Jiri Jihova Fiki Iruo Ilogbo Riẹ!

“Ẹzi mẹ o bi jiri Ọnowo na, . . . keme ọnọ o wo ogaga o ru eware ilogbo kẹ omẹ.”—LUK 1:46-49.

1. Fiki iruo ilogbo vẹ u je fo nọ ma re jiri Jihova?

JIHOVA o fo ejiro fiki iruo ilogbo riẹ. Okenọ Mosis ọruẹaro na o je gbiku usiwo Izrẹl rono Ijipti, o whowho nọ: “Aro rai eruẹ iruo ilogbo nọ ỌNOWO na o ru.” (Iziewariẹ 11:1-7) Epọvo na re, okenọ Gebriẹl ẹnjẹle na o whowho eyẹ Jesu nọ ọ be tha kẹ ọmọtẹ-kọkọ nọ a re se Meri, ọ ta nọ: “Ẹzi mẹ o bi jiri Ọnowo na, . . . keme ọnọ o wo ogaga o ru eware ilogbo kẹ omẹ.” (Luk 1:46-49) Wọhọ Isẹri Jihova, ma re jiri iei fiki iruo ilogbo itieye na wọhọ obusino Izrẹl rono igbo Ijipti gbe udihọ igbunu orọ Ọmọ ọghaghae riẹ na.

2. (a) Eme “ẹjiroro ebẹdẹ bẹdẹ” Ọghẹnẹ o dhesẹ rọkẹ ahwo-akpọ ẹmeoyo? (b) Eme Jọn ọ ruẹ eva ukoliko Patmọs?

² Iruo ilogbo Jihova buobu i w’obọ kugbe “ẹjiroro ebẹdẹ bẹdẹ” riẹ re ọ ghale ahwo-akpọ ẹmeoyo ẹkwoma Mesaya na gbe esuo Uvie riẹ. (Ahwo Ẹfẹsọs 3:8-13) Ẹjiroro ọyena ọ jẹ romavia ẹmẹrera evaọ okenọ a kẹ Jọn ukọ ọkpako na uvẹ re o rri lafi ẹthẹ eruẹaruẹ nọ a kpe fihọ evaọ obọ odhiwu. O yo urru nọ o wọhọ orọ ọgba nọ o ta kẹe nọ: “Ze obọ ehru etenẹ, re me ti dhesẹ eware nọ etejọ etenẹ ẹdẹfa kẹ owhẹ.” (Eviavia 4:1) A kẹ Jọn “eviavia Jesu Kristi,” evaọ okenọ egọmeti Rom o lei n’ẹwho kpohọ ukoliko Patmọs “fiki ẹme Ọghẹnẹ gbe isẹri Jesu.” Eware nọ ukọ na ọ ruẹ je yo i dhesẹ eware buobu kpahe ẹjiroro ebẹbẹ bẹdẹ Ọghẹnẹ, fikiere e rrọ elo abọ-ẹzi gbe uduotahawọ ẹruoke rọkẹ Ileleikristi uzẹme kpobi.—Eviavia 1:1, 9, 10.

3. Amono ekpako 24 nọ Jọn ọ ruẹ evaọ eruẹaruẹ na a dikihẹ kẹ?

³ Ẹkwoma ẹthẹ ọyena nọ o rovie evaọ odhiwu na, Jọn ọ ruẹ ekpako 24, nọ e kerria egbara-uvie je tu itu wọhọ ivie. A kie fihọ aro Ọghẹnẹ jẹ ta nọ: “Who teri, eyo Ọnowo nọ o re mie oro gbe adhẹẹ gbe ogaga, keme whẹ ọ ma eware na kpobi, jegbe fiki awere ra a rọ rọ, a rọ mae na.” (Eviavia 4:11) Ekpako eyena i dikihẹ kẹ Ileleikristi kpobi nọ a wholo na nọ a tẹ kparoma no evaọ ọkwa okpehru nọ Ọghẹnẹ ọ y’eyaa riẹ kẹ ae na. Oma o wọ rai jiri Jihova fiki iruo ilogbo riẹ nọ a rẹ jọ emama ruẹ. Akpọ o re gbe omai unu re fiki eware nọ ma be jọ okegbe mai ruẹ wọhọ imuẹro “ogaga irurẹ Ọghẹnẹ.” (Ahwo Rom 1:20) Yọ epanọ ma wuhrẹ kpahe Jihova te, ere ma rẹ ruẹ ẹjiroro bu te nọ ma re ro jiri iei fiki iruo ilogbo riẹ.

