Orọnọ Fiki Iruo Ọvo A Ro Siwi Omai Hi, Rekọ Fiki Aruoriwo

“A . . . siwi owhai fiki orọwọ . . . Orọnọ fiki iruo ho, re ohwo ọvo ọ siọ eha ba ese.”—AHWO ẸFẸSỌS 2:8, 9.

1. Ẹvẹ Ileleikristi a ro wo ohẹriẹ no amọfa evaọ oghẹrẹ eriwo nọ a re wo kpahe eware nọ ohwo ọ sai ru, kọ fikieme?

AHWO nẹnẹ a rẹ wọ oma kpehru fiki eware nọ a ru, yọ o rẹ vẹrẹ ai obọ gaga re a rehọ eware yena seha. Ileleikristi a wo ohẹriẹ. A rẹ wọ oma kpehru fiki eware nọ a ru no ho, makọ eware nọ i kpomahọ egagọ uzẹme. Dede nọ a rẹ ghọghọ fiki eware nọ ahwo Jihova wọhọ ekru a ru no, a rẹ rehọ abọ nọ omomọvo rai o ru ro dhesẹ oma ha. A riẹ inọ evaọ iruo Jihova, eva efuafo nọ e rẹ wọ ohwo ru oware u wuzou vi eware nọ ohwo o ru. Orọnikọ fiki iruo jọ nọ ohwo o ru a te rọ kẹe uzuazọ ebẹdẹ bẹdẹ hẹ, rekọ fiki ẹrọwọ gbe aruoriwo Ọghẹnẹ.—Luk 17:10; Jọn 3:16.

2, 3. Eme Pọl o ro seha, kọ fikieme?

² Pọl ukọ na o vuhu uzẹme nana mu ziezi. Nọ ọ lẹ isiasa no inọ a si ‘edada nọ e jariẹ oma’ no, Jihova ọ tẹ kẹe uyo no: “Aruoriwo mẹ o te kẹ owhẹ, keme eva okuako ogaga mẹ o jẹ gbunu.” Avọ omarokpotọ nọ ọ rọ jẹ ẹjiroro Jihova rehọ, Pọl ọ ta nọ: “Fikiere mẹ rẹ dhigbẹ yoma okuako mẹ viere, re ogaga Kristi o jọ omẹ oma.” Uruemu omarokpotọ Pọl na yọ oware nọ u fo nọ ma rẹ raro kele.—2 Ahwo Kọrint 12:7-9.

³ Dede nọ Pọl ọ viodẹ evaọ eruo iruo Ileleikristi, o vuhumu inọ orọnikọ fiki ona aghẹruẹ jọ nọ o wo ọ sai ro ru iruo yena ha. Avọ omarokpotọ, ọ ta nọ: “Whaọ dede nọ mẹ họ ọnọ ọ mae kawo udevie erezi kpobi na, mẹ a rehọ aruoriwo ọnana kẹ, re mẹ vuẹ ovuẹ efe odidi Kristi na kẹ ahwo Egedhọ.” (Ahwo Ẹfẹsọs 3:8) Pọl ọ jọ etenẹ wọ oma riẹ kpehru hu hayo kọ o dhesẹ nọ ọ fo vi amọfa ha. “Ọghẹnẹ o mukpahe otu-eheri, rekọ ọ rẹ rehọ aruoriwo kẹ enọ eromakpotọ.” (Jemis 4:6; 1 Pita 5:5) Kọ ma bi lele oriruo Pọl, be rehọ omarokpotọ rri oma mai kawo vi ọnọ ọ mae kawo kpobi evaọ udevie inievo na?

