Si Kẹle Ọghẹnẹ
Ọsẹ nọ O Wo Ibe He
“ỌSẸ.” Eme nọ e rẹ dhẹ ruọ ohwo oma te ẹme ọnana i bu hu. Ọsẹ nọ o gine you emọ riẹ o re fi obọ họ kẹ ae yeri emamọ uzuazọ. Oyejabọ nọ Ebaibol i ro se Jihova Ọghẹnẹ “Ọsẹ.” (Matiu 6:9) Oghẹrẹ ọsẹ vẹ Jihova ọ rrọ? Re ma sae kẹ uyo na, joma kiẹ eme nọ Jihova ọ ta kẹ Jesu evaọ okenọ ọ rọ họ-ame. Ẹhẹ, oghẹrẹ nọ ọsẹ ọ rẹ rọ ta ẹme kẹ emọ riẹ u re dhesẹ oghẹrẹ ọsẹ nọ ọ rrọ.
Oware wọhọ October 29 C.E., Jesu o kpohọ Ethẹ Jọdan nyae họ-ame. Ebaibol e vuẹ omai oware nọ o via: “Nọ [a] họ Jesu ame no, Ọ tẹ nwane va no ame ze, koyehọ ihru i rovie, ọ tẹ ruẹ Ẹzi Ọghẹnẹ nọ Ọ be tha wọhọ erueruẹ, o te kiemu uzou riẹ; koyehọ uru jọ u no ehru ze nọ, ‘Ọnana họ Ọmọ oyoyou mẹ, ọnọ ọ were omẹ hrọ.’”a (Matiu 3:16, 17) Eme nana nọ e rẹ sasa ohwo udu nọ Jihova ọ ta na i dhesẹ oghẹrẹ Ọsẹ nọ ọ rrọ kẹ omai. Muẹrohọ eware esa nọ Jihova ọ ta kẹ Ọmọ riẹ na.
Orọ ọsosuọ, ẹkwoma eme na, ‘Ọnana họ Ọmọ mẹ,’ Jihova ọ be ta nọ, ‘Oma o be were omẹ nọ mẹ rọ rrọ Ọsẹ ra.’ Emamọ ọsẹ ọ rẹ rọ ẹro te emọ riẹ je ru ai riẹ inọ o rri rai ghaghae. U fo re a hai ru emọ riẹ ẹsikpobi inọ a se rai gb’ahwo evaọ uviuwou. Dede nọ ọ gbẹ jọ ọmaha evaọ oke yena ha, dai roro epanọ o were Jesu te nọ Ọsẹ riẹ o dhesẹ kẹe inọ o rri rie ghaghae!
Orọ avivẹ, ẹkwoma Ọmọ riẹ nọ o se “oyoyou mẹ,” Jihova ọ ta via inọ o gine you Jesu. Koyehọ Ọsẹ na ọ be ta nọ, ‘Me you owhẹ.’ Emamọ Ọsẹ ọ rẹ ta kẹ emọ riẹ inọ o gine you rai, inọ a rrọ ghaghae kẹe. Eme itieyena—avọ uyoyou nọ o re dhesẹ via—u re fi obọ họ kẹ emọ riẹ wereva ziezi. U gine duobọte Jesu udu nọ o yo urru Ọsẹ riẹ nọ ọ be ta kẹe epanọ o you rie te!
Orọ avesa, ẹkwoma ẹme na, “Ọnọ ọ were omẹ hrọ,” Jihova o dhesẹ nọ ọ jẹ eware nọ Ọmọ riẹ o ru rehọ. O wọhọ ẹsenọ Jihova ọ be ta nọ, ‘Mọmẹ, eware nọ who ru e were omẹ eva thesiwa.’ Ọsẹ oyoyou ọ rẹ rehọ uvẹ kpobi vuẹ emọ riẹ inọ eme iwoma rai gbe eware iwoma nọ a bi ru e be were iẹe. Nọ ọsẹgboni a tẹ be hai jiri emọ rai, onana o rẹ kẹ emọ na uduotahawọ gbe ẹgba. U muẹro nọ o kẹ Jesu uduotahawọ gaga nọ ọ riẹ inọ eva riẹ e be were Ọsẹ riẹ!
Uzẹme, Jihova yọ Ọsẹ nọ o wo ibe he. Kọ whọ gwọlọ wo oghẹrẹ ọsẹ otiọye na? O tẹ rrọ ere, eva e te were owhẹ re whọ riẹ inọ Jihova ọ sae jọ oghẹrẹ ọsẹ otiọye kẹ owhẹ. Who te bi wuhrẹ kpahe iẹe je fi ẹrọwọ họ ẹme riẹ, jẹ be daoma rehọ eva ra kpobi ru oreva riẹ, o ti dede owhẹ rehọ. Ebaibol e ta nọ: “Bigba Ọghẹnẹ o re ti bigba owhẹ.” (Jemis 4:8) Eme ọ rẹ kẹ ohwo ududhomẹ avọ omofọwẹ vi usu okpekpe nọ who re wo kugbe Jihova Ọghẹnẹ, Ọsẹ owoma nọ a rẹ ruẹ obọ riẹ hẹ na?
[Oruvẹ-obotọ]
a Wọhọ epanọ Luk o kere iku evona evaọ obe riẹ, Jihova ọ ta ẹme na kẹ Jesu dẹẹ, inọ: ‘Whẹ họ Ọmọ oyoyou mẹ, whọ were omẹ hrọ.’—Luk 3:22.