Ekielele Ẹwo Evaọ Akpọ Evega
‘A gwọlọ uyoyou-ẹwo no obọ ohwo ze.’—ITẸ 19:22.
1. Fikieme o sae rọ jọ bẹbẹ re a dhesẹ ẹwo?
KỌ WHO rri oma ra wọhọ ohwo nọ o re wowou? O tẹ rrọ ere, kiyọ o rẹ sae jọ use-abọ k’owhẹ re whọ rria akpọ inẹnẹ. Uzẹme, a jọ Ebaibol dhesẹ ẹwo wọhọ abọjọ ‘ubi ẹzi na,’ rekọ fikieme o jẹ rrọ bẹbẹ gaga re a sai dhesẹ ẹwo makọ evaọ erẹwho nọ a bi se wọhọ ekwotọ Ileleikristi? (Ahwo Galesha 5:22) Wọhọ epanọ ma ruẹ evaọ uzoẹme nọ o vrẹ na, a rẹ sae jọ oware nọ Jọn ukọ na o kere duku abọjọ uyo na—akpọ na soso ọ rrọ obọ omama ẹzi nọ ọ kare ẹwo, Setan, Ukumuomu na. (1 Jọn 5:19) Jesu Kristi o dhesẹ Setan wọhọ ‘osu akpọ na.’ (Jọn 14:30) Fikiere, akpọ na o tho osu ọkparesuọ riẹ, ọnọ emuemu ọvo ọ rrọ uruemu riẹ.—Ahwo Ẹfẹsọs 2:2.
2. Use-abọ vẹ ma rẹ sae rẹriẹ ovao dhe nọ ma tẹ gwọlọ dhesẹ ẹwo?
2 U re kpomahọ uzuazọ mai yoyoma nọ amọfa a gbẹ be rehọ ẹwo lele omai yeri hi. Erivẹ nọ i wo eva iyoma, erara nọ i wo oma ogbẹnyusu hu, te makọ egbẹrioma gbe ahwo uviuwou nọ i re ru eware nọ e kare iroro ẹsejọ, a rẹ sai dhesẹ uruemu evega utioye. Ọyawọ nọ o re noi ze nọ ohwo ọ tẹ be rẹriẹ ovao dhe amọfa nọ a riẹ uruemu ezi hi, nọ a rẹ va n’otọ ze jẹ la omoma rai eka, o rẹ kẹ idhọvẹ gaga. Ababọ ẹwo nọ amọfa a re dhesẹ o rẹ sai ru omai gwọlọ geva, yọ ma rẹ sae gwọlọ rehọ evega ro ru ai kele. Oyena o rẹ sai tube su kpohọ ebẹbẹ abọ-ẹzi gbe ẹyao dede.—Ahwo Rom 12:17.
3. Ebẹbẹ ilogbo vẹ ahwo a be rẹriẹ ovao dhe nọ e rrọ ẹdawọ kẹ unevaze nọ a re ro dhesẹ ẹwo?
3 Eware idhọvẹ nọ e rrọ akpọ via e rẹ sai je ru ei bẹbẹ k’omai re ma dhesẹ ẹwo. Wọhọ oriruo, ahwo-akpọ kpobi a bi wo idhọvẹ kẹdẹ kẹdẹ fiki iguegue gbe iruẹru ozighi ọkparesuọ, jegbe awaọruọ inọ ẹsejọhọ itu erẹwho sa-sa a te rehọ ekwakwa-ẹmo nọ a rẹ rọ vaha emerao-ẹyao hayo ekwakwa-ẹmo ọraha-muotọ rọ họre ẹdẹjọ. Fibae, uvuhu u bi kpe ima ahwo buobu, a be rọ akọ kp’ena re a tẹ ruẹ oware nọ a rẹ re, be roma da iwou, be ya re a tẹ ruẹ oware nọ a re ro zuo oma rai gbe umutho ẹruọsa abọ-imu, re a ruẹsi te odẹ. Re a le ẹwo o tẹ rrọ use-abọ evaọ otọ uyero nọ o kare ẹruore.—Ọtausiwoma Na 7:7.
