Ẹnya Kugbe Ọghẹnẹ—owojẹ Ọsosuọ
“Bigba Ọghẹnẹ o re ti bigba owhẹ.”—JEMIS 4:8.
1, 2. Fikieme whọ jẹ sae ta nọ o rọ uvẹ-ọghọ ulogbo re a gọ Jihova?
ỌZAE na ọ jọ uwou-odi ruẹ uye ikpe buobu no. Kẹsena a te sei ziọ aro osu ẹkwotọ na. Eware na e via kpatakpata. Idudhe na ohwo nọ ọ jọ uwou-odi na o te muọ iruo họ kugbe osu nọ ọ mae jọ otọakpọ soso ga kpobi evaọ oke oyena. A te fi ohwo nọ ọ jọ uwou-odi vẹre na họ ọkwa okpehru avọ orro ulogbo. Josẹf—ọnọ a rọ ifi gba awọ riẹ vẹre na—o bi lele ovie nya enẹna!—Emuhọ 41:14, 39-43; Olezi 105:17, 18.
2 Nẹnẹ na, ahwo-akpọ a wo uvẹ nọ a re ro ruiruo kẹ ohwo nọ ọ rro vi Fẹro Ijipti. Oride ehrugbakpọ na o zizie omai kpobi re ma gọe. Ẹvẹ uvẹ-ọghọ na u mu urirẹ te re ma ru ere je wo usu okpekpe kugbe Jihova, Ọghẹnẹ erumeru na! Evaọ Ikereakere na, a rẹ rehọ ogaga ulogbo dhesẹ iẹe avọ oruaro jegbe urirẹ, erru, gbe ewoma. (Izikiẹl 1:26-28; Eviavia 4:1-3) Uyoyou o da iruẹru riẹ fia. (1 Jọn 4:8) Ọ rẹ t’erue he. (Ikelakele 23:19) Yọ Jihova o re kpomovuọ họ enọ e roma kpotọ kẹe oma ha. (Olezi 18:25) Ẹkwoma enwene kpohọ ute ukiẹrẹe riẹ, ma rẹ sae reawere uvi uzuazọ evawere enẹna, avọ irẹro uzuazọ ebẹdẹ bẹdẹ. (Jọn 17:3) Uvumọ osu ohwo-akpọ nọ ọ rẹ kẹ eghale gbe uvẹ-ọghọ nọ e dina kẹle oyena ọ riẹ hẹ.
3. Edhere vẹ Noa o ro ‘lele Ọghẹnẹ uzẹme na’ nya?
3 Evaọ oke anwae, Noa ọ gba riẹ mu re ọ rria lele oreva gbe ẹjiroro Ọghẹnẹ. Kpahe onana, Ebaibol na ọ ta nọ: “Noa ohwo okiẹrẹe, nọ ọ kare ẹpoviẹ evaọ oge riẹ; Noa o te je lele Ọghẹnẹ nya.” (Emuhọ 6:9) Dede na, orọnikọ Noa ọ jẹ nyonya lele Jihova ha, keme uvumọ ohwo “ọ te ruẹ Ọghẹnẹ oke ọvo ho.” (Jọn 1:18) Ukpoye, Noa o lele Ọghẹnẹ nya keme o ru oware nọ Ọghẹnẹ ọ ta kẹe nọ o ru. Fikinọ Noa ọ rehọ uzuazọ riẹ kẹ eruo oreva Jihova, ọ reawere usu oruọruọ okpekpe kugbe Ọghẹnẹ Erumeru na. Wọhọ Noa, ima ahwo buobu nẹnẹ a bi “lele Ọghẹnẹ nya” ẹkwoma ẹria lele ohrẹ gbe uthubro Jihova. Ẹvẹ ohwo o re ro mu onya utioye họ?
Ewo Eriariẹ O r’Oja
4. Ẹvẹ Jihova o bi ro wuhrẹ ahwo riẹ?
