Rehọ Omosasọ Kẹ Enọ E Rrọ Uweri

“ỌNOWO na o wholo omẹ . . . re mẹ jaja enọ e [rrọ] uweli oma.”—AIZAYA 61:1, 2.

1, 2. Amono ma rẹ kẹ omosasọ, kọ fikieme?

JIHOVA, Ọghẹnẹ omosasọ kpobi na, o bi wuhrẹ omai re ma dhesẹ ọdawẹ eva okenọ amọfa a tẹ rrọ uye. O bi wuhrẹ omai re ma “ta udu họ enọ udu u re bro awọ” jẹ sasa enọ i bi weri kpobi oma. (1 Ahwo Tẹsalonika 5:14) Okenọ ibe egegagọ a tẹ gwọlọ obufihọ utioye na, ma rẹ rehọ iẹe kẹ. Ma re je dhesẹ uyoyou kẹ enọ e rrọ otafe ukoko na, makọ enọ i mukpahe omai gaga evaọ okenọ u kpemu no.—Matiu 5:43-48; Ahwo Galesha 6:10.

² Jesu Kristi o se eme eruẹaruẹ nana via jẹ ta nnọ i kie kpahe ọye oma riẹ: “Ẹzi Ọnowo ỌGHẸNẸ na ọ rọ omẹ oma, fiki epanọ ỌNOWO na o wholo omẹ, re mẹ vuẹ emamọ usi kẹ enọ a nwẹ, o vi omẹ re mẹ sasa ahwo nọ a rọ uweli oma, . . . re mẹ jaja enọ e [rrọ] uweli oma.” (Aizaya 61:1, 2; Luk 4:16-19) U kri no nọ Ileleikristi ọgbọna nọ a wholo na a ro vuhumu nnọ iruo yena i kie kpahe ae re, yọ “igodẹ efa” na a rọ evawere kuomagbe ae evaọ iruo yena.—Jọn 10:16.

3. Okenọ ahwo a tẹ nọ nnọ, “Fikieme Ọghẹnẹ ọ rọ kẹ okpẹtu uvẹ?” ẹvẹ ma sai ro fi obọ họ kẹ ai?

³ Okenọ okpẹtu ọ tẹ via nọ ahwo a tẹ rrọ ọkora, ẹsibuobu a rẹ nọ inọ, “Fikieme Ọghẹnẹ ọ rọ kẹ okpẹtu uvẹ?” Ebaibol na e za onọ oyena vevẹ. Dede na, o sae rehọ oke taure ohwo nọ ọ re jọ ọmọ-uwuhrẹ Ebaibol ho o te wo otoriẹ uyo na ziezi. A rẹ sae jọ ebe ọ Isẹri Jihova ruẹ obufihọ.a Dede na, wọhọ emuhọ, o sasa ahwo jọ oma no re a jọ Ebaibol na ruẹ ikere wọhọ onọ o rrọ Aizaya 61:1, 2 na, keme u dhesẹ isiuru Ọghẹnẹ re ahwo-akpọ a wo omosasọ.

4. Ẹvẹ Osẹri jọ evaọ Poland ọ sai ro fi obọ họ kẹ ọmọtẹ isukulu nọ ọ jọ ọkora, kọ eme who wuhrẹ no onana ze nọ whọ sai ro fi obọ họ kẹ amọfa?

