Egọmeti Uvie Ọghẹnẹ O Bi Su Nẹnẹ

“Ẹvẹ erẹwho nana kpobi, avọ iruemu sa-sa gbe oghẹrẹ sa-sa nọ a rovie aro te no, a sae rọ rọwo kugbe? A ta riẹ no inọ ohọre nọ u no okogho-akpọ ọfa ze ọvo o rẹ sai ku ahwo-akpọ gbe.”—The Age, obe-usi orọ Australia.

OHỌRE nọ u re no okogho-akpọ ọfa ze? Sọ oyena u ti ku erẹwho otọakpọ na kpobi kugbe hayo u ti ru ere he, eruẹaruẹ Ebaibol e ta kpahe ozighi jọ nọ ọ be tha nọ o ti si erẹwho akpọ na kpobi uzou koko. Yọ emama obọ odhiwu e te wha ozighi nana ze.

Evaọ eruẹaruẹ, Devidi Ovie Izrẹl anwae ọ ta kpahe oware nana nọ o te jọ akpọ-soso via na. Evaọ otọ ẹzi Ọghẹnẹ, o kere nọ: “Ivie akpọ na i mugba, isu na e tẹ jẹ jiroro kugbe; kpahe Ọnowo jẹ kpahe ọ riẹ nọ a wholo na, anọ, ‘Jo ma vaha itu rai; re ma yẹ ifi rai kufiẹ no oma mai.’ ” (Olezi 2:2, 3; Iruẹru 4:25, 26) Muẹrohọ inọ isu akpọ na a ti si uzou koko wọhọ omọvo wọso Jihova, Ọnọma ehrugbakpọ na, gbe ọnọ o wholo, hayo Ovie riẹ nọ o ro mu na, Jesu Kristi. Ẹvẹ oyena o te rọ via?

Wọhọ epanọ oke-ukele Ebaibol gbe eruẹaruẹ nọ i rugba no i dhesẹ, evaọ ukpe ọ 1914, a rehọ Uvie Ọghẹnẹ mu evaọ obọ odhiwu avọ Jesu Kristi wọhọ Ovie.a Eva oke oyena erẹwho akpọ na a wo oware ovo jọ họ iroro. Ukpenọ a rẹ rọ oma kẹ esuo Uvie Ọghẹnẹ nọ a ro mu obọ na, a te du oma họ ohọre ogaga uhrowo—Ẹmo Ologbo na, hayo Ẹmo Akpọ I.

Ẹvẹ Jihova Ọghẹnẹ o rri uruemu yena nọ isu ahwo-akpọ na i dhesẹ na? “Ọnọ ọ rọ eva odhiwu ria ọ rẹ te hwẹ; Ọnowo ọ rẹ te rehọ ae jehwẹ. Kẹsena ọ vẹ te jọ evedha riẹ ta ẹme kẹ ae; ọ vẹ te rehọ ofu ọwhawha riẹ guegue ai.” Kẹsena Jihova ọ vẹ te ta kẹ Ọmọ riẹ, Ovie nọ a wholo ọrọ Uvie na, inọ: “Yare omẹ, mẹ rẹ te rehọ erẹwho akpọ na kpobi kẹ re o jọ ukuoriọ [ra], gbe ọnyaba akpọ na kpobi [who] re ti woi. Whọ rẹ te rehọ ọkpọ utehru whọlọ ae, kpe ai ehehẹhẹ wọhọ ẹbẹ ọmebẹ.”—Olezi 2:4, 5, 8, 9.

Ọraha nọ ọ te rọ rehọ ọkpọ utehru whọlọ erẹwho ọwọsuọ nana riẹriẹriẹ na o te via eva Amagẹdọn. Obe urere Ebaibol na, Eviavia, u dhesẹ ohọre urere nana wọhọ “ẹmo ologbo Ọghẹnẹ Erumeru na,” ọnọ a bi koko “ivie akpọ na kpobi” ze. (Eviavia 16:14, 16) Evaọ otọ ekpakpọ idhivẹri, erẹwho otọakpọ na a ve ti koko uzou họ avọ ẹjiroro ọvo: re a họre Ọghẹnẹ Erumeru na.

