Wo Uruemu Nọ O Rẹ Sai Fi Obọ Họ Kẹ Owhẹ Ru Ilele
“Wha nyai ru ilele ahwo erẹwho na kpobi.”—MATIU 28:19, NW.
1. Ona gbe oghẹrẹ uruemu vẹ o gba idibo Ọghẹnẹ jọ eva oke anwae họ nọ a re wo?
ẸSEJỌ o rẹ gba idibo Jihova họ re a wuhrẹ ona gbe uruemu nọ u re fi obọ họ kẹ ai ru oreva riẹ. Wọhọ oriruo, Abraham avọ Sera a ru epanọ Ọghẹnẹ ọ ta kẹ ae, a te no okpẹwho ọruẹriọ orọ Ọr nọ a jọ, o tẹ gwọlọ nọ a re wuhrẹ uruemu gbe ona orọ ahwo nọ a rẹ rria iwou-udhu. (Ahwo Hibru 11:8, 9, 15) Re ọ ruẹsi su emọ Izrẹl te Ẹkwotọ Eyaa na, o gwọlọ nọ Joshua o re wo udu, fi eva họ Jihova je wuhrẹ Uzi riẹ. (Joshua 1:7-9) Avro ọ riẹ hẹ, ẹzi Ọghẹnẹ o fiba ona nọ Bẹzalẹl avọ Oholiab a wo no vẹre, o soriẹ ze nọ ezae ivẹ nana a sai ro fi obọ họ evaọ ebabọ gbe ẹruorote iruo ebabọ uwou-udhu na gbe iruẹru uwou na efa.—Ọnyano 31:1-11.
2. Enọ vẹ nọ i wobọ kugbe iruo ilele-iruo na ma be te ta ẹme kpahe?
2 Ikpe buobu e ruemu no, Jesu Kristi ọ rehọ iruo jọ kẹ ilele riẹ inọ: “Wha wuhrẹ ahwo erẹwho kpobi, . . . wha wuhrẹ ai, re a ru eware kpobi nọ mẹ vuẹ owhai.” (Matiu 28:19, 20) A re kẹ ahwo-akpọ uvẹ iruo ilogbo itiena ẹdẹvo ho. Oghẹrẹ uruemu vẹ o gwọlọ nọ ohwo o re wo re ọ sai ru iruo ilele-iruo na ziezi? Ẹvẹ ma sai ro wo uruemu utioye na?
Wo Uyoyou Udidi kẹ Ọghẹnẹ
3. Didi uvẹ uwou nọ a vi omai inọ ma nyai ru ilele na o kẹ omai?
3 Re ma nya bru ahwo je ru ai vuhu oware nọ u je fo re a gọ Ọghẹnẹ uzẹme na, o gwọlọ nọ ma re wo uyoyou udidi kẹ Jihova. Emọ Izrẹl a rẹ sai dhesẹ uyoyou nọ a wo kẹ Ọghẹnẹ via ẹkwoma udu kpobi nọ a re ro koko ijaje riẹ, emamọ idhe nọ a re dhe kẹe, gbe ile nọ a re ro jiri ei. (Iziewariẹ 10:12, 13; 30:19, 20; Olezi 21:13; 96:1, 2; 138:5) Wọhọ otu nọ o bi wuhrẹ amọfa re a jọ ilele Kristi, ma re koko izi Ọghẹnẹ, je dhesẹ uyoyou nọ ma wo kẹ Jihova ẹkwoma amọfa nọ ma rẹ ta kẹ kpahe ọyomariẹ gbe ẹjiroro riẹ. U fo nọ ma rẹ ta ẹme avọ imuẹro, jẹ salọ emamọ eme nọ ma re ro dhesẹ ọwhọ nọ ma wo kpahe ẹruore nọ Ọghẹnẹ ọ kẹ omai na.—1 Ahwo Tẹsalonika 1:5; 1 Pita 3:15.