⁴ T’emaha t’ekpako a gwọlọ omosasọ. Evaọ obọ Poland, uzoge ikpe-ikpegbọ jọ nọ ọ rrọ ọkora ọ yare ohrẹ mi ogbẹnyusu riẹ. Avọ oma nọ o ro totọ nọe haro, ogbẹnyusu na, ọnọ ọ rrọ omọvo Isẹri Jihova, ọ tẹ ruẹ nọ enọ gbe avro sa-sa e vọ ọmọtẹ na eva: “Fikieme eyoma o je bu enẹ? Fikieme ahwo a jẹ be ruẹ uye? Fikieme oniọvo mẹ nọ okie o kie ọ be rọ ruẹ uye? Fikieme me ro wo ẹyao udu? Ichọche na e ta nọ ere Ọghẹnẹ ọ gwọlọ e riẹ. Rekọ o tẹ rrọ ere, mẹ te gbẹ rọwo Ọghẹnẹ hẹ!” Osẹri na ọ lẹ h’eva se Jihova no, ọ tẹ ta nọ: “Eva e were omẹ nọ whọ rọ n’omẹ kpahe onana. Mẹ te dao oma fi obọ họ k’owhẹ.” Ọ ta kẹe inọ ọye omariẹ o wo avro re okenọ ọ jọ ọmaha gbe nnọ Isẹri Jihova a fi obọ họ kẹe. Ọ ta nọ: “Me wuhrẹ nnọ orọnọ Ọghẹnẹ o bi ru ahwo ruẹ uye he. O you ahwo, ọ gwọlọ ewoma kẹ ae, gbe nnọ kẹle na ọ te wha inwene ilogbo ziọ otọakpọ na. Ẹyao, ebẹbẹ owho, gbe uwhu e te vrẹ, ahwo ẹmeoyo a vẹ te rria bẹdẹ bẹdẹ—evaọ otọakpọ nana.” O te dhesẹ Eviavia 21:3, 4; Job 33:25; Aizaya 35:5-7 gbe Aizaya 65:21-25 kẹ ọmọtẹ na. Nọ a t’ẹme krẹkri no, ọmọtẹ na o te kuẹwẹ ta nọ: “Enẹna mẹ riẹ ẹjiroro nọ mẹ rọ rrọ uzuazọ no. Kọ mẹ sae nyaze te wariẹ ruẹ owhẹ?” A te mu uwuhrẹ Ebaibol họ kugbe ei nọ a je ru isiava ẹkpoka.

Rehọ Omosasọ nọ Ọghẹnẹ Ọ Kẹ rọ Sasa Amọfa Oma

5. Okenọ ma te bi dhesẹ ọdawẹ, eme ọ rẹ sae ghinẹ kẹ uvi omosasọ?

⁵ Ma tẹ gwọlọ sasa amọfa oma, u kiehọ re ma gwọlọ eme ọdawẹ. Ma rẹ gwọlọ rehọ ẹmeunu gbe urru mai dhesẹ kẹ ohwo nọ ọ rrọ uweri na inọ ma wo ọdawẹ odidi kpahe uyero riẹ. Orọnikọ ma re se ohwo na keria ma ve mu eme ọ ero gheghe họ ẹta ha. Ebaibol na e ta k’omai nọ ma rẹ “rehọ fiki odiri gbe eri ikereakere na, wo ẹruore.” (Ẹjẹlẹ ibiẹme na ọmai; Ahwo Rom 15:4) Fiki onana, ma rẹ sae jọ ẹruoke dhesẹ oware nọ Uvie Ọghẹnẹ o rrọ, yọ ma sai dhesẹ no Ebaibol na ze epanọ Uvie na u ti ro ku ebẹbẹ inẹnẹ họ. Kẹsena ma vẹ ta oware nọ o jẹ rrọ ẹruore nọ a re fi eva họ. Evaọ edhere ọnana, ma rẹ sae kẹ omosasọ.

6. Eme ma re fi obọ họ kẹ ahwo vuhumu re a sai wo erere vọvọ no omosasọ Ikereakere na ze?

⁶ Re ohwo o wo erere vọvọ no omosasọ nọ ma be kẹ ze, u fo re ohwo na ọ riẹ Ọghẹnẹ uzẹme na, oghẹrẹ Ohwo nọ ọ rrọ, gbe epanọ eyaa riẹ i muẹro te. Ma tẹ gwọlọ fi obọ họ kẹ ohwo nọ ọ be gọ Jihova ha, u re fo re ma dhesẹ ugogo eware nana vevẹ. (1) Omosasọ nọ o rrọ Ebaibol na obọ Jihova, Ọghẹnẹ uzẹme na, u no ze. (2) Jihova họ Erumeru na, Ọnọma idhiwu gbe otọakpọ na. Ọ rrọ Ọghẹnẹ uyoyou ọ tẹ jẹ vọ avọ uyoyou-ẹwo gbe uzẹme. (3) Ma rẹ sai wo ẹgba nọ ma re ro yeri kugbe iyero sa-sa otẹrọnọ ma si kẹle Ọghẹnẹ ẹkwoma ewo eriariẹ egbagba rono Ẹme riẹ ze. (4) Ebaibol na i wo ikereakere nọ e ta kpahe ugogo edawọ nọ ahwo sa-sa a be rẹriẹ ovao ku.