Oke nọ ahwo-akpọ a ti ro si uzou koko re a họre esuo-okpehru Ọghẹnẹ o be tha kpata kpata. Wo ohẹriẹ no epanọ a roro, “okugbe” rai ọ te wha uvumọ erere ọvo se ai hi. Ukpoye, owojẹ rai o te jọ emuhọ ọrọ udhedhẹ rọkẹ ahwo-akpọ kpobi nọ ma bi rẹro riẹ anwẹdẹ na. Evaọ oghẹrẹ vẹ? Evaọ ohọre urere yena, Uvie Ọghẹnẹ o “rẹte whọlọ ivie [akpọ] na kpobi ọ vẹte rehọ ai ze oba, ọ vẹte jọ bẹdẹ.” (Daniẹl 2:44) Uvie Ọghẹnẹ họ egọmeti nọ o ti ru isiuru ahwo-akpọ rọkẹ udhedhẹ akpọ-soso gba, orọnikọ ukoko ohwo-akpọ jọ họ.

Ugogo Osu ọrọ Egọmeti Uvie Na

Uvie Ọghẹnẹ ahwo udu oruọzewọ buobu a be hae lẹ kẹ na, nọ a be ta nọ: “Uvie ra oze, epanọ a rọ obọ odhiwu ru orọ eva ra, ru re a jọ akpọ na ru ere re.” (Matiu 6:10) Ukpenọ o rẹ jọ uyero udu gheghe, Uvie Ọghẹnẹ yọ uzedhe egọmeti nọ o ru eware igbunu buobu via no anwẹnọ a rọ rehọ iẹe mu obọ odhiwu evaọ 1914. Joma kiẹ eware jọ riwi nọ i dhesẹ nọ Uvie Ọghẹnẹ o ghinẹ rrọ esuo nẹnẹ na.

Orọ ọsosuọ, u wo ogha isuẹsu nọ u bi ruiruo gidigba nọ Ovie nọ a ro mu no na, Jesu Kristi, o wo uzou riẹ. Evaọ 33 C.E., Jihova Ọghẹnẹ o ru Jesu Kristi họ Ọnowuzou ukoko Ileleikristi na. (Ahwo Ẹfẹsọs 1:22) No anwọ oke yena ze, Jesu o bi ruiruo riẹ wọhọ ọnowuzou, be rehọ ere dhesẹ ẹgba isuẹsu riẹ. Wọhọ oriruo, okenọ ohọwo u je mu gaga evaọ Judia evaọ ikpe-udhusoi ọsosuọ na, ukoko Ileleikristi na o j’owọ vẹrẹ vẹrẹ re u fi obọ họ kẹ ahwo riẹ. A rehọ ogbẹgwae obufihọ mu, a tẹ rehọ eware kẹ Banabas avọ Sọl dhogbo no obọ Antiọk ze.—Iruẹru 11:27-30.

Ma re rẹro onọ u vi oyena mi Jesu Kristi enẹna nọ egọmeti Uvie na o mu iruo họ no na. Oke kpobi nọ okpẹtu ọ tẹ roma via—etọ inuhu, ohọwo, ẹvo, ofou-ọwhibo, okpofou, hayo ẹvavia errae-ugbehru—ukoko Ileleikristi orọ Isẹri Jihova o rẹ dhogbo vẹrẹ vẹrẹ re u fi obọ họ kẹ inievo rai gbe amọfa nọ e rrọ oria okpẹtu na. Wọhọ oriruo, okenọ etọ i nuhu raha eware gaga evaọ El Salvador evaọ January gbe February 2001, a ru ọruẹrẹfihotọ obufihọ evaọ orẹwho na soso, yọ ẹko Isẹri Jihova jọ nọ i no Canada, Guatemala, gbe United States ze a fi obọ họ re. Evaọ umutho oke gheghe a bọ Egwa Uvie esa gbe iwou nọ i bu vi 500.

