Kọ Whọ Be Nọ Nnọ, “Diẹse Jihova Ọ Rrọ?”
“A thabọ no omẹ gaga no . . . Yọ a re ta ha inọ, ‘Diẹse Jihova ọ rrọ?’ ”—JERIMAYA 2:5, 6, NW.
1. Okenọ ahwo a tẹ nọ inọ, “Diẹse Ọghẹnẹ ọ rrọ?,” eme ọ rẹ sae jọ iroro rai?
“DIẸSE Ọghẹnẹ ọ rrọ?” Ahwo buobu a nọ onọ yena no. Ejọ rai e be gwọlọ wo otoriẹ ugogo uzẹme jọ ọvo kpahe Ọnọma na, oyehọ, bovẹ ọ be rria? Efa e nọ onọ na no okenọ oware okpẹtu jọ o via kẹ ae hayo okenọ a jọ otọ ẹbẹbẹ ologbo, yọ a sai wo otoriẹ oware nọ o soriẹ hẹ nọ Ọghẹnẹ ọ gbẹ rọ dhogbo ze he. Ghele na, ejọ e be nọ vievie he keme a rọwo nnọ Ọghẹnẹ ọ rrọ họ.—Olezi 10:4.
2. Amono a kparobọ no evaọ ẹgwọlọ rai kpahe Ọghẹnẹ?
2 Rekọ ibuobu e riẹ nọ i wo imuẹro ziezi inọ Ọghẹnẹ ọ rrọ. (Olezi 19:1; 104:24) Re a jọ egagọ jọ ọvo u te kẹ ahwo nana jọ. Rekọ uyoyou udidi kẹ uzẹme na o wọ ima ahwo buobu efa no, evaọ ekwotọ kpobi, re a gwọlọ Ọghẹnẹ uzẹme na. Omodawọ rai o re jọ ufofe he keme “otheri omai ọvuọvo abọ họ.”—Iruẹru 17:26-28.
3. (a) Diẹse Ọghẹnẹ ọ be rria? (b) Eme onọ Ikereakere na, “Diẹse Jihova ọ rrọ?,” u dhesẹ?
3 Ohwo ọ tẹ ghinẹ gwọlọ Jihova ruẹ no, o re vuhumu nnọ “Ọghẹnẹ họ ẹzi,” inọ ibiaro ahwo-akpọ e rẹ rue riẹ hẹ. (Jọn 4:24) Jesu ọ ta kpahe Ọghẹnẹ uzẹme na wọhọ ‘Ọsẹ mẹ nọ ọ rrọ obọ odhiwu.’ Eme oyena u dhesẹ? Inọ oria nọ Ọsẹ obọ odhiwu mai ọ be rria o rrọ oria ukpehru, evaọ edhere abọ-ẹzi, wọhọ epanọ idhiwu na i kpehru vi otọakpọ na. (Matiu 12:50; Aizaya 63:15) Dede nọ ma sae rọ ibiaro mai gheghe ruẹ Ọghẹnẹ hẹ, o ru rie lọhọ re ma riẹe je wuhrẹ eware buobu kpahe ẹjiroro riẹ. (Ọnyano 33:20; 34:6, 7) Ọ rẹ k’uyo enọ nọ ahwo evezi a nọ kpahe otofa uzuazọ. Rọ kpahe eme nọ i w’obọ kpahe izuazọ mai, ọ k’omai uvi ehri nọ ma rẹ rọ riẹ edikihẹ riẹ, koyehọ, epanọ o rri eme itieye na gbe sọ isiuru mai e rọwo kugbe ẹjiroro riẹ. Ọ gwọlọ re ma kiẹ kpahe eware itieye na jẹ daoma gwọlọ iyo rai. Ẹkwoma Jerimaya ọruẹaro na, Jihova ọ whọku ahwo Izrẹl anwae fikinọ a ru onana ha. A riẹ odẹ Ọghẹnẹ, rekọ a nọ họ inọ, “Diẹse Jihova ọ rrọ?” (Jerimaya 2:6) Ẹjiroro Jihova ọ jọ ọdawẹ rai hi. A jẹ gwọlọ ọkpọvio riẹ hẹ. Okenọ whọ tẹ rẹriẹ ovao ku iroro-ejẹ, te ilogbo te esese, kọ whọ be nọ nnọ, “Diẹse Jihova ọ rrọ?”