4. Fikieme o rọ jọ oware evawere kẹ Jesu re o wuhrẹ amọfa kpahe Jihova?
4 Fikinọ Jesu o wo uyoyou udidi kẹ Jihova, o jọ oware evawere ilogbo kẹe re ọ ta kẹ amọfa kpahe ẹjiroro Ọghẹnẹ, Uvie na, gbe egagọ uzẹme. (Luk 8:1; Jọn 4:23, 24, 31) Eva uzẹme, Jesu ọ ta nọ: “Emu mẹ họ oreva Ọnọ O vi omẹ ze, jegbe re me ru iruo riẹ.” (Jọn 4:34) Eme ọ okere-ilezi nana i rugba eva oma Jesu: “Mẹ gwọlọ ru orọeva ra, O Ọghẹnẹ mẹ; uzi ra o rọ udu mẹ. Mẹ ta iku evawere gbe ethathọ ra via eva ukokohọ ulogbo; ri, me ti ruru igbenu mẹ hẹ, wọhọ epanọ whọ riẹ, O, ỌNOWO.”—Olezi 40:8, 9; Ahwo Hibru 10:7-10.
5, 6. Re ohwo ọ sai wuhrẹ amọfa jọ ilele, ugogo oware vẹ o gwọlọ?
5 Ẹsejọ uyoyou nọ a wo kẹ Ọghẹnẹ gbe uzẹme Ebaibol na nọ a bi wuhrẹ, o rẹ wọ ahwo nọ a bi kurẹriẹ obọ rehọ ọwhọ vuẹ amọfa kpahe Jihova gbe Uvie na avọ imuẹro egaga te epanọ a be sai ro ru amọfa kiẹ Ikereakere na riwi kẹ omobọ rai. (Jọn 1:41) Uyoyou nọ ma wo kẹ Ọghẹnẹ họ ugogo oware nọ o be lẹliẹ omai wabọ evaọ iruo ilele-iruo na. Fikiere, joma yọrọ uyoyou yena whawha ẹkwoma Ẹme riẹ nọ ma re se je roro didi kpahe ẹsikpobi.—1 Timoti 4:6, 15; Eviavia 2:4.
6 Ababọ avro, uyoyou nọ Jesu Kristi o wo kẹ Jihova u ru nọ ọ sae rọ jọ owuhrẹ ajọwha. Rekọ orọnọ oyena ovo u ru nọ ọ rọ jọ emamọ ọtausiwoma ha. Kọ oware ofa vẹ u ru nọ Jesu ọ jẹ sai ro wo ilele?
Wo Ọdawẹ kẹ Ahwo
7, 8. Oghẹrẹ uruemu vẹ Jesu o dhesẹ kẹ ahwo?
7 Jesu o wo ọdawẹ gbe uvi isiuru kẹ ahwo. Makọ okenọ ọ jọ “osu iruo” kẹ Ọghẹnẹ evaọ obọ odhiwu, ọ jẹ hai wo evawere kpahe eware nọ i kpomahọ ahwo-akpọ. (Itẹ 8:30, 31) Nọ ọ ziọ otọakpọ, Jesu ọ jẹ re-ohrọ ahwo, onọ u ru nọ ahwo nọ a bru rie ze a je ro wo udhedhẹ. (Matiu 11:28-30) Jesu o dhesẹ oghẹrẹ uyoyou gbe ohrọoriọ Jihova, yọ onana u si ahwo uru nọ a je ro kurẹriẹ ze te gọ Ọghẹnẹ uzẹme ọvo na. Oghẹrẹ ahwo kpobi a gaviezọ kẹ Jesu fikinọ o wo ọdawẹ oyoyou kpahe ai gbe uyero rai.—Luk 7:36-50; 18:15-17; 19:1-10.