Ahwo nọ E Rrọ Otọ Egọmeti Uvie Ọghẹnẹ

Anwẹnọ a rọ rehọ iẹe mu evaọ 1914, Uvie Ọghẹnẹ obọ odhiwu u bi koko ahwo riẹ họ no ibienẹ ene akpọ na ze. Onana o rrọ orugba ọrọ eruẹaruẹ igbunu nọ Aizaya o kere fihọ otọ: “Edẹ e te tha nọ a rẹ te rehọ ugbehru-itho uwou ỌNOWO na [egagọ uzẹme ikpehru riẹ] viẹ kerọ igbehru-itho nọ i kpehru thesiwa, . . . erẹwho na kpobi e vẹ te dhẹ kpohọ iẹe.” Eruẹaruẹ na i dhesẹ inọ “ahwo buobu” a ti zurie kpohọ ugbehru yena jẹ dhẹ gbalọ ithubro gbe izi Jihova.—Aizaya 2:2, 3.

Iruẹru nana e wha ọgbakugbe nọ ọ mai gbunu kpobi ze no evaọ oke mai na—eyero-inievo akpọ-soso ọrọ Ileleikristi nọ i bu vi 6,000,000 evaọ erẹwho nọ i bu vi 230. Eva ikokohọ akpọ-soso erọ Isẹri Jihova, u re gbe iriughe unu nọ a tẹ ruẹ uyoyou, udhedhẹ, gbe okugbe nọ ọ rrọ udevie ogbotu ahwo gbidi gbidi enọ i fi ohẹriẹ orẹwho, uyẹ gbe evẹrẹ kparobọ no. (Iruẹru 10:34, 35) Kọ whọ gbẹ rọwo inọ re egọmeti ọ sae wha udhedhẹ gbe okugbe se ahwo uyẹ udhusoi buobu, ọ rẹ jọ egọmeti nọ o dikihẹ ga jẹ dọmu?

Uvie Ọghẹnẹ gbe Ewuhrẹ

Egọmeti kpobi o wo ute nọ o re rẹro nọ ahwo riẹ a rẹ nya te, yọ ohwo kpobi nọ ọ gwọlọ rria evaọ otọ egọmeti yena ọ rẹ nya te itee eyena hrọ. Epọvo na re, Uvie Ọghẹnẹ u wo itee nọ ahwo nọ a gwọlọ rria otọ riẹ kpobi a rẹ nya te. Dede na, re egọmeti na o ru oghoghẹrẹ ahwo sa-sa jẹ itee evona rehọ jẹ rria lele ai, okolo oware he. Nọ oware ofa nọ u dhesẹ nnọ Uvie Ọghẹnẹ o ghinẹ rrọ iruo—emamọ omaa ewuhrẹ riẹ nọ u bi duobọte je nwene udu ahwo, orọnikọ iroro ọvo ho.

Ẹvẹ egọmeti Uvie na o be rọ nyate use-abọ ulogbo nana? Ẹkwoma elele edhere usiuwoma ota ikọ na ọrọ “no uwou ruọ uwou” gbe Ẹme Ọghẹnẹ nọ a be nyai ro wuhrẹ ahwo omomọvo. (Iruẹru 5:42; 20:20) Ẹvẹ edhere ewuhrẹ nana o wo iruo te? Jacques Johnson, ozerẹ Kathọlik, o kere fihọ obe-usi ikoka koka ọ Canada jọ kpahe omodawọ nọ ọ jẹ rọ ta udu lọhọ aye jọ re ọ siọ Ebaibol ba ewuhrẹ kugbe Isẹri Jihova. Ọ ta nọ: “U gbe omẹ unu gaga, mẹ tẹ jẹ riẹ nnọ mẹ sae te ta udu aye na lọhọ họ. Mẹ tẹ te ruẹ nnọ evaọ emerae buobu nọ i kpo na, eyae Isẹri Jihova na a bọ usu okpekpe kugbe uvovo aye nana nọ ọ rẹ ruọ otafe he na no. A bigbae ẹkwoma obọ nọ a je fihọ kẹe, mu usu kugbei, jọ kugbei ẹsikpobi. U kri hi o te ti zihe ruọ omọvo egagọ rai yọ uvumọ oware o riẹ nọ mẹ sai ru rọ whaha iẹe he.” Wọhọ epanọ ovuẹ Ebaibol nọ Isẹri Jihova a bi wuhrẹ ahwo gbe uruemu Ileleikristi rai u duobọte udu aye nana nọ ọ jọ ohwo Kathọlik vẹre na, ere ọvona u bi duobọte idu ima ahwo buobu evaọ akpọ na soso.