“Roro Amọfa Ro Vi Oma Ra”

4. Fikieme o sae rọ jọ omai obọ gaga ẹsejọ re ma rri amọfa nnọ a kpehru vi omai?

⁴ Pọl ukọ na ọ hrẹ Ileleikristi nọ: “Wha rehọ mẹ-ọvo-ọria hayo eheri ru oware ovo ho, rekọ eva oma urokpotọ roro amọfa ro vi oma ra.” (Ahwo Filipai 2:3) Onana o rẹ sae jọ use-abọ, maero nọ ma te wo ọkwa-iruo. Ẹsejọhọ omarokpotọ udhesẹ o rrọ ẹbẹbẹ kẹ omai fikinọ ẹzi omahrowo nọ o da akpọ inẹnẹ fia na u wholo omai no omojọ. Ẹsejọhọ, okenọ ma jọ emaha, a wuhrẹ omai inọ ma rẹ daoma karo, karo kẹ inievo mai evaọ obọ uwou hayo karo kẹ ibe emọ-isukulu mai. Ẹsejọhọ a jẹ hae ta udu họ omai awọ ẹsikpobi inọ ma rẹ jọ ohwo ọsosuọ evaọ ezaharo isukulu hayo iruẹru isukulu efa kpobi. Uzẹme, u woma re ma dawo utho ẹgba mai kpobi evaọ oware ezi kpobi nọ ma bi ru. Dede na, Ileleikristi a re ru ere, orọnikọ re a ro si iroro bru omobọ rai hi, rekọ re a wo erere vọvọ no iruo na ze, yọ ẹsejọhọ re a jẹ wha erere se amọfa re. Dede na, re ohwo ọ hae gwọlọ jọ oria ọsosuọ ẹsikpobi re a ruẹsi jiri ei o rẹ sae wha enwoma ze. Evaọ oghẹrẹ vẹ?

5. Ohwo ọ gbẹ yọrọ oma ha, eme ẹzi omuhrowo o rẹ sai su ei kpohọ?

⁵ Ohwo ọ gbẹ kpọ oma riẹ hẹ, ẹzi omahrowo o rẹ sai ru ohwo rri amọfa vo hayo fu uke. Ọ sae re amọfa ihri fiki ona nọ a wo gbe ọkwa-iruo rai. Itẹ 28:22 o ta nọ: “Ọgboke o re lele esi efe tuatua, dede na yọ ọ riẹ onọ o rẹ te kariẹ he.” Ọ rẹ sae tubẹ rehọ oheri gwọlọ la ruọ ọkwa nọ ọ rro vi ei. Re ọ ta ewoma fihọ uruemu riẹ, ọ rẹ sai muhọ ẹgo hayo ta amọfa raha—uruemu nọ o gwọlọ nọ Ileleikristi a rẹ whaha. (Jemis 3:14-16) Epanọ o rrọ kpobi, uruemu oriobọ ọ be rehọ ẹmẹrera kọ na.

6. Ẹvẹ Ebaibol na e rọ vẹvẹ unu kpahe ẹzi omuhrowo?

⁶ Fikiere, Ebaibol e ta udu họ Ileleikristi awọ nọ: “Wha joma jọ otu omovia ha, nọ a rẹ guọlọ ẹwhọ họ, nọ a re wo ẹro-oyoma kpahọ ọrivẹ gbe he.” (Ahwo Galesha 5:26) Jọn ukọ na ọ ta kpahe ibe Oleleikristi jọ nọ o kie kẹ uruemu utionana. Jọn ọ ta nọ: “Me kere oware jọ se [ukoko] na vẹre i no; rekọ Diọtẹfis, ọnọ ọ rẹ guọlọ rọ oma riẹ dhe aro na, o vuhu ogaga mẹ hẹ. Re otẹrọnọ mẹ nyaze, mẹ rẹ te fere eware nọ o bi ru via, avọ eme iyoma nọ ọ be ta kpahe omẹ.” U re yoma gaga re Oleleikristi jọ o wo oghẹrẹ uruemu utionana!—3 Jọn 9, 10.