4. Eriwo ọthọthọ vẹ ahwo jọ a rẹ sai wo nọ a te roro kpahe ẹwo nọ a re dhesẹ kẹ amọfa?
4 Ohwo ọ rẹ sai ku ei họ inọ ẹwo ọ rrọ oware nọ a re le vievie he gbe inọ o tubẹ rrọ oka oyẹlẹ dede. Ọ sai tube roro nọ ahwo a be whae re maero okenọ amọfa a te bi lele iei yeri ababọ ororokẹ. (Olezi 73:2-9) Dede na, Ebaibol na e kẹ omai emamọ ọkpọvio nọ e ta nọ: “Uyo olọlọhọ o rẹ whaha ofu, rekọ ẹme ọgaga ọ rẹ rariẹ ofu.” (Itẹ 15:1) Ẹwolẹ gbe ẹwo yọ ekwakwa ivẹ nọ e rrọ abọjọ ubi ẹzi na, e kẹle ohwohwo gaga yọ i re fi obọ họ ziezi nọ ohwo ọ tẹ rẹriẹ ovao dhe iyero use-abọ.
5. Abọjọ uzuazọ uyero vẹ o jọ gwọlọ ẹwo odhesẹ?
5 Nọ edhesẹ ubi ẹzi na u wuzou gaga kẹ omai wọhọ Ileleikristi na, u fo re ma roro kpahe epanọ ma sai ro dhesẹ ubi ẹzi na jọ—ẹwo. Kọ o lọhọ re a kie lele ẹwo evaọ akpọ evega? O tẹ rrọ ere, idhere jọ vẹ ma sae rọ kẹ imuẹro inọ ma be kẹ Setan uvẹ re o ru omai si obọ kpẹre evaọ ẹwo odhesẹ hẹ, maero nọ ma tẹ rrọ otọ ọyawọ? Joma roro kpahe epanọ ma re ro le ẹwo evaọ uviuwou, oria iruo, obọ isukulu, eyerikugbe erivẹ mai, odibọgba mai, gbe evaọ usu ibe enọ e rọwo.
Ẹwo Odhesẹ Evaọ Uviuwou
6. Fikieme ẹwo nọ a re dhesẹ evaọ uviuwou u je wuzou te ere, kọ ẹvẹ a sai ro dhesẹ iẹe?
6 Re ma sai wo eghale gbe ọkpọvio Jihova, ubi ẹzi na u wuzou gaga yọ o gwọlọ nọ ma re dhesẹ iẹe vọvọ. (Ahwo Ẹfẹsọs 4:32) Joma tẹrovi epanọ u wuzou te re ahwo uviuwou a dhesẹ ẹwo kẹ ohwohwo. Evaọ iruẹru ikẹdẹ kẹdẹ, u re fo re ọzae-avọ-aye uwou orọo a dhesẹ ẹwo gbe ẹzi ẹruorote kẹ ohwohwo jẹ rọkẹ emọ rai. (Ahwo Ẹfẹsọs 5:28-33; 6:1, 2) O gwọlọ nọ ẹwo otiọye na o re dhesẹ oma via evaọ oghẹrẹ nọ ahwo uviuwou na a rẹ kpahe ẹme kẹ ohwohwo, oghẹrẹ nọ emọ na a rẹ rọ rehọ ọghọ gbe adhẹẹ kẹ ọsẹgboni rai gbe oghẹrẹ nọ ọsẹgboni a rẹ rọ rẹro te emọ rai ziezi. O hae vẹrẹ owhẹ obọ re who jiri, yọ whọ kaki brukpe he.