8 Nọ ọzae jọ ọ nọe oware nọ o re ru re ọ sae reuku uzuazọ ebẹdẹ bẹdẹ, “Jesu o ri yei, o te you yei.” (Mak 10:17-21) Ma se kpahe ahwo jọ nọ o wuhrẹ eva Bẹtani inọ: “Jesu o you Mata gbe oniọvo ọmọtẹ riẹ gbe Lazarọs.” (Jọn 11:1, 5) Jesu o wo ọdawẹ kẹ ahwo gaga te epanọ ọ rọ kpairoro vrẹ eriosehọ riẹ re ọ ruẹsi wuhrẹ ai. (Mak 6:30-34) Ọdawẹ odidi otiọye nọ Jesu o wo kẹ amọfa u ru nọ ọ rọ rrọ ohwo nọ amọfa a mae rehọ ulele riẹ kurẹriẹ ruọ egagọ uzẹme.
9. Wọhọ ohwo nọ o re wuhrẹ amọfa re a jọ ilele, oghẹrẹ uruemu vẹ Pọl o wo?
9 Pọl ukọ na o wo ọdawẹ ologbo kẹ ahwo nọ ọ jẹ ta usiuwoma kẹ re. Wọhọ oriruo, ọ ta kẹ ahwo nọ a zihe ruọ Ileleikristi eva obọ Tẹsalonika nọ: “Fiki epanọ ma guọlọ owhai eva uyoyou o tẹ ruọ omai nọ ma rẹ ghale ẹkẹ oma mai jọ kẹ owhai re, orọnọ eva usiuwoma Ọghẹnẹ ọvo ho, keme wha jọ obọ mai ghare hrọ.” Fiki uyoyou omolahiẹ nọ Pọl o dhesẹ kẹ ahwo Tẹsalonika na, otu rai jọ a te “kurẹriẹ bru Ọghẹnẹ ze siọ edhọ ba, te gọ Ọghẹnẹ uzuazọ” na. (1 Ahwo Tẹsalonika 1:9; 2:8) Ma te gine wo uvi ọdawẹ kẹ ahwo wọhọ epanọ Jesu avọ Pọl a ru na, ma te ruẹ nọ emamọ usi na u ti te udu ahwo nọ i wo evezi kẹ uzuazọ ebẹdẹ bẹdẹ, yọ onana o te wha evawere se omai.—Iruẹru 13:48.
Wo Ẹzi Oma-Olahiẹ
10, 11. Fikieme o jẹ gwọlọ ẹzi omolahiẹ nọ ma tẹ be daoma wuhrẹ amọfa re a zihe ruọ ilele?
10 Ahwo nọ a re wo emamọ iyẹrẹ evaọ amọfa owuhrẹ re a jọ ilele a re wo ẹzi oma-olahiẹ. A re rri efe-ole wọhọ oware nọ a rẹ rọ karo vievie he. Evaọ uzẹme, Jesu ọ ta kẹ ilele riẹ nọ: “Ẹvẹ o rẹ bẹ te re enọ i fe e ruọ uvie Ọghẹnẹ!” U gbe ilele na unu nọ a yo ẹme nana, rekọ Jesu o fibae nọ: “Emaha na, ẹvẹ o rẹ bẹ te re enọ e rọ ẹro suọ efe, a te ruọ uvie Ọghẹnẹ. O lọhọ kẹ kamẹl re o dhe uzou vrẹ eghogho ẹgwede vi ọdafe nọ ọ rẹ ruọ uvie Ọghẹnẹ.” (Mak 10:23-25) Jesu ọ jiroro kẹ ilele riẹ inọ a yeri uzuazọ olọlọhọ re a ruẹse tẹrovi iruo ilele-iruo na. (Matiu 6:22-24, 33) Fikieme ẹzi omolahiẹ u re ro fi obọ họ kẹ omai wuhrẹ amọfa zihe ruọ ilele?