7. Eme u fo nọ Oleleikristi ọ rẹ whaha evaọ omuhrowo nọ o da oria iruo fia nẹnẹ na?

⁷ Uzẹme, wọhọ epanọ o rrọ, o nwane lọhọ họ nnọ Oleleikristi ọ rẹ sae whaha iruẹru omuhrowo kpobi. Wọhọ oriruo, iruo riẹ hayo eware nọ ọ be zẹ o rẹ sae wha omuhrowo ze fiki ọ amọfa nọ a rrọ akọ iruo itieye na hayo be zẹ ọkpọ eware evona. Rekọ, o tẹ make rrọ ere, Oleleikristi o re ru iruo riẹ evaọ ẹzi ororokẹ, uyoyou, gbe adhẹẹ. Ọ rẹ whaha eware nọ e wọso uzi hayo nọ e wọso uruemu Ileleikristi, ọ vẹ jẹ whaha ẹjọ ohwo nọ a re dhesẹ wọhọ ọnọ o re thihi amọfa họ otọ le ugho. O re roro ho inọ re ọ jọ ohwo ọsosuọ họ oware nọ o mae roja evaọ uzuazọ. O tẹ rrọ ere abọ oria iruo, kọ ẹvẹ oyena o roja te evaọ egagọ Ọghẹnẹ!

‘O Jọ orọ Ẹwawọ Kugbe Omọfa Ha’

8, 9. (a) Fikieme ekpako Ileleikristi a gbe ro wo uvumọ ẹjiroro nọ a re ro lele ohwohwo hrowo oma ha? (b) Fikieme 1 Pita 4:10 u ro kie kpahe idibo Ọghẹnẹ kpobi?

⁸ A jọ eme nana nọ a rrọ ẹzi Ọghẹnẹ kere na dhesẹ uruemu nọ u fo nọ Ileleikristi a re wo: “Rekọ jọ kohwo kohwo o dhesẹ iruo riẹ via, kẹsena o ve ti wo a jiri eva oma [obọriẹ] ọvo, o gbẹjọ orọ [ẹwawọ kugbe] omọfa ha.” (Ahwo Galesha 6:4) Ekpako nọ e rrọ ukoko na, nọ a riẹ nọ a bi lele ohwohwo hrowo oma ha na, a re ruiruo kugbe wọhọ ugboma. A rẹ ghọghọ fiki iruo nọ omomọvo o bi ru rọkẹ ewoma ukoko na soso. A vẹ rọ enẹ whaha omuhrowo nọ o rẹ wha ẹbẹbẹ ze, a ve fi emamọ oriruo okugbe hotọ kẹ ahwo kpobi evaọ ukoko na.

⁹ Ekpako jọ e rẹ sae riẹ eware ru vi edekọ hayo tube wo orimuo vi edekọ fiki epanọ a kpako te, epanọ a nya thabọ te no, hayo fiki ona nọ Ọghẹnẹ ọ kẹ rai. Fiki onana, ekpako i wo ọvuọ ewha-iruo sa-sa evaọ ukoko Jihova. Ukpenọ a rẹ rehọ oma rai wawo ohwohwo, a rẹ kareghẹhọ ohrẹ na: “Wọhọ epanọ omomọvo o wo okẹ no, rehọ iẹ ru iruo kẹ ohwo ohwo, wọhọ irieyero oghoghẹrẹ aruoriwo Ọghẹnẹ.” (1 Pita 4:10) Uzẹme riẹ họ, ikere nana i kie kpahe idibo Jihova kpobi, keme mai kpobi ma wo okẹ eriariẹ egbagba, mai kpobi ma te je wo ọghọ nọ ma bi ro wo obọ evaọ odibọgba Ileleikristi na.

10. Oghẹrẹ vẹ ọvo ma rẹ gọ nọ Jihova ọ jẹ jẹ egagọ mai rehọ?

¹⁰ Egagọ mai e rẹ were Jihova otẹrọnọ i bi no ẹzi uyoyou avọ omarọkẹ ze, orọnikọ re ma rọ wọ oma mai kpehru vi amọfa ha. Fikiere o rrọ oja re ma wo emamọ eriwo kpahe iruo nọ ma bi ru rọ tha egagọ uzẹme uke. Dede nọ uvumọ ohwo ọ rẹ sae riẹ iroro nọ e rrọ omọfa udu gbagba ha, Jihova “o bi riwi udu na.” (Itẹ 24:12; 1 Samuẹle 16:7) Fikiere, u re woma re ma hae nọ oma mai noke ruọ oke nọ, ‘Eme me wo họ iroro bi ro ru iruo evaọ ukoko na?’—Olezi 24:3, 4; Matiu 5:8.