7, 8. (a) Oghẹrẹ uruemu vẹ ma rẹ whaha nọ ma tẹ gwọlọ dhesẹ uvi ẹwo evaọ uviuwou? (b) Oghẹrẹ vẹ emamọ ẹmeọta-kugbe ọ sae rọ zọhọ fihọ ọgbakugbe uviuwou nọ o rrọ gaga? (c) Oghẹrẹ vẹ whọ sai ro dhesẹ ẹwo evaọ uviuwou ra?
7 Re ma jọ wowou kẹ ahwo uviuwou mai o gwọlọ nọ ma re fi ohrẹ Pọl ukọ na họ iruo, onọ o ta nọ: “Wha si eware nana kpobi no unu rai no: evaedha, ofu, egrẹojẹ, ẹwhọ gbe eme igbegbe eta.” Kẹdẹ kẹdẹ, u fo re uviuwou Ileleikristi a hae ta ẹme kugbe ohwohwo avọ adhẹẹ. Fikieme? Fikinọ emamọ ẹmeọta-kugbe họ ugogo oware nọ u re kru iviuwou ga, je ru ai jọ sasasa. Nọ avro ọ tẹ rọma via, ukpenọ whọ rẹ gwọlọ jọ ohwo nọ ọ riase, daoma ru ẹbẹbẹ na kpotọ re ẹwhọ na ọ ruẹsi kuhọ. Ahwo uviuwou evawere a rẹ daoma gaga wha ẹwo gbe ororokẹ haro evaọ eyerikugbe ohwohwo.—Ahwo Kọlọsi 3:8, 12-14.
8 Ẹwo ọ rẹ tẹrovi abọ ewoma ọvo yọ o rẹ wọ omai gwọlọ ru ewoma kẹ amọfa. Fikiere, ma rẹ jọ ahwo nọ a re ru iruo, dhesẹ ororokẹ, je fi obọ họ evaọ edhere nọ u re kiehọ ahwo uviuwou na nọ i kiọkọ oma. O gwọlọ omodawọ omomọvo gbe orọ ahwo uviuwou na kpobi re a sai dhesẹ oghẹrẹ ẹwo nọ u re ru amọfa jiri uviuwou na. Oware nọ u re noi ze họ, orọnikọ eghale Jihova ọvo a ti wo ho rekọ a vẹ te rehọ ere kẹ Jihova nọ ọ rrọ Ọghẹnẹ ẹwo na adhẹẹ evaọ ukoko na gbe evaọ okegbe rai.—1 Pita 2:12.
Ẹwo Odhesẹ Evaọ Oria Iruo
9, 10. Dhesẹ ebẹbẹ jọ nọ e rẹ sae roma via evaọ oria iruo, re whọ jẹ fodẹ epanọ a sae rọ rehọ edhere ẹwo ku ai họ.
9 Rọkẹ Oleleikristi, o rẹ sae jọ use-abọ re a dhesẹ ẹwo kẹ ibe iruiruo kẹdẹ kẹdẹ evaọ oria iruo. Oma-uhrowo nọ o rẹ jọ udevie iruiruo o rẹ sae whae ze nọ ibe oriruo jọ ọ rẹ rọ rehọ iruẹru ẹghẹ gbe eviẹhọ riẹ fi iruo ohwo fihọ ọza, onọ o rẹ raha emamọ odẹ nọ ohwo o wo evaọ aro ọga iruo na. (Ọtausiwoma Na 4:4) O lọhọ họ re a dhesẹ ẹwo evaọ otọ iyero itieye na. Dede na, ma tẹ kareghẹhọ inọ oware uwowou nọ ohwo o re ru họ onọ o mai kiehọ, odibo Jihova ọ rẹ daoma te epanọ o rẹ lọhọ te kpobi re ọ ruẹse dẹ ahwo nọ a wo eva ezi hi t’obọ. Ẹzi ọdawẹ nọ a re dhesẹ o rẹ sai fi obọ họ evaọ abọ nana. Ẹsejọhọ whọ sai dhesẹ ọdawẹ otẹrọnọ ibe oruiruo na hayo ohwo uviuwou riẹ jọ o kie ruọ ẹyao. Makọ ẹnọ ọvo dede nọ a rẹ nọ ohwo kpahe oma riẹ hayo ohwo uviuwou riẹ o rẹ sai duobọte ohwo udu nọ o je nwene. Uzẹme, u fo re Ileleikristi a daoma wha udhedhẹ gbe ọrọwokugbe h’aro otẹrọnọ u te owhẹ te eruo. Ẹsejọ ẹme owowou nọ o dhesẹ ọdawẹ ọ rẹ sai fi obọ họ evaọ uyero na.
