo Itẹ 20:29.
8. Ẹvẹ Jihova o bi rri ahwo nọ a be kẹ uthoma rai?
8 Evaọ eriwo Ọghẹnẹ, kọ ohwo nọ ọ be rehọ ẹwẹ riẹ kpobi gọ nọ ọ mọ ibi ọgba o wo ẹrọwọ kao vi ọnọ ọ be mọ udhusoi? Vievie! Unu ibi nọ a mọ e rẹ sae jọ sa-sa, rekọ o rẹ were Jihova thakpinọ uthoma mai kpobi ma bi ro ru. Kareghẹhọ, ibi sa-sa na kpobi i no “emamọ otọ” na ze. Ubiẹme Grik na (ka·losʹ) nọ a fa “emamọ” na u dhesẹ oware nọ u wo “erru” gbe onọ o rẹ “were udu na, nọ u re si urru.” Ẹvẹ o rọ omosasọ te re ma riẹ nnọ ma te ru uthoma mai, udu mai u re wo erru evaọ aro Ọghẹnẹ!
Whọ Wawo Orọ Amọfa Ha
9, 10. (a) Didi iroro ethọthọ udu mai o rẹ sai su omai kpohọ? (b) Ẹvẹ ọtadhesẹ 1 Ahwo Kọrint 12:14-26 u ro dhesẹ nọ Jihova ọ be rehọ omai wawo amọfa evaọ oware nọ ma bi ru hu?
9 Udu mai onọ o gba ha o rẹ sai roro thọ. O rẹ sae rehọ iruo mai wawo erọ amọfa. O rẹ sai roro nnọ, ‘Amọfa a bi ru bu vi omẹ evaọ odibọgba na. Kọ ẹvẹ iruo mẹ e sae rọ were Jihova eva?’—Wawo 1 Jọn 3:19, 20.
10 Iroro gbe idhere Jihova i kpehru vi emai gaga. (Aizaya 55:9) Ma dina wo otoriẹ kpahe edhere nọ Jihova o re rri omodawọ ohwo no 1 Ahwo Kọrint 12:14-26 ze, oria nọ a jọ rehọ ukoko na dhesẹ ugboma nọ u wo ekwakwa sa-sa—ibiaro, abọ, awọ, ezọ, gbe efa. Dina dhizu re who roro kpahe ugboma na. Ẹvẹ o rẹ kpẹlobọ te re whọ rehọ ibiaro ra rọ wawo abọ hayo rehọ awọ ra wawo ezọ ra! Okwakwa sa-sa u wo ẹkẹ iruo riẹ, ghele na ekwakwa na kpobi i w’iruo yọ e rọ ghaghae. Epọvo na re, Jihova o bi rri egagọ udu ra kpobi ghaghae makọ amọfa a bi ru viere hayo a bi ru tere he.—Ahwo Galesha 6:4.
11, 12. (a) Fikieme ahwo jọ a je roro nọ a rọ ‘eyẹlẹ, hayo a wo ‘ọghọ tere he’? (b) Ẹvẹ Jihova o re rri egagọ mai?
11 Fiki awhaha nọ ẹyao ọ rẹ wha tha, owho, hayo iyero efa jọ, ẹsejọ otu mai jọ a re roro nnọ ma rọ ‘eyẹlẹ’ hayo inọ ma wo ‘ọghọ tere he.’ Rekọ ere Jihova o re rri eware he. Ebaibol na ọ ta k’omai nọ: ‘Abọ jọ oma nọ ma bi rri vo, i wo iruo buobu evaọ oma na. Abọ . . . nọ ma bi rri vo na e ye e mai wo adhẹ . . . Rekọ Ọghẹnẹ o ku oma na gbe, ọ tẹ rehọ adhẹẹ ologbo rọ kẹ abọ nọ ma be mae rri kawo na.’ (1 Ahwo Kọrint 12:22-24) Fikiere ohwo kpobi ọ rọ ghaghae kẹ Jihova. O bi rri egagọ mai ghaghae evaọ utho nọ ma be sai ru. Kọ udu ra o gbẹ be wọ owhẹ re who ru viere evaọ ẹgọ Ọghẹnẹ nọ o wo otoriẹ gbe uyoyou otiọye na?
12 Fikiere oware nọ Jihova o bi rri họ, orọnikọ sọ who bi ru te ohwo ọdekọ họ rekọ sọ who bi ru oware nọ whẹ—ẹwẹ ra—ọ rẹ sai ru. Inọ Jihova o re rri omodawọ ohwo ghaghae u dhesẹ oma via evaọ edhere isiuru nọ Jesu o ro yeri kugbe eyae ivẹ sa-sa evaọ etoke edẹ urere uzuazọ riẹ evaọ otọakpọ.