Enọ E Gwọlọ Ọghẹnẹ
4. Ẹvẹ ma sai ro wo erere no oriruo Devidi evaọ ẹnọ mi Jihova ze?
4 Okenọ ọ gbẹ jọ ọmoha, Devidi, ọmọ Jẹsi, o wo ẹrọwọ ologbo fihọ Jihova. Ọ riẹ Jihova wọhọ “Ọghẹnẹ uzuazọ na.” Devidi ọ rọ ẹro ruẹ uketha Jihova no. Avọ ẹrọwọ gbe uyoyou kẹ “odẹ ỌNOWO” na nọ o wọ riẹ, Devidi o kpe Goliat, ọgwara Filistia nọ ọ wha ẹgọ-ẹmo vọ oma na. (1 Samuẹle 17:26, 34-51) Dede na, obokparọ Devidi o lẹlie riẹ fu uke he. O roro ho inọ makọ oware nọ o ti ru kpobi enẹna, Jihova ọ te ghale iẹe. Ẹsibuobu, evaọ ikpe nọ i lele i rie, Devidi ọ nọ mi Jihova okenọ ọ tẹ rẹriẹ ovao ku iroro-ejẹ. (1 Samuẹle 23:2; 30:8; 2 Samuẹle 2:1; 5:19) Ọ gbẹ jẹ lẹ nọ: “Dhesẹ idhere ra kẹ omẹ, O ỌNOWO; re [who wuhrẹ] omẹ obọ eda idhere ra. Jọ uzẹme ra [u] su omẹ, re who wuhrẹ omẹ, keme whẹ họ Ọghẹnẹ usiwo mẹ; whẹ họ ẹruore mẹ bẹsenọ oke u ro kpo.” (Olezi 25:4, 5) Ẹvẹ onana o rọ emamọ oriruo te nọ ma re lele!
5, 6. Ẹvẹ Jehoshafat ọ rọ gwọlọ Jihova eva etoke sa-sa evaọ uzuazọ riẹ?
5 Evaọ edẹ Jehoshafat Ovie na, ovie avọ isoi evaọ uhie ivie nọ i no oma Devidi ze, egbaẹmo erẹwho esa i kuomagbe te họre Juda. Avọ ẹbẹbẹ idudhe orẹwho soso nana, Jehoshafat ‘ọ tẹ gwọlọ ỌNOWO na.’ (2 Iruẹru-Ivie 20:1-3) Onana họ orọ ọsosuọ nọ Jehoshafat ọ rọ gwọlọ Jihova ha. Ovie na ọ se egagọ Ebale onọ uvie ofẹ ẹkpẹlobọ ovatha-ọre Izrẹl o jẹ dhẹ lele na, yọ ọ salọ nọ ọ rẹ nya evaọ idhere Jihova. (2 Iruẹru-Ivie 17:3, 4) Fikiere nọ ọ rẹriẹ ovao ku okpẹtu nana, ẹvẹ Jehoshafat ọ rọ “gwọlọ ỌNOWO na”?
6 Evaọ olẹ ẹgbede nọ ọ lẹ evaọ Jerusalẹm eva oke okpẹtu na, Jehoshafat o dhesẹ inọ ọ kareghẹhọ ogaga ulogbo Jihova. O roro didi kpahe ẹjiroro Jihova nọ o dhesẹ oma via no ẹkwoma erẹwho efa nọ O le no jẹ rọ ekwotọ jọ kẹ Izrẹl wọhọ ukuoriọ. Ovie na o vuhumu nnọ ọ gwọlọ obufihọ Jihova. (2 Iruẹru-Ivie 20:6-12) Kọ Jihova o ru re a rue riẹ evaọ oke yena? E. Ẹkwoma Jahaziẹl, ohwo Livai, Jihova ọ kẹ ugogo ọkpọvio, yọ evaọ okiokiọ riẹ Ọ tẹ kẹ ahwo Riẹ obokparọ. (2 Iruẹru-Ivie 20:14-28) Ẹvẹ o sai ro mu owhẹ ẹro inọ Jihova o ti ru re whọ rue riẹ okenọ whọ tẹ nya bru ei kẹ ọkpọvio?