10 Eva ẹsejọ, ọga iruo ọ rẹ sae gba eriwo riẹ họ ahwo nọ ọ rehọ iruo, yọ ọ rẹ sae gwọlọ nọ ohwo kpobi o wabọ evaọ ehaa orẹwho hayo ehaa jọ nọ e rọwo kugbe Ikereakere na ha. Nọ obroziẹ-iroro Oleleikristi ọ gbẹ kẹe uvẹ wobọ họ, onana o rẹ sai su kpohọ ẹbẹbẹ nọ o re wo kugbe ọga iruo riẹ. Eva oke utioye na, ẹsejọhọ o rẹ sai fo ho re a ta eme thethei kpahe epanọ o rọ thọ re a ru lele ẹgwọlọ ọga iruo na. Rọkẹ ahwo nọ a wo orọwọ Ileleikristi mai hi, oware nọ a bi ru na o rẹ sai kiehọ evaọ aro rai. (1 Pita 2:21-23) Otiẹsejọ whọ sae rọ edhere ẹwo vuẹ ọga na kpahe oware nọ whọ te sae rọ jariẹ hẹ. Whọ kpahe eme egaga rọ za eme egaga nọ a ta kẹ owhẹ zihe he. U woma re Oleleikristi ọ nya lele ohrẹ nọ o rrọ Ahwo Rom 12:18 na inọ: “Otẹ make bẹ, epa umutho nọ orọ owhai oma na, wha rehọ iẹe lele ahwo kpobi ria dhedhẹ.”
Ẹwo Odhesẹ Evaọ obọ Isukulu
11. Use-abọ vẹ izoge a rẹriẹ ovao dhe evaọ ẹwo nọ a re dhesẹ kẹ ibe emọ-isukulu?
11 O rẹ sae jọ use-abọ ulogbo kẹ izoge na re a dhesẹ ẹwo kẹ ibe emọ-isukulu. Ẹsibuobu izoge a rẹ gwọlọ nọ ibe emọ-eklase rai a riẹ ai odẹ. Emezae jọ a re dhuaro ro dhesẹ kẹ ibe emọ-isukulu rai inọ a re gaga, onana o rẹ tubẹ ga te epanọ a re ro gb’oja kẹ emọ efa evaọ isukulu. (Matiu 20:25) Izoge efa a rẹ gwọlọ rehọ epanọ a riẹ obe te, epanọ a rẹ daoma te evaọ erozaha isukulu gbe eware efa ro dhesẹ oma. Evaọ oma-udhesẹ rai na, ẹsibuobu a rẹ rehọ ababọ uwowou hayo oheri yeri kugbe ibe emọ-eklase gbe ibe emọ-isukulu efa, bi roro thọthọ inọ enẹ a te rọ dẹ orro kẹ oma rai. Uzoge Oleleikristi ọ rẹ yọrọ oma re ọ siọ aro ba ero kele izoge enana. (Matiu 20:26, 27) Pọl ukọ na ọ ta nọ “uyoyou u re wo odiri krẹkri, avọ ọriẹruo,” gbe inọ ‘u wo eha-ise he.’ Fikiere, o gba Oleleikristi họ re ọ nya lele ohrẹ Ikereakere na evaọ eyerikugbe ibe emọ-isukulu riẹ ukpenọ ọ rẹ raro kele ekpere oriruo ahwo nọ a re dhesẹ uruemu nọ o kare ẹwo.—1 Ahwo Kọrint 13:4.