4 Re ma lele Jihova nya, ma rẹ kake riẹe. Aizaya ọruẹaro na ọ ta nọ: “Edẹ e te tha nọ a rẹ te rehọ ugbehru-itho uwou ỌNOWO na viẹ kerọ igbehru-itho nọ i kpehru thesiwa, nọ u re ti kpehru vi igbehru kpobi. Erẹwho na kpobi e vẹ te dhẹ kpohọ iẹe, ahwo buobu a rẹ te nyaze, te ta nọ: ‘Wha nyaze ma kpobọ ugbehru ỌNOWO na, kpobọ uwou Ọghẹnẹ Jekọp, re o wuhrẹ omai edhere riẹ, re ma nya evaọ idhere riẹ.’ Keme evaọ Zayọn uzi na u re ti no tha, ẹme ỌNOWO na kọ obọ Jerusalẹm o re ti no tha.” (Aizaya 2:2, 3) Ẹhẹ, ma rẹ sai wo evaifihọ inọ Jihova o ti wuhrẹ enọ e gwọlọ nya evaọ idhere riẹ kpobi. Jihova ọ k’omai Ẹme riẹ no, Ebaibol na, o te bi je fiobọhọ k’omai wo otoriẹ riẹ. Edhere jọ nọ o bi ro ru onana họ ẹkwoma ‘ọrigbo ẹrọwọ gbe areghẹ na.’ (Matiu 24:45-47) Jihova ọ be rehọ ‘ọrigbo ẹrọwọ na’ k’omai uthubro abọ-ẹzi ẹkwoma ebe nọ a fa no Ebaibol ze, iwuhrẹ Ileleikristi, gbe ọruẹrẹfihotọ uwuhrẹ Ebaibol ọvọvẹ. Ọghẹnẹ o bi je fiobọhọ kẹ ahwo riẹ re a wo otoriẹ Ẹme riẹ ẹkwoma ẹzi ọfuafo riẹ.—1 Ahwo Kọrint 2:10-16.
5. Fikieme uzẹme Ikereakere o jẹ ghare tere?
5 Dede nọ ma be hwa ugho fihọ uzẹme Ebaibol ho, o rẹ ghaghae. Nọ ma bi wuhrẹ Ẹme Ọghẹnẹ na, yọ ma bi wuhrẹ kpahe Ọghẹnẹ omariẹ—odẹ riẹ, uruemu riẹ, ẹjiroro riẹ, gbe edhere nọ o bi ro yeri kugbe ahwo-akpọ. Ma re je wuhrẹ kpahe iyo nọ e rẹ kẹ ufuoma kpahe enọ ilogbo uzuazọ: Fikieme ma jẹ rọ etenẹ? Fikieme Ọghẹnẹ ọ jẹ k’uvẹ kẹ uye-oruẹ? Eme ọ rọ obaro k’omai? Fikieme ma jẹ be rro kpako je whu? Kọ uzuazọ nọ u re lele uwhu o rrọ? Ofariẹ, ma riẹ oware nọ oreva Ọghẹnẹ o rọ k’omai, koyehọ, epanọ ma rẹ nya re ma ruẹsi ru ei eva were vọvọ. Ma wuhrẹ nnọ ute riẹ e rọ ziezi yọ i wo erere k’omai gaga otẹrọnọ ma re koko ai. Ababọ uthubro Ọghẹnẹ, ma re wo otoriẹ eware eyena ha.
