Omosasọ Evaọ Oke Obẹbẹ

O RRỌ bẹbẹ re usi inẹnẹ o kẹ omosasọ. Ohwo jọ o kere nọ: “Eware nọ e be via nẹnẹ i yoma te epanọ o rẹ rọ gwọlọ aruọwha re ma sae gaviezọ kẹ usi.” Ẹmo, iruẹru imuozọ, uye-oruẹ, ethube, gbe eyao e da akpọ na fia—yọ eware iyoma enana e rẹ sai kpomahọ omai kẹle na, otẹrọnọ i re ti kpomahọ omai no ho.

Ebaibol e ruẹaro eware enana gbagba. Nọ o je dhesẹ oke mai na, Jesu ọ ta nọ emo ilogbo, eyao, ohọo e rẹ te jọ, gbe etọ nọ i re ti nuhẹ. (Luk 21:10, 11) Epọvo na re, Pọl ukọ na o kere kpahe “oke ẹbẹbẹ,” okenọ ahwo a je ti heri oheri, you igho, jẹ kare uyoyou ewoma. O se etoke ọyena “edẹ urere” na.—2 Timoti 3:1-5.

Fikiere, evaọ edhesẹ iyero akpọ na, usi inẹnẹ o jọ abọ jọ tho oware nọ Ebaibol e ruẹaro riẹ. Rekọ edhesẹ iyero akpọ na ọvo ithatho na e nya ba. Ebaibol na o dhesẹ eware jọ nọ a rẹ jọ usi ta kpahe he. Ẹkwoma Ẹme Ọghẹnẹ nọ a kẹ ẹgba, orọnikọ otoriẹ oware nọ eyoma o ro bu tenẹ ọvo ma rẹ sai wo ho rekọ te epanọ obaro na ọ te jọ.

Epanọ Ọghẹnẹ O Rri Emuemu

Ebaibol na i dhesẹ epanọ Ọghẹnẹ o rri iyero idhọvẹ oke mai na. Dede nọ ọ ruẹaro ebẹbẹ oke mai na, orọnikọ e be were iẹe he yọ o ti vu ai wa bẹdẹ bẹdẹ hẹ. Jọn ukọ na o kere nọ: “Ọghẹnẹ họ uyoyou.” (1 Jọn 4:8) Jihova ọ be daezọ ahwo gaga yọ o mukpahe eyoma kpobi. U fo gaga inọ ma re bo bru Ọghẹnẹ kẹ omosasọ, keme ọ rrọ wowoma avọ ohrọ yọ o wo ogaga avọ isiuru nọ o ti ro si emuemu kpobi no otọakpọ na. Ọso-ilezi na o kere nọ: “[Ovie obọ odhiwu nọ Ọghẹnẹ o ro mu] o re [ti] siwi oyogbere gbe ọnọ o wo ọthuke he. Ọ be re ohrọ eyẹlẹ gbe iruori, o te bi siwi uzuazọ iruori. O siwi uzuazọ rai no okienyẹ avọ ozighi; azẹ rai ọ tẹ rẹ ghaghae eva aro riẹ.”—Olezi 72:12-14.

Kọ whọ rẹ re ohrọ enọ e be ruẹ uye? Ẹsejọhọ who re ru ere. Jihova o fi ọdawẹ họ omai oma, keme a ma omai evaọ uwoho riẹ. (Emuhọ 1:26, 27) Fikiere ma rẹ sai wo udu inọ Jihova ọ be daezọ uye-oruẹ ahwo-akpọ. Jesu, ọnọ ọ riẹ Jihova kpekpekpe vi omọfa kpobi na, o wuhrẹ inọ Jihova o wo isiuru gaga k’omai gbe nnọ ọ vọ avọ ohrọ.—Matiu 10:29, 31.

Emama riẹ i dhesẹ nọ Ọghẹnẹ ọ be daezọ ahwo-akpọ. Jesu ọ ta nọ Ọghẹnẹ “o bi ru ọre riẹ vatha ehru ahwo oyoma gbe ahwo owoma, o te [bi] vi oso ze ehru enọ i kiẹrẹe gbe enọ i kiẹrẹe he.” (Matiu 5:45) Pọl ukọ na ọ ta kẹ ahwo okpẹwho Listra inọ: “[Ọghẹnẹ] ọ siọ isẹi oma riẹ ba e se he, keme ọ riẹ ru, epanọ ọ kẹ owhai oso gbe ezi ivuẹvu, jẹ kẹ owhai emu avọ evawere.”—Iruẹru 14:17.

Ono Ọ Be Wha Emuemu Ze?

O rrọ oware nọ a re mu ẹro họ nọ Pọl ọ ta kẹ ahwo Listra na re nọ: “[Ọghẹnẹ] ọ jọ ige nọ i kpemu vu erẹwho kpobi wa nọ ọ vuọ epanọ u je rie i ọ nya.” Fikiere, erẹwho na—hayo ahwo na omarai—ae a be wha uye buobu nọ i bi te ae oma na ze. A rẹ fo Ọghẹnẹ hẹ.—Iruẹru 14:16.

Fikieme Jihova ọ jẹ kẹ eware iyoma uvẹ re e via? Kọ o ti ru oware jọ kpahe ae ẹdẹjọ? Evaọ Ẹme Ọghẹnẹ ọvo a jẹ sai duku uyo enọ nana. O rrọ ere keme uyo na u w’obọ kpahe ohwo ẹzi ọfa jọ avọ ẹme avro nọ ọ kpare ze evaọ obọ akpọ izi nọ a rẹ ruẹ hẹ na.

[Iwoho nọ e rrọ ẹwẹ-obe avọ 4]

Ahwo-akpọ a wo ọdawẹ. Kọ Ọghẹnẹ họ ọnọ ọ kare ọdawẹ kpahe uye-oruẹ ahwo-akpọ?

[Ọnọ o wo uwoho nọ o rrọ ẹwẹ-obe avọ 2]

UKE-OBE: Okwakwa-ẹmo: IFOTO UN 158181/J. Isaac; otọ-unuhu: San Hong R-C Picture Company

[Ọnọ o wo uwoho nọ o rrọ ẹwẹ-obe avọ 3]

Ẹkpẹlobọ obehru, Croatia: IFOTO UN 159208/S. White house; ọmọ nọ ohọwo u bi kpe: IFOTO UN 146150 NỌ O. MONSEN Ọ REHỌ