7. (a) Eme ma rẹ sai rugba ẹkwoma ẹgba ofihọ inọ omosasọ nọ Ọghẹnẹ ọ rẹ kẹ o rrọ “buobu no obọ Kristi ze”? (b) Ẹvẹ whọ sae rọ rehọ ọsasọ kẹ ohwo nọ o vuhumu nnọ uruemu riẹ u yoma?

⁷ Ahwo jọ a rehọ uduotahawọ abọ-ẹzi kẹ enọ i bi weri nọ e riẹ Ebaibol na no ẹkwoma ese 2 Ahwo Kọrint 1:3-7. Nọ a te bi sei, a re fi ẹgba họ eme nana ‘ma wo omosasọ buobu no obọ Kristi ze.’ Ikereakere nana e sai fi obọ họ kẹ ohwo vuhumu nnọ Ebaibol na yọ ehri omosasọ, onọ u fo nọ ma re se ẹsikpobi. O sae jẹ jọ otọhotọ kẹ ẹme nọ ma rẹ gbẹ t’ẹme haro, ẹsejọhọ evaọ oke ofa. Ohwo o te roro nọ ọ be ruẹ uye fiki eware iyoma nọ o ru no, ababọ ẹdhọ nọ ma re gu ei, ma rẹ sae ta kẹe inọ o rrọ omosasọ re ọ riẹ eme nọ a kere fihọ 1 Jọn 2:1, 2 gbe Olezi 103:11-14. Evaọ idhere nana ma sae ghinẹ rehọ omosasọ nọ Ọghẹnẹ ọ kẹ rọ sasa amọfa oma.

Okenọ Uzuazọ Ohwo O tẹ Tahaku Fiki Ozighi gbe Ọbẹwẹ

8, 9. Ẹvẹ ma sae rọ rehọ omosasọ kẹ ahwo nọ a be ruẹ uye ozighi?

⁸ Izuazọ ima ahwo buobu e tahaku no fiki ozighi—ozighi ahwo ugbarugba evaọ ẹwho hayo ozighi ẹmo. Ẹvẹ ma sae rọ sasa ae oma?

⁹ Ileleikristi uzẹme a rẹ yọrọ oma re a ruẹ nnọ a rehọ ẹmeunu hayo uruemu rai dhesẹ nọ a rrọ abọjọ evaọ ozighi akpọ na ha. (Jọn 17:16) Rekọ a rẹ rehọ Ebaibol na ruiruo ziezi ro dhesẹ nọ ebẹbẹ inẹnẹ na e te jariẹ bẹdẹ bẹdẹ hẹ. A rẹ sai se Olezi 11:5 ro dhesẹ epanọ ahwo nọ a you ozighi a rrọ Jihova oma hayo Olezi 37:1-4 ro dhesẹ uduotahawọ Ọghẹnẹ inọ ma ru orukele he rekọ ma fi eva họ Ọghẹnẹ. Eme ọ Olezi 72:12-14 u dhesẹ epanọ Solomọn Ologbo na, Jesu Kristi, nọ o bi su enẹna wọhọ Ovie obọ odhiwu, o wo ọdawẹ te kẹ iwhrori nọ e be ruẹ uye ozighi.

