Ẹhẹrẹ Evaọ “Ọwhọ Ẹruore”

“Ọwhọ ẹruore enama ọ be hẹrẹ odhesẹvia emọ Ọghẹnẹ.”—AHWO ROM 8:19.

1. Ithatho vẹ e rọ uyero Ileleikristi nẹnẹ avọ orọ Ileleikristi ikpe-udhusoi ọsosuọ?

UYERO Ileleikristi nẹnẹ o wọhọ orọ Ileleikristi ikpe-udhusoi ọsosuọ. Eruẹaruẹ jọ i fiobọhọ kẹ idibo Jihova evaọ edẹ eyena vuhu okenọ Mesaya na ọ te rọ roma via. (Daniẹl 9:24-26) Eruẹaruẹ evo yena e ruẹaro kpahe ọraha Jerusalẹm rekọ e fodẹ eware nọ e rẹ lẹliẹ Ileleikristi riẹ haro kpahe okenọ a te raha okpẹwho oyena ha. (Daniẹl 9:26b, 27) Epọvo na, eruẹaruẹ e lẹliẹ emọ-uwuhrẹ Ebaibol ikpe-udhusoi avọ 19 wo irẹro. Ẹkwoma ẹjẹhọ ‘eke ihrẹ’ na ọrọ Daniẹl 4:25 kugbe “oke ahwo Egedhọ” na, a rẹro nọ Kristi o ti wo ogaga Uvie evaọ 1914. (Luk 21:24; Izikiẹl 21:25-27) Nọ obe Daniẹl o vọ avọ eruẹaruẹ buobu na, ọvuọvo rai ọ rẹ sae lẹliẹ emọ-uwuhrẹ Ebaibol kele ẹdẹ nọ a te rọ raha uyero-akpọ Setan he. (Daniẹl 2:31-44; 8:23-25; 11:36, 44, 45) Dede na, onana o te via kẹle, keme ma be rria “oke urere” na.—Daniẹl 12:4.a

Ẹromuhotọ Evaọ Etoke Ọzino Kristi

2, 3. (a) Didi imuẹro e mae rro inọ ma be rria etoke ọzino Kristi evaọ ogaga uvie? (b) Eme o dhesẹ nọ Ileleikristi a re gbe roro evaọ etoke ọzino Jesu Kristi?

² Uzẹme, eruẹaruẹ e lẹliẹ Ileleikristi wo irẹro taure a te ti mu ogaga Uvie họ Kristi obọ evaọ 1914. Rekọ “oka” nọ Kristi ọ kẹ kpahe ọzino riẹ gbe ekuhọ eyero eware enana i dhesẹ eviavia sa-sa. Yọ a te ruẹ ibuobu enana nọ ọzino riẹ o te muhọ no. Eviavia buobu—emo, odubẹ emuore, etọ nọ i re nuhẹ, eyao, evihọ emuemu, ekpokpo Ileleikristi, gbe usiuwoma ota Uvie akpọ soso—e jọ imuẹro ilogbo inọ ma be rria etoke ọzino Kristi evaọ ogaga uvie.—Matiu 24:3-14; Luk 21:10, 11.

³ Ghele na, ehri ohrẹ urere nọ Jesu ọ kẹ ilele riẹ na họ: “Wha yọrọ oma, wha roro.” (Mak 13:33, 37; Luk 21:36) A tẹ roma totọ se uduotahawọ enana kpahe ẹromuhotọ i re dhesẹ nọ orọnikọ Kristi ọ jẹ mae ta kpahe ẹromuhotọ kẹ oka emuhọ ọzino riẹ hẹ. Ukpoye, ọ jẹ ta kẹ ilele uzẹme riẹ re a muẹrohọ otọ evaọ etoke ọzino riẹ. Eme Ileleikristi uzẹme a re muẹrohọ otọ kẹ?

4. Didi iruo oka nọ Jesu ọ kẹ na o rọ kẹ?

⁴ Jesu ọ kẹ eruẹaruẹ ilogbo riẹ evaọ uyo kẹ onọ na: “Oke ovẹ eware nana ete via [eviavia nọ i ti su kpohọ ọraha eyero eware ahwo Ju], gbe eme ọ rẹ te jọ oka ẹtha ra gbe urere akpọ na?” (Matiu 24:3) Oka nọ a ruẹaro riẹ na o te lẹliẹ omai vuhu, orọnikọ ọzino Kristi ọvo ho rekọ te eviavia nọ i ti su kpohọ urere uyerakpọ omuomu ọnana.

5. Ẹvẹ Jesu o ro dhesẹ nọ dede nọ ọ zino evaọ abọ-ẹzi, ọ te gbẹ ‘tha’ ghele?