Whowho Iruo Jihova nọ I Fo Ejiro!

4, 5. Fodẹ iriruo jọ ọrọ epanọ Devidi o ro jiri Jihova.

⁴ Devidi ọso-ilezi na o jiri Ọghẹnẹ fiki iruo ilogbo Riẹ. Wọhọ oriruo, Devidi ọ so inọ: “Wha suile ejiro kẹ ỌNOWO, nọ ọ be ria evaọ Zayọn! Wha ta eruo riẹ eva udevie ahwo! O Ọnowo ohrọ mẹ o re owhẹ! Re who ri uye nọ o be bẹ omẹ evaọ abọ enọ i mukpahe omẹ, O! whẹ họ ọnọ o si omẹ no inuethẹ uwhu, re mẹ jẹ wariẹ ejiro ra kpobi . . . eva unuighẹ ọmọtẹ Zayọn.” (Olezi 9:11, 13, 14) Nọ ọ rehọ omaa ebabọ etẹmpol na kẹ Solomọn ọmọ riẹ no, Devidi ọ tẹ ghale je jiri Ọghẹnẹ inọ: “O ra, O ỌNOWO, oruaro, ogaga, gbe oro gbe obokparọ gbe udu-ogaga . . . uvie na o ra, O ỌNOWO, jọ a kpare owhẹ kpehru wọhọ ọnọ o wuzou vi ai kpobi. . . . Whaọ enẹna ma yere owhẹ, Ọghẹnẹ mai, ma te je jiri odẹ oruaro ra.”—1 Iruẹru-Ivie 29:10-13.

⁵ Unuẹse buobu Ikereakere na i zizie—ẹhẹ, kpakpa—omai re ma jiri Ọghẹnẹ, wọhọ epanọ Devidi o ru. Eme ọ ujiro buobu rọkẹ Ọghẹnẹ e rọ obe Olezi na, yọ oware wọhọ abọvo ile enana yọ erọ Devidi. O jiri jẹ kẹ Jihova uyere ẹsikpobi. (Olezi 69:30) Ofariẹ, anwọ oke anwae ze, a rehọ eme ọ urirẹ Devidi gbe erọ amọfa nọ ẹzi ọ kẹ ẹgba ro jiri Jihova no.

6. Ẹvẹ Ilezi nọ a kẹ ẹgba na i ro w’iruo k’omai?

⁶ Ẹvẹ Ilezi na i w’iruo te rọkẹ egegagọ Jihova! Ma tẹ gwọlọ jiri Ọghẹnẹ fiki iruẹru ilogbo riẹ kpobi rọkẹ omai, iroro mai e rẹ sae dhẹ kpohọ eme awere nọ e rọ Ilezi na. Wọhọ oriruo, nọ ma tẹ rọuze evaọ ohiohiẹ oma o rẹ sae w’omai re ma ta eme wọhọ enana: “Uwoma re a rọ uyere kẹ ỌNOWO na, jẹ suile ajiri kẹ odẹ riẹ O Oride na re a je dhesẹ uyoyou ra nọ u re re he eva ohiohiẹ, jegbe ọtẹruo ra eva aso, . . . O whẹ, ỌNOWO, whọ rehọ iruo ra ru omẹ eva were, fiki iruo abọ ra mẹ rọ suile aghọghọ.” (Olezi 92:1-4) Evaọ okenọ ma te fi ọzadhe ẹnyaharo abọ-ẹzi mai jọ kparobọ, oma o rẹ sae w’omai dhesẹ oghọghọ gbe uyere evaọ olẹ, tubẹ wọhọ epanọ ọso-ilezi na o ru evaọ okenọ ọ so nọ: “O wha nyaze, wha suile kẹ ỌNOWO; jo ma doedo oghọghọ rọ kẹ utho esiwo mai. Jọ oma ze aro riẹ avọ akpẹwẹ; re ma doedo oghọghọ avọ ile ajiri rọ kẹ e.”—Olezi 95:1, 2.