Emamọ Eriwo Kpahe Iruo Mai

11. Didi enọ kpahe iruo mai evaọ odibọgba u kiehọ nọ ma rẹ sae ta ẹme kpahe?

¹¹ Otẹrọnọ ẹjiroro udu e rrọ oria ọsosuọ evaọ ewo ọjẹrehọ Jihova, ẹvẹ u fo nọ iruo egagọ mai e rẹ jọ omai oja te? Nọ ma tẹ be rehọ emamọ eva ru iruo odibọgba mai no, kọ o ginẹ roja re ma kere iyẹrẹ unu oke hayo eware nọ ma bi ru hotọ? Enọ nana i kiehọ keme ma gwọlọ re unu epanọ ohwo o ru te e jọ oja vi ugogo iruo ẹrọwọ nọ ma re ru hu hayo re ma rehọ awaọruọ epanọ ma rẹ rọ nẹ emamọ iyẹrẹ karo evaọ iruo Ileleikristi mai hi.

12, 13. (a) Fiki ẹjiroro jọ vẹ ma bi ro kere iyẹrẹ usiuwoma ota mai fihọ otọ? (b) Eme ọ rẹ lẹliẹ omai ghọghọ okenọ ma te bi rri iyẹrẹ iruo usiuwoma ota akpọ-soso na?

¹² Muẹrohọ ẹme nọ obe na A Koko Omai Họ re Ma Ru Oreva Jihova o ta: “Ilele ọsosuọ Jesu Kristi a wo isiuru kpahe iyẹrẹ ọrọ ẹnyaharo iruo usiuwoma ota na. (Mak 6:30) Obe Ebaibol orọ Iruẹru Ikọ Na o ta kẹ omai inọ ahwo nọ a bu te oware wọhọ 120 e jariẹ okenọ ẹzi ọfuafo o ro te ilele na obọ eva Pẹntikọst. U kri hi unu ilele na u te bu te 3,000 je ti kpohọ 5,000. . . . (Iruẹru 1:15; 2:5-11, 41, 47; 4:4; 6:7) Dai roro emamọ uduotahawọ nọ usi ẹvi nana o wha se ilele na!” Fiki ẹjiroro ọvona, Isẹri Jihova nẹnẹ a be daoma wo okerefihotọ ọrọ iyẹrẹ iruo nọ a be jọ akpọ na soso ru evaọ orugba eme Jesu na: “A rẹ te vuẹ ovuẹ usiuwoma uvie na kẹ akpọ na kpobi, re o jọ isẹi kẹ erẹwho akpọ na kpobi; kẹsena urere u te zi te.” (Matiu 24:14) Iyẹrẹ itieye na i re fi obọ họ kẹ omai riẹ oware nọ a be jọ akpọ na soso ru. I re dhesẹ oria nọ a jọ gwọlọ obufihọ gbe oghẹrẹ ebe nọ a gwọlọ gbe epanọ a gwọlọ ebe na bu te re a ruẹse wha iruo usiuwoma ota na haro.