⁵ Jesu o dhesẹ nnọ evaọ etoke ‘ọzino’ riẹ (Grik, pa·rou·siʹa) ọ te nyaze avọ ogaga gbe oruaro. Kpahe “ẹtha” otiọye na (onọ a fa no ubiẹme Grik erʹkho·mai ze), o whowho nọ: “Kẹsena oka Ọmọ ohwo o tẹ te via eva obọ ehru, kẹsena evẹrẹ akpọ na kpobi a ve ti bruenu, a rẹ te ruẹ Ọmọ ohwo nọ ọ te tha eva ehru igho obọ ehru avọ ogaga gbe oruaro ulogbo; . . . Wha jọ ure ojo rehọ uwuhrẹ riẹ: nọ egha riẹ e be nwane lọhọ, jẹ be ta ebe, wha vẹ riẹ nọ uvewhru o kẹle ino. Whaọ ere, nọ wha ruẹ eware enana kpobi, wha riẹ nọ [Kristi ọ] kẹle ino, makọ unuẹthẹ. . . . Fikiere wha roro, keme wha riẹ ẹdẹ nọ Ọnowo ọ rẹ tha ha. . . . Fikiere wha [ruẹrẹ oma kpahe]; keme okenọ wha roro ho Ọmọ ohwo ọ rẹ tha.”—Matiu 24:30, 32, 33, 42, 44.

Fikieme Jesu Kristi Ọ te rọ Nyaze?

6. Ẹvẹ ọraha “Babilọn ologbo na” ọ te rọ via?

⁶ Dede nọ ọ zino wọhọ Ovie anwọ 1914, Jesu Kristi o ti guẹdhọ uyero onana gbe omomọvo taure o te ti kpe otu emuemu na no. (Wawo 2 Ahwo Kọrint 5:10.) Kẹle na Jihova o ti fi ei họ udu egọmeti re a raha “Babilọn ologbo na,” isuẹsu egagọ ọrue akpọ. (Eviavia 17:4, 5, 16, 17) Pọl ukọ na ọ ta riẹ vevẹ inọ Jesu Kristi ọ te raha “ohwo uzioraha” na no—osu-egagọ Kristẹndọm ukọ-ọrue, abọ ologbo ọrọ “Babilọn ologbo na.” Pọl o kere nọ: “Kọ oke oye a ti dhesẹ [orumuomu] na via, Ọnowo Jesu ọ vẹ te rehọ ẹwẹokuo unu riẹ kpei, jẹ raha iẹ eva oke ẹtha riẹ.”—2 Ahwo Tẹsalonika 2:3, 8.

7. Okenọ Ọmọ ohwo ọ tẹ ze evaọ oruaro riẹ, didi ẹdhọ o ti gu?

⁷ Kẹle na, Kristi o ti gu ahwo erẹwho na ẹdhọ kpahe uruemu nọ a dhesẹ kẹ inievo riẹ nọ i kiọkọ otọakpọ. Ma se nọ: “Rekọ nọ Ọmọ ohwo ọ te tha eva oruaro riẹ, gbe ikọ-odhiwu kpobi a viẹ, kẹsena ọvẹ te keria ehru akaba oruaro riẹ. Erẹwho kpobi i re ti kuku aro riẹ ọ vẹ te hẹriẹ ae ọjọ nọ ọjọ wọhọ epanọ othuru-igodẹ ọ rẹ hẹriẹ igodẹ no ewe, ọ vẹ te rehọ igodẹ fihọ obọze riẹ, rekọ ewe kọ ẹkpẹlobọ. . . . Ovie na o re ti yo kẹ [igodẹ na] nọ, ‘Uzẹme mẹ ta kẹ owhai, fiki epanọ wha ru kẹ imoni mẹ enana ọjọ, makọ ekakao rai kpobi, wha ru kẹ omẹ.’ . . . [Ewe na] e rẹ nya kpo obọ eva uye bẹdẹ bẹdẹ, rekọ ikiẹrẹe i re kpo obọ uzuazọ ebẹdẹ bẹdẹ.”—Matiu 25:31-46.

8. Ẹvẹ Pọl o dhesẹ ẹtha Kristi re ọ raha enọ e riẹ Ọghẹnẹ hẹ no?