10. Otẹrọnọ whọ ruẹ uye ẹmo ẹsibuobu no, ẹvẹ ikereakere nọ a jọ etenẹ fodẹ na e sae rọ sasa owhẹ oma?

¹⁰ Ahwo jọ a ruẹ uye ozighi unuẹse buobu no okenọ ahwo ofẹ jọ a be họre ofẹ odekọ kẹ esuo. Evaọ eriwo rai, ẹmo gbe uye-oruẹ nọ o rẹ wha ze yọ ẹkoma uzuazọ. Ẹruore rai kpobi họ, akpọ rai o ti woma viere otẹrọnọ a dhẹ kpohọ orẹwho ọfa. Rekọ ibuobu rai a be sai ru ere oma kọkọ họ, yọ ejọ nọ e daoma ru ere a whu fihọ iẹe no. Enọ e dhẹ kpohọ orẹwho ofa no a rẹ ruẹ ẹsibuobu nnọ a dhẹ no ebẹbẹ ọsosuọ ruọ ebẹbẹ ekpokpọ efa. A rẹ sae rehọ Olezi 146:3-6 ro fi obọ họ kẹ ahwo otiọye na, re a fi ẹruore rai họ oware nọ u muẹro vi orẹwho ofa nọ a rẹ dhẹ kpohọ. Eruẹaruẹ nọ e rrọ Matiu 24:3, 7, 14 hayo 2 Timoti 3:1-5 e sai fi obọ họ kẹ ae wo otoriẹ ẹme na didi jẹ ruẹ otofa iyero nọ a bi thihakọ rai na, oyehọ, inọ ma be rria ekuhọ uyerakpọ anwae na. Ikere wọhọ Olezi 46:1-3, 8, 9 gbe Aizaya 2:2-4 e sai fi obọ họ kẹ ae vuhumu nnọ ẹruore ọ ghinẹ riẹ kẹ obaro udhedhẹ.

11. Didi ikere e sasa aye jọ evaọ obọ West Africa oma, kọ fikieme?

¹¹ Evaọ etoke nọ ẹmo ọ j’otọ evaọ West Africa, aye jọ ọ dhẹ no uwou riẹ avọ igbeke nọ i bi kie. Uzuazọ riẹ o tẹ te vọ avọ ozọ, uweri, gbe ọkora. Uwhremu na, nọ uviuwou na ọ jẹ rria orẹwho ofa, ọzae riẹ ọ tẹ mahe obe-orọo rai no, o te le aye na nọ o dihọ no uwou avọ ọmọ ikpe 10 rai, re ọ ruẹsi zihe ruọ ozerẹ. Okenọ a se Ahwo Filipai 4:6, 7 gbe Olezi 55:22 kẹe, kugbe izoeme Ikereakere jọ nọ a sino Uwou-Eroro Na gbe Awake! ze, ọ tẹ te ruẹ omosasọ gbe ẹjiroro evaọ uzuazọ uwhremu na.

12. (a) Didi ufuoma Ikereakere na e rọ kẹ enọ e rrọ ọbẹwẹ? (b) Ẹvẹ Osẹri jọ evaọ Esia ọ sai ro fi obọ họ kẹ ọhreki riẹ jọ?

¹² Ọbẹwẹ ọ taha izuazọ ima ahwo buobu ku no. Ẹsejọ onọ o rẹ wha onana ze họ fiki ẹmo gbe araha nọ o re no ẹmuofio ze. Evaọ efa jọ, ekpehre izi egọmeti gbe oriobọ avọ ababọ oruọzewọ orọ enọ e rrọ egọmeti, u tunye ahwo họ raha igho rai jẹ lẹliẹ ahwo dhẹ no iwou rai no. Akpọ ọ re bẹbẹ kẹ amọfa buobu. O rẹ sae sasa ahwo nana kpobi oma re a riẹ nọ Ọghẹnẹ ọ rehọ imuẹro ufuoma kẹ enọ i fi eva họ iẹe, jẹ y’eyaa akpọ okiẹrẹe nọ ahwo a te jọ reawere iruo abọ rai. (Olezi 146:6, 7; Aizaya 65:17, 21-23; 2 Pita 3:13) Okenọ Osẹri jọ evaọ orẹwho Esia jọ o yo ọhreki riẹ nọ o bi bruenu fiki ọbẹwẹ nọ ọ rrọ obei, ọ tẹ ta inọ oware nọ o be via na yọ oware nọ u kpomahọ akpọ na soso. Ẹme nọ a ta rono Matiu 24:3-14 gbe Olezi 37:9-11 ze u te su kpohọ uwuhrẹ Ebaibol ẹsikpobi.