7. Elẹ amono Ọghẹnẹ o re yo?
7 Jihova o wo ọriẹwẹ hẹ. O zizie ahwo erẹwho kpobi re a gwọlọ iẹe evaọ olẹ. (Olezi 65:2; Iruẹru 10:34, 35) O bi muẹrohọ oware nọ o rrọ udu enọ e be lẹ sei. Ọ k’omai imuẹro inọ o re yo elẹ ikiẹrẹe. (Itẹ 15:29) Ọ kẹ uvẹ re enọ i dhesẹ isiuru kpahe iẹe vẹre he, nọ e be rehọ omarokpotọ gwọlọ ọkpọvio riẹ enẹna a rue riẹ. (Aizaya 65:1) O re tube yo elẹ enọ i je koko uzi riẹ vẹre he rekinọ a rehọ omarokpotọ kurẹriẹ no enẹna. (Olezi 32:5, 6; Iruẹru 3:19) Ghele na, ohwo o gbe wo omarokpotọ kẹ Ọghẹnẹ evaọ udu riẹ hẹ, elẹ ohwo ọyena ifofe. (Mak 7:6, 7) Roro kpahe iriruo jọ.
A Yare Rekọ U Te Rai Obọ Họ
8. Fikieme Jihova ọ gbẹ rọ jẹ elẹ Sọl Ovie na rehọ họ?
8 Nọ Samuẹle ọruẹaro na ọ ta kẹ Sọl Ovie na nnọ Ọghẹnẹ ọ se riẹ no fiki aghẹmeeyo riẹ, Sọl o te kie rọ uzou kpotọ kẹ Jihova. (1 Samuẹle 15:30, 31) Rekiyọ ẹghẹ gheghe. Isiuru Sọl họ, orọnikọ re o yoẹme kẹ Ọghẹnẹ hẹ, rekọ re a kẹe ọghọ evaọ iraro ahwo na. Uwhremu na, okenọ ahwo Filistia a je fi Izrẹl ẹmo, Sọl ọ tẹ faki ru epaọ ẹsenọ ọ be gwọlọ Jihova. Dede na, nọ uyo u te rie obọ họ, ọ tẹ nekpẹ mi ọbo-ẹva, dede nọ ọ riẹ nnọ Jihova ọ ghọ onana. (Iziewariẹ 18:10-12; 1 Samuẹle 28:6, 7) Re a gba ẹme na ekru, enẹ 1 Iruẹru-Ivie 10:14 o ta kpahe Sọl: “Ọ gbẹ jẹ guọlọ obufihọ no obọ ỌNOWO na ze he.” Fikieme? Keme elẹ Sọl i no udu ẹrọwọ ze he. Fikiere, o tẹ wọhọ epaọ ẹsenọ ọ lẹ vievie he.
9. Eme ọ thọ evaọ olẹ nọ Zẹdikaya ọ lẹ rọkẹ ọkpọvio Jihova?
9 Epọvo na re, nọ ekuhọ uvie Juda o be kẹle na, a lẹ elẹ buobu a tẹ jẹ nekpẹ mi eruẹaro Jihova. Dede na, ahwo na a jẹ rehọ egagọ emedhọ gua egagọ nọ a rọ igbenu be rọ kẹ Jihova. (Zefanaya 1:4-6) Dede nọ a jẹ rọ igbenu nekpẹ mi Ọghẹnẹ, a ruẹrẹ idu rai họ re a roma kpotọ kẹ oreva riẹ hẹ. Zẹdikaya Ovie na ọ lẹ Jerimaya re ọ n’ekpẹ mi Jihova kẹe. Jihova ọ vuẹ ovie na oware nọ u fo nọ o re ru no. Rekọ fikinọ ọ kare ẹrọwọ je bi kie kẹ ozodhẹ ahwo, ovie na ọ gaviezọ kẹ urru Jihova ha, yọ Jihova ọ kẹ riẹ uyo ofa ha, onọ o rẹ were ovie na ezọ.—Jerimaya 21:1-12; 38:14-19.