⁸ Wọhọ epanọ a dhesẹ evaọ ọtadhesẹ igodẹ gbe ewe na, Jesu ọ raha enọ e riẹ Ọghẹnẹ hẹ no. Pọl ọ kẹ ibe enọ e rọwo nọ e be ruẹ uye imuẹro “eri-osehọ, okenọ Ọnowo mai Jesu Kristi ọte via no odhiwu tha avọ otu ikọ-odhiwu iride riẹ avọ ebruerae. Ọ vẹ te rehọ uye hwa osa kẹ enọ e riẹ Ọghẹnẹ hẹ, gbe enọ e kezọ usiuwoma Jesu Ọnowo mai hi. A vẹ te re oja ọraha ibẹdẹ bẹdẹ, gbe ele no aro Ọnowo na avọ ogaga oruaro riẹ; oke nọ ọ te tha ẹdẹ ọ yena o re ti wo oro thesiwa eva evie erezi riẹ.” (2 Ahwo Tẹsalonika 1:7-10) Avọ eviavia ejaja enana kpobi evaọ aro mai, kọ ma gbe wo ẹrọwọ je muẹrohọ otọ kẹ ẹtha Kristi?

Ẹhẹrẹ Ẹvia Kristi avọ Ọwhọ

9, 10. Fikieme enọ a wholo nọ e gbẹ rọ otọakpọ a be rọ hẹrẹ ẹromavia Jesu Kristi avọ ọwhọ?

⁹ ‘Ẹromavia Olori mai Jesu no odhiwu ze’ orọnikọ o te wha ọraha se irumuomu na ọvo ho rekọ te osohwa kẹ ikiẹrẹe. Inievo Kristi nọ a wholo nọ i kiọkọ otọakpọ a te gbẹ ruẹ uye taure Kristi ọ tẹ te via, rekọ a be ghọghọ evaọ ẹruore oruaro odhiwu rai. Rọ kẹ Ileleikristi nọ a wholo, Pita ukọ na o kere nọ: “Rekọ ghọghọ fiki epanọ who wo ẹkẹ eva uye Kristi, re whọ te ghọghọ re, je wo evawere okenọ oruaro riẹ o te via.”—1 Pita 4:13.

¹⁰ O rọ ọtamuo enọ a wholo na re a kru ẹrọwọ rai bẹsenọ Kristi ‘o ti koko ai họ bru ei’ re uvi ẹrọwọ rai nọ a “dawo” no na o “rẹriẹ ruọ ajiri gbe oro gbe adhẹẹ oke ezihetha Jesu Kristi.” (2 Ahwo Tẹsalonika 2:1; 1 Pita 1:7) Kpahe Ileleikristi ẹrọwọ itieye nọ ẹzi o yẹ na, a rẹ sae ta nọ: “A ru isẹi Kristi ga eva udevie rai—re okẹ ẹzi ovo o se owhai ba ẹ karọ, epanọ wha be rọ hẹrẹ odhesẹ via Ọnowo mai Jesu Kristi.”—1 Ahwo Kọrint 1:6, 7.

11. Nọ a be hẹrẹ ẹvia Jesu Kristi na, eme Ileleikristi nọ a wholo a bi ru?

¹¹ Okiọkotọ nọ a wholo na o wo iroro Pọl, ọnọ o kere nọ: “Me kele nọ uye oruẹ oke onana u te nọ a [rẹ sai kele] dhe oruaro nọ o te via eva mai hi.” (Ahwo Rom 8:18) Orọnikọ ekele oke o re fi ẹgba họ ẹrọwọ rai hi. A bi ruiruo buobu evaọ ẹgọ Jihova, bi fi oriruo ogbunu h’otọ kẹ egbẹnyusu rai, “igodẹ efa” na. (Jọn 10:16) Enana nọ a wholo na a riẹ inọ ekuhọ uyero-akpọ omuomu ọnana o kẹlino, yọ a bi yo uduotahawọ Pita na: “Fikiere wha kru iroro rai ga, wha yọroma, wha gale ẹruore rai vi aruoriwo nọ obi bru owhai tha oke ẹrọvia Jesu Kristi.”—1 Pita 1:13.

“Ọwhọ Ẹruore Enama”

12, 13. Ẹvẹ emama ahwo-akpọ e rọ rọ “ọthobọ eware ifofe,” kọ isiuru vẹ igodẹ efa na a wo?

¹² Kọ u wo oware jọ nọ igodẹ efa na a re je rẹro riẹ gaga re? Avro ọ riẹ hẹ. Nọ ọ t’ẹme kpahe ẹruore oruaro enọ Jihova o dede rehọ wọhọ “emọ” ẹzi riẹ no gbe “ereuku kugbe Kristi” evaọ Uvie obọ odhiwu, Pọl ọ tẹ ta nọ: “Ọwhọ ẹruore enama ọ be hẹrẹ odhesẹvia emọ Ọghẹnẹ. Keme enama na e jọ ọthobọ eware ifofe, orọnikọ oreva riẹ hẹ, rekọ fiki epa ọnọ o ru họ ọtahobọ eva ẹruore; kemena ukpuzou enama na a reti si ei no igbo egbogbo eruọ eva uvẹ oruaro emọ Ọghẹnẹ.”—Ahwo Rom 8:14-21; 2 Timoti 2:10-12.