Okẹ Aye Ovuhumuo jọ nọ O “Ghare Gaga”
13. (a) Eme ọ soriẹ nọ Meri o ro ku ewhri họ uzou gbe awọ Jesu? (b) Ẹvẹ ewhri Meri ọ ghare te?
13 Evaọ owọwọ Edisoi-Oka, Nisan 8, Jesu o te te Bẹtani, iwhre ọsese jọ evaọ ukiekpotọ ovatha-ọre Ugbehru Olivi, ole ikilomita esa no Jerusalẹm. Jesu o wo egbẹnyusu eghaghae evaọ ẹwho ọnana—Meri, Mata, gbe oniọvo rai, Lazarọs. Jesu ọ kpahe rai no vẹre, ẹsejọhọ kperekpere. Rekọ evaọ owọwọ Ẹdẹ-Ọmaha, Jesu avọ egbẹnyusu riẹ a tẹ jọ uwou Saimọn re emu, ọmoti vẹre ọnọ o wọhọ nọ Jesu o siwi. Nọ Jesu ọ keria emẹjẹ na, Meri o te dhesẹ uruemu omarokpotọ nọ u dhesẹ uyoyou udidi kẹ ọzae nọ ọ kpare oniọvo riẹ. O rovie ololo nọ ewhri ore isialẹ o rọ, onọ o “ghare gaga.” O ghinẹ ghare gaga! O ghare te dẹnari 300, enwene osa ẹgbukpe soso. O te ku ewhri ore isialẹ na họ uzou gbe awọ Jesu. Ọ tubẹ rehọ eto riẹ ririe awọ riẹ ya dede.—Mak 14:3; Luk 10:38-42; Jọn 11:38-44; 12:1-3.
14. (a) Didi uruemu ilele na a dhesẹ kpahe iruẹru Meri na? (b) Ẹvẹ Jesu ọ rọ thọ Meri?
14 Eva e tẹ dha ilele na! A tẹ nọ nọ: ‘Kọ araha ọnana kpobi ọrọ eme?’ Judas, nọ ọ be ko iroro ujitho riẹ dhere emu ọ ọghọ nọ a re ru kẹ iyogbere, ọ tẹ ta nọ: “Fikieme a gbẹ zẹ udẹ onana [dẹnari egba-esa, NW ] re a rehọ igho na kẹ iyogbere he?” Meri ọ j’ẹme he. Rekọ, Jesu ọ tẹ ta kẹ ilele na nọ: “Wha vu ei wa; eme wha jẹ be lahiẹe? O ru iruo iwoma [oghẹrẹ ubiẹme ka·losʹ] kẹ omẹ. . . . O ru onọ ọ sai ruẹ; o wholo oma mẹ vẹrino fiki ukio. Uzẹme mẹ ta kẹ owhai, koria koria nọ a jẹ te ta usiuwoma na eva akpọ na ososo, onọ aye ọnana o ru na a rẹ tae re a rorie.” Ẹvẹ eme Jesu na e lẹliẹ udu Meri totọ te!—Mak 14:4-9; Jọn 12:4-8.
15. Ẹvẹ oware nọ Meri o ru na u duobọ te Jesu te, kọ eme ma jọ etẹe wuhrẹ no egagọ ẹwẹ kpobi ze?
15 Oware nọ Meri o ru na u duobọ te Jesu udu gaga. Evaọ ẹwawọ riẹ, o ru oware nọ u fo ejiro. Orọnikọ unuigho oware nọ o ru na u muẹme kẹ Jesu hu rekọ uzẹme na nnọ o “ru onọ ọ sai ruẹ.” Ọ rehọ uvẹ nọ u rovie fihọ na ruiruo ọ tẹ kẹ uthoma riẹ. Efafa efa e ta enẹ, “Utho ẹgba riẹ kpobi o ru na,” hayo, “Orọ ogaga riẹ kpobi o ru na.” (An American Translation; The Jerusalem Bible) Meri ọ rọ ẹwẹ riẹ kpobi kẹ keme ọ kẹ uthoma riẹ kpobi. Oyehọ oware nọ egagọ ẹwẹ kpobi o gwọlọ.
‘Anini Ivẹ’ ọ Aye-Uku Na
16. (a) Ẹvẹ Jesu o ro muẹrohọ okẹ aye-uku oyogbere jọ? (b) Ẹvẹ anini aye-uku na e ghare te?