12. (a) Fikieme o sae rọ jọ use-abọ kẹ izoge na re a dhesẹ ẹwo kẹ iwuhrẹ rai? (b) Ono izoge na a sai rri bru kẹ obufihọ nọ a tẹ rrọ otọ otunyẹ nọ a re ro dhesẹ iruemu nọ e kare ẹwo?
12 U fo re izoge a rehọ ẹwo yeri kugbe iwuhrẹ rai re. O rẹ were emọ-isukulu buobu re a kpọ iwuhrẹ rai eva. A re roro nọ ae a mae riẹ nọ a tẹ be thọ izi isukulu ro dhesẹ orivo kẹ iwuhrẹ rai. A rẹ sai ru amọfa ku oma gbe ai ẹkwoma ozọ nọ a re ru mu ai. Nọ uzoge Oleleikristi ọ gbẹ rọwo ku oma gbe ai hi, a rẹ sae lae eka hayo kpọe eva dede. Re Oleleikristi ọ jọ otọ iyero yena evaọ etoke soso isukulu riẹ o rẹ sai fi ọtamuo nọ ọ gwọlọ ro dhesẹ ẹwo fihọ ẹdawọ. Dede na, kareghẹhọ epanọ u wuzou te re a jọ odibo omaurokpotọ Jihova. Jọ u mu owhẹ ẹro inọ ọ te rehọ ẹkwoma ẹzi riẹ thọ owhẹ uke evaọ etoke ebẹbẹ nana.—Olezi 37:28.
Ẹwo Odhesẹ kẹ Erivẹ
13-15. Eme ọ rẹ sai ru ei jọ bẹbẹ kẹ ohwo re o dhesẹ ẹwo kẹ erivẹ riẹ, kọ ẹvẹ a sai ro fi use-abọ enana kparobọ?
13 O make rọnọ whẹ ọvo whọ be rria ighẹ, whọ rrọ ighẹ ilogbo kugbe amọfa, hayo oria ofa kpobi nọ whọ rrọ, whọ sai roro kpahe idhere nọ who re ro dhesẹ ẹwo gbe ọdawẹ ro fi obọ họ kẹ erivẹ ra. Onana o rẹ sae jọ oware olọlọhọ ẹsikpobi gbe he.
14 Kọ otẹrọnọ erivẹ nọ e be rria unuẹthẹ nọ o kẹle owhẹ a be gbẹroma k’owhẹ fiki uyẹ ra, orẹwho ra, hayo egagọ nọ whọ rrọ? Kọ ẹvẹ otẹrọnọ a re dhesẹ evega ẹsejọ hayo nọ a gbe bi se owhẹ gbe ohwo ho? Wọhọ odibo Jihova, ẹwo nọ who re dhesẹ te epanọ o rẹ lọhọ te kpobi u ti fi obọ họ. A te ruẹ nọ who wo ohẹriẹ wọhọ ohwo nọ ọ rẹ whẹtiẹ oghẹrẹ ahwo kpobi h’oma, onọ o te ghinẹ wha ujiro se Jihova—ọnọ ọ kobaro evaọ ẹwo odhesẹ na. Whọ riẹ hẹ, ẹdẹjọ ọrivẹ na ọ sai nwene uruemu fiki ẹwo nọ who bi dhesẹ kẹe. Ọ sai tube zihe ruọ ọnọ ọ rẹ gọ Jihova dede.—1 Pita 2:12.
15 Oghẹrẹ vẹ a sai ro dhesẹ ẹwo kẹ erivẹ? Oghẹrẹ jọ họ ẹkwoma emamọ uruemu ahwo uviuwou nọ aikpobi a bi dhesẹ ubi ẹzi na. Eva ẹsejọ whọ sai ru oware uwoma jọ kẹ ọrivẹ ra. Kareghẹhọ inọ ẹwo họ obọdẹ isiuru nọ who re wo kpahe ewoma amọfa.—1 Pita 3:8-12.