6. Didi ute eriariẹ egbagba Ebaibol i re fiobọhọ k’omai le?
6 Uzẹme Ebaibol u w’ẹgba yọ o rẹ w’omai ru inwene evaọ izuazọ mai. (Ahwo Hibru 4:12) Taure ma te ti wo eriariẹ Ikereakere na, ma rẹ sae nya ọvo “lele epanọ akpọ ọ rọ.” (Ahwo Ẹfẹsọs 2:2) Rekọ eriariẹ egbagba Ẹme Ọghẹnẹ u dhesẹ edhere ọfa k’omai re ma “yeri uzuazọ, nọ u fo rọ kẹ Ọnowo na, onọ o rẹ weriẹe.” (Ahwo Kọlọsi 1:10) Ẹvẹ oghọghọ riẹ o rro te re ma j’owọ ọsosuọ evaọ ẹnya kugbe Jihova, Ohwo nọ ọ mae rro evaọ ehrugbakpọ na kpobi!—Luk 11:28.
Owojẹ Ilogbo Ivẹ —Omarọkẹ gbe Ame-Ọhọ
7. Nọ ma bi wuhrẹ Ẹme Ọghẹnẹ na, didi uzẹme kpahe esuo ohwo-akpọ u re dhesẹ oma via?
7 Nọ ma tẹ rro evaọ otoriẹ Ebaibol mai, ma ve ti muọ elo abọ-ẹzi Ẹme Ọghẹnẹ họ ero rri iruẹru ahwo-akpọ gbe izuazọ obọ mai. Uzẹme ulogbo jọ u ve ti dhesẹ oma via. Jerimaya ọruẹaro na ọ fodẹ uzẹme onana anwẹdẹ, ọnọ o kere nọ: “O ỌNOWO mẹ riẹ nọ ohwo o wo iroro obọ riẹ hẹ, ohwo o wo ogaga nọ o ro su oma obọ riẹ hẹ.” (Jerimaya 10:23) Ahwo-akpọ—mai kpobi—ma gwọlọ ọkpọvio Ọghẹnẹ.
8. (a) Eme ọ rẹ wọ ahwo re a roma mudhe kẹ Ọghẹnẹ? (b) Eme họ omarọkẹ Ileleikristi?
8 Otoriẹ uzẹme onana o rẹ w’omai re ma gwọlọ ọkpọvio mi Jihova. Yọ uyoyou kẹ Ọghẹnẹ o rẹ w’omai re ma rehọ uzuazọ mai mudhe kẹe. Re ma roma mudhe kẹ Ọghẹnẹ u dhesẹ nọ ma rẹ nyabru ei evaọ olẹ jẹ yeyaa nnọ ma rẹ rehọ uzuazọ mai gọe jẹ nya evaọ idhere riẹ avọ ẹrọwọ. Ma te bi ru enẹ yọ ma be raro kele oriruo Jesu, ọnọ ọ rehọ oma riẹ kẹ Jihova re ọ wha oreva ofuafo riẹ haro.—Ahwo Hibru 10:7.
9. Fikieme ahwo a jẹ rehọ uzuazọ rai mudhe kẹ Jihova?
9 Jihova Ọghẹnẹ ọ rẹ gba uvumọ ohwo họ hayo tẹzẹ ohwo re ọ roma mudhe kẹe he. (Wawo 2 Ahwo Kọrint 9:7.) Ofariẹ, Ọghẹnẹ ọ gwọlọ nọ ohwo jọ ọ rehọ uzuazọ riẹ mudhẹ kẹ E fiki oma nọ u mu rie he. Taure ọ tẹ te họ-ame, ohwo ọ rẹ jọ olele tao, yọ oyena o gwọlọ uvi omodawọ re a wo eriariẹ. (Matiu 28:19, 20) Pọl ọ lẹ enọ e họ-ame no re a rehọ ‘igboma rai kẹ wọhọ iwẹ ekpokpọ gbe ọrẹri, onọ Ọghẹnẹ ọ rẹ jẹrehọ, nọ e rọ egagọ Ẹzi rai.’ (Ahwo Rom 12:1) Ẹgba otiọye na ma rẹ rọ rehọ oma mai mudhe kẹ Jihova Ọghẹnẹ. Nọ ma te wuhrẹ eware nọ o gwọlọ no jẹ roma totọ roro kpahe ẹme na no, ma vẹ rọ udu obọ mai avọ oghọghọ rọ uzuazọ mai mudhe kẹ Ọghẹnẹ.—Olezi 110:3.