13. (a) Okenọ ahwo a tẹ rrọ ọkora fiki eyaa ifofe, ẹvẹ ma sae rọ rehọ Ebaibol na fi obọ họ kẹ ae? (b) Ahwo a te roro nọ ọbẹwẹ yọ imuẹro inọ Ọghẹnẹ ọ rrọ họ, ẹvẹ whọ sae rọ daoma lele ai jiroro?

¹³ Nọ ahwo a tẹ ruẹ uye ikpe buobu no hayo nọ a tẹ rrọ ọkora fiki eyaa ifofe, a sae jọ wọhọ emọ Izrẹl nọ e jọ Ijipti nọ e gaviezọ họ “fiki edada oma rai.” (Ọnyano 6:9) O tẹ via ere, o rẹ sae kẹ erere re a fodẹ idhere nọ Ebaibol na e sai ro fi obọ họ kẹ ai thihakọ ebẹbẹ itieye na ziezi, jẹ whaha ẹta nọ ọ be raha izuazọ ahwo buobu na. (1 Timoti 4:8b) Ejọ e rẹ sai rri ọbẹwẹ nọ a rrọ na wọhọ imuẹro inọ Ọghẹnẹ ọ rrọ họ hayo inọ ọ be daezọ rai hi. Whọ rẹ sae rehọ eria ikereakere jọ nọ i fo ro fi obọ họ kẹ ae vuhumu nnọ Ọghẹnẹ ọ kẹ obufihọ no rekọ ibuobu e re jẹe rehọ họ.—Aizaya 48:17, 18.

Oke Okpofou gbe nọ Etọ I te Nuhu

14, 15. Okenọ okpẹtu jọ o fi idudu họ ahwo buobu oma, ẹvẹ Isẹri Jihova a ro dhesẹ ọdawẹ rai?

¹⁴ Okpẹtu ọ sae roma via fiki okpofou, otọ nọ u nuhu, erae, hayo ebọmbo nọ e sa. Ahwo kpobi a sae jọ uweri. Eme a rẹ sai ru rọ sasa enọ e rrọ uzuazọ na oma?

¹⁵ U fo re ahwo a riẹ nọ ohwo jọ ọ be daezọ. Nọ ozighi ọkparesuọ ọ via no evaọ orẹwho jọ, idudu e ruọ ahwo buobu oma. Ahwo a whu ku ejọ buobu, enọ e be ko uviuwou rai a whu, egbẹnyusu i whu, ekọ hayo ufuoma nọ a roro nọ a wo kpobi i vru. Isẹri Jihova a tẹ dhogbo bru enọ e rrọ ewho rai, bi weri kẹ ai fiki eware nọ i vru mi ai gbe ahwo nọ a whu jẹ kẹ ae eme omosasọ no Ebaibol ze. Ọdawẹ nọ a dhesẹ ọ da ibuobu ẹro fia.

16. Okenọ okpẹtu ọ via evaọ abọjọ El Salvador, fikieme usiuwoma ota ọ Isẹri nọ e rrọ ẹwho na u ro w’iruo gaga?

¹⁶ Evaọ El Salvador, otọ ogaga nọ u nuhu evaọ 2001 o lẹliẹ ẹkpẹ hwẹ ruru ahwo buobu kpe. Ọmọzae ikpe 25 ọrọ Osẹri jọ avọ inievo ivẹ erọ ọmọtẹ nọ ọmọzae na ọ gwọlọ rọo a whu. Oni ọmoha na gbe ọmọtẹ nọ ọmọzae na ọ gwọlọ rọo na, a tẹ tọlọ ẹkpa kpohọ usiuwoma ota vẹrẹ vẹrẹ. Ahwo buobu a ta kẹ ae inọ Ọghẹnẹ họ ọnọ o kpe enọ i whu na hayo inọ oyena yọ oreva Ọghẹnẹ. Isẹri na a te se eme ọ Itẹ 10:22 ro dhesẹ nọ Ọghẹnẹ ọ gwọlọ re ma wo edada ha. A te se Ahwo Rom 5:12 ro dhesẹ nọ uzioraha ohwo-akpọ o wha uwhu ze, orọnikọ fikinọ o rrọ oreva Ọghẹnẹ hẹ. A te je dhesẹ ovuẹ omosasọ nọ o rrọ Olezi 34:18; 37:29; Aizaya 25:8; gbe Eviavia 21:3, 4. Ahwo a gaviezọ ziezi, maero nọ o rọnọ ahwo a whu ku eyae ivẹ nana re evaọ okpẹtu na, a te mu iwuhrẹ Ebaibol buobu họ.