11 Re ma wuhrẹ ahwo eware kpobi nọ Jesu ọ kẹ ujaje rai o gwọlọ omodawọ ulogbo. Ohwo nọ o re wuhrẹ amọfa re a jọ ilele ọ rẹ daoma ru uwuhrẹ kugbe ọmọ-uwuhrẹ Ebaibol riẹ k’oka k’oka. Re a ruẹsi duku ahwo nọ a wo isiuru vẹrẹ, iwhowho-uvie jọ a nwene no iruo nọ e rẹ rehọ oke rai kpobi no kpohọ iruo nọ a rẹ sai ru ubroke. Ileleikristi buobu a wuhrẹ ẹvẹrẹ ọfa no re a ruẹse ta usiuwoma kẹ ahwo ẹvẹrẹ ọfa nọ a rrọ ẹkwotọ rai. Ileleikristi efa a no ẹwho rai kpohọ ẹkwotọ hayo orẹwho ofa no re a ruẹsi wabọ vọvọ evaọ iruo ivuẹvu na. (Matiu 9:37, 38) Onana kpobi o gwọlọ ẹzi omolahiẹ. Rekọ re ohwo ọ sai wuhrẹ amọfa zihe ruọ ilele o gwọlọ oware ofa.
Thihakọ Rekọ Whọ Raha Oke Kufiẹ Hẹ
12, 13. Fikieme akothiho o ro wuzou gaga nọ ma te bi wuhrẹ ahwo re a zihe ruọ ilele?
12 Akothiho yọ obọdẹ oware ofa jọ nọ u re fi obọ họ kẹ omai wuhrẹ amọfa zihe ruọ ilele. Ovuẹ Uvie nọ ma bi whowho na o gwọlọ owojẹ ovẹrẹ, rekọ re a wuhrẹ ohwo zihe ruọ olele o rẹ rehọ oke jẹ gwọlọ akothiho. (1 Ahwo Kọrint 7:29) Jesu o wo odiri kẹ Jemis, oniọvo riẹ. Dedenọ Jemis ọ riẹ kpahe iruo usiuwoma ota Jesu, oware jọ o whaha e riẹ nọ o gbe ro zihe ruọ olele ẹsiẹsiẹ hẹ. (Jọn 7:5) Dede na, omoke jọ nọ Kristi o whu no, yọ taure Pẹntikọst 33 C.E. o te ti te, Jemis o zihe ruọ olele keme wọhọ epanọ Ikereakere na e ta, o wọhọ nọ o kuomagbe oni riẹ, inievo riẹ, gbe ikọ na kẹ olẹ. (Iruẹru 1:13, 14) Jemis ọ nyaharo ziezi eva abọ-ẹzi, u ru nọ o ro wo ewha-iruo ilogbo eva ukoko Ileleikristi na.—Iruẹru 15:13; 1 Ahwo Kọrint 15:7.
13 Wọhọ ọwhẹrẹ, Ileleikristi a be kọ ekakọ nọ e rẹ rehọ oke ziezi re e tẹ dhẹ—otoriẹ Ẹme Ọghẹnẹ, uyoyou kẹ Jihova, gbe ọkpọ uruemu Kristi. Onana o gwọlọ akothiho. Jemis o kere nọ: “Wha wo ithihakọ, imoni mẹ, bẹsenọ Ọnowo na ọ rẹ tha. Wha ri ọwhẹrẹ, epanọ ọ rẹ hẹrẹ ubi oghaghae otọ na, o re thihakọ kẹe bẹsenọ oso ọsosuọ avọ ọrọ urere ọ rẹ rọ kuei. Whai omarai wha wo ithihakọ re. Wha dikihẹ whawha, keme ẹtha Ọnowo na ọ kẹle ino.” (Jemis 5:7, 8) Jemis ọ jẹ ta udu họ ibe Ileleikristi riẹ awọ inọ a ‘wo ithihakọ bẹsenọ Ọnowo na ọ rẹ te tha.’ Nọ ilele na a gbe wo otoriẹ oware jọ họ, Jesu ọ jẹ hae fa otọ riẹ hayo rehọ ọtadhesẹ ru ẹme na vẹ avọ akothiho. (Matiu 13:10-23; Luk 19:11; 21:7; Iruẹru 1:6-8) Nọ ma rrọ etoke ọzino Ọnowo na, o gwọlọ nọ ma re thihakọ epọvo na re nọ ma be daoma wuhrẹ amọfa re a zihe ruọ ilele na. O gwọlọ nọ ma rẹ rọ akothiho wuhrẹ ahwo nọ a zihe ruọ ilele Jesu eva oke mai na.—Jọn 14:9.