10. Eme ọ thọ evaọ edhere nọ Johanan ọ rọ gwọlọ ọkpọvio Jihova, kọ eme ma wuhrẹ no ẹthọthọ riẹ ze?
10 Nọ a raha Jerusalẹm no nọ egbaẹmo Babilọn a wha ahwo Ju kpohọ igbo no, Johanan ọ tẹ ruẹrẹ oma kpahe re ọ rehọ umutho ahwo Ju nọ i kiọkọ Juda kpohọ Ijipti. A ta ẹme na mu no, rekọ taure a tẹ te ruọ edhere, a tẹ yare Jerimaya re ọ lẹ kẹ ae jẹ yare ọkpọvio mi Jihova. Dede na, nọ oghẹrẹ uyo nọ a gwọlọ u te rai obọ họ, a te ru epanọ o rrọ ae iroro. (Jerimaya 41:16–43:7) Kọ whọ jọ iriruo nana ruẹ eware uwuhrẹ nọ e rẹ sae k’owhẹ erere re evaọ okenọ whọ tẹ be gwọlọ Jihova, o ve ru re whọ rue riẹ?
“Wuhrẹ Onọ O rẹ Were Ọnowo Na”
11. Fikieme u je fo nọ ma fi oware nọ o rrọ Ahwo Ẹfẹsọs 5:10 họ iruo?
11 Egagọ uzẹme o gwọlọ vi ame nọ ma rẹ họ ọvo, ekpohọ iwuhrẹ ukoko, gbe abọ owo evaọ odibọgba na. U kpomahọ uzuazọ mai kpobi. Ma be nyaku itunyẹ kẹdẹ kẹdẹ—ejọ erọ ototọ, ejọ i kpoma fihọ—enọ e rẹ sai ku omai rẹriẹ no edhere nọ ọ rọwo kugbe omarọkẹ Ọghẹnẹ. Didi owọ ma te jẹ kpahe itunyẹ nana? Okenọ o je kere se ibe Ileleikristi ẹrọwọ evaọ Ẹfẹsọs, Pọl ukọ na ọ kẹ rai uduotahawọ nnọ: “Wuhrẹ onọ o rẹ were Ọnowo na.” (Ahwo Ẹfẹsọs 5:10) A jọ eware buobu nọ e via nọ a kere fihọ Ikereakere na i dhesẹ erere nọ ọ rrọ ere oruo.
12. Fikieme eva e rọ dha Jihova okenọ Devidi ọ wọ okọ ọvọ na kpohọ Jerusalẹm?
12 Nọ a zihe etehe ọvọ na ziọ Izrẹl no jẹ rria ikpe buobu no eva Kiriat-jearim, Devidi Ovie na ọ tẹ gwọlọ nọ ọ rẹ wọe ziọ Jerusalẹm. Ọ nekpẹ mi iletu ahwo na jẹ ta nọ a rẹ wọ Okọ na ‘otẹrọnọ u kiehọ evaọ aro rai gbe aro ỌNOWO na.’ Rekọ ọ nekpẹ na totọ họ re ọ riẹ oreva Jihova evaọ ẹme na. O hae jọ nọ o ru ere, a hae wọ Okọ na fihọ ehru akẹkẹ vievie he. Ahwo Livai erọ orua Kohat a hae wọe fihọ ẹkoko rai, wọhọ epanọ Ọghẹnẹ ọ ta vevẹ no. Dede nọ ẹsibuobu Devidi ọ nekpẹ mi Jihova, ọ rọ emamọ edhere ru ere evaọ oke nana ha. Okpẹtu o no rie ze. Uwhremu na Devidi ọ tẹ f’eva nọ: “ỌNOWO na Ọghẹnẹ mai ọ . . . vẹ ruọ omai na, fiki epanọ ma [nekpẹ mi ei] eva edhere nọ ọ gwọlọ họ.”—1 Iruẹru-Ivie 13:1-3; 15:11-13; Ikelakele 4:4-6, 15; 7:1-9.
