“Ẹdẹ Uzuazọ Mẹ Jọ Nọ Ọ Mai Woma Kpaobọ”

“OKORA họ ẹyao nọ a be mai bubo riẹ, yọ ẹsejọhọ nọ ọ karo evaọ usu eyao iroro nọ emoha e be ruẹ-uye rai,” ere ẹko-iruo egọmeti jọ evaọ obọ Australia nọ a re se Beyondblue, o ta. Ekiakiẹ i dhesẹ nnọ ole 100,000 erọ emoha Australia a be ruẹ uye ọkora kukpe kukpe.

Ileleikristi nọ e rrọ emoha a rẹ sae jọ ọkora re. Rekọ ẹrọwọ nọ a fihọ Jihova o fi obọ họ kẹ ibuobu rai fi iroro iyoma kparobọ no, jẹ be sai yeri emamọ uzuazọ evaọ etoke uzoge rai. Evaọ ere oruo, a wha erere se amọfa no. Evaọ oghẹrẹ vẹ?

Rehọ oriruo oware nọ o via kẹ Claire, ọmọtẹ ikpe 18. Tei te oni riẹ a rrọ ukoko Isẹri Jihova jọ evaọ Melbourne. Nọ ọsẹ Claire ọ dhẹ siọ uviuwou na ba, Claire ọ tẹ jọ ọkora. Rekọ ẹrọwọ nọ o fihọ Jihova, Ọsẹ obọ odhiwu riẹ, ọ gbẹ jọ gaga. Ẹdẹjọ, edọkita rai, Lidia, ọ tẹ ziọ obọ uwou amọ Claire re ọ ruẹ oni Claire nọ ọ be mọ. Kẹsena, ọ tẹ ta kẹ Claire nọ ọ gwọlọ nọ a gbe kpohọ eki. Evaọ edhere, ọ tẹ nọ Claire sọ o wo ọmọzae nọ o bi lele. Claire ọ tẹ ta nnọ wọhọ omọvo Isẹri Jihova, o re lele emezae he. Onana u gbe edọkita na unu. Claire o te dhesẹ epanọ Ebaibol na i ro fi obọ họ kẹe no jẹ iroro areghẹ evaọ uzuazọ. Ukuhọ riẹ, ọ tẹ ta kẹ edọkita na nnọ ọ te rehọ obe jọ nọ a kere no Ebaibol ze nọ u fi obọ họ kẹ ọye omariẹ gaga no ro sei. Odẹ obe na họ Questions Young People Ask—Answers That Work.

Nọ obe na u tei obọ te edẹ esa no, Lidia o te fonu oni Claire ta nọ obe na o were riẹ gaga. Ọ tẹ ta nọ a rehọ ezeza efa sei re ọ rọ kẹ ahwo nọ a gbẹ rrọ iruo. Nọ Claire ọ rehọ ebe na nya, edọkita na ọ tẹ ta nọ egagọ Claire e were riẹ gaga. Claire ọ tẹ nọe sọ ọ sai wuhrẹ Ebaibol kugbei, edọkita na ọ tẹ rọwo.

Evaọ emerae buobu, Claire o te je ru uwuhrẹ na evaọ oke ibreki edọkita na. Lidia ọ tẹ nọ Claire sọ ọ sae kẹ ovuẹ kpahe ọkora nọ ọ rrọ izoge oma evaọ ẹgwae jọ nọ a gwọlọ gba. Dede nọ ozọ u mu rie, Claire ọ rọwo. Ahwo nọ a jọ ẹgwae na a bu viọ 60. Edọkita ene nọ i re siwi ahwo nọ a wo ẹbẹbẹ iroro a kake ta ẹme kẹ ogbotu na. Oke ọ Claire u te ti te. Ọ tẹ fodẹ epanọ u wuzou te re emoha a wo usu kugbe Ọghẹnẹ. O dhesẹ nnọ Jihova Ọghẹnẹ ọ be daezọ emaha na gaga yọ o re fi obọ họ kẹ enọ i bo bru rie kpobi kẹ uketha gbe omosasọ. Fibae, ọ tẹ ta kpahe imuẹro riẹ inọ kẹle na Jihova o ti si ẹyao ugboma gbe ọrọ iroro kpobi no. (Aizaya 33:24) Eme o no emamọ isẹri nana ze?

Claire ọ ta nnọ: “Nọ ẹgwae na o kuhọ no, ibuobu a nya bru omẹ ze be ta nnọ o were rai gaga nọ a rọ ruẹ ọmoha nọ ọ be ta kpahe Ọghẹnẹ. Me fi obe ọ Young People Ask na 23 họ ada. Emetẹ esa evaọ ogbotu na a kẹ omẹ inọmba ifonu rai. Omọvo jọ emetẹ yena o bi wuhrẹ Ebaibol enẹna. Ẹdẹ yena ọ jọ “ẹdẹ uzuazọ mẹ jọ nọ ọ mai woma kpaobọ”