7. (a) Oware vẹ o mai siuru kpahe ile buobu nọ Ileleikristi a rẹ so? (b) Ẹjiroro vẹ jọ ọ rẹ lẹliẹ omai kaki te iwuhrẹ jẹ jariẹ te ekuhọ?

⁷ Ma rẹ kpare ivou mai ẹsibuobu evaọ ile ujiro kẹ Jihova evaọ iwuhrẹ ukoko gbe ikokohọ. O rọ oware isiuru inọ a rehọ ibuobu ile enana no iroro nọ Ọghẹnẹ ọ kẹ ẹgba nọ e rọ obe Ilezi na ze. Ẹvẹ eva e rẹ were omai te inọ ma wo ọruẹrẹhọ ile awere ujiro kẹ Jihova nẹnẹ! Ile-esuọ ujiro kẹ Ọghẹnẹ yọ uvi ẹjiroro jọ nọ o rẹ lẹliẹ omai kaki te iwuhrẹ mai jẹ jariẹ bẹsenọ i re kuhọ, ma ve kuomagbe ibe egegagọ rehọ ole gbe olẹ ro jiri Jihova.

‘Wha Jiri Jah!’

8. Eme ubiẹme na “Aleluya” u w’obọ kugbe, kọ ẹvẹ a rẹ fae ẹsikpobi?

⁸ Ubiẹme na “Aleluya” u w’obọ kugbe ejiri Jihova, onọ o rọ ẹwariẹ ubiẹme Hibru na nọ a fa evaọ enwenọ oria kpobi nọ ‘Wha jiri Jah.’ Wọhọ oriruo, ma jọ eva Olezi 135:1-3 (NW ) ruẹ uzizie oruọruọ ẹgba onana: “Wha Jiri Jah! Wha jiri odẹ Jihova, wha jiri ie, O whai idibo Jihova, whai enọ i dikihẹ evaọ uwou Jihova, evaọ egua uwou Ọghẹnẹ mai. Wha jiri Jah, keme Jihova o woma. Wha suile kẹ odẹ riẹ, keme u siuru.”

9. Didi eware e rẹ w’omai re ma jiri Jihova?

⁹ Nọ ma te roro kpahe iruo igbunu Ọghẹnẹ erọ emama gbe iruẹru riẹ kpobi rọkẹ omai, ovuhumuo nọ o no udu ze o rẹ w’omai jiri iei. Okenọ ma te roro kpahe eware igbunu nọ Jihova o ru kẹ ahwo riẹ evaọ oke anwae, idu mai e rẹ w’omai re ma jiri iei. Yọ nọ ma bi roro kpahe eyaa eware ilogbo nọ Jihova o ti gbe ru na, ma rẹ gwọlọ idhere nọ ma rẹ rọ kẹe ujiro gbe uyere.

10, 11. Ẹvẹ uzuazọ nọ ma rọ o rọ k’omai ẹjiroro nọ ma re ro jiri Ọghẹnẹ?