¹³ Ẹkwoma uzioraha Adamu, emọ riẹ kpobi e rọ otọ “ọthobọ eware ifofe,” keme a yẹ rai fihọ otọ igbo uzioraha gbe uwhu. A rẹ sae kẹ omobọ rai ufuoma no igbo yena ha. (Olezi 49:7; Ahwo Rom 5:12, 21) Oh, ẹvẹ igodẹ efa na a wo isiuru te re a “si [ai] no igbo egbogbo”! Rekọ taure oyena o tẹ te via, eware jọ e rẹ via wọhọ epanọ oke gbe ezi Jihova o gwọlọ.

14. Eme u ti kugbe “odhesẹvia emọ Ọghẹnẹ,” kọ ẹvẹ onana o te rọ wha ufuoma no “igbo egbogbo” se ahwo-akpọ?

¹⁴ A rẹ kaki dhesẹ “emọ Ọghẹnẹ” nọ a wholo na ‘via’ tao. Eme onana o te gwọlọ? Evaọ ẹruoke Ọghẹnẹ, o te jọ vevẹ kẹ igodẹ efa na inọ a “koka” họ enọ a wholo na no jẹ kẹ ae oruaro no re a lele Kristi su. (Eviavia 7:2-4) “Emọ Ọghẹnẹ” nọ a te kpare na a te jẹ ‘romavia’ nọ a ti wo abọ kugbe Kristi evaọ ẹraha eyero omuomu Setan. (Eviavia 2:26, 27; 19:14, 15) Kẹsena, evaọ etoke Esuo Odu Ikpe Kristi, a vẹ te ‘via’ viere wọhọ izerẹ nọ a ti ro kpeze irere idhe ẹtanigbo Jesu se “enama” ahwo-akpọ. Onana o te whae ze nọ a ti ro si ahwo-akpọ “no igbo egbogbo” uwhremu na a vẹ te ro “uvẹ oruaro emọ Ọghẹnẹ.” (Ahwo Rom 8:21; Eviavia 20:5; 22:1, 2) Avọ ẹruore oruaro oyena, kọ o rọ oware igbunu inọ igodẹ efa na a be “hẹrẹ odhesẹvia emọ Ọghẹnẹ” avọ “ọwhọ”?—Ahwo Rom 8:19.

Odiri Jihova U Dhesẹ Esiwo

15. Eme ọ rẹ thọrọ omai ẹro ho kpahe ekele oke eviavia Jihova?

¹⁵ Jihova họ Okoko-Oke Ologbo na. Ekele oke riẹ o rẹ gbagba. Ẹsejọ eware e rẹ nya epanọ ma rẹro rai hi. Dede na, ma rẹ sai wo ẹrọwọ ọvọvọ inọ eyaa Ọghẹnẹ kpobi i ti rugba. (Joshua 23:14) Ẹsejọhọ ọ kẹ eware uvẹ lehie vrẹ oke nọ ibuobu a rẹro rai no. Rekọ j’oma gwọlọ epanọ ma re ro wo otoriẹ idhere riẹ, re ma rọ adhẹẹ kẹ areghẹ riẹ. Pọl o kere nọ: “O! Wha ri edidi efe, gbe areghẹ, gbe ẹriẹ Ọghẹnẹ! Epanọ iziẹibro riẹ idhere te, gbe epanọ a sae riẹ idhere riẹ hẹ! ‘Keme ono ọ riẹ eva Ọnowo Ọghẹnẹ, hayo ono ọrọ ọkiroro riẹ?’ ”—Ahwo Rom 11:33, 34.