17. Evaọ oke okpẹtu, didi obufihọ ma rẹ sae kẹ?

¹⁷ Okenọ okpẹtu ọ tẹ via, whọ rẹ sae nyaku ohwo nọ ọ gwọlọ obufihọ ugboma. Onana o sae gwọlọ nọ who re se edọkita, fi obọ họ wọ ohwo na kpohọ ẹsipito, hayo daoma re whọ kẹ ohwo na emu gbe oria nọ ọ rẹ rria. Evaọ 1998 nọ okpẹtu jọ ọ via evaọ Itali, ọniyẹrẹ jọ o muẹrohọ nọ Isẹri Jihova “a bi ghine fi obọ họ, dhogbo bru enọ e be ruẹ uye, ababọ ẹnọ kpahe egagọ nọ a rrọ.” Evaọ eria jọ, eware nọ a ruẹaro rai kẹ edẹ urere na e be wha uye-oruẹ ulogbo gaga ze. Evaọ eria yena, Isẹri Jihova a bi dhesẹ eruẹaruẹ Ebaibol na via, jẹ be rọ imuẹro Ebaibol na sasa ahwo oma inọ Uvie Ọghẹnẹ o te wha uvi omofọwẹ se ahwo-akpọ.—Itẹ 1:33; Maeka 4:4.

Okenọ Ohwo Uviuwou O te Whu

18-20. Okenọ ohwo uviuwou jọ o te whu, eme whọ rẹ sae ta hayo ru rọ kẹ omosasọ?

¹⁸ Kẹdẹ kẹdẹ ima ahwo buobu a bi weri fiki uwhu ohwo nọ a you. Whọ rẹ sae nyaku enọ i bi weri evaọ okenọ whọ rrọ odibọgba Oleleikristi hayo okenọ who te bi ru oware ofa jọ gheghe. Eme whọ rẹ sae ta hayo ru rọ kẹ omosasọ?

¹⁹ Kọ ohwo na ọ rrọ ọkora? Kọ imoni nọ i bi weri a vọ uwou na? Whọ sai wo eme buobu nọ whọ rẹ ta, rekọ o gwọlọ areghẹ. (Ọtausiwoma Na 3:1, 7) Ẹsejọ oware nọ o rẹ sai fo họ who re dhesẹ nọ oware nọ o via na o d’owhẹ, nya siọ obe Ebaibol nọ u fo ba ke ae (ibroshọ, emagazini, hayo omobe-ovẹvẹ), whọ vẹ wariẹ zihe nọ edẹ jọ e tẹ ruọ emu no re whọ ruẹ sọ whọ sai fi obọ ofa họ. Eva oke nọ u fo, rehọ eme uduotahawọ jọ no Ebaibol na ze rọ jiroro kugbe ai. Onana o sae lẹliẹ udu kie ohwo na vi. (Itẹ 16:24; 25:11) Whọ sae kpare ọnọ o whu na ha, wọhọ epanọ Jesu o ru. Rekọ whọ rẹ sae ta ẹme nọ Ebaibol na e ta kpahe uyero iwhuowhu na, dede na onana o sae jọ okenọ who re ro si ikẹ kpahe eriwo ethọthọ họ. (Olezi 146:4; Ọtausiwoma Na 9:5, 10; Izikiẹl 18:4) Wha rẹ sai se eyaa Ebaibol na kpahe ẹkparomatha kugbe. (Jọn 5:28, 29; Iruẹru 24:15) Whọ rẹ sae ta oware nọ enana i dhesẹ, ẹsejọ avọ okerefihotọ Ebaibol jọ nọ o ta kpahe ẹkparomatha. (Luk 8:49-56; Jọn 11:39-44) Je si iroro kpoho ekwakwa Ọghẹnẹ oyoyou na, ọnọ ọ k’omai ẹruore otiọye na. (Job 14:14, 15; Jọn 3:16) Dhesẹ epanọ iwuhrẹ nana e rọ k’owhẹ erere no gbe oware nọ who ro fi eva họ ae.