¹⁰ Uzuazọ nọ ma rrọ o k’omai ẹjiroro nọ ma re ro jiri Jah. Devidi ọ so nọ: “Me re jiri owhẹ [Jihova], keme who muozọ [je] gbenu. Iruo ra i mu urirẹ! Whọ tẹ jẹ riẹ omẹ ziezi.” (Olezi 139:14) Ẹhẹ, a ma omai evaọ edhere nọ o “gbenu” yọ ma wo ekẹ eghaghae wọhọ ude-oruẹ, iyayo, gbe ẹgba eroro. Fikiere, kọ u gbe fo re ma kpọ uzuazọ mai evaọ edhere nọ ma jẹ rehọ iẹe ro jiri Ọnọma omai? Pọl o dhesẹ iroro evona re nọ o kere inọ: “Eva emu ọriọ hayo eva edada hayo eva oware kpobi nọ wha re ruo, wha ru ai kpobi rọ kẹ Ọghẹnẹ oruaro.”—1 Ahwo Kọrint 10:31.

¹¹ Ma re ru eware kpobi rọ kẹ Jihova oruaro otẹrọnọ ma ghine you rie. Jesu ọ ta nọ ujaje ọsosuọ họ: “Whọ rẹ rehọ eva ra kpobi, gbe ẹzi ra kpobi, gbe iroro ra kpobi, gbe ogaga ra kpobi, you Ọnowo na Ọghẹnẹ ra.” (Mak 12:30; Iziewariẹ 6:5) Ma re ghine you Jihova je jiri iei wọhọ Ọnọma omai gbe Ọkokẹ “kokẹ uwoma kokẹ uwoma avọ okẹ nọ o gba kiete kpobi.” (Jemis 1:17; Aizaya 51:13; Iruẹru 17:28) U fo nọ ma re ru ere keme, ẹgba iroro mai, ogaga abọ-ẹzi mai, gbe ogaga ugboma mai—ekwakwa gbe ẹgba mai kpobi—obọ Jihova i no ze. Wọhọ Ọnọma omai, o te kẹ uyoyou gbe ujiro mai.

12. Ẹvẹ who roro kpahe iruo ilogbo Jihova avọ eme nọ e rọ Olezi 40:5?

¹² Iruo ilogbo Jihova e k’omai ẹjiroro nọ i wo unu hu nọ ma re ro you rie je jiri iei! Devidi ọ so nọ: “Iruo ibuobu ra nọ who ru, O Ọnowo ỌGHẸNẸ mẹ, iruo igbenu who ru kẹ omai; a sai dhesẹ ovo kẹ owhẹ hẹ! Re mẹ sae tae dhesẹ ai, rekọ i bu vi ekele.” (Olezi 40:5) Devidi ọ sai kele iruo igbunu Jihova kpobi hi, yọ ma rẹ sai kele ai gbe he. Dede na joma jiri Ọghẹnẹ ẹsikpobi okenọ a te dhesẹ iruo ilogbo riẹ jọ k’omai.

Iruo nọ I w’Obọ Kugbe Ẹjiroro Ebẹdẹ Bẹdẹ Ọghẹnẹ

13. Ẹvẹ ẹruore mai o ro w’obọ kugbe iruo ilogbo Ọghẹnẹ?

¹³ Ẹruore mai kpahe obaro na o w’obọ kpekpekpe kugbe iruo ilogbo gbe erọ ujiro nọ i w’obọ kugbe ẹjiroro ebẹdẹ bẹdẹ Ọghẹnẹ na. Nọ ọkparesuọ evaọ Idẹn na ọ romavia no, Jihova ọ tẹ kẹ eruẹaruẹ ọsosuọ nọ e vọ avọ ẹruore na. Nọ o je bruoziẹ kpe araomuomu na, Ọghẹnẹ ọ ta nọ: “Me re ti fi egrẹ họ udevie ra avọ aye na, gbe udevie [ubi] ra avọ [ubi] riẹ. Ọ rẹ te nwa owhẹ uzou, whọ vẹ te royẹe ithihrawọ.” (Emuhọ 3:15) Makọ okenọ Jihova o ru oware ulogbo jọ rọ thọ Noa avọ uviuwou riẹ no Ẹvo akpọ-soso nọ ọ raha akpọ omuomu na no na, ẹruore kpahe Ubi eyaa aye na ọ gbẹ jọ udu ahwo ẹrọwọ. (2 Pita 2:5) Eyaa eruẹaruẹ nọ a rọ kẹ ezae ẹrọwọ wọhọ Abraham gbe Devidi e kẹ otoriẹ ofiba kpahe oware nọ Jihova o ti rugba ẹkwoma Ubi oyena.—Emuhọ 22:15-18; 2 Samuẹle 7:12.