13. Ekareghẹhọ vẹ a kugbe ole nọ a so evaọ okenọ a rehọ Okọ na te uwou gbẹsinẹdẹ?
13 Uwhremu na nọ ahwo Livae a wọ Okọ na no uwou ọ Obẹd-ẹdọm ziọ Jerusalẹm, a tẹ so ole nọ Devidi ọ ruẹrẹhọ. Eme ekareghẹhọ enana e rrọ abọjọ ole na: “Wha gwọlọ ỌNOWO na avọ ogaga riẹ, wha gwọlọ ẹjọkugbe riẹ kẹse kẹse! Wha kareghẹhọ iruo urirẹ nọ o ru, eware urirẹ nọ o ru, gbe iziẹ riẹ nọ o bru!”—1 Iruẹru-Ivie 16:11, 12.
14. Didi erere ma rẹ sai wo no emamọ oriruo Solomọn ze je no ethobọ riẹ evaọ oke owho riẹ ze?
14 Taure o te ti whu, Devidi ọ hrẹ Solomọn ọmọ riẹ nọ: “Whọ [tẹ gwọlọ Jihova], whọ rẹ te rue riẹ.” (1 Iruẹru-Ivie 28:9) Nọ ọ keria agbara-uvie na no, Solomọn o te kpohọ Gibiọn, oria nọ uwou-udhu egagọ na o jọ, o te dheidhe kẹ Jihova. Evaọ obei Jihova o jo zizie Solomọn nọ: “Yare oware nọ mẹ rẹ kẹ owhẹ.” Evaọ uyo kẹ ayare Solomọn, Jihova o te siobọno areghẹ gbe eriariẹ kẹe nọ o re ro gu Izrẹl ẹdhọ, O te je fi efe gbe oruaro bae. (2 Iruẹru-Ivie 1:3-12) Ẹkwoma omaa ebabọ nọ Jihova ọ rọ kẹ Devidi, Solomọn ọ tẹ bọ etẹmpol urirẹ. Rekọ evaọ abọ orọo, Solomọn ọ gwọlọ Jihova ha. Solomọn ọ rehọ eyae nọ e be gọ Jihova ha. Evaọ oke owho riẹ, a tẹ kpọ udu riẹ no Jihova. (1 Ivie 11:1-10) Epanọ ma roro nọ ma rro, wo areghẹ, je wo eriariẹ te kẹhẹ, u w’uzou re ma gbe “wuhrẹ onọ o rẹ were Ọnowo na”!
15. Okenọ Zira ohwo Ẹtiopia na ọ wọ ohọre bru Juda ze, fikieme Asa ọ sae rọ lẹ avọ eva nọ o fihọ nnọ Jihova o ti siwi Juda?
15 Okerefihotọ ọrọ esuo Asa, ọmọ-uruọmọ Solomọn, o fiẹgba họ ẹgwọlọ nọ a re ro ru onana. Nọ Asa o su te ikpe 11 no, Zira ohwo Ẹtiopia na o te su egbaẹmo ahwo ima ọvo te họre Juda. Kọ Jihova o ti siwi Juda? Bu vi ikpe 500 nọ i kpemu, Jihova ọ roma totọ fodẹ oware nọ ahwo riẹ a re rẹro riẹ otẹrọnọ a gaviezọ kẹe je koko ijaje riẹ gbe oware nọ a re rẹro riẹ otẹrọnọ a gaviezọ họ. (Iziewariẹ 28:1, 7, 15, 25) Eva emuhọ esuo riẹ, Asa o si agbada-idhe gbe odẹẹ erọ egagọ erue no otọ esuo riẹ. Ọ tuduhọ ahwo na awọ “re a gwọlọ ỌNOWO na.” Orọnikọ Asa ọ hẹrẹ bẹsenọ ọ rẹ rẹriẹ ovao ku okpẹtu taure o te ru ere he. Avọ ẹrọwọ nọ o fihọ Jihova, Asa ọ sae lẹ sei re o fi obọ họ kẹ ai. Eme o no rie ze? A kẹ Juda obọdẹ obokparọ.—2 Iruẹru-Ivie 14:2-12.