10. Ẹvẹ omarọkẹ o rọ jẹhọ ame-ọhọ?
10 Ma tẹ jọ olẹ omobọ mai ta kẹ Ọghẹnẹ no nnọ ma gwọlọ nya evaọ idhere riẹ, ma vẹ j’owọ nọ u lele i rie. Ma vẹ rọ ame-ọhọ mai dhesẹ omarọkẹ mai via evaọ ẹgbede. Onana yọ odhesẹvia ẹgbede inọ ma yeyaa no nnọ ma re ru oreva Ọghẹnẹ. Evaọ emuhọ odibọgba otọakpọ Jesu, Jọn ọ họ riẹ ame, ọ tẹ rọ ere fi oriruo h’otọ k’omai. (Matiu 3:13-17) Uwhremu na, Jesu o vi ilele riẹ uwou re a ru ilele ahwo jẹ họ ae ame. Fikiere, omarọkẹ gbe ame-ọhọ yọ owojẹ nọ e r’oja kẹ ohwo nọ ọ gwọlọ lele Jihova nya kpobi.
11, 12. (a) Ẹvẹ a sae rọ rehọ ame-ọhọ wawo ehaa-orọo? (b) Didi ithatho o rọ udevie usu mai kugbe Jihova gbe orọ ọzae avọ aye?
11 Re a jọ olele Jesu Kristi nọ ọ roma kẹ jẹ họ-ame no o wọhọ orọo. Evaọ ekwotọ buobu, eware buobu e riẹ nọ a re ru taure ẹdẹ orọo na o te ti te. Ọzae gbe aye na a rẹ kake ruẹ ẹro, a vẹ riẹ ohwohwo, a ve you ohwohwo. A vẹ sa ọmọtẹ na h’otọ. Ehaa-orọo u re dhesẹ ẹgwae nọ a jọ idhere gba na via—re a ruọ orọo jẹ rria kugbe wọhọ ọzae avọ aye. Ehaa-orọo na họ oware nọ u re kpoka họ emuhọ usu obọdẹ na. Ẹdẹ ọyena o kpoka họ emuhọ orọo na. Epọvo na, ame-ọhọ o re kpokahọ emuhọ uzuazọ nọ a ro mudhe kẹ ẹnya evaọ usu omarọkẹ kugbe Jihova.
12 Muẹrohọ ithatho ọfa. Nọ ẹdẹ ehaa-orọo na ọ tẹ vrẹ no, uyoyou nọ o rẹ jọ usu ọzae gbe aye na u re di je kodo viere. Re a ruẹsi bikẹle ohwohwo viere, imava-orọo na a rẹ daoma ziezi re a yọrọ jẹ bọ usu orọo rai ga. Dede nọ ma rẹ ruọ usu orọo kugbe Ọghẹnẹ hẹ, nọ ma tẹ họ-ame no ma re ruiruo re ma yọrọ usu okpekpe kugbe Jihova. O bi muẹrohọ je wo ovuhumuo kẹ omodawọ mai re ma ru oreva riẹ o ve je si kẹle omai. Jemis olele na o kere nọ: “Bigba Ọghẹnẹ o re ti bigba owhẹ.”—Jemis 4:8.
Ẹnya Evaọ Ithihi Jesu
13. Evaọ ẹnya kugbe Ọghẹnẹ, oriruo ono ma rẹ raro kele?
13 Re ma lele Jihova nya, ma re lele oriruo nọ Jesu Kristi o fihọ. Pita ukọ na o kere nọ: “Keme nwanọ onana a se owhai ze, keme na Kristi ọ ruẹ uye kẹ owhai no re, o te fi oriruo họ-otọ kẹ owhai re wha rọ kpahe ithihi riẹ.” (1 Pita 2:21) Nọ Jesu ọ rọ gbagba na yọ ma gba ha na, ma rẹ sai lele oriruo nọ ọ kẹ gbagba ha. Ghele na, Jihova o rẹro mi omai inọ ma re ru utho oma mai. Joma rri idhere isoi erọ uzuazọ gbe odibọgba Jesu enọ Ileleikristi nọ e roma mudhe no a rẹ daoma raro kele.