14. Ọvẹ họ oriruo odhesẹvia obọdẹ nọ ọ mai kpehru ọrọ iruo ilogbo Jihova kẹ ahwo-akpọ?

¹⁴ Odhesẹvia obọdẹ nọ ọ mai kpehru ọrọ Jihova wọhọ ọnọ o bi ru iruo ilogbo kẹ ahwo-akpọ o romavia evaọ okenọ ọ kẹ Ọmọ ọvo riẹ—Ubi eyaa na, Jesu Kristi—wọhọ idhe ẹtanigbo. (Jọn 3:16; Iruẹru 2:29-36) Ẹtanigbo na o rovie edhere rọkẹ ẹruẹrẹhọ kugbe Ọghẹnẹ. (Matiu 20:28; Ahwo Rom 5:11) Jihova ọ rehọ ahwo ọsosuọ nọ a ruẹrẹhọ kugbei ziọ ukoko Ileleikristi na, onọ a romu eva Pẹntikọst 33 C.E. Avọ obufihọ ẹzi ọfuafo na, a whowho emamọ usi na thabọ jẹ kẹre, je dhesẹ epanọ uwhu gbe ẹkparomatha Jesu i ro rovie edhere kẹ ahwo-akpọ ẹmeoyo re a ruẹ eghale ebẹdẹ bẹdẹ evaọ otọ esuo Uvie odhiwu Ọghẹnẹ.

15. Ẹvẹ Jihova o ro ruiruo evaọ edhere igbunu no evaọ edẹ mai na?

¹⁵ Evaọ edẹ mai na, Jihova o ruiruo evaọ edhere ogbunu no ro koko Ileleikristi nọ a wholo nọ i kiọkọ na họ. A kru ofou ọraha na daji re o kuvẹ kẹ ekokohọ enọ i kiọkọ erọ 144,000 na, enọ i ti lele Kristi su evaọ obọ odhiwu. (Eviavia 7:1-4; 20:6) Ọghẹnẹ ọ gbẹ edhere re a siwi Ileleikristi nọ a wholo na no igbo abọ-ẹzi rọkẹ “Babilọn ologbo na” no, isuẹsu egagọ ọrue akpọ na. (Eviavia 17:1-5) Didi oware usiwo oyena evaọ 1919 na gbe ethathọ Ọghẹnẹ nọ a ruẹ no anwọ okeoye na ze o kuvẹ kẹ okiọkotọ nọ a wholo na ru no? Re a lo via evaọ ẹkẹ isẹri urere taure Jihova o te ti ku uyerakpọ omuomu Setan na họ evaọ ‘uye ulogbo’ nọ o kẹle gaga no na.—Matiu 24:21; Daniẹl 12:3; Eviavia 7:14.

16. Eme ọ be via fiki iruo usiuwoma ota Uvie orọ akpọ-soso inẹnẹ na?

¹⁶ Isẹri ọ Jihova nọ o wholo na a rehọ ọwhọ karo kẹ iruo usiuwoma ota Uvie orọ akpọ-soso na no. Fikiere, unu gbidigbidi “igodẹ efa” a bi zihe ruọ egegagọ Jihova. (Jọn 10:16) Ma ghọghọ inọ uvẹ na u gbe rovie fihọ kẹ ahwo omarokpotọ otọakpọ na re a kuomagbe omai evaọ ejiri Jihova. Ahwo nọ a j’owọ kẹ uzizie na re a “nyaze” a rọ edhere ẹko-dhere vrẹ uye ulogbo na, avọ irẹro nọ a re ro jiri Jihova bẹdẹ bẹdẹ.—Eviavia 22:17.

