Enọ Ahwo nọ A s’Ebe

Esa evaọ usu ebe Usiuwoma na i gbiku unoma kpahe udẹ oghaghae nọ a ku fihọ Jesu. Kọ ikọ na buobu i gu unoma, manikọ Judas ọvo?

Matiu, Mak, gbe Jọn a gbiku nana fihọ Usiuwoma na. O wọhọ nọ Judas ọ kobaro evaọ unoma uguo na, ikọ na jọ a tẹ rọwo kugbe ei. Oware nọ o jọ etenẹ via na u dhesẹ oware nọ ma jẹ sae kẹ uyere fiki okerefihotọ Usiuwoma ene nọ ma wo na. Oware nọ ikere-obe na ọvuọvo o kere o gba, rekọ aikpobi i dhesẹ ẹme na oghẹrẹ sa-sa. Ma tẹ rehọ ikere na wawo ohwohwo, ma rẹ riẹ ẹme na kpobi, diwi viere.

Ikuigbe na eva Matiu 26:6-13 o dhesẹ oria nọ o jọ via—uwou Saimọn ọmoti na, evaọ Bẹtani—rekọ ọ fodẹ aye nọ o ku udẹ nọ o re gbo emamọ ore na họ uzou Jesu hu. Matiu o muẹrohọ nọ: ‘Nọ ilele na a rue riẹ, ofu o te mu ai,’ a te gu unoma nnọ a hae zẹ udẹ na a vẹ rọ ugho na kẹ iyogbere.

Ekere Mak o fodẹ eme eyena kpobi. Rekọ o fibae nnọ o kpe ololo na. Oware nọ o jọ ololo na họ “udẹ ezi nad,” epaọ onọ a dẹ no obọ India ze. Kpahe unoma na, Mak ọ niyẹrẹ nọ ‘ejọ i te mu ofu, a tẹ go kpahe aye na.’ (Mak 14:3-9) Fikiere okerefihotọ ivẹ na i dhesẹ nọ orọnikọ ukọ ọvo o gu unoma ha. Rekọ ẹvẹ unoma na u ro muhọ?

Jọn, ọnọ ọ jariẹ, o fi ẹme jọ nọ o wuzou bae. O se odẹ aye na—Meri, oniọvo Mata gbe Lazarọs. Jọn o te je ku ẹme nana gbei, ọnọ ma rẹ rehọ nọ u ru ẹme na gba ukpenọ o rẹ wọso ẹme na: ‘O ku rie ku awọ Jesu ọ tẹ rehọ eto uzou riẹ ririei.’ Ma te ku ikere na kugbe, ma sae ruẹ nnọ Meri o ku udẹ na, onọ Jọn o dhesẹ nọ orọ “nad oghaghae,” fihọ uzou gbe awọ Jesu. Jọn ọ kẹle Jesu gaga fikiere eva e rẹ dhae otẹrọnọ ohwo jọ o bi rri Rie vo. Ma se nọ: “Rekọ Judas Iskariọt omọvo ilele na, ọ nọ o bi ti vivie i, ọ tẹ ta nọ, ‘Fikieme a gbẹ zẹ udẹ onana epaọ kpegbisoi re a rehọ igho na kẹ iyogbere he? ”—Jọn 12:2-8.

Whaọ, Judas yọ “omọvo ilele na,” rekọ whọ rẹ sai wo otoriẹ evedha Jọn inọ ohwo nọ ọ rrọ ọkwa nana ọ be gwọlọ vivie Jesu. Ọfefafa na, Dr. C. Howard Matheny ọ ta kpahe Jọn 12:4 nọ: “Ẹme na ‘o bi ti’, o dhesẹ owojẹ nọ u muhọ kri no. U dhesẹ nọ evivie nọ Judas o vivie Jesu na orọnikọ iroro nọ ọ vabọhọ idudhe he keme ọ jiroro na ọ tẹ jẹ gbae mu edẹ buobu.” Jọn o ru ẹme na vevẹ nnọ Judas o gu unoma “orọnọ epanọ o weri kẹ iyogbere he; rekọ fiki epanọ ọ rọ oji, nọ ọ jẹ rọ o kru-igho ọ vẹ be lẹlẹ re igho ẹkpa na no.”

Fikiere o rrọ oware iroro re a rehọ iẹe nọ Judas oji na họ ọnọ o mu unoma na họ keme o ti wo igho nọ o re tho viere a tẹ zẹ udẹ oghaghae na re a fi ugho na họ ẹkpa nọ ọ be wọ na. Nọ Judas o mu ẹme na họ na, ikọ na jọ a ti fiunu họ ẹme nọ a roro nọ ọ riẹ ta na. Rekọ Judas họ ọnọ ọ rrọ ehri unoma na.