16, 17. (a) Dede nọ Asa ọ kparobọ, didi ekareghẹhọ Jihova ọ kẹ riẹ? (b) Okenọ Asa o ruthọ, didi obọ a fihọ kẹe, rekọ didi owọ ọ jẹ? (c) Ẹvẹ ma sai ro wo erere no eroro kpahe uruemu Asa ze?
16 Dede na, okenọ Asa o zihe ze no avọ obokparọ, Jihova o te vi Azaraya re o bru ovie na jẹ ta nọ: “Yo kẹ omẹ, Asa, gbe ahwo Juda gbe Benjamin kpobi: ỌNOWO ọ rọ kugbe owhai, wha tẹ jẹ rọ kugbe i re. Otẹrọnọ wha gwọlọ e riẹ, wha rẹ te rue riẹe, rekọ wha tẹ se iẹe, ọ rẹ te se owhai re.” (2 Iruẹru-Ivie 15:2) Avọ ọwhọ ọkpokpọ ọfa, Asa ọ tẹ wha egagọ uzẹme haro. Rekọ ikpe 24 e ruọ emu no, okenọ ọ rẹriẹ ovao ku ẹmo, Asa ọ gwọlọ Jihova ha. Ọ kiẹ Ẹme Ọghẹnẹ hẹ, yọ ọ kareghẹhọ oware nọ Jihova o ru hu okenọ egbaẹmo Ẹtiopia a wọ ohọre ziọ Juda. Gheghẹ gheghẹ, o te ku usu gbe Siria.—2 Iruẹru-Ivie 16:1-6.
17 Fiki onana, Jihova o te ru Hanani ọruẹaro na re ọ whọku Asa. Makọ eva oke yena, nọ a dhesẹ eriwo Jihova vẹ kẹe na, Asa ọ hai wo erere. Ukpoye, eva e tẹ dhae, o te fi Hanani họ ekarọ. (2 Iruẹru-Ivie 16:7-10) Kinọ oware! Kọ ẹvẹ kpahe omai? Kọ ma rẹ gwọlọ Ọghẹnẹ rekiyọ ma be se ohrẹ nọ a kẹ omai? Okenọ ọkpako ukoko jọ nọ o wo ọdawẹ ọ tẹ k’omai ohrẹ no Ebaibol na ze fikinọ ma be dhẹ lele akpọ na, kọ ma bi dhesẹ uyere kẹ obufihọ uyoyou nọ a be k’omai re ma “wuhrẹ onọ o rẹ were Ọnowo na”?
Whọ Siọ Jihova Ba Ẹnọ Kpahe He
18. Ẹvẹ ma sai ro wo erere no eme nọ Elaihu ọ ta kẹ Job na ze?
18 Ohwo nọ ọ make gọ Jihova kri no avọ ẹrọwọ ọ tẹ rrọ otọ otunyẹ, ọ rẹ sai ru thọ. Okenọ a rehọ ẹyao ọtọtọ tehe Job, emọ riẹ i whu gbe eyero riẹ o vru ku ei, nọ egbẹnyusu riẹ e bọwo iẹe ota, ọ tẹ tọ ẹro riẹ kpobi vi omobọ riẹ. Elaihu ọ kareghẹhọ iẹe nọ: “Rekọ ọvuọvo ọ ta [ha inọ], ‘Ọghẹnẹ mẹ ọnọ ọ ma omẹ ọrọ?’ ” (Job 35:10) U fo re Job ọ rẹriẹ iroro riẹ bru Jihova je roro kpahe epanọ O rri uyero na. Avọ omarokpotọ Job ọ jẹ ekareghẹhọ yena rehọ, yọ oriruo riẹ ọ sai fi obọ họ k’omai ru epọvo na re.