¹³ Fikiere, ma tẹ be nẹ iyẹrẹ iruo usiuwoma ota mai, u re fi obọ họ kẹ omai wha iruo ewhowho emamọ usi Uvie na haro ziezi. U te no ere no, kọ o gbẹ be kẹ omai uduotahawọ nọ ma te yo kpahe iruo nọ inievo mai a bi ru evaọ abọfa akpọ na? Usi ẹvi gbe ẹnyaharo nọ ma be jọ iruo na ruẹ evaọ akpọ-soso o be lẹliẹ omai ghọghọ, wọ omai ruiruo ziezi, jẹ kẹ omai imuẹro oghale Jihova. Yọ ẹvẹ evawere riẹ e rro te re ma riẹ nnọ iyẹrẹ iruo nọ mai omomọvo o bi ru e rrọ usu iyẹrẹ akpọ-soso na! Iyẹrẹ mai omomọvo i tulo ho a tẹ rehọ iẹe wawo orọ akpọ na soso, rekọ u re vo Jihova ẹro ho. (Mak 12:42, 43) Kareghẹhọ, ababọ iyẹrẹ ra, iyẹrẹ akpọ-soso na e rẹ gbunu hu.

14. U te no usiuwoma ota gbe amọfa owuhrẹ no, eware efa vẹ e rrọ abọjọ egagọ mai kẹ Jihova?

¹⁴ Uzẹme, ma rẹ nẹ iyẹrẹ eware jọ buobu nọ Osẹri kpobi o bi ru evaọ orugba owha-iruo riẹ wọhọ odibo Jihova nọ ọ rehọ oma mudhe no ho. Wọhọ oriruo, eware jọ nọ e rẹ jọ iyẹrẹ na ha họ uwuhrẹ Ebaibol omobọ ohwo, ekpohọ gbe abọ-owo evaọ iwuhrẹ Ileleikristi, ewha-iruo ukoko, obufihọ kẹ inievo nọ e rrọ uye, unevaze ugho nọ ma be rọ tha iruo Uvie na uke, gbe eware efa. Fikiere, dede nọ iyẹrẹ usiuwoma ota mai e roja, fi obọ họ kẹ omai yọrọ ọwhọ mai evaọ usiuwoma ota jẹ whaha obọ nọ ma re si kpemu, ma rẹ rehọ ubiẹro owowa rri rie. Ma re rri rie wọhọ obe-udu abọ-ẹzi hi, onọ a re ro wo uzuazọ ebẹdẹ bẹdẹ.

‘Rehọ Oma kẹ Iruo Iwoma Iruo’

15. Dede nọ iruo ọvo e rẹ sai siwi omai hi, fikieme e rọ roja?

¹⁵ U re vevẹ, dede nọ iruo ọvo e rẹ sai siwi omai hi, e roja. Oye jabọ a ro se Ileleikristi wọhọ “enọ e rehọ oma rai kẹ iruo iwoma iruo” yọ oye jabọ nọ a rọ ta udu họ ae awọ re a “wo uyoyou, je ru iruo ezi kpobi.” (Taitọs 2:14; Ahwo Hibru 10:24) Bi fi ẹgba họ ẹme na viere, Jemis, omọfa nọ o kere obe jọ Ebaibol na, ọ ta nọ: “Nwanọ epanọ oma nọ u wo ẹzi hi u whu no na, jẹruọ ere orọwọ nọ u wo iruo ho u whu no re.”—Jemis 2:26.

16. Eme ọ tubẹ mae roja vi iruo, rekọ eme ma rẹ yọroma kpahe?

¹⁶ Epanọ iruo iwoma e roja te kẹhẹ na, ẹjiroro nọ ma wo họ eva bi ro ru ai ọ tubẹ mae roja viere. Fikiere o rrọ oware areghẹ re ma kiẹ iroro mai riwi noke ruọ oke. Nọ o rọnọ uvumọ ohwo-akpọ ọ rẹ sae riẹ iroro omọfa gbagba ha na, ma rẹ yọroma kẹ ẹdhọ nọ ma re gu amọfa. A nọ omai nọ: “Whẹ ono nọ ore bruoziẹ odibo omọfa?” A tẹ kuyo na nọ: “Eva aro olori riẹ ọvo o je dikihẹ hayo ekie.” (Ahwo Rom 14:4) Jihova, Olori mai kpobi, gbe Obruoziẹ riẹ nọ o ro mu, Kristi Jesu, a ti bruoziẹ mai, orọnikọ fiki iruo nọ ma ru ọvo ho rekọ te iroro nọ e wọ omai ru iruo na, uvẹ nọ u rovie fihọ kẹ omai, uyoyou, gbe omarọkẹ mai. Jihova avọ Kristi Jesu ọvo a rẹ sai bruoziẹ gbagba sọ ma ru oware nọ a ta kẹ Ileleikristi nọ a ru, lele eme ọ Pọl ukọ na: “[Dawo oma] re whọ sai ru oma ra wọhọ ọnọ a jẹrehọ no, obọ aro Ọghẹnẹ jẹ wọhọ oruiruo ọnọ ọ kare omaovuọ, nọ rẹ yọrọ ẹme uzẹme na ziezi.”—2 Timoti 2:15; 2 Pita 1:10; 3:14.