14. Dede nọ ma re thihakọ, ẹvẹ ma sae rọ rehọ oke mai ru iruo avọ areghẹ nọ ma bi wuhrẹ amọfa re a zihe ruọ ilele na?
14 Dede nọ ma be maki thihakọ, ẹme na ọ be mọ ibi eva oma ahwo buobu nọ ma bi wuhrẹ Ebaibol kugbe he. (Matiu 13:18-23) Ma tẹ daoma bẹ evaọ obufihọ mai no, o rrọ oware areghẹ re ma whaha oke nọ ma rẹ raha fihọ ewuhrẹ ahwo otiọye na, ma vẹ gwọlọ ahwo nọ a ti se uzẹme uwuhrẹ Ebaibol na gboja. (Ọtausiwoma Na 3:1, 6) Uzẹme, o rẹ sae gwọlọ obufihọ oke krẹkri re ahwo nọ a maki wo ovuhumuo kẹ uwuhrẹ Ebaibol na dede a sai nwene eriwo, uruemu, gbe eware nọ a rọ karo evaọ uzuazọ. Fikiere ma re thihakọ, wọhọ epanọ Jesu o thihakọ kẹ ilele riẹ nọ o jọ bẹbẹ kẹ re a wuhrẹ uruemu ezi na.—Mak 9:33-37; 10:35-45.
Wo Ona Uwuhrẹ
15, 16. Fikieme oma nọ a rẹ ruẹrẹ kpahe ziezi gbe ẹme nọ a re ru lọhọ u ro wuzou nọ ma te bi wuhrẹ amọfa?
15 Uyoyou kẹ Ọghẹnẹ, ọdawẹ kẹ amọfa, ẹzi oma-olahiẹ, gbe odiri yọ eware nọ i wuzou gaga re ma sai wuhrẹ ahwo zihe ruọ ilele. U fo nọ ma re wuhrẹ ona uwuhrẹ re, keme onana u re fi obọ họ kẹ omai ru ẹme vẹ eva edhere ọlọlọhọ. Wọhọ oriruo, eme buobu nọ Owuhrẹ Ologbo na, Jesu Kristi, ọ ta i duobọte ahwo udu fikinọ o jọ lọlọhọ re a wo otọriẹ rai. Ẹsejọhọ whọ te kareghẹhọ eme Jesu jọ wọhọ: “Kọ okọ obọ odhiwu kẹ oma ra.” “Wha kẹ erakọ onọ uwoma ha.” “Ẹrẹreokie areghẹ iruo riẹ o re no via.” “Wha rehọ eware Siza kẹ Siza, re wha rehọ eware Ọghẹnẹ kẹ Ọghẹnẹ.” (Matiu 6:20; 7:6; 11:19; 22:21) Uzẹme, orọnikọ eme ekpẹkpẹe ọvo Jesu ọ ta ha. O ru eme vẹ jẹ fotọ eware buobu eva okenọ o gwọlọ ere. Ẹvẹ whọ sae rọ raro kele oghẹrẹ nọ Jesu o je ro wuhrẹ ahwo?