Idu Buobu A Bi Zurie Ziọ Egagọ Uzẹme

17. (a) Ẹvẹ Jihova o bi ro ru iruo ilogbo nọ i w’obọ kugbe iruẹru usiuwoma ota mai? (b) Ẹvẹ Zekaraya 8:23 o bi ro rugba?

¹⁷ Jihova o bi ru iruo ilogbo gbe enọ i fo ejiro enẹna kpahe iruẹru usiuwoma ota mai. (Mak 13:10) Evaọ umutho ikpe nọ e vrẹ na, o ‘rovie ẹthẹ ologbo nọ o re su kpohọ iruo’ no. (1 Ahwo Kọrint 16:9) Onana u ru rie lọhọ no re a whowho emamọ usi na evaọ ekwotọ buobu nọ ewegrẹ uzẹme na a jo dikihẹ wọhọ ezadhe vẹre. Ibuobu nọ e jẹ rria ebi abọ-ẹzi vẹre a be j’owọ kẹ uzizie na enẹna re a gọ Jihova. A bi ru eme eruẹaruẹ enana gba: “Enẹ ỌNOWO ogbaẹmo na ọ tae: Evaọ oke oyena imakpe i re ti no kẹvẹrẹ kẹvẹrẹ erẹwho kpobi tha te jẹ obọ họ iwu ahwo Iju, anọ, ‘Je oma lele owhai, keme ma yo nọ Ọghẹnẹ avọ owhai a gbẹrọ.’ ” (Zekaraya 8:23) Otu nọ imakpe na a j’obọ họ iwu rai na yọ ahwo Ju abọ-ẹzi, okiọkotọ inẹnẹ ọrọ Ileleikristi nọ a wholo na. Nọ orọnọ ikpe o sai dikihẹ kẹ ẹgbagba ọrọ eware otọakpọ na, “imakpe” na a dikihẹ kẹ “otu obuobu” na, nọ a rọ ze kugbe ‘Izrẹl Ọghẹnẹ na,’ enọ aikpobi a gbẹ rọ “uthuru ọvo” na. (Eviavia 7:9, 10; Ahwo Galesha 6:16) Ẹvẹ oghọghọ na o rro te nọ ma be rọ ruẹ ibuobu nọ i bi w’obọ kugbe evaọ iruo efuafo enẹna wọhọ egegagọ Jihova Ọghẹnẹ!

18, 19. Didi imuẹro e riẹ inọ Jihova ọ be ghale iruo usiuwoma ota na?

¹⁸ Ma ghọghọ inọ idu ẹko ikpe buobu—ẹhẹ, idu ẹko udhusoi buobu—a bi dede egagọ uzẹme rehọ evaọ ekwotọ nọ egagọ ọrue e vọ vẹre nọ o wọhọ nọ ahwo na a te jẹ emamọ usi na rehọ họ. Rri Yearbook of Jehovah’s Witnesses ọkpokpọ na, je muẹrohọ ekwotọ nọ e be n’iyẹrẹ iwhowho Uvie nọ i bu te 100,000 rite enwenọ 1,000,000. Onana yọ imuẹro egaga inọ Jihova ọ be ghale iruo usiuwoma ota Uvie na.—Itẹ 10:22.