Ẹwo Odhesẹ Evaọ Odibọgba Mai
16, 17. (a) Fikieme ẹwo nọ a re dhesẹ u ro wuzou evaọ odibọgba mai? (b) Oghẹrẹ vẹ a sai ro dhesẹ ẹwo evaọ abọ sa-sa ọrọ iruo odibọgba na?
16 U fo re ẹwo o dhesẹ oma via evaọ odibọgba Oleleikristi mai nọ ma be daoma gaga re ma nya te ahwo oma evaọ iwou rai, eria okọ rai, gbe evaọ ẹgbede na. U fo re ma kareghẹhọ nọ ma dikihẹ kẹ Jihova, ọnọ o wo uyoyou nọ o rẹ rẹriẹ hẹ.—Ọnyano 34:6.
17 U te no omodawọ nọ who re ro dhesẹ ẹwo evaọ odibọgba ra no, eme ọfa o gbẹ gwọlọ? Wọhọ oriruo, nọ whọ tẹ rrọ usiuwoma ota iyẹrẹ, whọ sai dhesẹ ẹwo ẹkwoma ẹme ra nọ who re ru kpẹkpẹe avọ ororokẹ nọ who te bi lele ohwo t’ẹme. Ahwo a re zurie gaga evaọ edhere owọ-otọ, fikiere whọ rẹ yọrọ oma re whọ se edhere ba edi. Ofariẹ, nọ whọ tẹ rrọ usiuwoma evaọ ẹkwotọ nọ a rẹ jọ thueki, dhesẹ ẹwo ẹkwoma ẹme ra nọ who re ru kpẹkpẹe, kareghẹhọ inọ ehreki i re bru ahwo na ze kẹ eware edẹ.
18. Abọ vẹ orimuo nọ a re dhesẹ o wo evaọ odibọgba mai?
18 Evaọ odibọgba nuwou ruọ uwou na, dhesẹ orimuo. Whọ rria kri hrọ họ nọ ohwo o te zizie owhẹ rueva uwou hayo eva unuẹthẹ, maero nọ ovao ehru na u gbe kiehọ họ. Kọ whọ sae riẹ nọ iweze ra e tẹ bẹ ohwo no, ọ gbẹ make rọ unu tae he? Ẹsejọhọ evaọ unuakpọ rai, Isẹri Jihova i re weze bru ahwo kpekpekpe gaga. O tẹ rrọ ere, dhesẹ ororokẹ, jọ wowou jẹ jọ whẹtiẹ whẹtiẹ. (Itẹ 17:14) Daoma wo ovuhumuo oware nọ ohwo nọ o wo uwou ọ gbẹ rọ gwọlọ gaviezọ ẹdẹ yena ha. Kareghẹhọ inọ ẹsejọhọ oniọvo Oleleikristi ra jọ ọ sai weze kpohọ uwou yena oke ofa kẹle. Whọ tẹ nyaku ohwo ọgeva, daoma gaga re who dhesẹ ẹwo. Whọ kpare urru wha hayo si ovao họ họ, rekọ kpahe ẹme wowolẹ. Oleleikristi nọ o re wowou ọ rẹ gwọlọ rehọ eme ẹwhọ ru eva dha ohwo nọ o wo uwou ho. (Matiu 10:11-14) Otiẹsejọ ohwo ọyena ọ te kezọ kẹ emamọ usi na evaọ ẹdẹ ọfa.
Ẹwo Odhesẹ Evaọ Iwuhrẹ Ukoko
19, 20. Fikieme a rọ gwọlọ ẹwo evaọ ukoko na, kọ ẹvẹ a sai ro dhesẹ iẹe?