16. Ono o ti wo erere no odiri Jihova ze?

¹⁶ Pita o kere nọ: “Fikiere, iyoyou, fiki epanọ wha bi rẹro eware nana [ọraha “ihru” gbe “akpọ” anwae na gbe “ihru ekpokpọ” gbe “akpọ ọkpokpọ” nọ Ọghẹnẹ ọ yeyaa nọ o ti ro nwene ai na], wha fi-ududhe re ọ ruẹ owhai ababọ epe hayo afuẹwẹ, rekọ udhedhẹ. Wha kele akothiho Ọnowo mai gbe usiwo.” Fiki odiri Jihova, a be kẹ ima ahwo buobu uvẹ re a zọ vrẹ “ẹdẹ Ọnowo” na, onọ o te tha idudhe “wọhọ oji.” (2 Pita 3:9-15) Odiri riẹ o be jẹ k’omai omomọvo uvẹ nọ ma rẹ rọ “rehọ ozọ-odhẹ avọ enuho ru iruo esiwo [mai] gba.” (Ahwo Filipai 2:12) Jesu ọ ta nọ ‘ma rẹ yọrọ oma’ je “roro” ma tẹ gwọlọ nọ a jẹ omai rehọ jẹ kparobọ evaọ ‘edikihẹ aro Ọmọ ohwo’ nọ ọ be te ziọ ẹdhoguo na.—Luk 21:34-36; Matiu 25:31-33.

Gbẹ Hae Nya avọ Ithihakọ

17. Didi eme ọ Pọl ukọ na u fo nọ ma re si te udu?

¹⁷ Pọl ọ tudu họ inievo abọ-ẹzi riẹ awọ re a fi ẹro họ, ‘orọnikọ eware nọ a rẹ ruẹ na ha, rekọ eware nọ a rẹ ruẹ hẹ.’ (2 Ahwo Kọrint 4:16-18) Ọ gwọlọ nọ uvumọ oware u di ude ọ osohwa obọ odhiwu rai nọ o rọ aro rai na ha. Sọ ma rọ Ileleikristi nọ a wholo hayo igodẹ efa, joma kareghẹhọ ẹruore igbunu nọ ọ rọ aro mai na re oma o se omai ba ẹlọhọ. Joma ‘ruabọhọ onya avọ ithihakọ,’ dhesẹ nnọ “ma rọ ahwo otiọye nọ i kie kpemu nọ a je whu hu, rekọ e nọ i wo orọwọ nọ i siwi izi rai.”—Ahwo Rom 8:25; Ahwo Hibru 10:39.

18. Ẹvẹ ma sae rọ nyasiọ ẹme oke gbe ezi ba obọ Jihova?

¹⁸ Ma rẹ sae nyasiọ oke gbe ezi ba obọ Jihova avọ udu. Orugba eyaa riẹ “ọ te raha oke he” wọhọ oke nọ o fihọ. (Habakuk 2:3) Bọo oke oyena, uduotahawọ Pọl se Timoti u re wo otofa viere k’omai. Ọ ta nọ: “Me mu onana họ owhẹ obọ eva aro Ọghẹnẹ jegbe Kristi Jesu ọnọ o re bruoziẹ otu uzuazọ gbe enọ i whuru, jegbe oma orọvia riẹ avọ uvie riẹ; vuẹ ovuẹ ẹme na, mu ọwhọ riẹ no oke ite oke . . . ru iruo ọta-usiuwoma, je ru iruo ra gbunu.”—2 Timoti 4:1-5.

19. Eme ahwo Jihova a re gbe ru, kọ fikieme?

¹⁹ Izuazọ mai—gbe erọ erivẹ mai e rọ awa. Pọl o kere nọ: “Sẹro oma ra gbe uwuhrẹ ra; yọrọ oyena ga, keme fiki ere oruo who re ro siwi oma ra gbe ahwo [nọ] a be kezọ ẹme ra.” (1 Timoti 4:16) Oke eyero omuomu ọnana o kpẹre gaga no. Nọ ma be hẹrẹ eviavia isiuru nọ e rọ obaro mai avọ ọwhọ na, joma riẹ nọ oke gbe ezi Jihova o gbẹ rọ kẹ ahwo riẹ re a ta usiuwoma Uvie na. A re ru iruo yena te epanọ ọ gwọlọ hrọ. Wọhọ epanọ Jesu ọ ta: “Kẹsena urere u te zi te.”—Matiu 24:14.

[Footnotes]

Evaọ Edhere ọ Ọkiẹkpemu

◻ Rọ kpahe ekele oke, ẹvẹ uyero mai u ro tho orọ Ileleikristi ikpe-udhusoi ọsosuọ?

◻ Fikieme Ileleikristi a je “roro,” makọ evaọ etoke ọzino Kristi?

◻ Fikieme emama ahwo-akpọ i je bi rẹro “odhesẹvia emọ Ọghẹnẹ” avọ ọwhọ?

◻ Fikieme ma jẹ sae nyasiọ ẹme oke gbe ezi ba obọ Jihova ududu?

[Picture on page 14]

Ileleikristi a rẹ jaja aro vi evaọ irẹro ẹtha Kristi

[Picture on page 15]

Okiọkotọ nọ a wholo na a bi ruiruo buobu evaọ egagọ Jihova, a fi ẹrọwọ rai họ ekele oke he