Epanọ A Bi Ro Jiri Jihova Eva obọ Isukulu

WARIẸ akpọ na họ, emaha gbe izoge Isẹri Jihova a be gwọlọ idhere nọ a re ro jiri Ọghẹnẹ evaọ obọ isukulu—ẹkwoma ẹmeunu gbe uruemu rai. Muẹrohọ iriruo jọ nọ i dhesẹ ajọwha uzoge rae.

Wọhọ abọjọ iruo isukulu riẹ, a ta kẹ Osẹri ọmaha jọ evaọ obọ Grisi inọ o kere kpahe ẹnua nọ a be nua idedeghe na. Nọ o rri Watch Tower Publications Index, o te duku evuẹ jọ evaọ emagazini Awake! nọ o ro kere eme riẹ na jẹ ta evaọ ekuhọ riẹ nọ Awake! ọ rehọ eme na no ze. Iticha riẹ ọ ta kẹe nọ oriẹ na o rrọ usu ekere nọ e mai woma kpaobọ nọ o se no. Okiofa jọ, iticha na ọ tẹ rehọ oware nọ ọmọ na o kere na ru ẹme evaọ ẹgwae ologbo ọrọ ahwo nọ a wo eriariẹ, onọ o wha emamọ iyẹrẹ ze. Oniọvo-ọmọtẹ ọmaha na ọ tẹ jiroro nọ ọ rẹ rehọ emagazini Awake! na efa kẹ iticha na, kugbe onọ uzoẹme uke riẹ o ta nọ “Teachers—What Would We Do Without Them?” (Iticha—Eme Ma rẹ Sai Ru Ababọ Rai?) Iticha na o jiri emagazini Awake! na evaọ eklase, emọ eklase na jọ a tẹ yare nọ a gwọlọ ejọ re. Oniọvo-ọmọtẹ na ọ tẹ wha emagazini Awake! efa sa-sa ziọ obọ isukulu re emọ-isukulu na a se.

Evaọ Republic of Benin, Africa, uzoge Oleleikristi jọ ọ rẹriẹ ovao dhe otunyẹ oghẹrẹsa jọ. Wọhọ epaọ uruemu rai, esẹgbini emọ-isukulu riẹ buobu a kuomagbe, a tẹ rehọ iticha efa nọ i re wuhrẹ emọ rai abọ uwuhrẹ nọ e rrọ gaga evaọ omaruẹrẹ kpahe kẹ ẹdawọ-okere. Dede na, iticha nọ a rehọ na e tẹ salọ ohiohiẹ Ẹdẹ-Ọmaha wọhọ oke nọ a te hai ro ru iwuhrẹ na. Osẹri ọmaha na ọ tẹ se ta nọ: “Ohiohiẹ Ẹdẹ-Ọmaha họ oke nọ ukoko na soso u re kpohọ usiuwoma ota kugbe. Oke yena mẹ rẹ mai ro wo evawere evaọ ẹkpoka na, yọ mẹ sae rehọ oke yena ru oware ofa ha!” Ọsẹ riẹ nọ ọ rrọ Osẹri, jẹ rrọ ọyewọ-ọvo ọ rọwo kugbe ọmọ na, ọ tẹ daoma ta kẹ utu esẹgbini avọ iwuhrẹ jọ re a nwene ẹdẹ na. Rekọ aikpobi a se. Ọmọtẹ na ọ tẹ tubẹ se uwuhrẹ na ba. Ọ tẹ jẹ hai lele ahwo ukoko riẹ kpohọ usiuwoma ota. Emọ eklase riẹ a je sei ẹkoko, jẹ ta kẹe nọ ọ se usiuwoma ota gbe Ọghẹnẹ riẹ ba. U mu rai ẹro inọ o ti kie evaọ ẹdawọ na. Rekọ ukuhọ riẹ kpobi, utu emọ-isukulu nọ i je kpohọ uwuhrẹ yena họ ahwo nọ a kie evaọ ẹdawọ na, rekọ osẹri ọmọtẹ ọmaha na ọ kparobọ. A gbe du ta ha sọ ẹkoko na o serihọ. Enẹna emọ-isukulu na a be ta kẹe nọ, “Ruabọhọ gọ Ọghẹnẹ ra.”

Evaọ Czech Republic, wọhọ abọjọ iruo isukulu riẹ, a ta kẹ ọmọtẹ ikpe 12 jọ inọ ọ ta ẹme kpahe obe jọ nọ ọ riẹ. Oni ọmọtẹ na ọ tẹ ta udu họ iẹe awọ nọ ọ ta kpahe obe na Ọzae nọ Ọ Mae Rro nọ Ọ Rria No. Onọ nana o ro mu ẹme riẹ họ: “Ẹvẹ who roro? Ono họ ọzae nọ ọ mae rro nọ ọ rria no?” O te dhesẹ Jesu, uzuazọ nọ o yeri evaọ otọakpọ, gbe iwuhrẹ riẹ. Kẹsena ọ tẹ ta ẹme kpahe uzoẹme na “Uwuhrẹ Evaọ Erọvrẹ.” Nọ o kuhọ no, iticha riẹ o te bo nọ, “Onana họ ẹme nọ ọ mai woma kpaobọ nọ me yo mi owhẹ no!” kẹsena iticha na ọ tẹ rehọ obe na jọ. Emọ isukulu na jọ a tẹ gwọlọ nọ a re wo orai re. Ẹdẹ nọ o lele i rie, eva e were riẹ nọ ọ rọ ghale unu obe nana nọ i bu te 18 soso.

Emaha itieye na a be were eva gaga nọ a bi ro jiri Jihova evaọ obọ isukulu. U fo nọ mai kpobi ma raro kele ajọwha uzoge rai.