14. Eme u kugbe ẹriẹ Ẹme Ọghẹnẹ?
14 Jesu o wo eriariẹ egbagba gbe evọvọ erọ Ẹme Ọghẹnẹ. Evaọ etoke odibọgba riẹ, ẹsikpobi Jesu ọ jẹ hae t’ẹme no Ikereakere Hibru na ze. (Luk 4:4, 8) Dede na, isu egagọ evega oke oyena a jẹ t’ẹme no Ikereakere na ze re. (Matiu 22:23, 24) Ẹhẹriẹ na họ Jesu o wo otoriẹ otofa Ikereakere na, yọ o fi rai họ iruo evaọ uzuazọ riẹ. Orọnikọ ibieme Uzi na ọvo ọ riẹ hẹ rekọ te ẹjiroro rai. Nọ ma bi lele oriruo Kristi na, ma rẹ jẹ daoma wo otoriẹ Ẹme Ọghẹnẹ, riẹ ẹjiroro hayo ẹzi riẹ. Ma te ruere, ma sae jọ iruiruo nọ Ọghẹnẹ ọ rẹ jẹrehọ enọ e be sai ‘kru ẹme uzẹme na gbagba.’—2 Timoti 2:15.
15. Ẹvẹ Jesu ọ rọ k’omai oriruo evaọ ẹta kpahe Ọghẹnẹ?
15 Kristi Jesu ọ ta kẹ amọfa kpahe Ọsẹ obọ odhiwu riẹ. Jesu ọ fare eriariẹ Ẹme Ọghẹnẹ riẹ yaobọ họ. Makọ ewegrẹ riẹ dede a je se ei “Owuhrẹ,” keme evaọ oria kpobi nọ o kpohọ ọ ta kẹ ahwo kpahe Jihova gbe ẹjiroro Riẹ. (Matiu 12:38) Jesu ọ ta usiuwoma ẹgbede evaọ eria etẹmpol na, uwou-egagọ, ikpewho, gbe erẹwho. (Mak 1:39; Luk 8:1; Jọn 18:20) O je wuhrẹ avọ ohrọ gbe ẹwo, je dhesẹ uyoyou kẹ enọ o je fiobọhọ kẹ. (Matiu 4:23) Ahwo nọ a bi lele oriruo Jesu a rẹ gwọlọ eria gbe idhere sa-sa nọ a re ro wuhrẹ amọfa kpahe Jihova Ọghẹnẹ gbe ẹjiroro ogbunu riẹ.
16. Ẹvẹ usu Jesu o kpekpe te kugbe ibe egegagọ Jihova efa?
16 Jesu ọ jọ kpekpekpe kugbe amọfa nọ e jẹ gọ Jihova. Okejọ nọ Jesu ọ jẹ t’ẹme kẹ ogbotu, oni riẹ gbe inievo riẹ nọ e rọwo ho a tẹ wha ẹme jọ bru ei ze. Ikere Ebaibol na e ta nọ: “Omọvo jọ ọ tẹ ta kẹe nọ, ‘Ri, oni ra gbe imoni ra a dikihẹ obọ otafe a be guọlọ owhẹ ta ẹme kẹ.’ Rekọ o te yo kẹ ọnọ ọ ta kẹe na nọ, ‘Onohọ oni mẹ jegbe amono họ imoni mẹ?’ Ọ tẹ riẹ obọ riẹ ri ilele riẹ ọ tẹ ta nọ, ‘Ri oni mẹ gbe imoni mẹ! Keme ohwo nọ o re ti ru eware nọ e rọ eva Ọsẹ mẹ nọ ọ rọ obọ odhiwu ọye họ oniọvo ọmọzae mẹ, gbe oniọvo ọmọtẹ mẹ, gbe oni mẹ.’ ” (Matiu 12:47-50) Orọnikọ onana u dhesẹ nọ Jesu ọ se uviuwou riẹ hẹ, keme eware nọ e jọ obaro via i dhesẹ nọ o ru ere he. (Jọn 19:25-27) Ghele na, ekere nana o dhesẹ uyoyou nọ Jesu o wo kẹ enọ e rọwo. Epọvo na nẹnẹ, ahwo nọ a bi lele Ọghẹnẹ nya a rẹ gwọlọ usu idibo Jihova efa a ve je you rai n’evaze.—1 Pita 4:8.