19 U wuzou re ma dhesẹ ẹwo kẹ ibe enọ e rọwo re. (Ahwo Hibru 13:1) Nọ ma rrọ okugbe-inievo akpọ-soso na, o roja re ma rehọ ẹwo lele ohwohwo yeri.
20 Otẹrọnọ ikoko ivẹ, esa, hayo bu viere a be jọ Ọgwa Uvie ọvo ru iwuhrẹ, o roja re a rehọ ẹwo yeri kugbe ahwo ikoko edekọ nọ a gbẹ rrọ Ọgwa Uvie ọvona ru iwuhrẹ na, avọ adhẹẹ nọ a re ro lele ai yeri. Oma-uhrowo o rẹ wha ọrọwokugbe ze he nọ a tẹ gwọlọ ruẹrẹ oke iwuhrẹ fihọ gbe okenọ a tẹ gwọlọ ru eware jọ nọ i wuzou wọhọ ẹfuọ hayo aruẹrẹ. Daoma dhesẹ ẹwo avọ ororokẹ dede nọ ahwo a rẹ sai wo ọvuọvo eriwo riẹ ẹsejọ. Oghẹrẹ utiona ẹwo ọ te rọ kparobọ, yọ Jihova ọ te ghinẹ ghale isiuru nọ who bi dhesẹ kpahe ewoma amọfa.
Ruabọhọ Ẹwo Odhesẹ
21, 22. Rọwo kugbe Ahwo Kọlọsi 3:12, eme ọ rẹ jọ ọtamuo mai?
21 Ẹwo yọ okwakwa nọ o kẹre gaga te epanọ u re ro kpomahọ kabọ kabọ uzuazọ mai. Fikiere, u fo re ma ru ei fihọ abọ ologbo uruemu mai wọhọ Oleleikristi. U fo re ẹwo nọ ma re dhesẹ kẹ amọfa o jọ ẹkoma uruemu mai.
22 Ajọ mai kpobi ma jọ wowou kẹ amọfa kẹdẹ kẹdẹ, re mai omomọvo ma rehọ ere fi eme Pọl ukọ na h’iruo, nọ ọ ta nọ: “Epanọ wha rọ enọ Ọghẹnẹ ọ sanọ, wha whẹ ọrẹri gbe eyowo họ oma, eva ehrọ, ọriẹruo, iroro idhedhẹ iwo, oma-urokpotọ, odiri.”—Ahwo Kọlọsi 3:12.
Kọ Whọ Kareghẹhọ?
• Eme o re ru nọ o jẹ jọ bẹbẹ kẹ Oleleikristi re o dhesẹ ẹwo?
• Fikieme u je wuzou re ohwo o dhesẹ ẹwo evaọ uviuwou riẹ?
• Eware jọ vẹ i ru rie fihọ use-abọ re a dhesẹ ẹwo eva obọ isukulu, oria iruo, gbe rọkẹ erivẹ?
• Dhesẹ epanọ Ileleikristi a sai ro dhesẹ ẹwo evaọ iruo odibọgba ẹgbede rai.
[Uwoho nọ o rrọ ẹwẹ-obe avọ 11]
Ẹwo nọ ahwo uviuwou na kpobi a re dhesẹ o rẹ wha ọrọwokugbe haro
[Uwoho nọ o rrọ ẹwẹ-obe avọ 12]
Whọ sai dhesẹ ẹwo okenọ ẹyao o te kie ibe oruiruo hayo ohwo uviuwou riẹ
[Uwoho nọ o rrọ ẹwẹ-obe avọ 13]
Jihova ọ rẹ rehọ uketha kẹ ahwo nọ a rehọ omaurokpotọ dhesẹ ẹwo ghelọ ẹkoko
[Uwoho nọ o rrọ ẹwẹ-obe avọ 14]
Obọ nọ a re fihọ kẹ ọrivẹ nọ ọ rrọ ọbẹwẹ yọ edhesẹ ẹwo