16 Oma oruẹrẹkpahe ziezi họ ugogo oware nọ u re fi obọ họ kẹ owhẹ wuhrẹ ohwo eva edhere ọlọlọhọ nọ o re ro wo otọriẹ ẹme na. Owhowho-uvie nọ ọ ruẹrẹ oma kpahe he, ọ rẹ ta eme buobu. Onana o rẹ sai ru nọ ugogo ẹme na ọ gbẹ rọ roma via ha fiki ubu eme riẹ, keme ọ rẹ gwọlọ ta oware kpobi nọ ọ riẹ kpahe ẹme na. Wo ohẹriẹ, owhowho-uvie nọ ọ ruẹrẹ oma kpahe ziezi o re roro kpahe ọmọ-uwuhrẹ na, roro didi kpahe uzoẹme na, jẹ tẹrovi eruvẹ eware nọ e mai wuzou ọvo. (Itẹ 15:28; 1 Ahwo Kọrint 2:1, 2) O re roro kpahe epanọ ọmọ-uwuhrẹ na ọ riẹ te no gbe oware nọ u fo nọ o re fi ẹgba họ eva uwuhrẹ na. Owhowho-uvie na ọ sae riẹ eware isiuru buobu kpahe uzoẹme na, rekọ uwuhrẹ na o rẹ mai vẹ ohwo na ẹro nọ ọ tẹ be hai dhunu te umutho jọ ọvo.
17. Ẹvẹ ma sai ro fi obọ họ kẹ ahwo roro kpahe Ikereakere na?
17 Jesu o fi obọ họ kẹ ahwo roro didi re, orọnikọ ọ jẹ hae nwane ta eware na kpobi kẹ ae ọvo ho. Wọhọ oriruo, eva ẹdẹjọ ọ nọ inọ: “Saimọn, ẹvẹ who roro? Ivie akpọ na abọ amono a je miẹ igho gbe azọhọ? Abọ emọ rai manikọ abọ erara?” (Matiu 17:25) Ẹsejọhọ oma o rẹ were omai gaga nọ ma te bi ru ẹme Ebaibol vẹ eva etoke uwuhrẹ te epanọ o rẹ rọ gwọlọ oma-oriẹsuo mi omai re ma sae kẹ ọmọ-uwuhrẹ na uvẹ ta oware nọ o riẹe eva hayo ta ẹme kpahe oware nọ ma bi wuhrẹ na. Wọhọ epanọ o rẹ jọ, u fo ho re ma nọ emọ-uwuhrẹ enọ bu hrọ. Ukpoye, ma rẹ sae rọ ona, etadhesẹ, gbe uvi enọ ro fi obọ họ kẹ ai wo otoriẹ ẹme Ikereakere nọ o rrọ obe uwuhrẹ Ebaibol na.
18. Re ohwo ọ jọ ‘emamọ owuhrẹ’ eme o gwọlọ?
18 Ikereakere na e ta ẹme kpahe “emamọ uwuhrẹ.” (2 Timoti 4:2; Taitọs 1:9) Oghẹrẹ ona uwuhrẹ utioye na u vi obọ nọ ma re fihọ kẹ ohwo fi eware nọ o wuhrẹ họ uzou ọvo. U fo re ma daoma fi obọ họ kẹ ọmọ-uwuhrẹ vuhu ohẹriẹ nọ o rrọ uzẹme gbe ọrue, uwoma gbe uyoma, areghẹ gbe ugheghẹ. Nọ ma bi ru onana jẹ be daoma ru ọmọ-uwuhrẹ na wo uyoyou kẹ Jihova na, ẹsejọhọ ọ te ruẹ oware nọ u je fo nọ o re yo ẹme kẹe.
Rọ Ajọwha Ru Iruo Ilele-Iruo Na
19. Ẹvẹ Ileleikristi kpobi a bi ro wobọ evaọ ewuhrẹ ahwo nọ a bi zihe ruọ ilele?