16 Umutho edẹ jọ evaọ obaro, evaọ Nisan 11, Jesu ọ jọ etẹmpol na raha oke krẹkri, oria nọ a jọ n’enọ kpahe udu ogaga riẹ ọ tẹ jẹ vabọhọ eyo enọ ebẹbẹ kpahe esa-uzou, ẹkparomatha, gbe eme efa. Ọ whọku ikere-ebe gbe otu Farisi na keme, u te no eware efa no, a be “re uvuhu họ iwou eyae-uku.” (Mak 12:40) Jesu ọ tẹ keria Afe Eyae na, oria nọ, wọhọ epanọ uruemu ahwo Ju o rọ, itehe okẹ 13 e rọ. Ọ keria omoke kakao, bi rri nọ ahwo na a be kokẹ unevaze rai na. Edafe buobu e nyaze, ẹsejọhọ ejọ avọ oma oruoro, kugbe ikpẹgọ dede. (Wawo Matiu 6:2.) Jesu ọ tẹ tẹrovi aye jọ. Ohwo gheghe ọ rẹ jọ oma aye na hayo okẹ riẹ ruẹ okpoware ovo ho. Rekọ Jesu, ọnọ ọ rẹ sae riẹ idu amọfa na, ọ riẹ ohwo nọ “aye-uku oyogbere” ọnana ọ rọ. Ọ tẹ jẹ riẹ unuigho okẹ riẹ—“ipini ivẹ.”b—Mak 12:41, 42.
17. Ẹvẹ Jesu o rri okẹ aye-uku na, kọ eme ma jọ etẹe wuhrẹ kpahe ẹrọkẹ Ọghẹnẹ?
17 Jesu o te se ilele riẹ kẹle, keme ọ gwọlọ re a riẹ oware nọ ọ gwọlọ wuhrẹ na. Jesu ọ ta nọ: “O fihọ vi ai kpobi nọ a bi fihọ emetehe-okẹ na.” Evaọ ẹwawọ riẹ, o fihọ vi igho nọ edekọ na kpobi a fihọ. ‘Onọ ukiọkọ kẹe kpobi’ ọ rọ kẹ—ugho nọ o wo kpobi. Ẹkwoma ere oruo, o fi oma riẹ họ abọ ẹruọsa Jihova. Fikiere ohwo nọ a salọ wọhọ oriruo okẹ nọ a rẹ kẹ Ọghẹnẹ họ ohwo nọ aghare ugho okẹ riẹ u fioka ha. Rekọ evaọ aro Ọghẹnẹ, o ghare thesiwa!—Mak 12:43, 44; Jemis 1:27.
Ewuhrẹ no Eriwo Jihova Kpahe Egagọ Ẹwẹ Kpobi
18. Eme ma wuhrẹ no oghẹrẹ nọ Jesu o yeri kugbe eyae ivẹ na ze?
18 No edhere nọ Jesu o yeri kugbe eyae ivẹ enana ze, ma wuhrẹ iwuhrẹ omosasọ jọ no kpahe oghẹrẹ nọ Jihova o re rri egagọ ẹwẹ kpobi. (Jọn 5:19) Jesu ọ rehọ aye-uku na wawo Meri hi. O rri anini ivẹ aye na kawo vi epanọ o rri ewhri Meri nọ o “ghare gaga” ha. Nọ eyae na a kẹ ọvuọ uthoma riẹ na, evaọ aro Ọghẹnẹ ekẹ rai e rọ ghaghae. Fikiere otẹrọnọ iroro inọ who fioka ha i te bi kpokpo owhẹ fikinọ whọ be sai ru te ẹgwọlọ ra ha evaọ egagọ Ọghẹnẹ, kru udu ga. Umutho nọ who bi ru na o be were Jihova. Kareghẹhọ, Jihova ọ rẹ ‘ruẹ oware nọ o rọ udu na,’ fikiere ọ riẹ kpahe isiuru udu ra ziezi.—1 Samuẹle 16:7.
19. Fikieme ma gbe gu amọfa ẹdhọ họ evaọ oware nọ a ru evaọ egagọ Ọghẹnẹ?
19 Eriwo Jihova kpahe iruo ẹwẹ kpobi u re kpomahọ oghẹrẹ nọ ma re rri je yeri kugbe ohwohwo. Ẹvẹ o rọ ababọ uyoyou te re ma whọku omodawọ amọfa hayo re ohwo ọ rehọ egagọ riẹ rọ wawọ ọrọ ohwo ọdekọ! Avọ uweri, Oleleikristi jọ o kere nọ: “Ẹsejọ ahwo jọ a rẹ rehọ iẹe nnọ whọ gbẹ rọ ọkobaro ho kiyọ whọ rọ oware ovo ho. U fo re a rri itu mai jọ nọ e be daoma gaga re a ‘ruẹse’ jọ iwhowho Uvie oke-kpobi ghaghae re.” Joma vuhumu nnọ a kẹ omai udu nọ ma re ro guẹdhọ oware nọ o rọ egagọ ẹwẹ kpobi ibe Oleleikristi hi. (Ahwo Rom 14:10-12) Jihova o bi rri egagọ ẹwẹ kpobi ọrọ ima iwhowho Uvie ẹrọwọ buobu na ghaghae, yọ ere ma re rri rie re.