¹⁹ Wọhọ ahwo Jihova, ma re jiri jẹ kẹ Ọsẹ obọ odhiwu mai uyere fiki uvi ẹjiroro uzuazọ, iruo erere evaọ egagọ riẹ, gbe eriwo ọliọliọ kpahe obaro na nọ ọ k’omai. Ma be rria avọ irẹro ọrọ orugba eyaa Ọghẹnẹ kpobi yọ ma gba riẹ mu re ma ‘yọrọ oma mai evaọ uyoyou Ọghẹnẹ, avọ irẹro uzuazọ ebẹdẹ bẹdẹ.’ (Jud 20, 21) Ẹvẹ eva e were omai te nọ ma ruẹ nnọ ogbotu obuobu nọ o bi jiri Ọghẹnẹ enẹna a bu te oware wọhọ 6,000,000 no! Avọ imuẹro oghale Jihova, okiọkotọ nọ a wholo na kugbe egbẹnyusu rai erọ igodẹ efa na a koko oma fihọ oware wọhọ ikoko 91,000 evaọ ekwotọ 235. Mai kpobi ma be riemu abọ-ẹzi d’oma fia ẹkwoma omodawọ ababọ-eriosehọ ọrọ ‘ọrigbo nọ o wo ẹrọwọ avọ areghẹ na.’ (Matiu 24:45) Ukoko esuo Ọghẹnẹ nọ o be nyaharo avọ ẹruọsa oyoyou o be rẹrote iruẹru Uvie na ẹkwoma iwou ogha 110 erọ Isẹri Jihova. Ma be kẹ uyere inọ Jihova ọ wọ udu ahwo riẹ no re a ‘rọ eware efe rai kẹe ọghọ.’ (Itẹ 3:9, 10) Fikiere, iruo usiuwoma ota akpọ-soso mai o be nyaharo, avọ ekwakwa ebe ikporo, iwou Ebẹtẹle gbe erọ imishọnare, Egwa Uvie, gbe Egwa Okokohọ nọ a be bọ wọhọ epanọ ẹgwọlọ na ọ rrọ.

20. Ẹvẹ eroro kpahe iruo ilogbo gbe enọ i fo ejiro erọ Jihova i re kpomahọ omai?

²⁰ O lọhọ họ re ma fodẹ iruo ilogbo gbe enọ i fo ejiro erọ Ọsẹ obọ odhiwu mai kpobi. Kọ ohwo jọ nọ o wo eva-ezi ọ sae siọ oma ba ekugbe ogbotu nọ o bi jiri Jihova na? Vievie! Fikiere, jọ enọ i you Ọghẹnẹ kpobi a bo via avọ oghọghọ inọ: “Wha jiri ỌNOWO! Wha jiri ei no obọ ihru ze, jiri ei eva eria nọ i kpehru! Whai ikọ odhiwu riẹ kpobi, wha jiri ei, . . . Whai emoha na gbe ighele emetẹ na te ekpako na te emaha na! Jọ a jiri odẹ ỌNOWO na, keme odẹ riẹ ovo họ onọ o mae ro; oruaro riẹ u kpehru vi akpọ gbe odhiwu.” (Olezi 148:1, 2, 12, 13) Ẹhẹ, enẹna gbe ebẹdẹ bẹdẹ, joma jiri Jihova fiki iruo ilogbo riẹ!

Ẹvẹ Whọ te k’Uyo?

• Evẹ jọ họ iruo Jihova nọ i fo ejiro?

• Fikieme oma o jẹ be w’owhẹ jiri Jihova?

• Ẹvẹ ẹruore mai o ro w’obọ kugbe iruo ilogbo Ọghẹnẹ?

• Ẹvẹ Jihova o bi ro ru iruo nọ i fo ejiro nọ i w’obọ kugbe iruo usiuwoma ota Uvie na?

[Uwoho nọ o rrọ ẹwẹ-obe avọ 4]

Kọ who bi kuomagbe ile-esuọ ujiro kẹ Jihova avọ udu kpobi?

[Iwoho nọ e rrọ ẹwẹ-obe avọ 7]

Ma ghọghọ inọ uvẹ na u gbe rovie fihọ kẹ ahwo omarokpotọ re a kuomagbe omai evaọ ejiri Jihova