17. Nọ ma be daoma ru uthoma mai na, fikieme ma je fi eme nọ e rrọ Jemis 3:17 họ iroro?

¹⁷ Jihova ọ rrọ owowa evaọ oware nọ o bi rẹro riẹ mi omai. Wọhọ epanọ Jemis 3:17 u dhesẹ, usu eware nọ “areghẹ nọ o nehru ze” o re ru họ “o re roro didi.” Kọ o gbẹ rrọ oware areghẹ re ma raro kele Jihova evaọ abọ nana? Fikiere, u fo ho re ma daoma fi itee nọ i fioka ha gbe enọ ma rẹ sai le tobọ họ kẹ omobọ mai hayo rọ kẹ inievo mai.

18. Eme ma rẹ sai rẹro riẹ nọ ma te wo eriwo owowa kpahe iruo nọ ma bi ru gbe aruoriwo Jihova?

¹⁸ Ma te gine wo iroro owowa kpahe iruo ẹrọwọ nọ ma bi ru gbe aruoriwo Jihova, ma ti wo oghọghọ nọ a re ro vuhu idibo uzẹme Jihova. (Aizaya 65:13, 14) Ma rẹ sae ghọghọ fiki eghale nọ Jihova o bi ku kuọ ahwo riẹ kpobi, ababọ ẹwawọ oware nọ mai omomọvo ọ rẹ sai ru. Nọ ma be ruabọhọ “olẹ gbe olẹ-ayare, te uyere-okẹ” na, ma rẹ yare Ọghẹnẹ re o fi obọ họ kẹ omai ru uthoma mai. Kẹsiẹ, ababọ avro, “udhedhẹ Ọghẹnẹ nọ uvi eriariẹ kpobi, [o vẹ te] yọrọ eva gbe iroro [mai] eva Kristi Jesu.” (Ahwo Filipai 4:4-7) Ẹhẹ, ma rẹ sai wo omosasọ gbe uduotahawọ nọ ma riẹ nọ a rẹ sai siwi omai, orọnikọ ẹkwoma iruo ọvo ho, rekọ ẹkwoma aruoriwo Jihova!

Kọ Whọ rẹ Sai Dhesẹ Oware nọ Ileleikristi

• a rẹ rọ whaha ehaise kpahe iruo nọ a ru hayo oware nọ a sai wo tobọ?

• a rẹ rọ whaha ẹzi omuhrowo?

• a rẹ rọ nẹ iyẹrẹ iruo rai evaọ odibọgba na?

• a rẹ rọ whaha ẹdhọ nọ a re gu ibe eg’Ọghẹnẹ?

[Uwoho nọ o rrọ ẹwẹ-obe avọ 23]

“Aruoriwo mẹ o te kẹ owhẹ”

[Iwoho nọ e rrọ ẹwẹ-obe avọ 24, 25]

Ekpako na a rẹ ghọghọ fiki utho nọ omomọvo rai o bi ru ro fiba ewoma ukoko na

[Iwoho nọ e rrọ ẹwẹ-obe avọ 26, 27]

Ababọ iyẹrẹ ra, iyẹrẹ akpọ-soso na e rẹ gbunu hu