²⁰ Uzizie kpohọ Ọgwa Uvie o sai fi obọ họ kẹ ọnọ o bi weri na riẹ ahwo nọ a ghine you erivẹ rai gbe enọ e riẹ epanọ a rẹ bọ ohwohwo ga. Aye jọ evaọ obọ Sweden ọ ruẹ nọ oware nọ ọ be gwọlọ evaọ uzuazọ riẹ kpobi ona.—Jọn 13:35; 1 Ahwo Tẹsalonika 5:11.

21, 22. (a) Eme o gwọlọ mi omai nọ ma tẹ gwọlọ kẹ omosasọ? (b) Ẹvẹ whọ sae rọ kẹ ohwo nọ ọ riẹ Ikereakere na ziezi omosasọ?

²¹ Whọ tẹ riẹ nọ ohwo jọ ọ rrọ uweri, makọ evaọ ukoko Ileleikristi na hayo obọ otafe, kọ who re brudu ẹme nọ whọ rẹ ta hayo oware nọ who re ru? Otofa ubiẹme Griki nọ a fa “omosasọ” evaọ Ebaibol na họ “ese ziọ akotọ ohwo.” Re whọ jọ ohwo nọ ọ rẹ kẹ uvi omosasọ, whọ rẹ jọ kugbe ahwo nọ a rrọ uweri na.—Itẹ 17:17.

²² Kọ ẹvẹ otẹrọnọ ohwo nọ whọ gwọlọ sasa oma na ọ riẹ oware nọ Ebaibol na e ta no kpahe uwhu, ẹtanigbo na, gbe ẹkparomatha? Re ogbẹnyusu nọ a gbe wo orọwọ ovona ọ jọ kugbe ohwo ọvo dede yọ oware omosasọ. Ọ tẹ gwọlọ t’ẹme, gaviezọ ziezi. Who roro nọ o gwọlọ re whọ ta eme ithethei jọ họ. Wha te se ikereakere, rehọ ae wọhọ eme nọ i no unu Ọghẹnẹ ze re e bọ owhai imava ga. Dhesẹ evaifihọ egaga nọ whai imava wha wo kpahe imuẹro eyaa Ebaibol na. Ẹkwoma edhesẹ via ọdawẹ Ọghẹnẹ gbe uzẹme oghaghae nọ o rrọ Ẹme Ọghẹnẹ nọ wha rẹ rọ ta ẹme kugbe, whọ rẹ sai fi obọ họ kẹ enọ i bi weri re a wo omosasọ gbe ẹgba mi “Ọghẹnẹ omosasọ” na, Jihova.—2 Ahwo Kọrint 1:3.

[Oruvẹ-obotọ]

Eme Họ Uyo Ra?

• Ono ahwo buobu a rẹ fo kẹ okpẹtu, kọ ẹvẹ ma sai ro fi obọ họ kẹ ae?

• Eme ma rẹ sai ru ro fi obọ họ kẹ amọfa wo erere vọvọ rono omosasọ nọ Ebaibol na e rẹ kẹ ze?

• Didi iyero e be wha uweri se ahwo buobu evaọ oria ra, kọ ẹvẹ whọ sae rọ sasa ae oma?

[Iwoho nọ e rrọ ẹwẹ-obe avọ 29]

Ẹghale ovuẹ uvi omosasọ evaọ oke ẹbẹbẹ

[Ọnọ o wo uwoho]

Evuẹ enọ e dhẹ n’ẹwho: UN PHOTO 186811/J. Isaac

[Uwoho nọ o rrọ ẹwẹ-obe avọ 30]

Re ogbẹnyusu ọ jọ kugbe ohwo o rẹ kẹ omosasọ