19. Eme ahwo Izrẹl a gbabọkẹ ẹsibuobu?
19 Ahwo Izrẹl a riẹ okerefihotọ epanọ Ọghẹnẹ o ro yeri kugbe orẹwho rai. Rekọ ẹsibuobu a kareghẹhọ eware nana ha okenọ a tẹ be j’iroro kpahe igogo iyero jọ evaọ izuazọ rai. (Jerimaya 2:5, 6, 8) Okenọ a tẹ rẹriẹ ovao ku iyero evaọ uzuazọ, a je le isiuru obọ rai ukpenọ a rẹ nọ inọ: “Diẹse Jihova ọ rrọ?”—Aizaya 5:11, 12.
Gbẹ Hae Nọ inọ, “Diẹse Jihova Ọ Rrọ?”
20, 21. (a) Amono nẹnẹ a dhesẹ ẹzi Elaeja no evaọ ẹgwọlọ ọkpọvio Jihova? (b) Ẹvẹ ma sae rọ raro kele je wo erere no oriruo ẹrọwọ rai ze?
20 Okenọ odibọgba ẹgbede Elaeja o kuhọ no, odibo riẹ Elaesha ọ tẹ rehọ ewu iruo nọ o kie no Elaeja oma ze, kpohọ ethẹ Jọdan, ọ tẹ tehe ame na jẹ nọ inọ: “Kọ ỌNOWO na ọ rọ, Ọghẹnẹ Elaeja?” (2 Ivie 2:14) Jihova ọ tẹ k’uyo onọ u dhesẹ nnọ ẹzi riẹ ọ ruọ Elaesha oma no. Eme ma rẹ sai wuhrẹ no onana ze?
21 Ọkpọ oware ovona o via evaọ ọgbọna. Ileleikristi jọ nọ a wholo enọ e jẹ kobaro evaọ iruo usiuwoma ota na a whu no. Enọ a kẹ iruo ẹruọsa na a tẹ kiẹ Ikereakere na riwi jẹ lẹ se Jihova kẹ ọkpọvio. A seba ẹnọ họ inọ, “Diẹse Jihova ọ rrọ?” Fikiere, Jihova o gbe bi su ahwo riẹ je fi ẹvi họ iruẹru rai. Kọ ma be raro kele ẹrọwọ rai? (Ahwo Hibru 13:7) O tẹ rrọ ere, koyehọ ma te jọ kẹle ukoko Jihova, j’owọ kẹ ọkpọvio riẹ, je w’obọ vọvọ ziezi evaọ iruo nọ o bi ru evaọ otọ ọkpọvio Jesu Kristi na.—Zekaraya 8:23.
Ẹvẹ Whọ te k’Uyo?
• Eme ma re wo họ iroro rọ nọ inọ, “Diẹse Jihova ọ rrọ?”
• Ẹvẹ mai nẹnẹ ma sae rọ ruẹ uyo kẹ onọ na, “Diẹse Jihova ọ rrọ?”
• Fikieme a gbe ro yo elẹ jọ nọ a rẹ lẹ rọkẹ ọkpọvio Ọghẹnẹ hẹ?
• Didi iriruo Ebaibol i dhesẹ ẹgwọlọ nọ ma re ro “wuhrẹ onọ o rẹ were Ọnowo na”?
[Uwoho nọ o rrọ ẹwẹ-obe avọ 15]
Ẹvẹ Jehoshafat Ovie na ọ rọ gwọlọ Jihova?
[Uwoho nọ o rrọ ẹwẹ-obe avọ 16]
Fikieme Sọl ọ rọ nekpẹ mi ọbo-ẹva?
[Iwoho nọ e rrọ ẹwẹ-obe avọ 18]
Lẹ, wuhrẹ, je roro didi re whọ sae riẹ ‘obonọ Jihova ọ rrọ’