17. Ẹvẹ eruo oreva Ọsẹ obọ odhiwu riẹ o jọ Jesu oma, kọ ẹvẹ oyena u re kpomahọ omai?
17 Ẹkwoma eruo oreva Ọghẹnẹ, Jesu o dhesẹ uyoyou kẹ Ọsẹ obọ odhiwu riẹ. Jesu o yoẹme kẹ Jihova riẹriẹriẹ. Ọ ta nọ: “Emu mẹ họ oreva Ọnọ O vi omẹ ze, jegbe re me ru iruo riẹ.” (Jọn 4:34) Kristi ọ tẹ jẹ ta nọ: “Me bi ru eware nọ e be were iẹe kẹse kẹse.” (Jọn 8:29) Jesu o you Ọsẹ obọ odhiwu riẹ ga te epanọ o ro “hrẹ oma riẹ kpotọ ọ tẹ rọwo whu, whu uwhu [ure-oja, NW ].” (Ahwo Filipai 2:8) Jihova ọ tẹ ghale Jesu, kpare iẹe fihọ ọkwa udu-esuo gbe ọghọ nọ o kẹle Jihova omariẹ. (Ahwo Filipai 2:9-11) Wọhọ Jesu, ma re dhesẹ uyoyou mai kẹ Ọghẹnẹ ẹkwoma ekoko ijaje riẹ gbe eruo oreva riẹ.—1 Jọn 5:3.
18. Edhere vẹ Jesu ọ rọ k’omai oriruo evaọ ẹme olẹ?
18 Jesu ọ jọ ọgba olẹ. Ọ lẹ evaọ etoke ame-ọhọ riẹ. (Luk 3:21) Taure ọ tẹ te salọ ikọ 12 riẹ, ọ lẹ aso okioke. (Luk 6:12, 13) Jesu o wuhrẹ ilele riẹ epanọ a rẹ lẹ. (Luk 11:1-4) Evaọ aso taure o te ti whu, o lele ilele riẹ lẹ jẹ lẹ kẹ ae. (Jọn 17:1-26) Olẹ yọ abọ ologbo uzuazọ Jesu, wọhọ epanọ u fo nọ o rẹ jọ evaọ izuazọ mai, keme ilele riẹ ma rọ. Ẹvẹ ọghọ riẹ ọ rro te re ma sae t’ẹme kugbe Osu Ehrugbakpọ na evaọ olẹ! Ofariẹ, Jihova ọ rẹ kuyo elẹ, keme Jọn o kere nọ: “Whaọ onana họ eva-ifihọ nọ oma wo kpahọ iẹ, nnọ, re ma tẹ yare oware jọ wọhọ [epaọ] oreva riẹ, o re yo kẹ omai. Ma tẹ riẹ nọ oware kpobi nọ oma yare o re yo kẹ omai, ma riẹ nọ ayare riẹ o te omai obọ no.”—1 Jọn 5:14, 15.
19. (a) Didi ekwakwa Jesu ma rẹ raro kele? (b) Idhere vẹ ma re ro wo erere no ewuhrẹ uzuazọ gbe odibọgba Jesu ze?