19 Ukoko Ileleikristi na yọ ukoko nọ u re wuhrẹ ahwo re a zihe ruọ ilele. Nọ ohwo ọkpokpọ o te zihe ruọ olele, orọnikọ omọvo Osẹri Jihova nọ o duku ohwo na je fi obọ họ kẹe wuhrẹ oware nọ Ebaibol na o gine wuhrẹ ọvo o wo ẹjiroro nọ ọ rẹ rọ ghọghọ họ. Wọhọ oriruo, nọ ogbotu ahwo a tẹ ruọ otafe nyae gwọlọ ọmọ nọ o vru, ẹsejọhọ ọmọvo evaọ utu na o re duku ọmọ na. Rekọ nọ a tẹ rehọ ọmọ na se ọsẹgboni riẹ no, ahwo kpobi nọ a nyae gwọlọ ọmọ na a rẹ ghọghọ kugbe. (Luk 15:6, 7) Epọvo na, re a wuhrẹ ohwo zihe ruọ olele yọ iruo ukoko na soso. Ileleikristi kpobi nọ e rrọ ukoko na a bi wobọ evaọ ẹgwọlọ ahwo nọ a ti zihe ruọ ilele Jesu. Yọ ohwo ọkpokpọ o te mu uwuhrẹ họ ẹnyaze evaọ obọ Ọgwa Uvie no, Oleleikristi kpobi nọ ọ ziọ ewuhrẹ o bi kuobọgbe fi obọ họ kẹ ohwo na wo ovuhumuo kẹ egagọ uzẹme. (1 Ahwo Kọrint 14:24, 25) Fikiere, Ileleikristi kpobi a rẹ sae ghọghọ inọ ma bi wo ẹvi ọrọ ahwo ọkpokpọ buobu nọ a bi zihe ruọ ilele kukpe kukpe.
20. Eme u fo nọ who re ru nọ whọ tẹ gwọlọ wuhrẹ amọfa uzẹme Ebaibol na?
20 Oma o rẹ were Ileleikristi buobu re a fi obọ họ kẹ omọfa riẹ Jihova gbe egagọ uzẹme. Dede na, ghelọ epanọ a daoma te kẹhẹ, ẹsejọhọ a re sai fi obọ họ kẹ ohwo ọvo jẹ egagọ uzẹme rehọ họ. Otẹrọnọ ere o rrọ kẹ owhẹ, gbẹ hai ru uyoyou ra kẹ Jihova ga, wo ọdawẹ kẹ ahwo, wo ẹzi oma-olahiẹ, thihakọ, re who je ru ona uwuhrẹ ra woma viere. Onọ o mae rro, hae lẹ se Ọghẹnẹ kpahe isiuru nọ whọ gwọlọ ro wuhrẹ amọfa uzẹme na. (Ọtausiwoma Na 11:1) Jọ u mu owhẹ ẹro inọ oware kpobi nọ who bi ru evaọ egagọ Jihova o be zọhọ fihọ iruo ilele-iruo nọ e be kẹ Ọghẹnẹ oruaro na.
Kọ Whọ Sae k’Iyo Enọ Nana Vevẹ?
• Fikieme iruo nọ ma bi ro wuhrẹ amọfa na u bi ro fi uyoyou nọ ma wo kẹ Ọghẹnẹ họ odawọ?
• Uruemu vẹ o gwọlọ nọ ohwo nọ o re wuhrẹ amọfa re a jọ ilele o re wo?
• Re ohwo ọ jọ ‘emamọ owuhrẹ’ eme o gwọlọ?
[Uwoho nọ o rrọ ẹwẹ-obe avọ 20]
Ileleikristi a re dhesẹ uyoyou udidi nọ a wo kẹ Ọghẹnẹ via ẹkwoma amọfa nọ a re wuhrẹ re a jọ ilele
[Uwoho nọ o rrọ ẹwẹ-obe avọ 22]
Eme o rọ gwọlọ nọ ohwo nọ o bi wuhrẹ ahwo re a jọ ilele o re wo isiuru kpahe amọfa?
[Uwoho nọ o rrọ ẹwẹ-obe avọ 23]
Uruemu-aghae jọ vẹ o gwọlọ nọ ahwo nọ a re wuhrẹ amọfa re a jọ ilele a re wo?
[Uwoho nọ o rrọ ẹwẹ-obe avọ 24]
Oma o rẹ were Ileleikristi kpobi nọ emamọ iyẹrẹ i te bi no iruo nọ ma bi ro wuhrẹ amọfa ze