Ẹtanigbo na Ọ Kpare Ẹrẹreokie Ọghẹnẹ Kpehru
NỌ Adamu avọ Ivi a kpareso no, Jihova ọ tẹ yeyaa inọ ọ te rehọ Ubi jọ lahwe nọ a te rowo ithihrawọ. (Emuhọ 3:15) Onana u rugba nọ ewegrẹ Ọghẹnẹ a gbẹgwae nọ a ro kpe Jesu Kristi evaọ ure oja. (Ahwo Galesha 3:13, 16) Jesu ọ kare uzioraha, keme ẹkwoma ẹzi ọfuafo ọmọtẹ nọ ọ riẹ ọzae he ọ rọ rehọ edhere igbunu dieva riẹ họ. Fikiere, a rẹ sae rehọ azẹ riẹ nọ o hwẹ ta ahwo-akpọ nọ e reuku uzioraha gbe uwhu mi Adamu no igbo.—Ahwo Rom 5:12, 19.
Uvumọ oware o rẹ sae whaha Jihova, Ọghẹnẹ erumeru na, nọ o gbe ro ru ẹjiroro riẹ gba ha ha. Fikiere, nọ ohwo o kie ruọ uzioraha no, evaọ eriwo Jihova, o wọhọ ẹsenọ a tubẹ hwa ẹtanigbo na no keme ọ riẹ nọ oware ovo o te whaha ẹwha riẹ hẹ, yọ ọ rẹ sai wo usu kugbe enọ i fi ẹrọwọ họ erugba eyaa riẹ. Onana o wha riẹ ze nọ emọ Adamu nọ e gba ha, wọhọ Enọk, Noa, gbe Abraham a sai ro lele Ọghẹnẹ nya, Ọghẹnẹ o te je mu usu kugbe ai ababọ epe nọ onana o whẹhọ ẹfuọ riẹ.—Emuhọ 5:24; 6:9; Jemis 2:23.
Ahwo jọ nọ i fi ẹrọwọ họ Jihova a raha izi ilogbo. Oriruo jọ họ Devidi Ovie na. Whọ rẹ sae nọ inọ: ‘Fikieme Jihova ọ gbẹ jẹ rọ ghale Devidi Ovie na yọ Devidi o lele Batshẹba bruẹnwae jẹ wha uwhu se Uraya ọzae riẹ no?’ Oware jọ nọ o soriẹ ze họ uvi ekurẹriẹ Devidi gbe ẹrọwọ riẹ. (2 Samuẹle 11:1-17; 12:1-14) Fiki idhe Jesu Kristi nọ e jọ obaro be tha, Ọghẹnẹ ọ sae rọ vrẹ Devidi nọ o kurẹriẹ na, ababọ egbeku uvi-ẹdhoguo gbe ẹrẹreokie Riẹ. (Olezi 32:1, 2) Re u gine muẹro nọ ere o rrọ, Ebaibol na i dhesẹ oware nọ o mai gbunu nọ ẹtanigbo Jesu o ru via, koyehọ “re u dhesẹ ẹrẹreokie Ọghẹnẹ, keme eva akothiho riẹ Ọghẹnẹ ọ jẹ kpare iroro vrẹ izieraha ọsosuọ” gbe erọ “oke nana.”—Ahwo Rom 3:25, 26.
Ẹhẹ, eghale buobu i te ahwo-akpọ obọ fiki azẹ Jesu. Fiki ẹtanigbo na, ahwo-akpọ erahaizi nọ i kurẹriẹ no a rẹ sai ro wo usu okpekpe kugbe Ọghẹnẹ. Fibae, ẹtanigbo na o rovie edhere fihọ kẹ ẹkparomatha enọ i whu ziọ akpọ ọkpokpọ Ọghẹnẹ. Oyena u ti kugbe idibo ẹrọwọ Ọghẹnẹ enọ i whu taure Jesu ọ tẹ te hwosa ẹtanigbo na gbe makọ ibuobu nọ i whu evaọ ogbori nọ e gọ Ọghẹnẹ hẹ. Ebaibol e ta nọ: “Ẹkparomatha enọ ikiete avọ enọ ikiete he e rẹ te jarọ.” (Iruẹru 24:15) Eva oke yena, fiki ẹtanigbo na, Jihova ọ te kẹ ahwo-akpọ ẹmeoyo kpobi uzuazọ ebẹdẹ bẹdẹ. (Jọn 3:36) Jesu ọ ta nọ: ‘Ọghẹnẹ o you akpọ na hrọ, ọ jẹ rehọ Ọmọvo riẹ kẹ, re kohwo kohwo nọ ọ rọwo riẹ o gbe vrẹ hẹ rekọ o re wo uzuazọ ebẹdẹ bẹdẹ.’ (Jọn 3:16) Irere nana kpobi i ti te ahwo-akpọ obọ fiki ọruẹrẹfihotọ Ọghẹnẹ ọrọ idhe ẹtanigbo na.
Rekọ oware nọ o mae jọ ẹtanigbo na rro họ, orọnikọ irere nọ i bi ti te omai obọ họ. Oware nọ o mai wuzou họ oware nọ ẹtanigbo Kristi u ru kẹ odẹ Jihova. U dhesẹ nnọ Jihova yọ Ọghẹnẹ uvi ẹdhoguo ọnọ ọ rẹ sai yeri kugbe ahwo-akpọ uzioraha, yọ ghele na ọ gbẹ rrọ ọrẹri. Ọghẹnẹ ọ gbẹ hai ru ọruẹrẹfihotọ ẹtanigbo na ha, uvumọ ọmọ Adamu, makọ Enọk, Noa, gbe Abraham, ọ hae sai lele Jihova nya hayo jọ ogbẹnyusu riẹ hẹ. Ọso-ilezi na o vuhu onana mu o te kere nọ: “O ỌNOWO, otẹrọnọ, who roro imuemu mai, ỌNOWO kọ ono ọ rẹ sai dikihẹ?” (Olezi 130:3) Ma rẹ kẹ Jihova uyere gaga nọ o ro vi Ọmọ oyoyou riẹ ziọ otọakpọ, ma re je yere Jesu nọ ọ rọ rehọ unevaze fi uzuazọ riẹ h’otọ wọhọ ẹtanigbo kẹ omai!—Mak 10:45.