19 Eware buobu e riẹ nọ ma re wuhrẹ no eriwo uzuazọ otọakpọ gbe odibọgba Jesu Kristi ze! Roro kpahe ekwakwa nọ o dhesẹ: uyoyou, ohrọ, ẹwo, ẹgba, owowa, uvi-iroro, omarokpotọ, aruọwha, gbe ababọ-oriobọ. Epanọ ma wuhrẹ kpahe Jesu te, ere ma rẹ gwọlọ jọ ilele ẹrọwọ riẹ te. Eriariẹ Jesu i re je si omai kẹle Jihova. Whaọ, Jesu ọ raro kele Ọsẹ obọ odhiwu riẹ gbagba. Ọ kẹle Jihova te epanọ ọ sae rọ ta nọ: “Ọ nọ ọ ruẹ omẹ ọ ruẹ Ọsẹ na.”—Jọn 14:9.
Fievahọ Ọghẹnẹ re Ọ Sẹro Ra
20. Ẹvẹ ma sai ro wo evaifihọ evaọ ẹnya kugbe Jihova?
20 Okenọ emọ i te bi wuhrẹ onya obọ, a re kpo deghedeghe. Ẹvẹ a re ro wuhrẹ onya avọ udu? Ẹkwoma ewuhrẹ gbe ithihakọ ọvo. Whaọ, ahwo nọ a bi lele Jihova nya a rẹ daoma thihi otọ ududu. Onana o gwọlọ oke gbe ithihakọ re. Pọl o dhesẹ epanọ ithihakọ u wuzou te evaọ ẹnya kugbe Ọghẹnẹ evaọ okenọ o kere nọ: “Orọ uwhremu, ma lẹ owhai imoni, ma rọ fiki Jesu Ọnowo na ta kẹ owhai wọhọ epanọ wha jọ obọ mai yo nọ ufo owhai eyero na: [epanọ wha rẹ nya] re wha were Ọghẹnẹ, nwanọ epanọ wha [be nya] na, wha he dhei erueruo.”—Ahwo Tẹsalonika 4:1.
21. Nọ ma te bi lele Jihova nya, didi eghale ma rẹ sae reawere rai?
21 Ma tẹ roma kpobi kẹ Ọghẹnẹ, o ti fiobọhọ k’omai re ma gbe lele ei nya. (Aizaya 40:29-31) Oware ovo o riẹ nọ akpọ na ọ rẹ k’omai hi nọ a rẹ rọ wawo eghale nọ ọ rẹ kẹ enọ e be nya evaọ idhere riẹ. Ọye o bi ‘wuhrẹ omai wo erere, ọnọ o bi su omai nya edhere nọ o fo ẹnya. Ma te ghine yo ijaje riẹ, udhedhẹ mai o rẹ jọ wọhọ ethẹ, ẹrẹreokie mai o rẹ jọ wọhọ ẹkporo abade.’ (Aizaya 48:17, 18) Ẹkwoma ẹjẹrehọ uzizie na re ma lele Ọghẹnẹ nya je ru ere avọ ẹrọwọ, ma rẹ sae reawere udhedhẹ kugbei bẹdẹ bẹdẹ.
Didi Uyo Whọ Te Kẹ?
◻ Fikieme o jẹ rọ ọghọ re a lele Ọghẹnẹ uzẹme na nya?
◻ Fikieme ewuhrẹ, omarọkẹ, gbe ame-ọhọ e jẹ rọ owojẹ ọsosuọ evaọ ẹnya kugbe Jihova?
◻ Ẹvẹ ma re ro lele owojẹ Jesu?
◻ Ẹvẹ ma rọ riẹ nọ Jihova ọ te thọ omai nọ ma bi lele ei nya na?
[Pictures on page 11]
Ewuhrẹ, omarọkẹ, gbe ame-ọhọ yọ owojẹ ọsosuọ evaọ ẹnya kugbe Ọghẹnẹ