20. Eme ọ rẹ mai woma nọ ma re roro kpahe ibe egegagọ mai?
20 Kọ ẹvẹ otẹrọnọ ahwo jọ a bi ru te epanọ u fo nọ a re ru evaọ odibọgba na ha? Ekiekpotọ evaọ iruẹru ọnọ ma gbẹ rọ ẹrọwọ o rẹ sai dhesẹ kẹ ekpako ẹruọsa nnọ ẹgwọlọ obufihọ hayo uduotahawọ o riẹ. Eva okiovo na, o rẹ thọrọ omai ẹro ho inọ rọ kẹ otu jọ, egagọ ẹwẹ kpobi o rẹ sae jọ wọhọ anini ivẹ aye-uku na vi ewhri ọghaghae Meri. O rẹ mai woma re ma riẹ nnọ inievo mai a you Jihova jegbe nnọ uyoyou otiọye na o rẹ wọ ai ru uthoma rai—orọnikọ kakao ho—onọ a sai ru. Uzẹme riẹ họ, odibo oruọzewọ Jihova ọvuọvo nọ o re keke aro fihọ ru kpotọ vi onọ ọ rẹ sai ru evaọ ẹgọ Ọghẹnẹ ọ rọ họ!—1 Ahwo Kọrint 13:4, 7.
21. Didi ute erere ahwo buobu a bi le, kọ didi enọ e roma via?
21 Rekọ, rọkẹ ahwo Ọghẹnẹ buobu, egagọ ẹwẹ kpobi u dhesẹ ele iruo nọ o rẹ kẹ erere gaga na—iruo odibọgba ọkobaro na. Didi eghale a bi wo? Kọ ẹvẹ kpahe otu mai jọ nọ e re sai ruọ iruo ọkobaro na ha—ẹvẹ ma sai ro dhesẹ ẹzi ọkobaro na? Ma te t’ẹme kpahe enọ enana evaọ uwuhrẹ n’otha na.
[Footnotes]
a Nọ Matayas o nwene Judas wọhọ ukọ na, ẹsejọhọ odẹ riẹ—orọnikọ Pọl ho—họ onọ o rẹ roma via evaọ usu itho otọhotọ 12 na. Dede nọ Pọl ọ jọ ukọ, ọ jọ omọvo 12 na ha.
b Ibigho enana ọvuọvo e jọ lepton, ubigho ahwo Ju nọ o mae kawo kpobi evaọ oke oyena. Lepta ọvo o jọ 1/64 ọrọ osa okpẹdẹ. Wọhọ epanọ Matiu 10:29 o ta, rọ kẹ ubigho assarion (ọnọ ọ rọ ẹrẹrẹ wọhọ lepta eree), ohwo ọ rẹ sae dẹ erata ivẹ, nọ e rọ evra nọ e mai ku kpobi nọ iyogbere e rẹ sae dẹ re. Fikiere aye-uku ọnana o ghine yogbe, keme abọvo unuigho nọ a rẹ sae rọ dẹ arata ọvuọvo o wo, onọ o rẹ sai te emuore ẹsiọvo ho.
Ẹvẹ Whọ te k’Uyo?
◻ Eme u dhesẹ re a rọ ẹwẹ kpobi gọ Jihova?
◻ Ẹvẹ ọtadhesẹ ọ 1 Ahwo Kọrint 12:14-26 u ro dhesẹ nnọ Jihova ọ be rọ omai wawo amọfa ha?
◻ Eme ma wuhrẹ kpahe udu mai kpobi nọ ma rẹ rọ kẹ ro no ẹme nọ Jesu ọ ta kpahe ewhri ọghaghae Meri gbe ibigho esese ivẹ aye-uku na ze?
◻ Ẹvẹ eriwo Jihova epanọ o re rri egagọ ẹwẹ kpobi u re kpomahọ oghẹrẹ nọ ma re rri ohwohwo?
[Picture on page 11]
Meri ọ kẹ uthoma riẹ kpobi, ku ewhri isialẹ nọ ọ “ghare gaga” họ oma Jesu
[Pictures on page 12]
Ibigho aye-uku na—i fioka ha evaọ aghare ugho rekọ e ghare thesiwa evaọ aro Jihova