Oghẹrẹ ewuhrẹ nana—ewuhrẹ Uvie na—o wo ehri riẹ no Ebaibol na ze, be kpare itee uruemu riẹ kpehru. U bi wuhrẹ ahwo re a you jẹ rehọ ọghọ kẹ ohwohwo makọ oghẹrẹ nọ a rrọ kpobi kẹhẹ. (Jọn 13:34, 35) U bi je fi obọ họ kẹ ahwo j’owọ lele uthubro na: “Wha kielele akpọ nana ha; rekọ jọ ẹjiroro ọkpokpọ rai o rẹriẹ owhai, re wha dhesẹ oreva Ọghẹnẹ via, o nọ uwoma nọ a jẹrehọ nọ ojẹ gbunu.” (Ahwo Rom 12:2) Ẹkwoma ẹnya seba uzuazọ anwae yena re a jẹ rehọ evawere nwene kpohọ izi gbe ehri-izi egọmeti Uvie na, ima ahwo buobu a ruẹ udhedhẹ gbe evawere no enẹna gbe emamọ ẹruore kẹ obaro na.—Ahwo Kọlọsi 3:9-11.

Oware jọ nọ u bi fi obọ họ gaga evaọ ẹnyate okugbe akpọ-soso nana họ emagazini nana, Uwou-Eroro Na. Ẹkwoma ona efafa nọ a nabe ruẹrẹhọ ziezi gbe ekwakwa nọ a rẹ rọ fae fihọ evẹrẹ sa-sa, a bi kere ugogo izoẹme Uwou-Eroro Na ususu evaọ evẹrẹ 135, yọ bu vi ahwo 95 evaọ udhusoi enọ i bi sei evaọ akpọ-soso a rẹ sai wuhrẹ izoeme na evaọ ẹvẹrẹ obọ rai oke ovona.

Okere-ebe jọ ọrọ egagọ Mormon o ru okerefihotọ iruo imishọnare ichọche amọfa nọ e kparobọ gaga no. Ọ fodẹ Uwou-Eroro Na gbe Awake!, enọ Isẹri Jihova a bi kere, wọhọ emagazini usiuwoma ota nọ e mai woma kpobi jẹ ta nọ: “Uvumọ ohwo ọ rẹ sae fo Uwou-Eroro Na hayo Awake! hi inọ e be lẹliẹ ahwo kpairoro vrẹ ovẹrẹ oke nọ ma be rria na je fi oma họ otọ—ukpoye, e be lẹliẹ ahwo jaja aro vi evaọ edhere nọ mẹ rẹ rehọ ọthobọ gheghe se ku evaọ ebe egagọ efa. Uwou-Eroro Na gbe Awake! e rẹ sasa oma ẹkwoma ikuigbe uzẹme orọ eware nọ e rrọ akpọ na via, nọ a kiẹ via ziezi, nọ i wiruo kẹ ahwo.”

Ma wo imuẹro ziezi nọ u ghine dhesẹ nọ Uvie Ọghẹnẹ o rrọ iruo gidigba. Avọ evawere gbe ẹgba, Isẹri Jihova a be vuẹ erivẹ rai “ovuẹ usiuwoma uvie na,” bi zizie ai re a jọ enọ e te jọ otọ riẹ. (Matiu 24:14) Kọ ẹruore ọyena o si owhẹ urru? Whọ rẹ sae reawere eghale erọ omaukugbe ahwo nọ a be rehọ itee Uvie na wuhrẹ jẹ be daoma rria lele ai. Jẹ mai woma na, whọ rẹ sae reawere irẹro orọ ẹria evaọ otọ esuo Uvie na evaọ akpọ ọkpokpọ nọ a yaa eyaa riẹ na, onọ “ẹrẹreokie ọ be ria.”—2 Pita 3:13.

[Oruvẹ-obotọ]